Jchʼiel, mukʼubukxan te schʼuunel awoʼtan te kʼalal awichʼojix jaʼ-ae

1. ¿Bin juʼem yuʼunik spasel bayal ta tul jchʼieletik?

TA JUJUN JAʼBIL bayal ta mil jchʼieletik ya yichʼik jaʼ. ¿Jichbal la apasix-euk? Teme jiche, te hermanoetik kʼax tseʼel yoʼtanik yuʼun, soknix te Jehová kʼax tseʼel yoʼtan (Prov. 27:11). Nopa awaʼiy spisil te bintik apasoje. Jich bitʼil, bayalniwanix jaʼbil la anop te Bibliae, jaʼ yuʼun la schʼuun awoʼtan te jaʼ sKʼop te Diose. Pero te bin kʼax mukʼxan skʼoplale, jaʼ te ya anaʼbeyix sba sok te kʼux ta awoʼtan te machʼa la yakʼ ta pasel te Bibliae. La ata ta nopel te ya awakʼ akuxlejal ta stojol te Jehová sok ya awichʼ jaʼ, melel kʼax kʼux ta awoʼtan. ¡Kʼax lek te jich la apase!

2. ¿Bin ya kilbeytik skʼoplal ta artículo ini?

² Bayalniwan prueba kʼax ta atojol te kʼalal mato awichʼoj jaʼ-ae. Pero te kʼalal ya xkʼax bael te jaʼbile, bayalxan bin ya xtal ta atojol. Te Satanás ya skʼan te ya xpejkʼaj te skʼuxul awoʼtan ta stojol te Jehová sok te ya xnamajat ta stojol (Efes. 4:14). Mame xa awakʼ te jich ya xkʼot ta pasele. ¿Bin ya skoltayat swenta jun awoʼtan ta stojol te Jehová sok ya akʼotes ta pasel te bin la awale? Ya skʼan ya awakʼbeyxan yipal, te ya skʼan ya yal te bejbeukme ta mukʼubel te schʼuunel awoʼtan (Heb. 6:1). Ta artículo ini ya kiltik bin-utʼil ya xjuʼ awuʼun spasel.

¿BIN YA XJUʼ YA APAS YUʼUN YA XCHʼIXAN TE SCHʼUUNEL AWOʼTAN?

3. ¿Bin ya skʼan ya spas te j-abatetik yuʼun Dios te kʼalal yichʼojikix jaʼ-ae?

³ Te machʼa ya yichʼ jaʼ, ya skʼan te jichuknix ya spas te bin-utʼil la yichʼik albeyel yuʼun te jpuk-kʼop Pablo te jchʼuunjeletik ta Éfeso. La stijbey yoʼtan te yakuk xyijub te snopojibal yuʼunik jich te bin-utʼil jtul ants winik (Efes. 4:13). Jich kʼoem te la yaltiklanbey: «Akʼbeyaikxan yipal». Te Pablo la spajbey skʼoplal te bin-utʼil ya xchʼixan te schʼuunel koʼtantik, jich te bin-utʼil ya xchʼi te alale. Te meʼil tatiletik tseʼel yoʼtanik ta swenta te alal yuʼunik, pero ya sta yorail te ya xchʼi te alale. Jaʼnix jich ya sta yorail te ya yijkitay spasel «spisil te bin scuenta alal» (1 Cor. 13:11). Jaʼ pajal sok te kʼalal yichʼojix jaʼ-a te j-abat yuʼun Dios: ya skʼan te ya xchʼixan te schʼuunel yoʼtane. Kiltik cheʼoxebuk te bin ya xjuʼ ya skoltayate.

4. ¿Bin talelil ya skoltayat yuʼun ya xchʼixan te schʼuunel awoʼtan, sok bin yuʼun? (Filipenses 1:9).

⁴ Akʼbeya stsakxan yip te skʼuxul awoʼtan ta stojol te Jehová. Ya jnaʼtik te kʼux ta awoʼtan te Jehová. Pero ya xjuʼ ya xchʼixan te skʼuxul awoʼtan ta stojol. ¿Bin-utʼil? Te jpuk-kʼop Pablo la yal junuk te bin ya skʼan ya jpastik ta Filipenses 1:9 (kʼopona). Te Pablo la skʼanbey te Jehová te bejbeuk ya xchʼi te skʼuxul yoʼtanik te filipenseetik. Jaʼ ya skʼan ya yal-abi te ya xjuʼ ya xchʼi te skʼuxul koʼtantik ta stojol te Jehová ta swenta te pʼijil oʼtanil sok «te bintic ay ta naʼel». Jaʼ yuʼun te kʼalal ya jnaʼbeytikxan sba te Jehová ya xchʼixan te skʼuxul ta koʼtantik ta stojol, ya jmulantik te taleliletik yuʼun sok te bin ya spase. Ya jkʼan ya kakʼbeytik stseʼelil yoʼtan ma jaʼuk te ya smel yoʼtane. Ya jpastik tulan ta yilel te bin ya skʼan ta jtojoltik sok te yakuk jpastike.

