LECCIÓN 23

Kʼax lek te yakuk awichʼ jaʼe

Partitura

Te Jesús la yal te ya skʼan ya kichʼtik jaʼ swenta ya x-ochotik ta jnopojel yuʼun (kʼopona Mateo 28:19, 20). ¿Bin-a te ichʼjaʼe? ¿Bin ya skʼan ya spas te machʼa ya skʼan ya yichʼ jaʼe?

1. ¿Bin-a te ichʼjaʼe?

Te kʼopil ichʼjaʼ talem ta kʼopil griego te ya skʼan ya yal «mulel ta jaʼ». Te Jesús la yichʼ jaʼ ta mukʼul jaʼ Jordán, la yichʼ mulel ochel, ta patil «locʼ tal ta haʼ» (Marcos 1:9, 10). Kʼalal ya yichʼik jaʼ te smelelil jchʼuunjeletike, jaʼnix jich skojtol ya yichʼik mulel ta jaʼ.

2. ¿Bin ya yakʼ ta ilel te ichʼjaʼe?

Te kʼalal ay machʼa ya yichʼ jaʼe, ya yakʼ ta ilel te la yakʼix skuxlejal ta stojol te Jehová. ¿Bin-utʼil ya yakʼ skuxlejal ta stojol te Jehová? Jaʼ te ya spas jun oración ta stukel swenta ya yalbey te Jehová te ya yakʼ sba ta abatinel ta stojol ta sbajtelkʼinal. Te oración-abi ya spas te kʼalal mato yichʼoj jaʼ-ae. Ya yalbey te jaʼnax stukel ya yichʼ ta mukʼ sok te jaʼ mukʼ skʼoplal ya xkʼot ta skuxlejal spasel te skʼanojel yoʼtan te Diose. Jaʼnix jich, ya stʼun te ejemplo yuʼun te Jesús sok te bin la yakʼ ta nopele, melel jich la yal te Jesús: «Teme ay machʼa ya scʼan ya stʼunon, acʼa sloqʼues sba ta yoʼtan [...] soc acʼa stʼunon» (Mateo 16:24). Kʼalal ay machʼa ya yakʼ skuxlejal ta stojol te Jehová sok ya yichʼ jaʼ, ya xjajch yamigoin sba sok te Jehová sok te j-abatetik yuʼune.

3. ¿Bin ya skʼan ya spas te machʼa ya skʼan ya yichʼ jaʼe?

Teme ya akʼan ya awichʼ jaʼe, nail ya skʼan ya anaʼbey sba te Jehová sok te ya xchʼi te schʼuunel awoʼtan ta stojol (kʼopona Hebreos 11:6). Teme maba ya akom aba ta spasel-abi, yame xchʼi te skʼuxul awoʼtan ta stojol te Jehová. Sok ya stijbat awoʼtan ta scholbeyel te skʼope sok ta spasel ta akuxlejal te mantaliletik ay ta Bibliae (2 Timoteo 4:2; 1 Juan 5:3). Teme jich ya xkuxinat te bitʼil ya skʼan te Jehovae, yame xjuʼ ya awakʼ akuxlejal ta stojol sok ya awichʼ jaʼ (Colosenses 1:9, 10).a

JNOPTIKXAN TA LEK

Kiltik bin ya yakʼ jnoptik te bin-utʼil la yichʼ jaʼ te Jesuse sok te bin ya skʼan ya spas te machʼa ya skʼan ya yichʼ jaʼe.

4. ¿Bin-utʼil la yichʼ jaʼ te Jesuse?

Swenta ya anaʼik te bin-utʼil la yichʼ jaʼ te Jesuse, kʼoponaik Mateo 3:13-17 sok albeyaik skʼoplal ini:

¿Alaltobal-a te Jesús te kʼalal la yichʼ jaʼe?
¿Jaʼnaxbal la yichʼ tsijtsanbeyel jaʼ ta sjol? ¿Bin-utʼil la yichʼ jaʼ?

Kʼalal la yichʼ jaʼ te Jesuse, jajch spas te aʼtelil akʼbil yuʼun te Diose. Kʼoponaik Lucas 3:21-23 sok Juan 6:38, sok albeyaik skʼoplal ini:

Kʼalal yichʼojix jaʼ-a te Jesuse, ¿bin aʼtelil la spas te kʼax mukʼ skʼoplal la yile?

5. Te jaʼate ya xjuʼ ya awichʼ jaʼ

Ayniwan machʼatik ya xiwik te ya yakʼ skuxlejalik ta stojol te Jehová sok te ya yichʼik jaʼe. Pero, teme ya anaʼbeyxan sba ta lek te Jehová jun awoʼtan ya awakʼ aba ta stojol sok ya awichʼ jaʼ. Naʼbeya sba chaʼoxtul ants winiketik te jich juʼ yuʼunik spasel, ilawilik te VIDEO.

VIDEO: Amigoinaxan ta lek te Jehová (1:11)

Kʼoponaik Juan 17:3 sok Santiago 1:5, sok albeyaik skʼoplal ini:

¿Bin ya xjuʼ ya xkoltayot te machʼa ya skʼan ya yichʼ jaʼe?

