LECCIÓN 48

Tsaa ta lek te awamigotake

Partitura

Te lekil amigoetik ya yakʼxan stseʼelil koʼtantik sok ya skoltayotik yuʼun maba bayal ya jmel koʼtantik. Pero ya skʼan ya jtsajtay jbatik, melel te Biblia ya yal te maba lekik ta amigoinel spisil te ants winiketik. ¿Bin-utʼil ya xjuʼ ya ale lekil awamigotak? Ilawil te jojkʼoyeletik ini.

1. ¿Bin-utʼil ya skoltayat te awamigotake?

Yame xjuʼ ya jkʼayinbeytik stalel te machʼatik ya jokintik, chikan teme lek o ma lek te stalele. Jich ya xkʼot ta pasel te kʼalal ya jokintik o ya jkʼopontik ta Internet. Jich ya yal te Biblia: «Te machʼa ya sjoquin te machʼatic pʼij yoʼtanic, ha nix hich pʼij ya xcʼoht, yan te machʼa ya sjoquin te machʼatic ma snaʼic qʼuinal [te ma kʼux ta yoʼtan te Jehová], ya me sta swocol» (Proverbios 13:20). Teme kʼux ta yoʼtanik te Jehová te awamigotake, ya skoltayat yuʼun nopolxan ya x-ayinat ta stojol te Jehová sok lek te bin ya apase. Teme jaʼ ya awamigoin te machʼatik maba ayik ta congregación, maba ya skoltayat yuʼun nopolxan ya x-ayinat ta stojol te Jehová. Jaʼ yuʼun te Biblia ya yalbotik te yakuk jtsatik ta lek te kamigotaktike. Teme kʼux ta yoʼtanik te Jehová, lek ya xkʼootik ta lokʼel sok ya xjuʼ ya jchʼuuntik ini: «Talel cʼaxel me xamucʼubtesbe aba qʼuinal awaʼiyic soc talel cʼaxel me xawaʼbe aba yip awoʼtanic» (1 Tesalonicenses 5:11).

2. ¿Aybal skʼoplal ta yoʼtan te Jehová te machʼatik ya awamigoine?

Te Jehová ya stsa ta lek te machʼatik ya yamigoin. Jaʼ «jun yoʼtan sba soc te machʼatic toj yoʼtan» (Proverbios 3:32). ¿Bin yaʼiyel ya yaʼiy sba te Jehová teme jaʼ ya jokintik te machʼatik ma kʼux ya x-aʼiyot yuʼune? ¡Ya smel yoʼtan yuʼun! (Kʼopona Santiago 4:4). Pero, teme maba ya jokintik te machʼatik ma lekik ta jokinel sok teme ya xnoptsajotik ta stojol te Jehová sok te yamigotak, tseʼel yoʼtan yuʼun sok ya yamigoinotik (Salmo 15:1-4).

JNOPTIKXAN TA LEK

Kiltik bin yuʼun mukʼ skʼoplal te ya jtsatik ta lek te kamigotaktik sok bin-utʼil ya xjuʼ ya ata awamigotak te ya skoltayat ta akuxlejal.

3. Mame jokintik te machʼatik ma lek ta jokinel

Te machʼatik ma kʼux ta yoʼtanik te Dios sok ma schʼuunik spasel te mantaliletik yuʼune jaʼik te machʼatik ma lekik ta jokinel. Ilawilik te VIDEO sok albeyaik skʼoplal ini:

VIDEO: Te bin-utʼil ya xjuʼ ya jpʼajtik te chopol amigoetik (6:17)

¿Bin-utʼil ya xjuʼ ya xjajch jokintik te machʼatik ma lek stalelike?

Kʼoponaik 1 Corintios 15:33 sok albeyaik skʼoplal ini:

¿Machʼatik maba ya skʼan ya ajokin? ¿Bin yuʼun?

Kʼoponaik Salmo 119:63 sok albeyaik skʼoplal ini:

¿Bin stalel ya akʼan te ayuk yuʼun te awamigotake?

Jun moch te yichʼoj manzanaetik. Jpʼij manzana te ay yusil yak ta yakʼel ta kʼaʼel te yantike. — Jpʼij manzana te kʼaʼem ya xjuʼ ya skʼaʼtes te yantike. Jaxan te jaʼate, ¿bin-utʼil ya xjuʼ ya yutsʼinat teme ya ajokin te machʼatik maba lek stalelike?

4. Ma puersa pajalotik sok te kamigotaktike

Te Biblia ya yalbey skʼoplal chaʼtul israel-winiketik—te David sok te Jonatán—te mero la yamigoin sbaik manchukme ma pajal yaʼbilalik sok te bin kʼax ta skuxlejalik. Kʼoponaik 1 Samuel 18:1 sok albeyaik skʼoplal ini:

¿Bin yuʼun te ma puersa pajal kaʼbilaltik sok te kamigotaktik o te pajal ay jtakʼintik soke?

