Bin utʼil ya ata te smelelil relijione

Teme ya akʼan awamikoin te Diose, ya skʼan ayat ta relijion te jaʼ lek ilbil yuʼun te Diose. Te Jesus la yal “te smelelil chʼuunjeletik” yame xchʼuunik te Dios sok ta “melel” (Juan 4:23, 24, NM). Jaʼnax ay jun te bin utʼil lek ya yichʼ chʼuunel te Diose (Efesios 4:4-6). Te smelelil relijione jaʼ ya yikʼat bael ta kuxinel sbajtʼelkʼinal, yan te lotil relijione ya yikʼat bael ta lajel (Mateo 7:13, 14).

Ya xjuʼ anaʼ banti ay te smelelil relijione, teme ya awil bin utʼil ya xkuxinik te machʼatik tey-a. Jich bitʼil lek te Jeobae, ya skʼan lekik euk te smelelil chʼuunjeletik yuʼune. Jich bitʼil wol lekil steʼel alaxax (narax) te ya yakʼ lekil alaxaxetik (naraxetik), jich euk te smelelil relijion ya spas lekil kristianoetik (Mateo 7:15-20).

Te yamikotak te Jeobae bayal ya yichʼik ta mukʼ te Bibliae. Snaʼojik te jaʼ yuʼun Dios te Bibliae. Jaʼ yuʼun, ya stuuntesik ta stojtesel te xkuxlejalike, ta xchapel te kʼop yuʼunike, sok bitʼil koltayel yuʼun ya snopbeyik skʼoplal te Diose (2 Timoteo 3:16). Jaʼnix jich, ya spasik tulan ta spasel ta xkuxlejalik te bina ya spukik ta alele.

Te yamikotak te Jeobae ya xkʼux otʼantay sbaik. Te Jesuse la yakʼ ta ilel te xkʼuxul yotʼan ta stojol te kristianoetik, kʼalal la spʼijuʼbtes ta swenta Dios sok la slekuʼbtes te jchameletike. Te machʼatik ayik ta smelelil relijione, jichnix euk kʼux ta yotʼanik te yantik kristianoetike. Maʼba ya yilayik te machʼatik meʼbajetike, te yantik stsʼumbalike sok te yantik slumalike, jich bitʼil la spas te Jesuse. Te Jesus la yal teme ya xkʼux otʼantay sbaik te nopojeletik yuʼune, jichme ya snaik-a te kristianoetike (Juan 13:35).

Te yamikotak te Diose ya yichʼbeyik ta mukʼ te sbiile: Jeoba. Teme ay machʼa ma skʼan stuuntesbat te abiile, ¿jaʼbal lekil awamiko abi? Maʼuk. Kʼalal ay kamikotike, ya kalbeytik te sbiile sok lek ya xkʼopojotik ta stojol sok yantik. Jaʼ yuʼun, te machʼatik ya skʼanik yamikoinik te Diose, ya skʼan ya stuuntesbeyik te sbiile sok ya xkʼopojik sok yantik kristianoetik ta swenta te Diose. Te Jeoba ya skʼan te jich ya jpastike (Mateo 6:9; Romanos 10:13, 14).

Jich bitʼil te Jesuse, te yamikotak te Diose ya spʼijuʼbtesik te kristianoetik ta swenta te sReino te Diose. Te sReino te Dios jaʼ te ajwalil ta chʼulchan te ya spas ta jun paraiso te Balumilale. Te yamikotak te Dios ya yakʼik ta naʼel ta stojol yantik kristianoetik te lekil yachʼil kʼopetik yuʼun te sReino te Diose (Mateo 24:14).

Te stestikotak te Jeoba ya spasik tulan yuʼun ya yamikoinik te Diose. Ya yichʼik ta mukʼ te Biblia sok ya xkʼux otʼantay sbaik. Jichnix euk, ya stuuntesik sok ya yichʼik ta mukʼ te sbiil te Diose sok ya spʼijuʼbtesik te kristianoetik ta swenta te sReino te Diose. Ta yoʼtik ini, te stestikotak te Jeoba, jaʼik te smelelil relijione.