Spisilik ya skʼanik te lekuk te skuxlejalik
¿Binwan yilel ya amulan te akuxlejal ta pajel chaʼbej sok te afamiliae? Jaʼniwan ya amulan te ayuk stseʼelil awoʼtan, te maʼyukix chamel, sok te ayuk lamalkʼinale. Jaʼ te bin ya skʼan spisil te ants winiketike.
Pero bayal machʼatik ya snopik te wokol ta tael-abi, melel yilojik te oranax ya xjuʼ ya xjelon te kuxlejalile. Jich bitʼil ta skaj te chamel COVID-19 bayal jelonem skuxlejal te ants winiketik, maʼyuk takʼin sok bayal lajik yuʼun. Jaʼ yuʼun ay ya snopik te maʼyuk bin-ora ya xkʼot ta pasel te bin ya skʼanik ta pajel chaʼbej.
Ta swenta te bintik yak ta kʼaxel, te ants winiketik ya sleik koltayel yuʼun jich lek-a te skuxlejalike. Ay ya yakʼ smukʼul yoʼtanik ta swenta te bin ma staik ta ilel, jich bitʼil te destino o te suerte. Ay machʼatik ya skuyik teme ya snopik jun sok teme ay stakʼinik jaʼ ya x-akʼbotik te bin ya skʼan yoʼtanik. Sok ay yantik ya yalik te tikʼnax-a te lek yoʼtanike.
Pero spisil ini, ¿yabal yakʼbat te bin ya akʼan ta pajel chaʼbej? Nopa ta swenta te jojkʼoyeletik ini:
¿Bintik ya smukʼulin awoʼtan?
¿Yabal yakʼbat lekil kuxlejalil te nop jun sok te takʼine?
¿Tikʼnaxbal-a te lek awoʼtan yuʼun ya ata lekilal?
¿Banti ya xjuʼ ya ata lekil koltayel?
Te revista ini ya skoltayat ta stabeyel te sujtibe.