¿Bin yuʼun ya kakʼ jbatik ta stojol te Jehová?

«Ahcʼabe la stehcʼan sba ta jtojol jtuhl chʼul aʼbat yuʼun Dios, ha te ayon ta scuenta» (HECH. 27:23).

1. 1) ¿Bin-a te ya skʼan ya spas te machʼa ya skʼan ya yichʼ jaʼe? 2) ¿Bintik jojkʼoyeletik ya kilbeytik sujtib?

«TA SKAJ te la yakʼ sba ta lajel te Jesucristoe, ¿labal asujtesix awoʼtan ta swenta te amule sok labal awakʼix aba ta stojol te Jehová yuʼun jich ya apasbey te skʼanojel yoʼtane?». Jaʼ jun jojkʼoyel te ya yichʼ pasel ta slajibal te discurso te ya yichʼik akʼbeyel te machʼatik ya yichʼik jaʼe. Pero, ¿bin yuʼun ya skʼan ya yakʼ sbaik ta stojol Jehová te jchʼuunjeletike? ¿Bin lekilal ya staik te kʼalal jich ya spasike? ¿Bin yuʼun mukʼ skʼoplal te jich ya spasik yuʼun ya yichʼ ta wenta te Jehová te aʼtelil ya spasik ta stojole? Swenta ya jtabeytik sujtib te jojkʼoyeletik ini nail ya skʼan ya xkʼot ta koʼtantik bin-utʼil-a te ya kakʼ jkuxlejaltik ta stojol te Jehová.

2. ¿Bin-utʼil-a te ya kakʼ jkuxlejaltik ta stojol te Jehová?

² ¿Bin-utʼil-a te ya kakʼ jkuxlejaltik ta stojol te Jehová? Te bin ya skoltayotik ta stabeyel te sujtibe jaʼ te bin la yal te Pablo te kʼalal ay ta jun barco te nopol ya xmulix ta mar-ae. Te Pablo jich la yal ta stojol te Jehová: «[Te Dios] te ayon ta scuenta», jich la yakʼ ta naʼel te jaʼ uʼuninbil yuʼun te Jehová (kʼopona Hechos 27:22-24). Manchukme ay «ta scʼab pucuj swohlol te bahlumilale», te jchʼuunjelotik jaʼ yuʼunotik te Jehová (1 Juan 5:19). ¿Bin-utʼil juʼem kuʼuntik? Jaʼ te kʼalal la kakʼ jkuxlejaltik ta stojol te Jehová —la kakʼ jkʼoptik sok la kaltik ta jamal te ya jkʼotestik ta pasel— ta patil, la kichʼtik jaʼ.

3. ¿Bin la yakʼ ta ilel te kʼalal la yichʼ jaʼ te Jesuse, sok bin ya spasik-euk te jchʼuunjeletik yuʼun Cristo?

³ Jich la yakʼ kiltik te Jesús te kʼalal la yichʼ jaʼe, la yakʼ ta ilel ta komonsitil te jaʼ ya skʼan ya spas te skʼanojel yoʼtan te sTate. Te Jesús ayin ta lum Israel, te jaʼ jun nación yuʼun Dios, jich yuʼun ma puersaukix-a te ya yakʼ skuxlejal ta stojol te Diose. Jaʼnix jich maba la spas swenta ya schʼuun te bin ya yal te Ley. Te bin la yakʼ ta ilel te kʼalal la yichʼ jaʼe, jaʼ te bin ya yal te Biblia te la yalbey te Jehová: «Ilawil, talemon [...] yuʼun ya jpasbat bin ya scʼan awoʼtan» (Heb. 10:7; Luc. 3:21). Jich, te kʼalal la yichʼ jaʼe, jich kʼot te la stejkʼan sba ta stojol te sTat swenta ya spasbey te skʼanojel yoʼtane. Ta kʼajkʼal ini, te jchʼuunjelotik yuʼun Cristo ya kichʼtik jaʼ jich bitʼil la spas te Jesús, pero te joʼotik ya jpastik swenta ya kakʼtik ta ilel ta komonsitil te la kalbeytikix ta oración te Dios te la kakʼix jkuxlejaltik ta stojol.

