Te Jesús jaʼ bayalxan yuʼel te bitʼil te pukujetike

¿YATOBAL xjul ta awoʼtan bin yuʼun jtul chʼul-abat yuʼun Dios kʼatpʼuj ta Satanás?... Ay sbikʼtal yoʼtan-a sok la skʼan te ya x-ichʼot ta mukʼe; jaʼ yuʼun la skontrain te Diose. ¿Aybal yantik chʼul-abatetik te la stʼunik te Satanase?... Ay. Te Biblia ya yalbey skʼoplal te jaʼ ‹j-abatetik yuʼun Satanás›, o pukujetik (Apocalipsis 12:9).

¿Yabal schʼuunik te ay Dios te chopol chʼul-abatetik ini?... Te Biblia ya yal ‹te schʼuunej te ay Dios pukujetike› (Santiago 2:19). Pero ta ora ini ayik ta xiwel, melel snaʼojik te ya yichʼik castigo yuʼun te bintik ma lek spasojike. ¿Bintik-a?...

Te Biblia ya yal te chʼul-abatetik-abi la yijkitayik te chʼulchan, koik tal ta Balumilal yuʼun ya xkuxinik sok te ants winiketik. Jich la spasik ta skaj te la skʼan la sjokinik ta wayel te tʼujbil antsetik ta Balumilal (Génesis 6:1, 2; Judas 6). ¿Bin ya anaʼ ta swenta te ya sjokin sbaik ta wayel jtul ants sok jtul winik?...

Kʼalal jtul ants sok jtul winik ya sjokin sbaik ta wayel, te ants ya xjuʼ ya sta alal te ya xchʼi bael ta schʼujt. Te Dios ya skʼan te jaʼnax ya xjuʼ ya sjokin sbaik ta wayel te machʼatik nujpunemike. Jich yuʼun te kʼalal ya x-ayin te alale, ya yichʼ kanantayel yuʼun te mamalalil sok te inamile. Pero te chʼul-abatetik ma albilik yuʼun te Dios te ya xjuʼ ya sjokinik ta wayel jtul ants.

Te kʼalal te chʼul-abatetik la skʼatpʼun sbaik ta winiketik, la sjokinik ta wayel te antsetik, jich la sta yal snichʼnabik te kʼax toyolike. Kʼax ma lek stalelik sok ya yutsʼinik te ants winiketik. Jaʼ yuʼun te Dios la stikun tal jun pulemal —o nojel jaʼ— yuʼun ya slajinlan te toyol ants winiketik-abi sok te machʼatik ma lek stalelike. Pero te Dios la yalbey te Noé te akʼa spas jun arca, o jun mukʼul barco, yuʼun ya xkol-a te ants winiketik te yakik ta spasel te bin leke. Te Jesús te jaʼ Lekil Jpʼijubteswanej la yal te kʼax mukʼ skʼoplal te ya jnaʼulantik te bin kʼot ta pasel ta yorail te Pulemale (Génesis 6:3, 4, 13, 14; Lucas 17:26, 27).

¿Yabal anaʼ bin la spasik te chopol chʼul-abatetik kʼalal tal te Pulemale?... La yijkitayik jilel te sbakʼetalik sok chaʼsujtik bael ta chʼulchan. Pero ma kʼotikix ta chʼul-abatetik yuʼun te Dios, jaʼ kʼotik ta j-abatetik yuʼun Satanás. Pero, ¿bin kʼot ta stojolik te yal snichʼnabik te jaʼik te toyol winiketike?... Lajik ta Pulemal sok spisil te machʼatik ma la schʼuunbeyik skʼop te Diose.

Kʼalal kʼaxemix-a te Pulemale, te Dios maʼyuk bin-ora la yakʼix te ya skʼatpʼun sbaik ta sbakʼetal winiketik te pukujetik-abi. Manchukme maba ya kiltik te pukujetik, yakik ta spasel tulan yuʼun ya stijbeyik yoʼtan te ants winiketik ta spasel te bin ma leke. Ta ora ini bayal wokol yakʼojik, melel yichʼojik chʼojel koel tal ta Balumilal.

¿Yabal anaʼ bin yuʼun ma xjuʼ ya kiltik te pukujetike?... Jaʼ yuʼun te espirituetike. Pero, jnaʼojtik ta lek te yuʼun-nanix ayik-ae. Te Biblia ya yal te Satanás sok te pukujetik yuʼune ‹yakik ta sloʼlayel spisil te ants winiketik ta swolol Balumilal› (Apocalipsis 12:9, 12).

¿Yabal xjuʼ ya sloʼlayotik-euk te Satanás sok te pukujetik yuʼune?... Yak teme maba ya jkanantay jbatike. Pero ma skʼan ya jxiʼtik. Te Jesús la yal: ‹Te Satanás maʼyuk bin ya xjuʼ spasbon›. Teme nopol ya kakʼ jbatik ta stojol te Dios, jaʼme ya skanantayotik ta stojol te Satanás sok te pukujetik yuʼune (Juan 14:30).

