Te Job jun yoʼtan ya yakʼ sba

¿YABAL xjuʼ yuʼunik te j-abatetik yuʼun Dios te jun yoʼtan ya yakʼ sbaik te kʼalal ya staik tulan wokolile, manchukme maʼyuk skʼoplal yilel te jun yoʼtan ya yakʼ sbaike? Ay jtul winik te Job sbiil te jich la yakʼ ta ilele. Kiltik te bin kʼot ta pasele.

Kʼalal ayik ta kuxinel te israeletik ta Egipto, te Job ay bin yutoj sba sok te Abrahán te kuxin ta skʼinal Arabia te jich sbiil ta ora ini. Ay jun kʼajkʼal te Jehová la stsob tal te chʼul abatetik ta chʼulchan, jaʼnix jich kʼot tey-a te Satanase. Te Jehová la yalbey lek skʼoplal te Job ta stojol spisil te machʼatik stsoboj sbaik tey-ae, la yal te maʼyuk machʼa ya xpajot yuʼun te bitʼil jun yoʼtan yakʼoj sbae, jich te Jehová la yakʼ ta ilel te ay smukʼul yoʼtan ta stojol te Jobe. Jaʼukmeto, te Satanás la slebey smul te Job te kʼalal la yal te jaʼnax yakʼoj sba ta abatinel ta stojol Dios yuʼun te ay bintik lek akʼbil yuʼun sok te lek kanantaybil yuʼune. La yal ta jamal te yakuk yichʼ pojbeyel spisil te bintik ay yuʼun jichla ya yijkʼitay xchʼuunel te Diose.

Te Dios la yakʼ te yakuk xpojbot yuʼun te Pukuj te bintik ay yuʼun te Job, te xnichʼnab sok ta patil akʼbot kʼael chin ta sbakʼetal. Te Job ma snaʼ te jaʼ yak ta akʼbeyel swokol yuʼun te Pukuje, jich yuʼun ma xkʼot ta yoʼtan te bin yuʼun te yak ta kʼaxel swokole. Manchukme jich kʼax swokol, maʼyuk bin ora la yijkʼitay te Diose.

Ta patil tal ta ulaʼtayel yuʼun oxtul winiketik te skuyoj sbaik ta yamigo te Jobe, te jajchik ta sjultesbeyel yoʼtan ta skʼopik, spisil te bin la yalik tsʼibaybil jilel ta Biblia ta sjun Job. Albotik yuʼun te yamigotak te ayla smukoj smul jich yuʼun la yalik te jaʼla yak ta akʼbeyel castigo yuʼun te Diose. Jaʼnix jich la yalik te ma la ayuk skʼoplal ta yoʼtan te Dios te j-abatetik yuʼune, sok te ma la xyakʼ smukʼul yoʼtan ta stojolike. Jaʼukmeto, te Job ma la yichʼ ta mukʼ te bintik la yichʼ albeyel yuʼun te yamigotak sok la yaltiklambey ta jamal te jun yoʼtan ya yakʼ sba ta stojol Dios jaʼto te kʼalal ya xlaje.

Manchukme jich la yal te Jobe, te bin ma lek la snop jaʼ te la smel bayal yoʼtan yuʼun ta skoltayel sba te bitʼil maʼyuk muken mulil spasoje. Te Elihú te jaʼ pekʼelxan yaʼbilale, la xchʼam yaʼiy spisil te bintik la yichʼ alele, jich yuʼun la stojobtes te Job te bitʼil jaʼnax bajtʼ ta yoʼtan skoltayel sba te bitʼil ma jaʼuk la yakʼ ta ichʼel ta mukʼ sbiil te Jehová sok te bitʼil ya xmantalaje. Jaʼnix jich te Elihú la yakʼbey tulan tsitsel te machʼatik skuyoj sbaik ta yamigotak te Jobe.

Ta patil te Jehová la stojobtes te Job kʼalal la yakʼbey yil te bintik pastiklambil yuʼune, jich la yakʼbey snaʼ te jaʼ kʼax toyolxan stukel ta stojol te ants winiketike. Te Job la yakʼ ta ilel te pekʼel yoʼtan sok la xchʼuun te tojobtesele. Te Jehová te «bayal ya xkʼuxultaywan sok ya snaʼbotik yoʼbolil jbatik», la slekubtes te Job sok la yakʼbeyxan skʼulejal cheb buelta te bitʼil ta nailtoe sok la staxan lajuntul xnichʼnab (Santiago 5:11). Te Job la yakʼ ta ilel ta stojol te Satanás te juʼ yuʼun te jun yoʼtan la yakʼ sbae sok la yakʼ ta ilel te ya xjuʼ yuʼun te ants winiketik te jun yoʼtan ya yakʼ sbaik ta stojol Dios manchukme ya xtal tulan wokolil ta stojolik.

(Lokʼem ta sjun Job.)