Te lekilal ya jtatik te kʼalal ya kakʼ jbatik ta stojol Dios

4. ¿Bin ya yakʼ jnoptik te bin-utʼil la yamigoin sbaik te David sok te Jonatán?

⁴ Ma biluknax te ya kakʼ jbatik ta stojol te Diose. Kʼaxme mukʼ skʼoplal. Pero, ¿bintik lekilal ya jtatik yuʼun? Te bin ya skoltayotik yuʼun ya xkʼot ta koʼtantik jaʼ te ya jnoptik te lekilal ya staik te machʼatik jun ayike. Jich bitʼil te machʼa ya skʼan ya sta yamigo, nail ya skʼan ya yakʼ ta ilel te lek ta amigoinel. Ya skʼan kʼoem ta yoʼtanik te talel kʼaxel ya skʼan ya skanantay sbaik. Jun ejemplo te ya yal te Biblia jaʼ te David sok te Jonatán, te kʼax tʼujbil te bitʼil la yamigoin sbaik sok te la yalbey sbaik te lek ya yil sbaik spisil-ora (kʼopona 1 Samuel 17:57 sok 18:1, 3). Ta kʼajkʼal ini maʼyuk bayal machʼatik jich ya yamigoin sbaik. Pero jichnix bitʼil te namey, te machʼatik lek yamigoinej sbaik jun ayik sok ya skoltay sbaik (Prov. 17:17; 18:24).

5. ¿Bin ya skʼan ya spas jtul j-abat teme ya skʼan ya xjil sok te yajwale?

⁵ Ta lum Israel jaʼnix jich ya xjuʼ-a te jun yoʼtan sbaik te j-abat sok te yajwale. Te Ley jich ya yal-a: «Yan teme ya yal te abat: ‹Cʼux ta coʼtan te cajwal, te quiname, soc te jnichʼnab, ma jcʼan xjilon ta libre›, teme xie, jich yuʼun te yajwal ya me yicʼ bael ta stojol Dios, ya me xba stejcʼan ta tiʼnail, o teme jaʼ ta bay smarcoile, te yajwal ya me sjutbey xchiquin ta mucʼul aguja, jich me ya xjil ta abatil ta jcʼaxel» (Éx. 21:5, 6, Xchʼul Cʼop Dios ta Tzeltal yuʼun Oxchuc soc Tenejapa, [TZOXCH]). Jich bitʼil la jkʼopontikixe, te j-abat ya xjuʼ ya xjil sok te yajwal teme ya yal ta jamal te ma skʼan ya xjilix ta libre.

6, 7. 1) ¿Bin lekilal ya staik te machʼatik ya yakʼ skʼopik o ya schap skʼopik? 2) ¿Bin yuʼun mukʼ skʼoplal te ya kakʼ jbatik ta stojol te Jehová?

⁶ Jaʼnix jich te machʼatik nujpunemik yame skʼan te jun yoʼtan ya yakʼ sbaik ta stojol te sjoyike. Te machʼa ya xnujpun ya yalbey ta jamal te machʼa ya xnujpun soke te jun yoʼtan ya yakʼ sba ta stojol. Te machʼatik jichnax yikʼoj sbaik ma xjuʼ te jun yoʼtan ya yaʼiy sbaik ta yutil snaik jich bitʼil te machʼatik nujpunemike. Sok maniwan ya spasik tulan o maba mukʼ skʼoplal ya yilik te ya schajpanik sok slekil yoʼtanik te kʼop ya xjajch yuʼunike (Mat. 19:5, 6; 1 Cor. 13:7, 8; Heb. 13:4).

