Jaʼatnix ya atsa te bin yilel ya akʼan te akuxlejal

Ayix tal 3,500 jaʼbil, te Jehová la yalbey te ants winiketik te bin ya skʼan ya spasik yuʼun lek-a te skuxlejalik, jich la yal: «La jcaʼbeyex atsahic te cuxlejal soc te lajel, te bendición soc te chopol cʼoblalil. Tsaha hiche te cuxlejal, scuenta yuʼun ya xcuxajat soc te patil al-nichʼaniletic awuʼun» (Deuteronomio 30:19).

Ya skʼan te lekuk te bin ya spasik, yuʼun jich lek ya xkuxinik-a. Jaʼnix jich te joʼotik ya skʼan te lekuk te bin ya jpastik, jaʼ yuʼun te Biblia jich ya yal: «Te cʼux yac awaʼiy ta awoʼtan te Jehová te Dios awuʼun, te yac awichʼbe ta mucʼ scʼop» (Deuteronomio 30:20).

¿BIN-UTʼIL YA XJUʼ TE KʼUX TA AWOʼTAN TE JEHOVÁ SOK TE YA ACHʼUUNBEY TE SKʼOPE?

NOPA TE BIN YA YAL TE BIBLIA. Yuʼun kʼux ya awaʼiy-a te Jehová, nail ya skʼan ya awil te bin ya yal te Biblia. Te kʼalal jich ya apas, yame ata ta ilel te lek yoʼtan sok ya skʼan te lekuk ya xkuxinat. Jaʼnix jich ya skʼan te ya akʼopon, melel bayal akʼoplal ta yoʼtan (1 Pedro 5:7). Teme ya apas tulan ta snaʼbeyel sba, te Biblia ya yal te ya xnoptsajxan ta atojol (Santiago 4:8).

PASA TA AKUXLEJAL TE BIN YA ANOPE. Yuʼun ya achʼam awaʼiy te bin ya yal te Dios, ya skʼan ya atʼun te tojobteseletik te ay ta Biblia, yuʼun jich ya xkʼot ta atojol te bin ya yal te Josué 1:8: «Lec ya xcʼohat bayuc ya xbehenat soc lec ya xcʼoht spisil bintic yac apas».