Meʼil tatiletik, koltaya te awal anichʼnabik te kʼuxuk ta yoʼtanik te Jehová

1, 2. ¿Bin yuʼun mukʼ skʼoplal ya xkʼot ta jtojoltik cheʼoxeb versiculoetik?

KʼOTIX yorail te ya xnujpun te kerem sok te achʼixe, leknax schʼaloj sbaik sok ya schʼam yaʼiyik ta lek te discurso ya yakʼ te hermanoe. Ya snaʼikix ta lek te tojobtesel ya yichʼ akʼele. Pero ta yorail-abi, kʼax mukʼ skʼoplal ya xkʼot ta stojolik, melel ya xjajch spasik ta skuxlejalik.

² Jaʼ pajal sok te schʼitesel te alnichʼanetik. Te machʼatik nujpunemik ayniwan yaʼiyojik bayal discursoetik ta swenta te bin-utʼil ta chʼitesel te alnichʼanetik. Pero kʼalal ayix yuʼunik-ae, ya xjelon te snopojibal yuʼunik. Spisil te bin ya yal te Biblia ta swenta-abi ya xkʼotxan ta yoʼtanik. ¡Bayal te bin ay ta swentaik spasel te meʼil tatiletik! Jich yuʼun te kʼalal ya xjelon te jkuxlejaltik, jaʼnix jich ya xjelon te bitʼil ya skoltayotik te bin ya yal te Biblia. Jaʼ yuʼun te j-abatotik yuʼun Jehová ya jkʼopontik te Biblia ta jujun kʼajkʼal sok ya jnopilan ta koʼtantik, jich te bitʼil ya skʼan spasik-a te ajwaliletik ta Israel (Deut. 17:19).

3. ¿Bin ya kilbeytik skʼoplal ta artículo ini?

³ Meʼil tatiletik, awichʼojik te mukʼul majtanil te bitʼil j-abatex yuʼun Jehová: jaʼ te ya akoltayik te awal anichʼnabik yuʼun ya snaʼbeyik sba te Jehová. Pero ma jaʼuknax smakoj te ay bintik ya awakʼbeyik snop ta swenta te Diose; ya skʼan ya akoltayik yuʼun kʼuxuk ta yoʼtanik te Jehová. ¿Bin-utʼil ya xjuʼ ya apasik? Ta artículo ini ya kiltik chanchajp te bin ya yal te Biblia te ya skoltayexe (2 Tim. 3:16). Jaʼnix jich ya kiltik bintik lekilal staojik chaʼoxtul meʼil tatiletik kʼalal ya spasik te bin ya yal te Biblia.

CHANCHAJP TE BIN YA XJUʼ YA SPASIK TE MEʼIL TATILETIK

4. ¿Bin ya xkoltayotik te meʼil tatiletik yuʼun ya skoltay te yal snichʼnabik te kʼuxuk ta yoʼtanik te Jehová? (Santiago 1:5).

⁴ Sbabial: leaik koltayel ta stojol Jehová. Ya skʼan te ayuk spʼijil awoʼtanik yuʼun ya akoltayik te awal anichʼnabik te kʼuxuk ta yoʼtanik te Jehová. Jaʼ yuʼun kʼanbeyaik spʼijil awoʼtanik te Jehová (kʼopona Santiago 1:5). Jaʼnax stukel te machʼa bayal spʼijile. ¿Bin yuʼun? Melel jaʼ te tatil te pʼijubenxan ta lek ta swolol Balumilal (Sal. 36:9). Jaʼnix jich spisil-ora ya skoltayotik te tojobtesel ya yakʼe (Is. 48:17).

5. 1) ¿Bin koltayel ya x-akʼbotik te meʼil tatiletik ta organización yuʼun Jehová? 2) ¿Bin la yakʼbat anop ta swenta te schʼitesel alnichʼanetik te video yuʼun te hermanoetik Amorim?

