¿Aybal bin kuxul ya xjil kuʼuntik te kʼalal ya xlajotike?

¿Aybal machʼa lajem awuʼun? Teme aye, ayniwan jich la ajojkʼoybey aba: «¿Aybal bin kuxul jil yuʼun? ¿Aybal bin-ora ya kilxan?». Ta lección ini sok ta yan ya kiltik bin ya yal te Bibliae.

1. ¿Aybal bin kuxul ya xjil kuʼuntik te kʼalal ya xlajotike?

Te Jesús la spajbey skʼoplal te lajel jich bitʼil te kʼalal ya xkʼub jwayeltik. ¿Bin-utʼil-a te pajal te lajel sok te ya xkʼub jwayeltike? Te kʼalal ay machʼa kʼuben swayele, ma xyaʼiy te bin yak ta kʼoel ta pasele. Te machʼatik ya xlajike maʼyukix bin kʼux ya yaʼiyik sok maʼyukix swokolik. Te Biblia ya yal te «machʼatic chamenic mayuc bin ya snaʼic» (kʼopona Eclesiastés 9:5).

2. ¿Bin yuʼun ya yakʼ smukʼul koʼtantik snaʼel te bin ya yal te Biblia ta swenta te lajele?

Bayal machʼatik ya xiʼik te lajele sok te machʼatik lajemikixe. Teme jich ya awaʼiy abae, yame yakʼbat smukʼul awoʼtan te bin ya yal te Biblia ta swenta te lajele. Te Jesús jich la yal: «Ya yaqʼuex ta libre te smelelil cʼope» (Juan 8:32). Te Biblia maba ya yakʼ ta nopel te ay jchʼuleltik te kuxul ya xjil te kʼalal ya xlajotike. Jich yuʼun, te kʼalal ay machʼa ya xlaje, maba ya xwoklajix-a. Ma xjuʼ ya yutsʼinotik te machʼatik lajemikixe, melel maʼyuk bin ya snaʼikix. Jaʼ yuʼun ma puersa te ya jkʼopontik Dios ta stojolik o te ay binxan ya jpastik yuʼun ya jlamantesbeytik yoʼtan o yuʼun ya kichʼtik ta mukʼ.

Ay machʼatik ya yalik te ya xjuʼ ya skʼoponik te machʼatik lajemikixe, pero ma xjuʼ ta pasel-abi. Jich bitʼil la jnoptikixe, te «machʼatic chamenic mayuc bin ya snaʼic». Te machʼatik ya skuyik te ya skʼoponik te machʼatik lajem yuʼunik, ta melel jaʼ yakik ta skʼoponel te pukujetik te ya skuy sbaik-a te machʼa lajeme. Jaʼ yuʼun te kʼalal ya jnoptik te smelelil, ya skoltayotik yuʼun maba ya yutsʼinotik te pukujetike. Te Jehová ya yalbotik te ma skʼan ya jkʼopontik te machʼatik lajemikixe, melel jaʼ ya jkʼopontik te pukujetik sok ya xjuʼ ya yutsʼinotik (kʼopona Deuteronomio 18:10-12).

3. ¿Bin-nix ya xkʼot ta pasel-a te kʼalal ya xlajotike?

Bayal bin ya yichʼ alel ta swenta te bin ya xkʼot ta pasel te kʼalal ya xlajotike. Pero manix meleluk spisil-a te bin ya yichʼ alele.

• Ta banti te alumale, ¿bin schʼuunejik ta swenta te machʼatik lajemikixe?

VIDEO: ¿Bin-utʼil ayik te machʼatik lajemikixe? (jmajkʼnax) (1:19)

Kʼoponaik Eclesiastés 3:20 sok albeyaik skʼoplal ini:

• Jich bitʼil ya yal te versiculoe, ¿bin ya xkʼot ta pasel ta stojol te machʼa ya xlaje?

• ¿Aybal bin kuxul ya xjil yuʼun te machʼa ya xlaje?

Te Biblia ya yal te laj te yamigo te Jesús te Lázaro sbiile. Jich bitʼil la yal te Jesús, ¿bin-utʼil ay-a te Lazaroe? Kʼoponaik Juan 11:11-14 sok albeyaik skʼoplal ini:

• ¿Bin la spajbey skʼoplal-a te lajel te Jesuse?