⁷ Jaʼnix jich ta swenta te aʼtelil. Jaʼto tal ta namey kʼinal, ya spasik contrato te ants winiketike (Mat. 20:1, 2, 8). Te kʼalal ay machʼa ya spas jun negocio o ya xjajch ta aʼtel ta stojol yan ants winik, ya spasik firmar jun contrato swenta maʼyuk machʼa ya xchʼay stakʼin-a. Jich bitʼil la kiltikixe, te machʼatik ya yamigoin sbaik, te machʼatik nujpunemik o te machʼatik ya spasik jun negocio jaʼ junxan yoʼtan ya yaʼiy sbaik-a te kʼalal ya yakʼ skʼopik o ya schap skʼopik. Yan stukel te bitʼil kamigoinej jbatik sok te Diose ay bin-a te mukʼxan skʼoplal te ya yakʼ te jun koʼtantik ya kaʼiy jbatik soke: jaʼ te kʼalal ya kakʼ jbatik ta stojol, melel ya kalbeytik ta jamal te jaʼ yuʼun ya xkʼot te jkuxlejaltike. Ta ora ini ya kalbeytik skʼoplal te lekilal la staik ta namey kʼinal te machʼatik la yakʼ sbaik ta stojol te Diose, sok ya kiltik bin yuʼun te pajal sok te kʼalal ay machʼatik ya schap skʼopike.

Te lum Israel la sta lekilal te kʼalal la yakʼ sbaik ta stojol te Diose

8. ¿Bin-utʼil la yichʼik ilel yuʼun Dios te israeletik te kʼalal la yakʼ sbaik ta stojole?

⁸ Te israeletik la yakʼ sbaik ta stojol te Jehová te kʼalal la yakʼ skʼopik ta stojol. La stsob sbaik ta stojol te Jehová ta wits Sinaí sok jich albotik yuʼun te Jehová: «Teme yac awaʼiybonic jcʼop soc teme yac acʼohtesic ta pasel te chapbil-cʼop cuʼune, haʼex me tsahbil cʼulejalil cuʼun ya xcʼohex ta yohlil spisil te pueblohetic». Tey-abi, spisil te israeletik jich pajal la sjakʼik: «Ya jpascotic spisil te bin yaloj te Jehová» (Éx. 19:4-8). Ma jaʼuknax la yakʼ skʼopik. Te bin la yalik jaʼ señail kʼot te jaʼ yuʼunix Jehová te skuxlejalike, melel albotik te jaʼ «tsahbil cʼulejalil» ya xkʼotik.

9. ¿Bin lekilal la staik te israeletik te kʼalal la yakʼ sbaik ta stojol te Diose?

⁹ Bayal lekilal la staik te israeletik te kʼalal la yakʼik ta stojol Jehová te skuxlejalike. Te Jehová jun yoʼtan la yakʼ sba ta stojolik, la skʼuxultay sok jich la yiltiklan bitʼil snichʼnab. Jich la yaltiklanbey: «¿Ya bal xchʼay ta yoʼtan te ants te yal te la yaʼbe schuʼ, yuʼun ma ba ya scʼuxultay te machʼa la yalatay? ¡Aunque ya xchʼay ta yoʼtan te yale, mayuc bin ora ya xchʼayat ta coʼtan te haʼate!» (Is. 49:15). Te Dios la stojobtes te lum yuʼun ta swenta te Ley, la yakʼtiklanbey yip yoʼtanik ta swenta te j-alwanejetik sok la stikun chʼul-abatetik yuʼun ya xkanantayotik. Te salmista jich la yal: «[Te Jehová] la yaʼbe snaʼ Jacob te scʼop, la yaʼbe snaʼ Israel te mandariletic yuʼun soc te bintic schapoj ta yoʼtan. Mayuc hich spasbeyej te yantic nacionetic» (Sal. 147:19, 20; kʼopona Salmo 34:7, 19 sok 48:14). Jich bitʼil la skanantay te lum Israel, te lum yuʼune, jaʼnix jich ta kʼajkʼal ini ya skanantay te j-abatetik yuʼun te yakʼoj sbaik ta stojole.