A. Jtul ants yak ta spasel oración yuʼun ya yakʼ skuxlejal ta stojol Dios.

B. Jaʼnix te antse, yak ta yichʼel jaʼ yuʼun ya x-och ta testigo yuʼun Jehová. Skojtol yak ta yichʼ mulel ta jaʼ.

Ya kakʼ jkuxlejaltik ta stojol te Jehová te kʼalal ya kalbeytik te ya x-abatinotik ta stojol ta sbajtelkʼinal.
Kʼalal ya kichʼtik jaʼ, ya kakʼtik ta ilel ta komonsitil te la kakʼix jkuxlejaltik ta stojol te Diose.

6. Ya x-ochotik ta sfamilia te Jehová kʼalal ya kichʼtik jaʼ

Te kʼalal ya kichʼtik jaʼe, jun-nax familia ya xkʼootik ta swolol Balumilal. Manchukme yanyantik jtsʼumbaltik o yanyantik jkuxineltik ta namey, pajal te bin jchʼuunejtik sok jich ya xkuxinotik te bitʼil ya yal te Bibliae. Kʼoponaik Salmo 25:14 sok 1 Pedro 2:17, sok albeyaik skʼoplal ini:

Jich bitʼil ya yal te textoetike, ¿bin lekilal ya jtatik te kʼalal ya kichʼtik jaʼ?

Dibujoetik yuʼun jtul achʼix te yichʼojix jaʼ tseʼel yoʼtan yuʼun te lek yamigoinej sba sok te hermanoetik ta congregación: 1. Ya yalbey te bin yaʼiyel ya yaʼiy sba te hermanae. 2. Snitoj ta beel jtul hermana te ayix yaʼbilal. 3. Sjokinoj ta weʼel yamigotak te yanyantik yaʼbilalik. 4. Jokinbil yuʼun jtul hermana te yakik ta scholbeyel skʼop Dios jtul winik. 5. Ay ta mukʼul tsoblej sok yak ta slokʼesel sfoto sok chaʼtul hermanaetik te yanyantik stsʼumbalik.

AY MACHʼATIK JICH YA YALIK: «Mato chapalon ya kaʼiy yuʼun ya kichʼ jaʼ».

Manchukme jich ya awaʼiy abae-euk, ¿yabal skʼan ya apas tulan yuʼun ya sta yorail te ya awichʼ jaʼe?

¿BINTIK LA JNOPTIK?

Te Jesús la yal te ya skʼan ya kichʼtik jaʼ swenta ya x-ochotik ta jnopojel yuʼun. Teme jich ya akʼan ya apase, ya skʼan te tulanuk schʼuunel awoʼtan ta stojol te Jehová, te ya achʼuun te mantaliletik yuʼun sok te ya awakʼ akuxlejal ta stojol.

¿Jilbal ta awoʼtan into?

¿Bin-a te ichʼjaʼe, sok bin yuʼun te kʼax mukʼ skʼoplale?
¿Bin ya yakʼ ta ilel te ichʼjaʼe?
¿Bin ya skʼan ya spas te machʼa ya skʼan ya yakʼ skuxlejal ta stojol te Jehová sok te ya yichʼ jaʼ?

Laj koʼtan ta snopel ta:

Pasa awil ini

Ilawil te listaetik te ay ta slajibal te parte 4, «¿Chapalonixbal yuʼun ya jchol skʼop Dios sok te congregación?» «¿Chapalonixbal yuʼun ya kichʼ jaʼ?». Teyme ya awil-a teme chapalatixe.

Pasaxan awil ini:

Your other goal

YA XJUʼ YA ANOPXAN INI

Naʼa bin ya skʼan ya yal te ichʼjaʼ sok te bin ma stojiluk albil ta swentae.

«¿Bin-a te ichʼjaʼe?» (Ay ta jw.org)

Ilawil bintik ya xjuʼ ya skoltayat yuʼun ya awichʼ jaʼ.

«Te kʼuxul oʼtanil sok yalel wokol ya stij koʼtantik ta yichʼel jaʼ» (Te J-ilkʼinal ta toyol, marzo 2020)

Ilbeya skʼoplal jtul winik te la snop ta lek te ya yichʼ jaʼe.

«Jaʼ la skʼanik-a te ya jta ta ilel banti ay te smelelile» (Te J-ilkʼinal ta toyol, 1 yuʼun febrero 2013)

Ilawil bin yuʼun mukʼ skʼoplal te ya apas tulan yuʼun ya awichʼ jaʼ.

«¿Yabal skʼan ya kichʼix jaʼ?» (Te sujtib te bintik ya sjojkʼoyik te jchʼieletik, [volumen 2], capítulo 37)

a Teme ay machʼa yichʼojix jaʼ ta yan religión, ya skʼan ya xchaʼyichʼ jaʼ. Melel ta religión te banti ay-ae ma akʼbot snop te bin smelelil ya yal te Bibliae (kʼopona Hechos 19:1-5 sok te lección 13).