Jichuk ya kaʼiy jbatik te bitʼil ya yaʼiy sba te yantike

Te bitʼil jich ya kaʼiy jbatik te bin-utʼil ya yaʼiy sba te yantike, jaʼ te yakuk jnaʼtik te bin ya snopik, te bin mukʼ skʼoplal ya yilik sok te bintik ya xtuun yuʼunik. Ya kakʼtik ta ilel te kʼalal ya jkʼan ya jkoltaytik te yantike. Teme jich ya kakʼtik ta ilel te kʼalal ya xlokʼotik ta scholel skʼop Dios, yakotik ta skʼayinbeyel stalel te Jehová te kʼux ta yoʼtan te ants winiketik sok jich ya snaʼbeyik sba te Jehová (Flp 2:4).

Te jichuk ya kaʼiytik te bin-utʼil ya yaʼiy sba te yantike, ma jaʼuknax ya kakʼtik ta ilel te kʼalal ya xnojpteswanotik, jaʼnix jich ya xchiknaj te kʼalal ya jchʼam kaʼiytik te yantik, ta jtaleltik sok ta jsit kelawtik. Ya skʼan ya kakʼtik ta ilel te ay skʼoplal ta koʼtantik, te bin ya smulan, te bin schʼuunej, te bin yak ta kʼaxel ta skuxlejal, te yakuk kakʼbeytik consejo sok te yakuk jkoltaytik, pero ma skʼan ya jsujtik. Kʼalal ya skʼanik te yakuk jkoltaytik te machʼa ya jcholbeytik skʼop Dios, ya yakʼbotik tseʼelil koʼtantik.

KʼALAL LA AWILIX-A TE VIDEO TE STSEʼELIL KOʼTANTIK TA YOTSESEL JNOPOJELETIK. JLEKUBTESTIK TE BIN-UTʼIL YA XPʼIJUBTESWANOTIK: JICHUK YA KAʼIY JBATIK TE BITʼIL YA YAʼIY SBA TE YANTIKE, AKʼBEYA SUJTIB TE JOJKʼOYELETIKE:

• 

  ¿Bin-utʼil la yakʼ ta ilel te Rita te ya xkʼot ta yoʼtan te bin yaʼiyel ya yaʼiy sba te Coral te kʼalal tibil kʼote?

• 

  ¿Bin-utʼil la yakʼ ta ilel te Rita te ya xkʼot ta yoʼtan te bin yaʼiyel ya yaʼiy sba te Coral te kʼalal kʼax lujben la yaʼiy sba yuʼun ya snop te Bibliae?

• 

  ¿Bin-utʼil la yakʼ ta ilel te Rita te ya xkʼot ta yoʼtan te bin yaʼiyel ya yaʼiy sba te Coral te kʼalal la yal te ma xyakʼbey yorail te bin ya spase?