5, 6. ¿Bin ya skoltayotik yuʼun ya xchʼixan te skʼuxul koʼtantik ta stojol te Jehová?

⁵ Te bin-utʼil ya xchʼixan te skʼuxul koʼtantik ta stojol te Jehová jaʼ te kʼalal ya jnaʼbeytik sba te sNichʼane, melel ya yakʼ ta ilel ta lek te taleliletik yuʼun te sTate (Heb. 1:3). Te kʼalal ya jnoptik te chaneb Evangelioetik jich ya jnaʼbeytik sba ta lek te Jesús. ¿Yabal akʼopon ta jujun kʼajkʼal te Bibliae? Teme mato yakat ta spasele, ya xjuʼ ya xjajch akʼopon ta ora ini. Te kʼalal ya akʼopon te bin la spas te Jesús sok te bin la yale, ilawil te bin yilel te stalele. Maba wokol la yaʼiyik te ants winiketik te ya xkʼopojik sok, jaʼnix jich la spetiklan te alaletike (Mar. 10:13-16). Te jnopojeletik leknax ya yaʼiy sbaik te kʼalal sjokinejik te Jesús, jaʼ yuʼun ya yalbeyik te bin ay ta yoʼtanike (Mat. 16:22). Te Jesús jich stalel, melel jich stalel-euk te sTate. Te Jehová spisil-ora ya yaʼiy te jkʼoptik. Jaʼ yuʼun ya xjuʼ ya jkʼopontik sok ya kalbeytik te bin ay ta koʼtantike. Jun-nax koʼtantik ya jkʼopontik, melel lek te bin ya snop ta jtojoltik. Kʼuxotik ta yoʼtan sok ya smel yoʼtan ya jtojoltik (1 Ped. 5:7).

⁶ Te Jesús la snaʼbey yoʼbolil sba te ants winiketik. Jaʼ yuʼun te j-pujk-kʼop Mateo jich la yal: «Cʼalal la yil te bayel ants-winiquetic, stsʼujet ta yoʼtan la yaʼiy, como ay swocolic soc ihquitaybilic hich bin utʼil tuminchijetic te mayuc jcanan yuʼunique» (Mat. 9:36). ¿Bin yilel ya yil Jehová te ants winiketik? Te Jesús jich la yalbey skʼoplal te sTate: «Ma scʼan te ya xchʼay jtuhluc haʼi alaletic ini» (Mat. 18:14). ¡Kʼax tseʼel koʼtantik te kʼuxotik ta yoʼtan te Jehová! Ya xchʼixan te skʼuxul koʼtantik ta stojol te Jehová teme ya jnaʼbeytik sba ta lek te Jesús.

7. ¿Bin yuʼun jaʼ lekxan te ya awamigoin te hermanoetik te tulan schʼuunel yoʼtanike?

⁷ ¿Binxan ya skʼan ya apas yuʼun ya xchʼixan te skʼuxul awoʼtan ta stojol te Jehová sok te ya stsak yip te schʼuunel awoʼtane? Jaʼ te ya awamigoin te hermanoetik sok hermanaetik te tulan schʼuunel yoʼtanike. Te hermanoetik-abi spisil-ora tseʼel yoʼtanik sok maba sujtesoj yoʼtanik te bitʼil yakik ta abatinel ta stojol te Jehová. Albeya te yakuk scholbat te bintik kʼaxem ta skuxlejalik. Jaʼnix jich te kʼalal ay bin mukʼ skʼoplal ya ata ta nopel spasel, cholbeya yaʼiyik yuʼun ya awichʼ koltayel. Jaʼ yuʼun te Biblia jich ya yal: «Ta scuenta tsobol jʼacʼ-oʼtaniletic ay me tsalaw» (Prov. 11:14).

8. ¿Bin ya skʼan ya apas teme ay bin ma kʼoem ta awoʼtan ta lek ta swenta te bin ya yakʼ ta nopel te Bibliae?