¿Bin yuʼun ya skʼan ya kakʼ jbatik ta stojol te Diose?

10, 11. ¿Bin yuʼun te kʼalal ya x-ayinotik maʼyukotik ta sfamilia te Jehová?

¹⁰ Ayniwan machʼatik jich ya yalik: «¿Bin yuʼun ya skʼan ya kakʼ jba ta stojol Dios sok te ya kichʼ jaʼ swenta ya xjuʼ ya x-abatinon ta stojol?». Jaʼ ta skaj te la sta smul te Adán, te bitʼil jaʼ yal snichʼanotik jpisiltik jmulawilotik ya x-ayinotik sok maba nopol ayotik ta stojol te Diose (Rom. 3:23; 5:12). Jaʼnax ya xjuʼ ya xnoptsajotik ta stojol teme ya kakʼ jbatik ta stojol. Kiltik bin yuʼun.

¹¹ Ni jtuluk meʼil tatil juʼem yuʼun yakʼbeyel te smelelil kuxlejalil te yal snichʼnabike (1 Tim. 6:19). Ta skaj te la sta smulik te Adán sok te Eva, te kʼalal ya x-ayinotik namal ayotik ta stojol te jTatik sok te Jpaswanej kuʼuntike, jaʼ yuʼun ma xjuʼ te yal snichʼanotik ya xkʼootik (paja sok Deuteronomio 32:5). Teyto tal-abi, te ants winiketik maba ochemik ta sfamilia te Jehová.

12. 1) ¿Bin-utʼil ya xjuʼ ya x-ochik ta sfamilia te Dios te jmulawil ants winiketike? 2) ¿Bin ya skʼan ya spasik te kʼalal mato yichʼojik jaʼ-ae?

¹² Manchukme jich-abi, ta jujuntul ya xjuʼ ya jkʼanbeytik te Jehová te yakuk yikʼotik ta sfamilia te banti ay te j-abatetik yuʼune.a Pero ¿bin-utʼil ya xjuʼ te lek ya yilotik teme jmulawilotike? Te Pablo la yal te bin yuʼune, jich la yal: «Te cʼalal jcontrahinej jbahtic soc a te Diose, la yacʼ te chaʼlecub xan yoʼtan ta jtojoltic ta scuenta te laj te Snichʼane» (Rom. 5:10). Swenta ya yikʼotik ta stojol te Diose, ya skʼan ya jkʼanbeytik te lekuk te bin ya yalbotik te koʼtantike, jich ya jpastik te kʼalal ya kichʼtik jaʼe (1 Ped. 3:21). Pero ay yantik te bin nail ya skʼan ya jpastike. Jich bitʼil te ya jnaʼbeytik sba ta lek te Jehová sok te ya smukʼulin koʼtantik; jaʼnix jich te ya jsujtes koʼtantik yuʼun te jmultik sok te ya jeltaytik te jkuxlejaltike (Juan 17:3; Hech. 3:19; Heb. 11:6). ¿Bin ya skʼan ya jpastik ta patil?

13. ¿Bin yuʼun ya skʼan ya kakʼ jbatik ta stojol te Dios yuʼun ya xjuʼ ya x-ochotik ta sfamilia?

¹³ Swenta ya x-ochotik ta sfamilia te Jehová, ay bin jamal ya skʼan ya kaltik. ¿Bin yuʼun? Kaltik jun ejemplo. Jnop kaʼiytik te jtul tatil te ichʼbil ta mukʼ ta slumal ya snaʼbey sba jtul chʼin kerem te maʼyuk smeʼ stat, kʼux ta yoʼtan sok jich ya skʼan ya yil bitʼil snichʼan. Pero nail jich ya yalbey: «Ya jkʼan te ya awalbon ta jamal te jich ya awilon bin-utʼil atat te kʼuxon ta awoʼtan sok te ya awichʼon ta mukʼ spisil-ora». Teme maba jamal ya yal-abi te kereme, ma xjuʼ te jaʼ snichʼan ya xkʼot. Ta melel, ma wokoluk ta pasel te bin ya xkʼanbote. Jaʼnix jich ta swenta te Jehová: jaʼnax ya yikʼ ta sfamilia te machʼatik ya skʼan ya yakʼ sbaik ta stojole. Jich ya yal te Bibliae: «Acʼa me abaic ta scʼab Dios soc te abaqʼuetalique. Jaʼuc me cuxul smajtʼan Dios ya xcʼoex ta stojol [...] te lec yoʼtan yuʼun te Diose» (Rom. 12:1, TZOXCH).

