¿Bintik spasoj te Diose?

Swenta ay machʼa ya jnaʼbeytik sba ta lek, ya skʼan ya jnaʼtik te bintik juʼem yuʼun spasele. Jaʼnix jich teme ya jkʼan ya jnaʼbeytik sba ta lek te Diose, ya skʼan ya jnaʼtik te bintik spasoje. Chajpnaxniwan ya xbajt awil-a te jayebto lekilal jtaojtik ta swenta te bintik spasoj te Diose sok te snitojbey sba skʼoplal sok te bin ya jtatik ta pajel chaʼbeje.

TE DIOS LA SPAS SPISIL TE BINTIK AY YUʼUN KʼUXOTIK TA YOʼTAN

Te Jehová jaʼ Mukʼul Jpaswanej kuʼuntik, te taleliletik yuʼun te ma chikanuk ta ilel, ya xchiknaj ta swenta «te yuʼel te sbajtelkʼinal aye sok te stalel Dios stukel jamal chikan ta ilel kʼalalto ta sjajchibal te balumilal ta swenta te bintik spasoje» (Romanos 1:20). Jaʼ «la spas ta yuʼel te lumqʼuinal, ta scuenta sbihil la yaʼbe yichʼ yip te bahlumilal soc ta scuenta spʼijil yoʼtan la slim bahel te chʼulchane» (Jeremías 10:12). Ta swenta te bintik kʼax tʼujbil spasoj te Jehová ya yakʼ kiltik te kʼax kʼuxotik ta yoʼtane.

Nopanax awaʼiy te jayebto ya jmulanbeytik yutsilal te jkuxlejaltik ta swenta te jich la spasotik te Jehová te bitʼil slokʼombae (Génesis 1:27). Ta swenta-abi, ya xjuʼ ya kakʼtik ta ilel te taleliletik yuʼun te ban kʼalal ya xjuʼ kuʼuntike. La yakʼbotik ta koʼtantik te ya jkʼan ya jnaʼbeytik sbae, jaʼ-abi ya skʼan ya yal te ya xjuʼ ya xkʼot ta koʼtantik te bin ya snop sok te mantaliletik yuʼune. Kʼalal ya kakʼ ya stojobtesotik-abi, ayxan stseʼelil koʼtantik sok ay swentail ya xkʼot te jkuxlejaltike. Jaʼnix jich, ya xjuʼ ya kamigointik te Diose.

Kʼalal ya kiltik te bintik spasoj ta Balumilal te Jehová, ya yakʼ jnaʼtik te kʼuxotik ta yoʼtane. Te Biblia jich ya yal: «Maba la skom sba ta yakʼel sba ta naʼel ta swenta te bintik lek la spase. La yakʼbey tal jaʼal ta chʼulchan, la yakʼ sitinuk te yawal stsʼunubik, la yakʼbey bayal sweʼelik sok la yakʼ te kʼax tseʼeluk yoʼtanike» (Hechos 14:17). Te Diose ma jaʼuknax la yakʼbotik te bin ya xtuun kuʼuntike, jaʼnix jich la yakʼbotik spisil te bin ya yakʼbey yutsilal te jkuxlejaltike. Pero aytoxan bayal te bintik ya skʼan ya yakʼbotike.

Te Jehová la spas te Balumilal yuʼun ya xkuxinik sbajtelkʼinal tey-a te ants winiketike. Te Biblia ya yal te «ha la yaʼbe te ants-winiquetic te lumqʼuinale» sok te «ma tojoluc la spas, ha la spas scuenta yuʼun ay machʼatic ya xnahinic tey a» (Salmo 115:16; Isaías 45:18). ¿Machʼatik ya xnainik tey-a sok jayeb kʼajkʼal? Te Biblia jich ya yal: «Te machʼatic toj yoʼtanic ya me yichʼic hilel te qʼuinale, sbahtel qʼuinal ya xnahinic tey a» (Salmo 37:29).

Te Jehová la spas te Adán sok te Eva swenta ya xkuxinik ta sbajtelkʼinal. La yichʼik akʼel ta jun nichimal kʼinal «yuʼun ya xtsʼunbaj tey-a sok yuʼun ya skanantay» (Génesis 2:8, 15). Jaʼnix jich, ay bin kʼax tʼujbil akʼbotik spas yuʼun te Diose: «Akʼa ayinuk bayal awal anichʼnabik, pʼola abaik, nojesaik te balumilal sok tuuntesaik» (Génesis 1:28). Te lajuk skʼanike, kuxinik sbajtelkʼinal liʼ ta Balumilal sok stseʼelil yoʼtanik te jichuke. Pero mel-oʼtantik sba te bin la spasike, la skʼaxuntayik mantal sok la xchʼayik te «toj yoʼtanic» ya x-ilotik yuʼun te Diose sok te ya «yichʼic hilel te qʼuinale». Manchukme la skʼaxuntayik te mantale yame kiltik bael te maba jelon te skʼanojel yoʼtan Dios ta swenta te ants winiketik sok te Balumilale. Pero nail ya kiltik te binxan spasoj te Diose.