⁸ Ilbeya skʼoplal te bin ma kʼoem ta awoʼtan ta leke. Jich bitʼil la kiltik ta párrafo 2, te Satanás ya skʼan te ma xchʼi te schʼuunel awoʼtane. Te bin ya stuuntese, jaʼ te bin ma kʼoem ta awoʼtan ta leke. Jaʼ ya skʼan te ma xa awakʼ smukʼul awoʼtan ta swenta te bin ya yakʼ ta nopel te Biblia. Ayniwan ya awaʼiy te ya yichʼ albeyel skʼoplal te evolución te ma lek ya yalbey skʼoplal te Jehovae. Ta sjajchibal maniwan bayaluk bin anopoj ta swenta-abi. Pero te bitʼil jchʼielatixe, te maestroetik yaniwan snojptesat ta swenta te evolución. Te bin ya yalike yaniwan yakʼik ta ilel te jaʼ smelelile sok te ya schʼuun koʼtantik. Pero ayuk ta awoʼtan te maniwan ayuk bin-ora yilojbeyik skʼoplal ta lek teme yuʼun-nix ay-a te Jpaswaneje. Juluk ta awoʼtan te bin ya yal te Proverbios 18:17: «Te machʼa nahil ya scoltay sba ta cʼop, hich yaʼiyel te toj ay, ha to cʼalal ya xtal yan te ya sjocʼobe ta lec». ¿Bin ya yakʼ jnoptik te textoe? Maba ya skʼan ya schʼuun awoʼtan spisil te bin ya yalik ta escuela. Te bin ya xjuʼ ya apase, jaʼ te ya anopbey skʼoplal ta lek te bin ya yal te Bibliae. Lea información ta publicación kuʼuntik. Kʼopojan sok hermanoetik te la schʼuunik te evolución sok jojkʼoybeya te bin yuʼun la schʼuun yoʼtanik teme yuʼun-nix ay-a te Jpaswanej te kʼuxotik ta yoʼtane. b Te kʼalal jich ya jpastik ya skoltayotik yuʼun ya jnoptik te aynix pruebaetik-a te ya yakʼ ta ilel te ay Jpaswaneje.

9. ¿Bin ya yakʼbat anop te bin kʼax ta stojol te Melissa?

⁹ Jtul hermana te Melissa sbiil bayal koltayot sleel información ta swenta te bin-utʼil chiknaj spisil te bintik pastiklanbile.c Jich ya yal: «Ta escuela te maestroetik leknax ya scholbeyik skʼoplal te evolución swenta ya schʼuunik-a te ants winiketike. Ta nailal ma jkʼan ya jlebey skʼoplal-a. Melel ya jxiʼ teme yuʼun-nix melel-a te bin ya yalik ta swenta te evolución yaniwan xchʼay te schʼuunel koʼtane. Pero la jta ta nopel te ya skʼan Jehová te ya jnopbeytik skʼoplal te bintik swentail te bin jchʼuunojtike, jich yuʼun la jlebeyxan skʼoplal. La jkʼopon te libro ¿Existe un Creador que se interese por nosotros? Soknix te folletoetik ¿Es la vida obra de un Creador? Sok ¿Bin-utʼil chiknaj te kuxlejalil? Joʼchajp te bin ya skʼan ilbeyel skʼoplal. Jaʼ la skoltayon snopbeyel skʼoplal spisil-abi. Jichuk la jpas ta nailale».

10, 11. ¿Bin ya skoltayat yuʼun ya asitintay te bin ma lek ya skʼan awoʼtane? (1 Tesalonicenses 4:3, 4).

¹⁰ Pasa tulan ta spʼajel te bin ma lek ya skʼan awoʼtane. Te kʼalal jchʼielatoe, jaʼ kʼaxtoxan ya yikʼbat awoʼtan te ay machʼa ya ajokin ta wayel sok ayniwan machʼa ya stenat ta spasel mulil. Te Satanás jaʼ ya skʼan ya apas te bin ma lek ya skʼan awoʼtane. ¿Bin ya skoltayat yuʼun maba ya apas te bin ma leke? (Kʼopona 1 Tesalonicenses 4:3, 4). Te kʼalal ya akʼopon te Jehovae, albeya te bin yaʼiyel ya awaʼiy abae sok kʼanbeya te yakuk yakʼbat yip awoʼtan (Mat. 6:13). Juluk ta awoʼtan te spisil-ora ya skʼan ya skoltayat te Jehová, ma jaʼuk te ya yalbat te amule (Sal. 103:13, 14). Te Biblia jaʼnix jich ya xjuʼ ya skoltayat. Te Melissa, te la kalbeytik skʼoplal ta yan parrafoe, la spas tulan swenta ma xtal ta spensar te bintik swenta mulile. Jich ya yal: «Jaʼ la skoltayon te la jkʼopon ta jujun kʼajkʼal te Biblia jich maba la kijkitay spasel tulan. Jaʼ ya sjultesbon ta koʼtan te jkuxlejal jaʼ yuʼun te Jehová sok ya jkʼan te spisil-ora nopol ay ta jtojol» (Sal. 119:9).