⁵ Ya yakʼbeyex bayal koltayel te Jehová ta swenta te Biblia sok te organización, swenta kʼuxuk ta yoʼtanik te Jehová te awal anichʼnabik (Mat. 24:45). Jich bitʼil ya ata lekil tojobteseletik ta sección «Ayuda para las familias», te ayix bayal jaʼbil lokʼ ta ¡Despertad! sok te ayix ta jw.org. Jaʼnix jich ya ata videoetik yuʼun entrevistaetik sok escenificacionetik te ya skoltayat yuʼun ya apas te tojobteseletik te ya yakʼ te Jehová ta swenta te schʼitesel te awal anichʼnabik (Prov. 2:4-6).b

6. ¿Bin ya yal te Joseph sok te yinam ta swenta te koltayel ya yichʼik ta organización yuʼun Jehová?

⁶ Bayal meʼil tatiletik yalojik wokol ta swenta te koltayel ya yakʼ te Jehová ta organización yuʼune. Te Joseph te ay snichʼnab jich ya yal: «Wokol kaʼiyojtik schʼitesel te oxtul kal jnichʼnabtik yuʼun ya snaʼbeyik sba te Jehová. Te joʼon sok te kinam ya jkʼanbeytik te Jehová te yakuk skoltayotike. Spisil-ora kilojtik te yakʼojbotik ta yorail jun artículo o jun video te ya skoltayotike. Kʼalal ya jletik te koltayel yuʼun Jehová, bayal bin lekilal jtaojtik yuʼun». Te Joseph sok te yinam yilojik te bayal koltaybilik te yal snichʼnabik te articuloetik sok videoetik yuʼun ya yamigoinik te Jehová.

7. ¿Bin yuʼun mukʼ skʼoplal te ya spasik tulan te meʼil tatiletik yuʼun ya yakʼik ta ilel lekil ejemplo? (Romanos 2:21).

⁷ Schebal: akʼaik ta ilel lekil ejemplo. Te alnichʼanetik jaʼ ya spasik te bin ya spas te smeʼ statike. Ta melel maʼyuk machʼa toj ta jkʼaxel (Rom. 3:23). Pero te meʼil tatiletik te ay spʼijilike ya spasik tulan ta yakʼel ta ilel lekil ejemplo (kʼopona Romanos 2:21). Jtul tatil jich la yal ta swenta te alnichʼanetik: «Jich kʼoemik te kʼalal ya jmultik ta kapel te pane ya snukʼbey te yalele». Sok jich la yalxan: «Kʼalal ya yilik te ma jichuk yakotik ta spasel te bin ya kakʼbeytik snopike, yananix yalbotik-a». Jich yuʼun teme ya jkʼantik te kʼuxuk ta yoʼtanik te Jehová te kal jnichʼnabtik, jaʼnix jich ya skʼan te chikanuk ta ilel te kʼux koʼtantik-euke.

8, 9. ¿Bin la yakʼbat anop te bin la yal te Andrew sok te Emma?

⁸ Te meʼil tatiletik bayal bin ya xjuʼ ya spasik swenta ya snojptesik te yal snichʼnabik yuʼun kʼuxuk ta yoʼtanik te Jehová. Kiltik te bin la yal te Andrew, te yichʼojix jaʼ sok ay 17 yaʼbilal: «Te jmeʼ jtat yakʼojbonik jnop te mukʼ skʼoplal te ya jpas oración. Jujun ajkʼabal te jpapa ya sjokinon ta spasel oración manchukme joʼon la jpasix-a. Te jpapa sok jmama spisil-ora jich ya yalbonik: ‹Ya xjuʼ ya akʼopon te Jehová chikan jayeb buelta›. Jaʼ yuʼun mukʼ skʼoplal la kil te spasel oración. Ta ora ini leknax ya kaʼiy jba kʼalal ya jkʼopon te Jehová sok jich ya kil bitʼil jtul tatil te kʼuxon ta yoʼtane». Meʼil tatiletik, ayuk ta awoʼtanik te bayal ya xkoltayotik te awal anichʼnabik te skʼuxul awoʼtanik ta stojol Jehová.

