LECCIÓN 44
¿Lekbal ya yil Dios spisil te kʼinetike?
Te Jehová ya skʼan te ya jmulantik te jkuxlejaltik sok te ya jpastik te kʼine. Pero, ¿lekbal ya yil spisil te kʼinetik ya yichʼ pasele? ¿Bin-utʼil ya xjuʼ ya kakʼtik ta ilel te kʼux ta koʼtantik te Dios sok te ya kichʼtik ta wenta te bin yaʼiyel ya yaʼiy sbae?
1. ¿Bin yuʼun te Jehová ma lek ya yil spisil te kʼinetike?
Maniwan anaʼoj-a, pero bayal ta chajp kʼinetik ya skontrain te bin ya yal te Biblia o lokʼemik ta lotil religión. Ayniwan lokʼemik skʼoplal ta espiritismo o ya skoltaybeyik skʼoplal te aylaj bin kuxul ya xjil yuʼun te machʼa ya xlaje. Ay yantik kʼinetik te ya spasik ta skaj te bayal bin schʼuunejik sok yuʼun ya skʼanik suerte (Isaías 65:11). Jaʼ yuʼun te Jehová jich ya yalbey te j-abatetik yuʼun: «Parte me xawacʼ abahic [...] Ma me xapiquic te bin bohloben scʼoblal» (2 Corintios 6:17).a
2. ¿Bin-utʼil ya yil te Jehová te kʼinetik banti jaʼ ya yichʼik ichʼel ta mukʼ te ants winiketike?
Te Jehová ya yalbotik te ma skʼan jichukotik te bitʼil te ants winiketik te «ha smucʼulinej yoʼtan te winiquetic», melel jaʼ jun pejtsʼ (kʼopona Jeremías 17:5). Ay kʼinetik te ya spasik ta stojol te ajwaliletik o te machʼatik ay la skoltayik te nación. Ya skʼayojtayik te bandera o ya spasbeyik skʼinul te independencia yuʼun jun nación (1 Juan 5:21). Jaʼnix jich ay ya stsob sbaik ta skoltaybeyel skʼoplal te política o yuʼun ay bin ya skʼan ya schajpanik. Teme bayal ya kichʼtik ta mukʼ jtul ants winik o jun organización te ya skontrain te skʼanojel yoʼtan te Jehová, ¿binwan yaʼiyel ya yaʼiy sba yuʼun?
3. ¿Bintik ya yichʼ pasel ta jun kʼin te ma lek ya yil te Diose?
Te Biblia ya yal te maba lek te kʼin te banti ya xyakubik sok ya xjelawik ta yuchʼel trago (1 Pedro 4:3). Ay kʼinetik te banti te ants winiketik ya xchʼay yoʼtanik, ma snaʼ skomel sbaik sok ya spasik mulil. Teme spisil-ora ya jkʼantik ya kamigointik te Jehová, maba ya jkap jbatik sok te machʼatik jich ya spasik-abi.
JNOPTIKXAN TA LEK
Kiltik bin ya skoltayat ta snopel ta lek te bin ya apas ta swenta te kʼinetik yuʼun jich ya awakʼbey stseʼelil yoʼtan-a te Jehová.
4. Mame xa apas kʼinetik te ya sbolobtesbey skʼoplal te Jehová
Kʼoponaik Efesios 5:10 sok albeyaik skʼoplal ini:
¿Bin ya skʼan ya jtsajtaytik kʼalal ya jtatik ta nopel teme ya jpastik jun kʼin o maʼuk?
¿Bintik kʼinetik ya spasik te banti nainemate?
¿Bin xchiat? ¿Lekbal ya yil te Diose?
Jich bitʼil te spasel cumpleaño, ¿aybal ajojkʼoybeyoj aba teme lek ya yil te Diose? Te Biblia maba ya yal te ay la spasik cumpleaño te j-abatetik yuʼun Dios, pero ya yalbey skʼoplal cheb cumpleaño te la spasik te machʼatik maba yichʼojik ta mukʼ te Diose. Kʼoponaik Génesis 40:20-22 sok Mateo 14:6-10. Ta patil albeyaik skʼoplal ini:
¿Bin kʼot ta pasel ta cumpleañoetik te la yichʼ pasele?
Jich bitʼil la jkʼopontikixe, ¿bin-utʼil ya yil Jehová te cumpleañoetike?
Manchukme jich-abi, yaniwan anop «¿Yuʼun-nixbal ma lek ya yil-a te Jehová te ya jpas te cumpleaño o te ya xboon ta jun kʼin te ma lokʼem skʼoplal ta Bibliae?». Kʼoponaik Éxodo 32:1-8. Ta patil ilawilik te VIDEO sok albeyaik skʼoplal ini:
¿Bin yuʼun ya skʼan ya jnaʼtik bin-a te lek ya yil te Jehová?
¿Bin-utʼil ya jnaʼtik?
¿Bin-utʼil ya jnaʼtik teme lek ya yil Dios te kʼinetike?
