LECCIÓN 34
¿Bin-utʼil ya kakʼbeytik yil te kʼux ta koʼtantik te Jehová?
Te bitʼil yakat ta snopel te Biblia, ¿nopolxanbal ya awaʼiy aba ta stojol te Diose? ¿Yabal akʼan te lekxan ya awil aba soke? Te kʼalal ya yil te Jehová te ya xchʼixan te skʼuxul awoʼtan ta stojole, jaʼnixme jich kʼuxatxan ta yoʼtan ya yaʼiy sok ya skanantayat. ¿Bin-utʼil ya xjuʼ ya awakʼbey yil te kʼux ta awoʼtan te Jehovae?
1. ¿Bin-utʼil ya kakʼbeytik yil te kʼux ta koʼtantik te Jehová?
Kʼalal ya jchʼuunbeytik skʼop te Jehová, ya kakʼtik ta ilel te kʼux ta koʼtantike (kʼopona 1 Juan 5:3). Pero maʼyuk machʼa ya suj ta schʼuunel te skʼope. Te bin ya spase, jaʼ te ya yakʼ jtsatik teme ya jchʼuuntik o maʼuke. ¿Bin yuʼun? Melel te Jehová jaʼ ya skʼan te spisil koʼtantik ya jchʼuunbeytik te skʼope (Romanos 6:17). Te Jehová ma skʼan te sujbil ya awaʼiy abae, jaʼ ya skʼan te sok skʼuxul awoʼtan ya achʼuunbey te skʼope. Te bin ya anop ta libro ini ta parte 3 sok 4 ya snojptesat cheb te bin-utʼil ya awakʼ ta ilel te kʼux ta awoʼtan te Jehová: te kʼalal ya apas te bin ya smulan sok kʼalal maba ya apas te bin ma smulane.
2. ¿Bin yuʼun ay wokol ya kaʼiytik yakʼbeyel yil skʼuxul koʼtantik te Jehová?
«Ay bayel swocolic te machʼa toj yoʼtan» (Salmo 34:19). Jpisiltik ay banti ya xchʼayotik. Ma jaʼuknax-abi, jaʼnix jich ya xkʼax jwokoltik ta skaj te maʼyuk takʼin, te ay bin ma stojiluk ya kichʼtik pasbeyel sok yantik wokoliletik. Kʼalal ay jwokoltik, tulanxan ya kaʼiytik spasel te bin ya skʼanbotik te Jehová, melel jaʼniwan kʼunxan ta pasel te bin ma leke. Pero, te kʼalal ya apas tulan ta spasel te bin ya skʼanbat te Jehová, ya awakʼbey yil te kʼax kʼux ta awoʼtan sok te jun awoʼtan ta stojole. Jaʼnixme jich te Jehová jun yoʼtan ta atojol sok maʼyuk bin-ora ya yijkitayat (kʼopona Salmo 4:3).
JNOPTIKXAN TA LEK
Ilawil bin yuʼun ya awakʼbey stseʼelil yoʼtan te Jehová kʼalal ya achʼuunbey te skʼope sok bin ya skoltayat yuʼun spisil-ora jich ya apas.
3. Te Satanás ya slebat amul
Te libro yuʼun Job ya schol kaʼiytik kʼalal te Satanás la slebey smul te Job sok spisil te ants winiketik te ya skʼan ya x-abatinik ta stojol te Jehová. Kʼoponaik Job 1:1 sok 1:6-2:10, sok albeyaik skʼoplal ini:
Jich bitʼil la yal te Satanás, ¿binlaj yuʼun te Job la schʼuunbey smantal te Jehová? (Ilawilik Job 1:9-11).
¿Bin la yal te Satanás ta stojol spisil te ants winiketik soknix ta atojol? (Ilawilik Job 2:4).
Kʼoponaik Job 27:5b sok albeyaik skʼoplal ini:
¿Bin-utʼil la yakʼ ta ilel te Job te kʼux ta yoʼtan ta smelelil te Jehová?