• ¿Bin-utʼil ayix-abi te machʼatik lajemikixe?

• ¿Snujpʼbal ya awaʼiy te bin ya yal te Biblia ta swenta te lajele?

4. Ya yakʼotik ta libre te bin smelelile

Te kʼalal ya jnoptik te smelelil ta swenta te lajele, maba ya jxiʼtikix-a te machʼatik lajemike. Kʼoponaik Eclesiastés 9:10 sok albeyaik skʼoplal ini:

• ¿Yabal xjuʼ ya yutsʼinotik te machʼatik lajemikixe?

Te kʼalal ya jnoptik te bin-nix ya yal-a te Bibliae, ya skoltayotik yuʼun maba ya jchʼuuntikix spasel te costumbreetik yuʼun slamantesbeyel yoʼtan sok yichʼel ta mukʼ te machʼatik lajemikixe. Kʼoponaik Isaías 8:19 sok Apocalipsis 4:11, sok albeyaik skʼoplal ini:

• ¿Binwan-utʼil ya yaʼiy sba te Jehová te kʼalal ay machʼatik ya yichʼik ta mukʼ o ya skʼanbeyik koltayel te machʼatik lajemikixe?

5. Ya yakʼ smukʼul koʼtantik te bin smelelile

Bayal machʼatik albilik te kʼalal ya xlajik yalaj xbajtik ta woklajel ta swenta te bin ma lek la spasik te kʼalal kuxulikto-ae. Pero ya slamantes koʼtantik snaʼel te maʼyuk machʼa ya xbajt ta woklajel te kʼalal ya xlaje, ni jaʼuk te machʼatik ay bin kʼax ma lek la spasike. Kʼoponaik Romanos 6:7 sok albeyaik skʼoplal ini:

• Te Biblia ya yal te machʼa ya xlaje ya xjil ta libre yuʼun te smule. Jaʼ yuʼun, ¿yabal awal te ayik ta wokol te machʼatik lajemikix yuʼun ya stojik spisil te smulike?

Te kʼalal ya jnaʼbeytikxan sba te Jehová, ya xkʼotxan ta koʼtantik te maʼyuk bin-ora ya yakʼbey swokol te machʼatik lajemikixe. Kʼoponaik Deuteronomio 32:4 sok 1 Juan 4:8, sok albeyaik skʼoplal ini:

• Jtul Dios te jich stalel te bitʼil la jkʼopontikix ta versiculoetik, ¿yabal yakʼbey swokol te machʼatik lajemikixe?

• ¿Yabal yakʼ smukʼul koʼtantik snaʼel bin-utʼil ayik te machʼatik lajemikixe? ¿Bin yuʼun?

¿BINTIK LA JNOPTIK?

Te kʼalal ay machʼa ya xlaje, tey ya xlaj-a te skuxlejale. Ma xkʼax swokolik sok maʼyuk machʼa ya xjuʼ ya yutsʼinik.

¿Jilbal ta awoʼtan into?

• ¿Aybal bin kuxul ya xjil kuʼuntik te kʼalal ya xlajotike?

• ¿Bin yuʼun ya yakʼotik ta libre snaʼel te smelelil ta swenta te lajele?

• ¿Bin yuʼun ya yakʼ smukʼul koʼtantik snaʼel te smelelil ta swenta te lajele?

YA XJUʼ YA ANOPXAN INI

Ilawil teme ya yal te Biblia te ay bin kuxul ya xjil kuʼuntik te kʼalal ya xlajotike.

«¿Bin-a te chʼulelale?» (Ay ta jw.org)

Ilawil teme ya yakʼ castigo ta infierno te Diose.

¿Yuʼun-nixbal ay-a te infiernoe? (3:06)

¿Yabal skʼan ya jxiʼtik te machʼatik lajemikixe?

Te machʼatik lajemikix... ¿yabal xjuʼ ya skoltayotik o ya yutsʼinotik? ¿Kuxuliktobal? (Folleto)

Naʼbeya sba jtul winik te akʼbot smukʼul yoʼtan snaʼel te bin smelelil ta swenta te lajele.

«Mero la jmulan te sujtib ya yakʼ te Bibliae» (Te J-ilkʼinal ta toyol, 1 yuʼun febrero 2015)