Ya kakʼtik ta ilel skʼuxul koʼtantik sok schʼuunel koʼtantik

14. ¿Bin-utʼil ya kakʼtik ta ilel skʼuxul koʼtantik te kʼalal ya kakʼ jbatik ta stojol te Diose?

¹⁴ Te kʼalal ya kakʼ jbatik ta stojol te Dios, ya kakʼtik ta ilel te kʼux ta koʼtantike. Jaʼ pajal sok te kʼalal ay machʼa ya xnujpune. Te kʼalal ya xnujpunike, te winik ya yalbey ta jamal te ants te spisil-ora ya sjokin chikan teme ay o maʼyuk wokolil. Ma jaʼuknax ya yal ta jamal te ya xnujpun soke; jaʼnix jich ya yal te jun yoʼtan ya yakʼ sba ta stojol. Teme ma xyal-abi, snaʼoj te ma xjuʼ te ya xnujpunike. Jaʼnix jich, ma xjuʼ ya jtatik lekilal yuʼun te ya x-ochotik ta sfamilia te Jehová teme maba ya kakʼ jbatik ta stojole. Jich yuʼun te bin swentail te ya kakʼ jbatik ta stojol te Diose jaʼ te ya jkʼantik te jaʼ yuʼunotik ya xkʼootik sok te ya jkʼantik te jun koʼtantik ta stojol manchukme jmulawilotik (Mat. 22:37).

15. ¿Bin-utʼil ya kakʼtik ta ilel schʼuunel koʼtantik te kʼalal ya kakʼ jbatik ta stojol te Diose?

¹⁵ Te kʼalal ya kakʼ jbatik ta stojol te Dios jich ya kakʼtik ta ilel te ay schʼuunel koʼtantik. Ya kakʼ jbatik ta stojol te Jehová, melel ay schʼuunel koʼtantik ta stojol sok ya jnaʼtik te kʼax lek te ya kamigointike (Sal. 73:28). Ya jnaʼtik te ayniwan bin-ora wokol ya kaʼiytik te ya x-abatinotik ta stojol, melel kuxinemotik «ta yohlil te caj tsʼumbalil ini te chopol». Pero, jnaʼojtik ta lek te ya xbajt yakʼbotik bendición te Dios teme ya jpastik tulane (Filip. 2:15; 4:13). Sok jnaʼojtik te ya snaʼbotik yoʼbolil jbatik teme ay ya xchʼayotik ta swenta te jmulawilotik (kʼopona Salmo 103:13, 14 sok Romanos 7:21-25). Sok ya jnaʼtik te ya smajtantesotik teme jun koʼtantik ya kakʼ jbatik ta stojol (Job 27:5).

Te kʼalal ya kakʼ jbatik ta stojol Dios ya yakʼ stseʼelil koʼtantik

16, 17. ¿Bin yuʼun ya yakʼ stseʼelil koʼtantik te kʼalal ya kakʼ jbatik ta stojol te Diose?