TE DIOSE YAKʼOJBOTIK TE BIBLIA

¿Bin yuʼun la yakʼbotik te Biblia te Jehovae? Ta sbabial, yuʼun jich ya jnaʼbeytik sba-a (Proverbios 2:1-5). Te Biblia ma xyakʼbotik sujtib spisil te jojkʼoyeletik ya jpasbey jbatik ta swenta te Diose, maʼyuk junuk libro te ya xjuʼ ya spase (Eclesiastés 3:11). Pero spisil te bin ya yalbotik te Bibliae ya skoltayotik yuʼun ya jnaʼbeytik sba te Diose. Te kʼalal ya jkʼopontike ya xjuʼ ya jnaʼtik te bin yilel ya yil te ants winiketike. Jich ya xjuʼ ya jnaʼtik te machʼatik lek ilbilik yuʼune (Salmo 15:1-5). Teyme ya jnoptik-a te bin-utʼil ya xjuʼ ya kichʼtik ta mukʼ te Diose, te bin lek sok te bin ma lek ta pasel sok te bin ya snop ta swenta te sleel jbiluktike. Jaʼnix jich te Biblia ya yakʼ jnaʼbeytik sba ta lek te Jpaswanej kuʼuntik ta swenta te bintik la yal sok te bintik la spas te sNichʼane, jaʼ te Jesucristoe (Juan 14:9).

Te schebal swentail te bin yuʼun yakʼojbotik te Biblia te Jehovae, jaʼ yuʼun te jich ya jtatik te stseʼelil koʼtantik soknix te ayuk swentail te jkuxlejaltike. Tey ya scholbotik-a te bin ya xjuʼ ya jpastik yuʼun ayuk stseʼelil koʼtantik sok te jfamiliatik, te lekuk ya kaʼiy jbatik sok te yakuk xkujch kuʼuntik te bin ya jmel koʼtantik yuʼune. Jich bitʼil ya kiltik bael ta patil, te Biblia ya yakʼbotik sujtib te jojkʼoyeletik te mukʼ skʼoplal ya jpasbey jbatike, jich bitʼil: ¿Bin yuʼun te ay bayal wokolile? ¿Bin ya jmaliytik ta pajel chaʼbej? Jaʼnix jich ya scholbotik te bin spasoj te Dios yuʼun ya xkʼot ta pasel te skʼanojel yoʼtane.

Ay bintikxan ya yakʼ kiltik te maʼyuk yan libro te pajal sok te Biblia sok te jaʼ lokʼem tal ta yoʼtan te Diose. Manchukme ayniwan 40 ta tul winiketik la stsʼibayik sok te jalajniwan ta tsʼibayel 1,600 jaʼbil, maba ya skontrain sba te bin ya yale, melel yuʼun-nix jaʼ lokʼem tal ta yoʼtan-a te Diose (2 Timoteo 3:16). Te Biblia ma pajaluk sok te yantik libroetik te antiguoixe, te bintik tsʼibaybil tey-ae maba jelonem manchukme kʼaxemix tal bayal jaʼbil, jich ya yakʼ kiltik te junetik yuʼun Biblia te yichʼoj tsʼibayel ta namey kʼinale. Jaʼnix jich, maʼyuk machʼa juʼem yuʼun slajinel manchukme ay machʼatik skomojik te ya yichʼ kʼasesel ta yan kʼopil, te ya yichʼ pukel sok te ya yichʼ kʼoponele. Ma jaʼuknax-abi, jaʼ jun libro te bayal yichʼoj chonel sok te bayal kʼopil kʼasesbil ta swolol te Balumilale. Te bitʼil ay kuʼuntik te Biblia ta ora ini ya yakʼ kiltik te yuʼun-nix jaʼ sKʼop-a te Dios te «stalel ay sbahtel qʼuinal» (Isaías 40:8).

