«Ya me yacʼ sit te bin ya xcol ta qʼuinal; ya me yaʼbotic bendición te Diose, ha te Dios cuʼuntique» (SALMO 67:6).

Mulana ta sbajtelkʼinal te bendisionetik yuʼun te Jpaswanej kuʼuntike

Te Dios la yalbey te j-alwanej Abraham te «spisil nacionetic ta swohlol bahlumilal» ya yichʼik bendision ta swenta stsʼumbal (Génesis 22:18). ¿Machʼawan yak ta albeyel skʼoplal?

Kʼaxemix ta dos mil jaʼbil, te Dios la yakʼbey yuʼel te Jesús yuʼun ya spas milagroetik. Te milagroetik ini, la yakʼ ta ilel te bin la yalbey Dios te Abraham te ya yakʼbey bendision spisil nasionetik te jaʼnax ya xkʼot ta pasel ta swenta te Jesús te talem ta stsʼumbal te Abraham (Gálatas 3:14).

Te milagroetik la spas te Jesús koltaywan yuʼun jich te ants winiketik ya snaʼbeyik sba jich bitʼil j-alwanej te tsabil yuʼun Dios yuʼun ya yakʼbey bendision te ants winiketike. Jaʼnix jich la yakʼik ta ilel te bin-utʼil te Dios ya xbajt stuuntes te Jesús yuʼun ya yakʼbotik bendision ta sbajtelkʼinal. Kiltik bin-utʼil la yakʼ ta ilel tʼujbil taleliletik te Jesús ta swenta te milagroetik la spase.

La yakʼ ta ilel skʼuxul yoʼtan sok la slekubtes te machʼatik ay schamele.

Ta jun buelta, jtul winik te yichʼoj kʼaʼel chamel la skʼanbey te Jesús te yakuk xlekubtesote. Te Jesús la spik sok la yalbey: «Ya jcʼan, acʼa lecubucat», ta oranax chʼay bael te kʼaʼel chamele (Marcos 1:40-42).

Maʼyuk stʼutʼil sok la smakʼlin te machʼatik ayik ta wiʼnal.

Te Jesús ma la skʼan te ya xlajik ta wiʼnal te ants winiketike. Ta bayal buelta la spas milagroetik yuʼun ya smakʼlin bayal ta tul ants winiketik sok la yakʼ pʼoluk chaʼoxpejch panetik sok chaʼoxkojt chayetik (Mateo 14:17-21; 15:32-38). Spisil noj schʼujtik ta lek sok aytoxan la spas sobra-a te weʼelile.

La snaʼbey yoʼbolil sba te yantik sok la schaʼkuxajtes te machʼatik lajemikixe.

Kʼalal la yil te Jesús te laj te jip jtul yal-a te jtul meʼba ants sok te maʼyukix machʼa ya xkanantayot yuʼune, te Jesús «stsʼujet ta yoʼtan la yaʼiy», jaʼ yuʼun la schaʼkuxajtes te kereme (Lucas 7:12-15).

BENDISIONETIK TA SBAJTELKʼINAL TA SWOLOL BALUMILAL

Te Jesús la yakʼ ta ilel te ya xjuʼ ya yakʼbey bendisionetik spisil te ants winiketik te Diose. Kʼalal ya xchaʼsujt tal te Jesús, jichnix te bitʼil la yale, te Machʼa spisil ya xjuʼ yuʼune ya xbajt stuuntes ta spasel milagroetik te maʼyuk banti jich kʼoem ta pasel-a ta swolol te Balumilal.

¿Binwan yilel te kuxlejalil kʼalal te Dios ya skʼotes ta pasel te bin la yalbey ta jamal te Abrahame? Te machʼatik kʼux ta yoʼtanik sok te ya yichʼik ta mukʼ te Diose, «ya me yichʼic hilel te qʼuinal soc ya me smulanic bayel lamal qʼuinal» (Salmo 37:11). Jaʼnix jich, ya xlaj skʼoplal te «lajel, mel-oʼtan, oqʼuel o te bin cʼux» (Apocalipsis 21:4).

¿Mabal jichuk te jaʼ jun mukʼul bendision te ya xjuʼ xkuxinotik sok slamalil koʼtantik liʼ ta Balumilal? Teme ya akʼan ya anaʼbeyxan skʼoplal ta swenta te bendisionetik ya yakʼ te Diose, ochan ta www.pr418.com/tzh.