⁹ Ta ora ini ya kaʼiytik stojol te bin la yal te Emma. Te kʼalal ijkitayotik yuʼun te spapa, bayal betil jil ta stojol te smama. Te Emma jich ya yal: «Kʼalal te jmama ma tikʼuk ya xlokʼ-a ta takʼin yuʼune. La yalbotik te spisil-ora ya skanantay Jehová sok ya yakʼbey te bin ya xtuun yuʼun te j-abatetik yuʼune. Ta swenta te bin ya sta ta nopel spasel, ya jta ta ilel te schʼuunoj yoʼtan spisil-abi. Te jmama ya yakʼ ta ilel lekil ejemplo». ¿Bin ya yakʼ jnoptik? Te meʼil tatiletik ya xjuʼ ya yakʼbeyik snop te yal snichʼnabik ta swenta te ejemplo yuʼunike, manchukme ya sitintayik wokoliletik (Gál. 6:9).

10. ¿Bin-utʼil la snojptesik te yal snichʼnabik te meʼil tatiletik ta Israel? (Deuteronomio 6:6, 7).

¹⁰ Yoxebal: kʼaytesa abaik ta aʼiyej sok te awal anichʼnabik. La yichʼik albeyel te meʼil tatiletik ta Israel te yakuk yakʼbeyik snop ta swenta Jehová te yal snichʼnabike (kʼopona Deuteronomio 6:6, 7). Ta sjunal kʼajkʼal ya skʼan ya yakʼbeyik snop te yal snichʼnabik te kʼuxuk ya yaʼiyik te Jehová. Te chʼin keremetik ya xjuʼ ya sjokinik te statik ta tsʼunbajel o ta stsobel te sit yawal stsʼunubike. Te chʼin achʼixetike jaʼ ya sjokinik sjunal kʼajkʼal te snanik ta spasel te aʼtelil ta yutil na, jich bitʼil tsʼisomajel o ay bin ya sjalik. Kʼalal ay bin jun-nax ya spasik jich ya xjuʼ te ay bintik mukʼ skʼoplal ya yakʼbeyik snop. Jich bitʼil ya snop ta yoʼtanik te bitʼil yakʼoj ta ilel te yutsil yoʼtan te Jehová sok bin-utʼil ya skanantay te familia.

11. ¿Bin ya skʼan ya spasik te meʼil tatiletik yuʼun ya xkʼopojik sok te yal snichʼnabik?

¹¹ Ta kʼajkʼal ini ma jichukix. Ta bayal nacionetik, te meʼil tatiletik maba ya sjokinikix te yal snichʼnabik ta skaj te ayik ta yaʼtelik o ta escuela. Jaʼ yuʼun-abi, te meʼil tatiletik ya skʼan ya slokʼesik tiempo yuʼun ya sjokin te yal snichʼnabik sok te ya xkʼopojike (Efes. 5:15, 16; Filip. 1:10). Jich ya xjuʼ ya spasik te kʼalal ya yichʼik ta mukʼ Dios ta sjunal na. Jtul kerem te Alexander sbiil, jich ya yal: «Te jpapa spisil-ora lek chajpanbil yuʼun te kʼalal ya kichʼtik ta mukʼ Dios ta sjunal na sok ma xyakʼ te ay bin ya smon koʼtantik yuʼun jun-nax ya x-ayinotik ta yorail-abi. Te kʼalal ya xlaj koʼtantike, ay bintikxan ya kalbeytik skʼoplal».

12. ¿Bin ya skʼan ya spas te jolal ta na ta yorail te yichʼel ta mukʼ Dios ta sjunal na?

