¿Bintik lekilal ya ata te banti ya jtsob jbakotike?

Ay bayal ta jtul ants winiketik te yijkʼitayojix ta stsobel sbaik ta sreligionik ta skaj te ma stabeyik sujtib te jojkʼoyeletik te kʼax tulan skʼoplal ta jkuxlejaltike sok ma sta smukʼul kʼinal yaʼiyik. Jaʼ yuʼun, ¿bin yuʼun te ya skʼan ya xbaat ta tsoblejetik yuʼun te stestigotak te Jehovae? ¿Bintik lekilal ya xjuʼ ya ata tey-a?

Yame ata sbujtsʼ awoʼtan te kʼalal ya ajokin aba sok te machʼatik ay skʼuxul yoʼtanike. Te jchʼuunjeletik yuʼun Cristo ta sbabial sigloe chajpambilik ta lek ta jujuntsojb-a sok la stsob sbaik ta yichʼel ta mukʼ te Diose, ta snopel te sJun Dios sok talel kʼaxel la smukʼubtesbey sba kʼinal yaʼiyik (Hebreos 10:24, 25). Te kʼalal junax stsoboj sbaik sok te yermanotakik te pajal kʼux la yaʼiy sbaike, jich junax yoʼtan sbaik-a (2 Tesalonicenses 1:3; 3 Juan 14). Jaʼnix jich ta ora ini jaʼ jkʼayinojkotik te bitʼil la spasike, jich ya jtakotik tseʼel oʼtanil euk.

Yame ata lekilal te kʼalal ya apas ta akuxlejal te mantaliletik yuʼun te Bibliae. Jich bitʼil te ya yalbey skʼoplal te Biblia ta swenta te bin la spasik te winiketik, antsetik sok te alaletik ta nameye, jaʼnix jich ya jpaskotik euk, melel ya jtsob jbakotik ta schʼamel te bin ya yalik te machʼatik pʼijubtesbilik ta lek yuʼun ya skoltayonkotik ta snaʼbeyel swentail te bin utʼil ta pasel ta jkuxlejaltik ta jujun kʼajkʼal te mantaliletik te ay ta Bibliae (Deuteronomio 31:12; Nehemías 8:8). Spisil te machʼatik ya xtalik ta tsobleje ya xjuʼ ya yakʼbeyik sujtib te bintik ya yichʼ jojkʼoyel sok skʼayojtayel kʼayojetik, ta swenta ini jich ya kakʼtik ta naʼel te bin ya jmaliytik ta swenta te Diose (Hebreos 10:23).

Yame ata utsilal te kʼalal ya sta yip schʼuunel awoʼtan ta stojol te Diose. Te jpuk kʼop Pablo jich la stsʼibay ta stojol te jtsojb jchʼuunjeletik ta skʼajkʼalel-ae: «Coʼtanuc ya quilex scuenta yuʼun [...] te pajal ya yichʼ yip coʼtantic te bin utʼil pajal ay schʼuhunel coʼtantique» (Romanos 1:11, 12). Te kʼalal ya jtsob jbatik sok te hermanoetik ta jujun tsobleje, jich ya yichʼxan yip schʼuunel koʼtantik soknix jich ya jpastik ta jkuxlejaltik te mantaliletik te jnopojtik ta Bibliae.

¿Bin yuʼun ma xbaat ta tsoblej ta yan semana yuʼun jaʼatnix ya awil te bitʼil ya yichʼ pasele? Kʼax tseʼelme koʼtankotik yuʼun teme kʼoate. Te tsoblejetike maba tojbil sok maʼyuk machʼa ya xkʼax skʼambat takʼin tey-a.

• ¿Machʼatik jkʼayinojbeykotik te bitʼil ya yichʼ pasel te tsoblejetik kuʼunkotike?

• ¿Bintik lekilal ya yakʼbotik te tsoblejetike?