Kʼoponaik Romanos 1:11, 12 sok albeyaik skʼoplal ini:

¿Bin-utʼil ya yakʼbey sba yip yoʼtanik te machʼatik kʼux ta yoʼtanik te Jehová?

¿Bin-utʼil la sta yamigotak jtul kerem manchukme la skuy te ma stae? Ilawilik te VIDEO sok albeyaik skʼoplal ini:

VIDEO: Ya xjuʼ ya jta kamigotaktik te banti ya jkuytik te maʼyuke (5:06)

¿Bin yuʼun la smel yoʼtan te smeʼ stat te Akil ta swenta te yamigotak la sta ta escuelae?
¿Bin yuʼun te Akil la smulan yamigoinel te keremetike?
¿Bin la spas yuʼun maba stukel ya yaʼiy sba?

5. ¿Bin-utʼil ya jtatik lekil kamigotaktik?

Ilawil bin-utʼil ya xjuʼ ya ata lekil awamigotak sok bin-utʼil ya xjuʼ ya xkʼoat ta lekil amigo. Ilawilik te VIDEO.

VIDEO: ¿Bin yilel te smelelil amigoe? (4:14)

Te bin chiknaj ta video ‹¿Bin yilel te smelelil amigoe?›. Jtul jchʼiel achʼix joytaybil yuʼun te yamigotak te yanyantik yaʼbilalik, stsʼumbalik sok yanyantik te bin ya smulanik spasel.

Kʼoponaik Proverbios 18:24 sok 27:17, sok albeyaik skʼoplal ini:

¿Bin-utʼil ya skoltay sbaik te machʼatik yamigo sbaike?
¿Aybal ataoj lekil awamigotak jich bitʼil ya yal te Proverbios? Teme maʼuke, ¿bin ya xjuʼ ya apas yuʼun ya ata?

Kʼoponaik Filipenses 2:4 sok albeyaik skʼoplal ini:

Swenta ya ata lekil awamigotak, ya skʼan te lekil amigoat-euke. ¿Bin-utʼil ya xjuʼ lekil amigo ya xkʼoat?

Dibujoetik te banti ya xchiknaj jtul achʼix te ya sjokin te yamigatak: 1. Te achʼix ya skʼopon jtul yamiga ta teléfono. 2. Ta sNail Tsoblej ya sjuk ta kʼop jtul yamiga te ayix yaʼbilal. 3. Te achʼix ya yulaʼtay jtul yamiga te yak ta mel-oʼtan. — Swenta ya ata lekil awamigotak, ya skʼan te ***lekil amigoat-euke.***

AY MACHʼATIK JICH YA YALIK: «Maʼyuk skʼoplal te bin yilel stalel te kamigoe, jaʼnax teme lek ya yilone».

¿Bin ya awal te jaʼate?

¿BINTIK LA JNOPTIK?

Kʼalal ya jtsatik ta lek te kamigotaktik, ay bin lek ya jtatik-a sok ya kakʼbeytik stseʼelil yoʼtan te Jehová.

¿Jilbal ta awoʼtan into?

¿Bin yuʼun mukʼ skʼoplal ta yoʼtan te Jehová te bin yilel stalel te kamigotaktike?
¿Machʼatik maba ya skʼan ya kamigointik?
¿Bin-utʼil ya xjuʼ ya xjajch awamigoin te machʼatik lek ta jokinele?

Laj koʼtan ta snopel ta:

Pasa awil ini

Pasa tulan ta snaʼbeyelxan sba te hermanoetik ta congregación.

Pasaxan awil ini:

Your other goal

YA XJUʼ YA ANOPXAN INI

Ilawil bin-utʼil ya xjuʼ ya skoltayotik ta yorail wokol te kamigotaktike.

«Jletik kamigotaktik te bitʼil mato xtal te tulan wokolil» (Te J-ilkʼinal ta toyol, noviembre 2019)

Ilawil bin ya xjuʼ ya skoltayat ta stael lekil awamigotak.

«¿Bin yilel stalel te lekil amigoe?» (Te sujtib te bintik ya sjojkʼoyik te jchʼieletik [volumen 1], capítulo 8)

¿Bin ya skʼan ya anaʼ ta swenta te sleel awamigotak ta Internet?

Pʼijme xa awakʼ aba teme ya atuuntes te redes sociales (4:12)

Ilawil bin yuʼun la sjeltay te yamigotak jtul winik, kʼopona te bin kʼax ta skuxlejal: «Ya jkʼan-a te ayuk jpapae».

«Jelontesbot skuxlejalik yuʼun te Biblia» (Te J-ilkʼinal ta toyol, 1 yuʼun abril 2012)