¹² ¿Bin ya xjuʼ ya spas te jolal ta na yuʼun ya smulanik te yichʼel ta mukʼ Dios te yal snichʼnabike? Ya xjuʼ ya snopik ta jun-nax te libro Mulana te akuxlejal ta sbajtelkʼinal. Teme ya snopik te libro-abi, yaniwan xjuʼ te ay bintik lek ya yalbeyik skʼoplale. Teme ya akʼanik te ya yalbeyex te awal anichʼnabik te bin yaʼiyel ya yaʼiy sbaik sok te bin ya smel yoʼtanik yuʼune, mame jaʼuk xa awalbey te bin-nix ya skʼan ya spasik-ae o ya awutiklan ta yorail te yichʼel ta mukʼ Dios ta sjunal na. Mame x-ilinex teme ay bin ya yalik te ma jichuk ya yalbey skʼoplal te Biblia. Jaʼme lek te ya awalbeyik wokol te bitʼil la yalbeyex te bin ay ta yoʼtanik sok albeyaik te jichuk ya spasulanike. Teme ya yalik te bin yaʼiyel ya yaʼiy sbaik te alnichʼanetike, maba wokol ya awaʼiy skoltayel.

13. ¿Bin-utʼil te meʼil tatiletik ya skoltay te yal snichʼnabik yuʼun ya xnoptsajik ta stojol te Jehová?

¹³ Meʼil tatiletik, lebeyaik yorail ta jujun kʼajkʼal yuʼun ya akoltayik te awal anichʼnabik yuʼun ya xnoptsajik ta stojol te Jehová. Mame jaʼukto ya amaliyik ta yorail te ya anopik te Biblia yuʼun ya awalbeyik skʼoplal ta swenta Jehová te awal anichʼnabik. Jtul mamail te Lisa sbiil jich ya yal: «La jkoltaytik te kal jnichʼnabtik ta snaʼbeyel sba ta lek te Jehová ta swenta te bintik pastiklanbil. Jun ejemplo te kʼalal ay bin ya spas te jtsʼiʼtike ya yakʼ stseʼejinotik yuʼun, jich ya jultesbeytik ta yoʼtanik te ay stseʼelil yoʼtan te Jehová sok te kʼux ta yoʼtan te kuxlejalil, jich bitʼil ya kiltik te joʼotike».

14. ¿Bin yuʼun mukʼ skʼoplal ta stojol te meʼil tatiletik te yakuk skoltay te yal snichʼnabik ta stael lekil yamigotak? (Proverbios 13:20).

¹⁴ Schanebal: koltayaik te awal anichʼnabik ta stael lekil yamigotak. Te sKʼop Dios jamal ya yalbotik te ya xjuʼ ya skoltayotik o maʼuk te machʼatik ya jokintike (kʼopona Proverbios 13:20). Meʼil tatiletik, ¿yabal anaʼ machʼatik-a te yamigotak te awal anichʼnabike? ¿Yabal anaʼtiklanbey sba sok aybal ajokinoj? ¿Bin ya apas yuʼun ya akoltay te awal anichʼnab te jaʼuk ya yamigoin te machʼa kʼux ta yoʼtanik te Jehová? (1 Cor. 15:33). Te kʼalal ay bin ya apasik sok te afamilia, ikʼa ta anaik te machʼatik yamigoinejik te Jehová (Sal. 119:63).

15. ¿Bin ya spasik te meʼil tatiletik ta skoltayel te yal snichʼnabik ta stael lekil yamigotak?

¹⁵ Kiltik jun ejemplo. Jtul papail te Tony sbiil, ya schol kaʼiytik te bin spasoj sok te yinam ta skoltayel te yal snichʼnabik ta stael lekil yamigotakik, jich ya yal: «Te joʼon sok te kinam ya kikʼ ta jnatik hermanoetik sok hermanaetik te yanyantik yaʼbilalik sok yanyantik scostumbreik. Ya jokin jbatik ta weʼel sok ya jmulantik te ya jpastik te yichʼel ta mukʼ Dios. Te bitʼil jich ya jpastike, ya jnaʼbeytik sba hermanoetik te kʼux ta yoʼtanik te Jehová sok tseʼel yoʼtanik ya x-abatinik ta stojol. Ay jilem ta jnatik te superintendenteetik yuʼun circuito, misioneroetik sok yantik hermanoetik. Bayal koltaybilik te kal jnichʼnabtik sok noptsajemikxan ta stojol te Jehová ta swenta te experiencia yuʼun te hermanoetik, te stseʼelil yoʼtanik sok te spasojik tulan ta abatinel ta stojol te Jehová». Meʼil tatiletik, pasaik tulan ta skoltayel te awal anichʼnabik ta stael lekil yamigotak.

