Jun templo ta stojol Jehová

Kʼalal och ta ajwalil te Salomón ta Israel, jich jojkʼoybot yuʼun te Jehová: “¿Bin ya akʼan ya kakʼbat?”. Te Salomón jich la sut: “Keremonto sok mato jnaʼ lek spasel te aʼtelile. Awokoluk, akʼbon jpʼijil swenta ya jkanantay te lum awuʼune”. Jich albot yuʼun Jehová: “Jich bitʼil la akʼan apʼijil, ya kakʼ te bayal apʼijil ya xkʼoat ta swolol Balumilal. Jaʼnix jich ya kakʼbat akʼulejal sok bayal jaʼbil ya xkuxinat teme ya achʼuunbon te jkʼope”.

Te Salomón kaj spas te temploe. La stuuntes oro, plata, teʼetik sok lekil tonetik. Spisil kʼax lek te bintik la yichʼ tuuntesele. Bayal ta mil winiketik sok antsetik aʼtejik ta spasel te templo. Ta jukeb jaʼbil juʼ ta pasel te temploe. Kʼot yorail te la yichʼ akʼel ta stojol te Jehová, jich yuʼun la yakʼik majtʼaniletik ta sba te skajtijib chikʼbil majtʼanile. Te Salomón la skejan sba ta stojol te skajtijib chikʼbil majtʼanil sok jich la skʼopon te Dios: “Jehová, te jaʼate jaʼ snujpʼ te ya awichʼ akʼbeyel jun templo te mukʼxan sok te tʼujbilxan te bitʼil ini. Pero awokoluk, ichʼa ta wenta te bitʼil ya kichʼatkotik ta mukʼ sok te bitʼil ya jkʼoponatkotike”. ¿Bin ya awal te jaʼate? ¿Labal smulan Jehová te temploe? ¿Aʼiybotbal skʼop te Salomone? Te kʼalal laj yoʼtan ta skʼoponel te Jehová ko tal kʼajkʼ ta chʼulchan sok la schikʼ te majtʼanile. Jich la yakʼ ta ilel Jehová te la smulan te temploe. Kʼalal la yilik te israeletik-abi tseʼelnax yoʼtanik yuʼun.

Te ajwalil Salomón la yichʼ naʼbeyel sba ta spamal lum Israel sok ta yantikxan lumetik te namal ayik ta skaj te spʼijile. Te ants winiketik ya xbajtʼ yulaʼtayik swenta ya skʼanbeyik koltayel yuʼun te swokolike. Jaʼnix jich te ajwalil ants yuʼun Sabá (Seba) la yulaʼtay yuʼun ya stsajtay sok chujkʼul jojkʼoyeletik. Kʼalal la yaʼiy stojol te bitʼil la sut te Salomone, jich la yal: “Ta sjajchibal ma la jchʼuun te bin la yalbonike, pero ta ora ini ya kil te yuʼun-nix bayal apʼijil-ae, kʼaxemtoxan-a te bitʼil la yalbonike. Te Jehová Dios awuʼun bayal yakʼojbat bendision”. Te kuxlejalil ta Israel kʼax tʼujbil-a, tseʼel yoʼtanik-a te ants winiketike. Pero oranax jelon te skuxlejalike.