TE BIN-UTʼIL YA XLAJ SKʼOPLAL TE PʼAJAW

4 | Lea te koltayel yuʼun te Dios

Te Biblia jich ya yal:

«Yan te sit ya yacʼ te Espíritu, ha te scʼuxul-oʼtanil, tseʼel-oʼtanil, lamal qʼuinal, ya xcuhch yuʼun, yutsil-oʼtanil, jun-oʼtanil, schʼuhunel-oʼtanil, manso-oʼtanil, soc ya xhuʼ yuʼun scomel sba» (GÁLATAS 5:22, 23).

Te bin ya skʼan ya yal:

Ta swenta te koltayel yuʼun te Dios ya xjuʼ ya jtsaltik te pʼajawe. Te chʼul espíritu ya xjuʼ ya skoltayotik ta schʼitesel taleliletik te maba ya xjuʼ ya jchʼitestik ta jtukeltiknaxe. Yuʼun ya jtsaltik-a te pʼajawe, jaʼ lek te ya jletik te koltayel yuʼun te Diose. Teme jich ya jpastik, ya xjuʼ te jich ya kaltik bitʼil te Pablo: «Spisil ya xjuʼ kuʼun spasel ta swenta te machʼa ya yakʼbon yip koʼtane» (Filipenses 4:13, TNM). Jichme ya xjuʼ ya kaltik: «Te coltayel cuʼun ya xtal ta stojol Jehová» (Salmo 121:2).

Pasa awil ini:

«Ta namey ya x-utsʼinwanon-a, pero te Jehová la skoltayon ta slekubtesel te jtalele» (WALDO).

Kʼanbeya sok spisil awoʼtan te Jehová te yakuk yakʼbat te schʼul espíritu sok te yakuk skoltayat ta stael lekil taleliletik (Lucas 11:13). Jich bitʼil te kʼuxul oʼtanil, te lamalkʼinal sok te ya xkujch kuʼuntik te taleliletik-abi ya skoltayotik ta stsalel te pʼajaw. Ilawil te bin ya yal te Biblia ta swenta te taleliletik-abi sok ilawil bin-utʼil ya xjuʼ ya awakʼ ta ilel ta akuxlejal. Jaʼnix jich tulan skʼoplal te ya ajokin te machʼatik ya yakʼik ta ilel te taleliletik-abi, melel ya xjuʼ ya skoltayat ta yakʼel ta ilel kʼuxul oʼtanil sok ta spasel lekil aʼteliletik (Hebreos 10:24).

Te bin kʼax ta skuxlejal (WALDO)

La yijkitay te pʼajaw sok te utsʼinwanej

Te kʼalal chʼinto-a te Waldo kʼax bayal swokol, jaʼ yuʼun jajch ta pʼajaw. Jich ya yal: «Spisil-ora ya jmaj jba sok-a te machʼatik ya schonik droga. Ta jun buelta te jkontratak la stojik jtul jmilawal, la slowon ta cuchillo, pero juʼ jlokʼel ta anel».

Te Waldo ma la smulan te jajch ta snopel Biblia te yinam sok te testigoetik yuʼun Jehová, jich ya yal: «Maba lek ya kiltiklan-a sok ya kaltiklanbey chopolkʼop. Pero yan-nax la kil-a te spisil-ora leknax la sjakʼbonik te jkʼope».

Ta patil te Waldo jajch snop te Biblia, jich ya yal: «Wokol ya kaʼiy-a te ya jpas ta jkuxlejal te bin yakon ta snopele. La jkuy te maʼyuk bin-ora ya xjelon te jtalele». Pero ay bin la snop ta Biblia te jelontesbot skuxlejal yuʼune.

Jich ya yal: «Ta jun buelta te Alejandro te machʼa ya snojpteson ta Biblia, la yalbon te yakuk jkʼopon te Gálatas 5:22, 23. La yalbon teme ya jkʼan ya jchʼites te taleliletik-abi, jaʼ ya skʼan ya smukʼulin koʼtan te Dios te ya skoltayon ta swenta te schʼul espíritu».

Te Waldo la stsal te pʼajawe, melel la yakʼ sba ta koltayel yuʼun te Diose. Jich ya yal: «Te jfamilia sok te kamigotak, maba ya schʼuunik te jelonemix te jtalele. Ta namey ya x-utsʼinwanon-a, pero te Jehová la skoltayon ta slekubtesel te jtalele».