¡AYUK SMUKʼUL AWOʼTANIK!

16. ¿Bin ya skʼan ayuk ta yoʼtan te meʼil tatiletik teme maba ya skʼan ya x-abatinix ta stojol Jehová jtul yal snichʼnab?

¹⁶ Teme la apasikix tulan ta skoltayel te awal anichʼnabik, pero ay jtul te maba ya skʼan ya x-abatinix ta stojol Jehová, ¿bin ya apasikix-a? Mame xa anop ta awoʼtanik te ma lekil meʼil tatilex. Te Jehová yakʼoj ta jwentatik yuʼun ya jtsatik teme ya x-abatinotik ta stojol o maʼuk, jaʼnix jich tey ochem skʼoplal-euk-a te awal anichʼnabik. Teme ay jtul awal anichʼnabik te ma skʼan ya x-abatinix ta stojol Jehová, ayuk smukʼul awoʼtanik te ya sta skʼajkʼalel te ya xchaʼsujt tal. Juluk ta awoʼtanik te lokʼombakʼop yuʼun te kerem te la yijkitay jilel te stat (Luc. 15:11-19, 22-24). Te kerem-abi la yijkitay te lekil be, ta patil sujt tal. Pero jichniwan ya awal: «Kʼop aʼiyejetiknax. Ma jichuk ya xkʼot ta pasel». Te ejemplo yuʼun te jchʼiel kerem te Elie sbiil, ya yakʼ jnaʼtik te ay jich ya xkʼot ta pasele.

17. ¿Bin-utʼil ya stijbat awoʼtan te bin kʼax ta stojol te Elie?

¹⁷ Te Elie jich ya yal ta stojol te smeʼ stat: «La spasik tulan yuʼun kʼuxuk ta koʼtan te Diose sok te yakuk xkʼot ta koʼtan te bin ya yal te Biblia. Pero te kʼalal keremonto-ae, jajchon ta skʼaxuntayel kʼop». Te Elie muken jajch spas te bin ma lek sok la spʼaj te koltayel ya x-akʼbot yuʼun te smeʼ state. La yijkitay jilel te sna sok jajch spas te bintik ma lek ya yil te Jehová. Manchukme jich-abi, ya scholbey skʼop Dios te yamigo. Te Elie jich ya yal: «Kʼalal ya jcholbey skʼop Dios te kamigo, ya jnop ta koʼtan te bin yilel stalel te Jehová. Jich yuʼun jajch ta chʼiel te bintik la yakʼbon jnop te jmeʼ jtate». Ta patil, te Elie sujt tal ta stojol te Jehová.c Nopanax awaʼiy te stseʼelil yoʼtan akʼbot te smeʼ stat te bitʼil ta schʼinilto la yakʼbeyik snop te kʼuxuk ta yoʼtan te Jehová (2 Tim. 3:14, 15).

18. ¿Bin ya anop ta swenta te meʼil tatiletik te yakik ta spasel tulan yuʼun kʼuxuk ta yoʼtanik te Jehová te yal snichʼnabik?

¹⁸ Meʼil tatiletik, te Jehová yakʼojbeyex te tʼujbil majtanil yuʼun ya achʼites te awal anichʼnabik te ya x-abatinik ta stojol te Jehová (Sal. 78:4-6). Ya jnaʼtik te wokol ta pasel-abi, jaʼ yuʼun ya kutsilkʼoptayexkotik ta swenta te tulan aʼtelil ya apasike. Pasaik tulan te bantito kʼalal ya xjuʼ awuʼunik ta skoltayel te awal anichʼnabik yuʼun kʼuxuk ta yoʼtanik te Dios sok te ya atojobtesik jich te bin-utʼil ya skʼan yoʼtan te Jehová (Efes. 6:4). Teme jich ya apasike, yame awakʼbeyik tseʼelil yoʼtan te jTatik ta chʼulchane.