Te Jesús la slokʼes ta templo te jchonbajeletik

Ta yuilal bael yuʼun abril ta jaʼbil 30, te Jesús bajtʼ ta Jerusalén. Bayal ants winiketik kʼoemik ta lum-abi ta spasel te kʼin Pascua. Ta kʼin-abi ya yakʼik chikʼbil majtʼaniletik ta templo. Ay machʼatik la yikʼik bael schambalamik, pero ay machʼatik ya smanik ta Jerusalén.

Kʼalal kʼot ta templo te Jesuse, la yil te ay machʼatik yakik ta schonel chambalametik tey-a. ¡Yakik ta chonbajel ta mero sna te Jehovae! ¿Bin la spas te Jesuse? La spas jun chikote ta chʼajan jich la slokʼeslan te tuminchijetik sok te wakaxetik ta templo. Jaʼnix jich la skotpʼin te mesaetik yuʼun te machʼatik ya sjelik takʼin, spisil busul kʼoel ta lum te takʼine. Te Jesús la yaltiklanbey te machʼatik yakik ta schonel te stsumutetik: “¡Lokʼesaik bael spisil ini! ¡Mame xa akʼatpʼunik ta merkado te sna te jTate!”.

Te ants winiketik te ayik ta templo chajpnax la yilik-a te bin la spas te Jesuse. Te jnopojeletik yuʼun jul ta yoʼtanik te bin ya yal te albilkʼop ta swenta te Mesías: “Bayal kʼux ta koʼtan ya kaʼiy te anae”.

Ta patil bael, ta jaʼbil 33 te Jesús la slokʼes ta schebal buelta te jchonbajeletik ta templo. Ma la skʼan te ay machʼa maba ya yichʼbey ta mukʼ te sna te sTate.