Te Job jun yoʼtan la yakʼ sba ta stojol Jehová, jich la yakʼ ta ilel te kʼux ta yoʼtane.
Ya kakʼtik ta ilel te kʼux ta koʼtantik te Jehová teme jun koʼtantik ta stojole.
4. Akʼbeya stseʼelil yoʼtan te Jehová
Kʼoponaik Proverbios 27:11 sok albeyaik skʼoplal ini:
¿Bin yaʼiyel ya yaʼiy sba te Jehová kʼalal ya achʼuunbey te skʼop sok lek te bin ya ata ta nopel spasele? ¿Bin yuʼun?
5. Ya xjuʼ te jun awoʼtan ta stojol te Jehová
Te skʼuxul koʼtantik ta stojol te Jehová ya stij koʼtantik ta spukbeyel skʼoplal. Sok teme jun koʼtantik ta stojole, maba ya jkom jbatik manchukme ay tulan ya kaʼiytik spasel. Ilawilik te VIDEO sok albeyaik skʼoplal ini:
¿Wokolbal ya awaʼiy te ya achol skʼop Diose?
Jich bitʼil la kiltik ta video, ¿bin-utʼil la stsal te xiwel te Grayson?
Teme kʼux ta koʼtantik te bin kʼux ta yoʼtan te Jehová sok teme ya jpʼajtik te bin ya spʼaje, maba wokol ya kaʼiytik te jun koʼtantik ta stojole. Kʼoponaik Salmo 97:10 sok albeyaik skʼoplal ini:
Ta swenta te bin la anopix ta yantik leccionetik, ¿bintik-a te ya smulan te Jehová? ¿Sok bintik-a te ma smulane?
¿Bin ya skoltayat yuʼun ya apas te bin lek sok ya apʼaj te bin ma leke?
6. Ya jta jlekilaltik teme ya jchʼuunbeytik skʼop te Jehová
Ya jta jlekilaltik kʼalal ya jchʼuunbeytik skʼop te Jehová. Kʼoponaik Isaías 48:17, 18 sok albeyaik skʼoplal ini:
¿Yanixbal schʼuun awoʼtan-a te spisil-ora ya snaʼ te bin lek ta jtojoltik te Jehová? ¿Bin yuʼun te jich ya awale?
¿Bin-utʼil skoltayejat te snopel te Biblia sok snaʼbeyel sba te Jehová te smelelil Diose?
AY MACHʼATIK JICH YA YALIK: «Maʼyuk skʼoplal ta yoʼtan te Dios te bin ya jpase».
¿Bin texto ya xjuʼ ya atuuntes yuʼun ya awakʼ ta ilel te ya xjuʼ ya x-akʼbot stseʼelil yoʼtan o ya smel yoʼtan te Jehová te bin ya jpastike?
¿BINTIK LA JNOPTIK?
Ya awakʼ ta ilel te kʼux ta awoʼtan te Jehová kʼalal ya achʼuunbey skʼop sok jun awoʼtan ta stojol manchukme wokol ya awaʼiy spasel.
¿Jilbal ta awoʼtan into?
¿Bin ya snojptesat te bin kʼax ta stojol te Job?
¿Bin-utʼil ya awakʼbey yil te skʼuxul awoʼtan te Jehová?
¿Bin ya skoltayat yuʼun jun awoʼtan ta stojol te Jehová?
YA XJUʼ YA ANOPXAN INI
Nopa bin-utʼil jun awoʼtan ta stojol te Jehová sok ta stojol te congregación.
«Jun awoʼtan ta stojol te machʼa jun yoʼtan ta atojole» (16:49)
Ilbeyaxan skʼoplal te bin la yal te Satanás ta stojol te Job.
«Te Job jun yoʼtan ya yakʼ sba» (Te Biblia sok te bin ya xchole, jxajtʼ 6)
Te alaletik jaʼnix jich ya xjuʼ ya yakʼik ta ilel te kʼux ta yoʼtanik te Jehová.
¿Bin-utʼil ya xjuʼ te jun yoʼtan ya yakʼ sbaik te achʼix keremetik manchukme ya yichʼik tenel?