Mukʼ skʼoplal te ya jnaʼtik bintik-a te ya skʼanik te pukujetik te ya jpastik. Jich yuʼun nopa awaʼiy: ¿bintik ma lek la spasik te pukujetik te kʼalal xtalukik ta Balumilale?... Kʼalal mato xtal-a te Pulemale, la sjokin sbaik ta wayel sok te antsetik, te ma jichuk yaloj-a te Diose. Ta ora ini, te pukujetik ya x-akʼbot stseʼelil yoʼtanik kʼalal te ants winiketik ya skʼaxuntayik te leyetik yuʼun te Dios ta swenta te ya sjokin sbaik ta wayel jtul ants sok jtul winik. Kiltik teme yato xjul ta awoʼtane: ¿machʼatiknax-a te ya xjuʼ ya sjokin sbaik ta wayele?... Jichnix-a, jaʼnax te machʼa nujpunemike.

Ta kʼajkʼal ini ay achʼix keremetik te ya sjokin sbaik ta wayel, pero maba lek te jich ya spasike. Te Biblia ya yalbey skʼoplal te skʼunil sbakʼetal te winike (Levítico 15:1-3). Jaʼnix jich ya yalbey skʼoplal te skʼunil sbakʼetal te antse. Te Jehová jich la spas te winik sok te antse yuʼun jich ya smulanik-a te ya sjokin sbaik ta wayele, pero jaʼnax teme nujpunemike. Te pukujetik lek ya yilik kʼalal te ants winiketik ya skʼaxuntaybeyik smantal te Jehovae, jich bitʼil kʼalal jtul chʼin achʼix sok jtul chʼin kerem ya spikbey sbaik te skʼunil sbakʼetalike. ¿Melel te ma jkʼantik spasel te bin ya smulanik te pukujetike?...

Ay yanxan te bin ya smulan te pukujetike, pero ma smulan stukel te Jehová. ¿Yabal anaʼ bin-a?... Jaʼ te utsʼinwanej (Salmo 11:5). Te machʼa ya x-utsʼinwan ma lek ya yakʼ ta ilel stalel sok ya yejchentes te yantike. Ayuk ta awoʼtan te jaʼ jich la spasik te toyol winiketik, te jaʼik te yal snichʼnab te pukujetike.

Te pukujetik jaʼnix jich ya smulanik xiwtesel te ants winiketik. Jaʼ ya skuy sbaik-a te ants winiketik te lajemikix sok ya skʼayinik te bitʼil ya xkʼopojike. Jich ya sloʼlayik te ants winiketik yuʼun ya schʼuunik te kuxulikto te machʼatik lajemikixe sok te ya xjuʼ ya xkʼopojik soke. Jaʼ yuʼun ay bayal ants winiketik ya schʼuunik te ay bintik ya yilik te ya xiwtesotik yuʼune.

Jaʼ yuʼun ya skʼan ya jkanantay jbatik yuʼun ma sloʼlayotik-a te Satanás sok te pukujetik yuʼune. Te Biblia jich ya yalbotik: ‹Te Satanás ya skuy sba ta lekil chʼul-abat, jaʼnix jich ya spasik-euk te j-abatetik yuʼune› (2 Corintios 11:14, 15). Pero ta smelelil, kʼax chopolik te pukujetike. Kiltik bintik ya xjuʼ ya stuuntesik yuʼun ya jkʼayinbeytik te stalelike.

¿Banti ya snopik te ants winiketik te majtamba, te ya sjokin sbaik ta wayel te ants sok te winik, te chʼulelaletik sok yantikxan?... ¿Mabal jichuk te ya snopik ta televisión, ta videojuegoetik, ta Internet sok ta libroetik? ¿Yabal yakʼ xnoptsajotikxan ta stojol te Dios spisil ini, o jaʼbal ya yakʼ xnoptsajotik ta stojol te Satanás sok te pukujetik yuʼune? ¿Bin ya awal te jaʼate?...

¿Machʼatik-a te ya skʼanik te ya kaʼiytik sok te ya kiltik te bintik chopole?... Jaʼ te Satanás sok te pukujetik yuʼune. Jaʼ yuʼun, ¿bin ya skʼan ya jpastik?... Ya skʼan ya jkʼopontik, ya kaʼiytik sok ya kiltik te bintik ya xtuun kuʼuntik sok te ya skoltayotik yuʼun ya x-abatinotik ta stojol te Jehová. ¿Yabal xjul ta awoʼtan bintik-a?...

Teme ya jpastik te bin leke, maba ya jxiʼtik te pukujetike, melel te Jesús jaʼ bayalxan yuʼel. Ta jun buelta, te pukujetik la sjojkʼoybeyik te Jesús: ‹¿Yuʼunbal tal alajinotik?› (Marcos 1:24). ¿Mabal yakʼbotik stseʼelil koʼtantik kʼalal te Jesús ya slajin te Satanás sok te pukujetik yuʼune?... Jnaʼojtik te ya xbajt skanantayotik te Jesús teme nopol ya kakʼ jbatik ta stojol sok ta stojol te Jehová te ay ta chʼulchan.