¿Lokʼembal ta jun nojptesel te ma jichuk ya yal te Bibliae? Swenta ya anaʼbey skʼoplal pasa investigar bin-utʼil chiknaj tal te kʼin-abi.
¿Yabal yakʼ ta ichʼel ta mukʼ ants winiketik, organizacionetik o te bandera? Te joʼotike jaʼnax ya kichʼtik ta mukʼ te Jehová sok schʼuunej koʼtantik te jaʼ ya xbajt schajpan te wokoliletik ta Balumilal.
¿Yabal skontrain te Biblia te bin ya yichʼ pasel tey-ae? Ya jkʼantik te spisiluk-ora lek te jtaleltike.
5. Pasa tulan yuʼun ya yichʼik ta mukʼ yantik te bin achʼuunej
Kʼalal ya kichʼtik tenel ta spasel jun kʼin te ma lek ya yil te Jehová, ayniwan wokol ya kaʼiytik spʼajel. Lamaluknax awoʼtan ya achol te bin yuʼun maba ya apase. Swenta ya anaʼ bin la spas te machʼa jich kʼax ta stojol, ilawilik te VIDEO.
Kʼoponaik Mateo 7:12 sok albeyaik skʼoplal ini:
Jich bitʼil ya yal te textoe, ¿yabal skʼan ya akom ta spasel kʼin te afamilia te ma pajal bin achʼuunej soke?
¿Bin-utʼil ya xjuʼ ya awakʼbey yil te afamilia te kʼux ta awoʼtan manchukme maba ya ajokin ta spasel kʼin?
6. Te Jehová ya skʼan te tseʼeluk koʼtantik
Te Jehová ya smulan te ya jkʼasestik tiempo sok te jfamiliatik sok kamigotaktik. Kʼoponaik Eclesiastés 8:15 sok albeyaik skʼoplal ini:
¿Bin-utʼil ya yakʼ ta ilel te texto ini te ya skʼan Jehová te tseʼeluk koʼtantike?
Te Jehová ya smulan te ya sjokin sbaik te j-abatetik yuʼun sok te tseʼeluk yoʼtanike. Ilawilik te VIDEO te ya yakʼ ta ilel te jich ya xkʼot ta pasel ta mukʼul tsoblejetik internacional.
Kʼoponaik Gálatas 6:10 sok albeyaik skʼoplal ini:
¿Puersabal ya jmaliybeytik skʼajkʼalel jun kʼin swenta ay bin lek ya jpastik ta stojol te yantike?
¿Bin-utʼil ya akʼan ya awakʼ jun majtanil: jaʼbal te sujbil ya awakʼ te kʼalal ay bin ya yichʼ pasbeyel skʼinul, o jaʼ te ya xlokʼ ta awoʼtan yakʼele?
Bayal Testigoetik ay ya slebeyik skʼajkʼalel yuʼun ya stsob sbaik sok te yal snichʼnabik, sok ay ya yakʼbeyik smajtanik. Teme ay awal anichʼnab, ¿bintik ya xjuʼ ya apas ta stojolik?
AY MACHʼATIK JICH YA YALIK: «Maʼyuk skʼoplal te bitʼil chiknaj tal te kʼinetik. Te bin mukʼ skʼoplale jaʼ te ya jokin jbatik sok te jfamiliatik sok te kamigotaktik».
¿Bin ya awal te jaʼate?
¿BINTIK LA JNOPTIK?
Te Jehová ya smulan te ya jokin jbatik sok te jfamiliatik sok te kamigotaktik, pero ma smulan te ya jpastik kʼinetik te ma lek ya yile.
¿Jilbal ta awoʼtan into?
¿Bin ya skʼan ya jojkʼoybey jbatik yuʼun ya jnaʼtik teme ya smulan Jehová jun kʼine?
¿Bin-utʼil ya xjuʼ ya jkoltaytik te jfamiliatik sok te kamigotaktik yuʼun ya xkʼot ta yoʼtanik bin yuʼun maba ya jpastik te kʼinetike?
¿Bin-utʼil ya jnaʼtik te ya skʼan Jehová te tseʼeluk koʼtantik sok te ya jmulantik sjokinel te yantike?
YA XJUʼ YA ANOPXAN INI
Kʼopona te bin kʼinetik ma spasik te j-abatetik yuʼun Dios.
«¿Bin yuʼun ay kʼinetik te ma spasik te testigoetik yuʼun Jehová?» (Ay ta jw.org)
Ilawil chanchajp te bin yuʼun te Dios ma lek ya yil te ya yichʼ pasel te cumpleañoe.
«¿Bin yuʼun ma spasik kʼin te stestigotak te Jehová te kʼalal ya xlokʼ yaʼbilalike?» (Ay ta jw.org)
Ilawil bin-utʼil te chʼin achʼix keremetik maba xiwik kʼalal ya yichʼ pasel jun kʼin te ma smulan te Jehová.
Bayal ta tul j-abatetik yuʼun Dios ma spasik te Navidad. ¿Tseʼelbal yoʼtanik yuʼun te ma spasike?
«Ay bin lekxan la staik» (Te J-ilkʼinal ta toyol, 1 yuʼun diciembre 2012)