¹⁶ Ya yakʼ stseʼelil koʼtantik te ya kakʼ jbatik ta stojol te Diose, melel jaʼ ya kakʼbeytik te jkuxlejaltike, sok jich bitʼil la yal te Jesús: «Ha bayel xan yutsil te machʼa ay bin ya yacʼ te bin utʼil ay bin ya yichʼ» (Hech. 20:35). Te kʼalal xtaluk ta Balumilal te sNichʼan te Diose la spas ta skuxlejal te bin ya yal te texto ini sok la sta stseʼelil yoʼtan yuʼun te la yakʼ ta ilel slekil yoʼtane. Ay baeltik te maba la skux yoʼtan sok maba weʼ swenta ya snojpteslan te ants winiketik yuʼun ya sta skuxlejalik (Juan 4:34). Jaʼ akʼbotxan stseʼelil yoʼtan te yakʼbeyel stseʼelil yoʼtan te sTate. Jaʼ yuʼun jich la yal: «Spisil ora ya jpas te bin lec yoʼtan yuʼun stuquel» (Juan 8:29; Prov. 27:11).

¹⁷ Te Jesús la yakʼbey snop te jnopojeletik yuʼun bin-utʼil ya xjuʼ ya sta stseʼelil yoʼtanik, jich la yal: «Teme ay machʼa ya scʼan ya stʼunon, acʼa sloqʼues sba ta yoʼtan» (Mat. 16:24). Te kʼalal ya jlokʼes jba ta koʼtantik —o, maba ya jpastikix te bin ya skʼan koʼtantik—, ya xnoptsajotik ta stojol te jkʼuxul oʼtanil Dios. ¿Aybal machʼa lekxan ya xjuʼ ya skanantayotik?

18. ¿Bin yuʼun te jaʼ ya yakʼxan stseʼelil koʼtantik te ya kakʼ jbatik ta stojol Dios ma jaʼuk ta stojol jtul ants winik o te ya jletik te bin ya jmulantik?

¹⁸ Te machʼatik ya yakʼ sbaik ta stojol Dios sok ya spasbeyik te skʼanojel yoʼtan jaʼ tseʼelxan yoʼtanik ma spaj te machʼatik ya xbajt ta yoʼtanik ta aʼtel ta stojol jtul ants winik o ta sleel te bin ya smulanik, jich bitʼil te ya xkʼulejubik. Te j-abatetik yuʼun Dios tseʼel yoʼtanik ta smelelil (Mat. 6:24). Jun te bin ya x-akʼbot stseʼelil yoʼtanik jaʼ te ya x-aʼtejik ta stojol te Diose, pero ma schʼay ta yoʼtanik te jaʼ la yakʼ sbaik ta stojol te Diose, ma jaʼuk ta stojol jun aʼtelil (1 Cor. 3:9). Te Jehová kʼax mukʼ skʼoplal ta yoʼtan te jun yoʼtan ya yakʼ sbaik ta stojol sok te ya spasik tulan ta abatinel ta stojol. Jaʼnix jich ya yakʼ te achʼix kerem ya xkʼotik yan buelta sok te ya xkuxinik ta sbajtelkʼinal (Job 33:25; kʼopona Hebreos 6:10).

19. ¿Bin ya xjuʼ ya staik te machʼatik yakʼojix sbaik ta stojol te Jehová?

¹⁹ Te Biblia jich ya yalbotik: «Nohpojanic ta stojol Dios, hich ya xnohpoj ta atojolic» (Sant. 4:8; Sal. 25:14). Te machʼatik ya yakʼ sbaik ta stojol te Jehová jichme ya xjuʼ ya yamigoin sbaik sok. Ta yan artículo ya kiltik bin yuʼun te ma skʼan ya xiwotik te ya kakʼ jbatik ta stojol te Dios yuʼun jaʼ yuʼunotik ya xkʼootik.

[Nota]

¿Bin sujtib ya awakʼbey?

• ¿Bin ya skʼan ya yal te ya kakʼ jbatik ta stojol te Diose?

• ¿Bin lekilal ya jtatik te kʼalal ya kakʼ jbatik ta stojol te Diose?

• ¿Bin yuʼun ya skʼan ya yakʼ sbaik ta stojol te Dios te j-abatetik yuʼune?

[Foto]

Te kʼalal ya kakʼtik ta ilel te kakʼojix jbatik ta stojol te Dios ya yakʼ stseʼelil koʼtantik