TE DIOSE YALOJ TA JAMAL TE YA SKʼOTES TA PASEL TE SKʼANOJEL YOʼTANE

Te binxan spasoj te Diose jaʼ te jamal la yal te ya skʼotes ta pasel te skʼanojel yoʼtan ta swenta jun majtanil te kʼax mukʼ skʼoplale. Jich bitʼil la kalbeytik skʼoplal ta sjajchibale, te Dios jaʼ la skʼan te yakuk xkuxinik sbajtelkʼinal te ants winiketik liʼ ta Balumilal. Pero la sta smulik te kʼalal la skʼaxuntaybeyik smantal Dios te Adán sok te Eva, la schʼayik te kuxlejalil ta sbajtelkʼinal sok jich kʼot ta stojolik-euk te yal snichʼnabike. «Ta swenta jtul winik och mulil ta balumilal sok ta swenta te mulil och te lajele, jich te lajele kʼax ta stojol spisil te ants winiketik, melel spisil la sta smulik» (Romanos 5:12). Ta swenta te la skʼaxuntayik mantale, jich yilel te ma xkʼotix ta pasel te skʼanojel yoʼtan te Diose. Pero, ¿bin la spasix-a te Jehovae?

Ay bin la spas te snujpʼ sba sok te stalele. La spas te bin stojile, la yakʼbey castigo te Adán sok te Eva ta skaj te la skʼaxuntayik mantale, pero ta swenta te skʼuxul yoʼtan ay bin la spas yuʼun ay bin ya yakʼbey smaliy te ants winiketike. Te Jehová la stuuntes te spʼijil swenta ya schajpan te kʼop sok oranax la yal te bin-utʼil ya xbajt schajpane (Génesis 3:15). Jaʼ te ya skoltayotik lokʼel yuʼun te mulil sok te lajel ta swenta te sNichʼane, jaʼ te Jesucristoe. ¿Bin smakojbey skʼoplal-abi?

Te Jehová la stikun tal ta Balumilal te Jesús swenta ya skoltay te ants winiketik ta skaj te la skʼaxuntay mantal te Adane, jichme ya yakʼbey snop te ants winiketik te be yuʼun kuxlejalil sok te ya «yakʼ sba ta lajel yuʼun jich ya sta skolelik bayal ta tul ants winiketik»a (Mateo 20:28; Juan 14:6). Te Jesús juʼ yuʼun stojel te jkoleltik melel tojil winik jich bitʼil te Adane, pero te Jesuse spisil-ora la schʼuunbey smantal te Dios jaʼto te kʼalal laje. Ta skaj te ma snujpʼuk ya xlaje, te Jehová la schaʼkuxajtes sok la yakʼ te ya sujt bael ta chʼulchan. Juʼ yuʼun spasel te bin ma juʼ yuʼun te Adane: jaʼ te ya yakʼbey skuxlejal sbajtelkʼinal te ants winiketik te ya schʼuunik mantale. «Jich bitʼil te bayal machʼatik la sta smulik ta swenta te la skʼaxuntay mantal jtul winik, jaʼnix jich bayal machʼatik toj ya x-ilotik yuʼun Dios ta swenta jtul winik te la schʼuun mantal stukele» (Romanos 5:19). Ta swenta te la yakʼ sba ta lajel te Jesús, te Dios ya skʼotes ta pasel te bin jamal yaloje: jaʼ te ya xkuxinik sbajtelkʼinal te ants winiketik liʼ ta Balumilal.

Te bin-utʼil la schajpan te kʼop te Jehovae, ya skoltayotik ta snaʼbeyelxan sba ta lek. Ya yakʼ jnoptik te maʼyuk bin ya xmakot yuʼun ya skʼotes ta pasel te skʼanojel yoʼtane, melel te skʼope yananix skʼotes ta pasel-a (Isaías 55:11). Jaʼnix jich ya yakʼ kiltik te kʼax kʼuxotik ta yoʼtane. «Te bitʼil la yakʼ ta ilel te skʼuxul yoʼtan Dios ta jtojoltik jaʼ ini: te Dios la stikun tal ta balumilal te jip jtul sNichʼan yuʼun jich ya jta jkuxlejaltik ta swenta. Jich ay skʼoplal te kʼuxul oʼtanile: ma jaʼuk te kʼux la kaʼiy ta koʼtantik te Diose, jaʼ kʼux la yaʼiyotik sok la stikun tal te sNichʼan yuʼun ya yakʼ ta milbil majtanil ta skaj te jmultik, yuʼun jich lek ya kil jbatik sok-a te Diose» (1 Juan 4:9, 10).

Te Diose spasemal yoʼtan la yakʼ ta lajel ta jtojoltik te sNichʼane, jaʼ-abi ya yakʼ jnaʼtik te ya «yakʼbotik ta swenta slekil yoʼtan» te bintik jamal yalojbotike (Romanos 8:32). ¿Bin-a te yaloj ta jamal te ya spas ta jtojoltike? Akʼa kiltik.