¹¹ Ma skʼan te ya atukeltay aba sok te awokole. Cholbeya yaʼiy te apapa o te amama te bin yak ta kʼaxel ta atojol. Wokolniwan ya awaʼiy yalbeyel te bin yaʼiyel ya awaʼiy aba, pero kʼax mukʼ skʼoplal te jich ya apase. Te Melissa jich ya yal: «La jkʼanbey Jehová te yakuk yakʼbon yip koʼtan sok ta patil la kalbey te jpapa te bin yak ta kʼaxel ta jtojole. Kʼax lek la kaʼiy jba yuʼun. Jnaʼoj te la kakʼbey stseʼelil yoʼtan te Jehovae».

12. ¿Bin ya skoltayat yuʼun lek te bin ya ata ta nopel spasel?

¹² Jaʼuk akʼa stojobtesat te bin ya yal te Bibliae. Te kʼalal ya ata bael te awaʼbilale, te ameʼ atat ya yalbat te ya xjuʼ te ay bintik ya ataix ta nopel spasel ta akuxlejale. Pero naʼame te mato ayuk bayal bin awiloj ta akuxlejal. ¿Bin ya skoltayat yuʼun maba ya awakʼbey smel yoʼtan te Jehová? (Prov. 22:3). Jtul hermana te Kari sbiil ya xjul ta yoʼtan te bin la spas yuʼun ya sta ta nopel te bin leke. Kʼot ta yoʼtan te machʼatik tulan schʼuunel yoʼtanik ma puersauk te ayuk jun mantalil ta Biblia ta swenta te bintik ya spase. Te Kari jich ya yal: «Ma jaʼuknax la jtʼun mantaliletik, la jpas tulan yuʼun ya xkʼot ta koʼtan te bin yilel ya yil Jehová te bin ya jpase». Te kʼalal ya akʼopon te Biblia, jojkʼoybeya aba: «¿Bin ya yakʼbon jnop te relato ini ta swenta te snopojibal yuʼun Jehová? ¿Aybal bin ya yal te ya stojobteson ta spasel te bin leke? Teme jaʼ ya kakʼ stojobteson-abi, ¿bintik lek ya xlokʼ kuʼun-a?» (Sal. 19:7; Is. 48:17, 18). Teme ya akʼopon te Biblia sok te ya anopilan ta awoʼtan te tojobteseletik, maba wokol ya awaʼiy te ay bin ya ata ta nopel spasel te ya awakʼbey stseʼelil yoʼtan te Jehová. Te kʼalal ya xchʼixan te schʼuunel awoʼtan, ma puersauk te ayuk jujun mantalil ta swenta te bintik ya apas. Jaʼ jich ya xchiknaj te yak ta chʼiel te schʼuunel awoʼtan.

13. ¿Bin-utʼil ya xjuʼ ya skoltayat te lekil awamigotak? (Proverbios 13:20).

¹³ Lea awamigotak te kʼux ta yoʼtanik te Jehová. Jich bitʼil la kiltik ta párrafo 7, te awamigotak ya skoltayat yuʼun ya xchʼi te schʼuunel awoʼtane (kʼopona Proverbios 13:20). Kiltik te bin kʼax ta stojol jtul hermana te Sara sbiil. Jich la yaʼiy te maba tseʼelix yoʼtan te yak ta abatinel ta stojol te Jehová, pero ay bin koltayot. Te Sara jich ya yal: «La jta lekil kamigotak te bayal la skoltayonike. Joʼon sok kamiga la jnoptik ta jujun semana Te J-ilkʼinal ta toyol, sok yan kamiga la stijbon koʼtan yuʼun ya kakʼ jcomentario ta tsoblejetik. Ta swenta te la skoltayonik te kamigatak, la kakʼ ta koʼtan snopel ta lek te Biblia sok te ya jpas oración. Jich kʼunkʼun la kamigoinxan ta lek te Jehová, sok la jchaʼta te stseʼelil koʼtane».

14. ¿Bin-utʼil la sta lekil yamigotak te Julien?

¹⁴ ¿Bin ya xjuʼ ya apas yuʼun ya ata lekil awamigotak? Jtul hermano te Julien sbiil sok jaʼ anciano ta ora ini, jich ya yal: «Kʼalal jchʼielonto-ae, la jta lekil kamigotak ta scholel skʼop Dios. Kʼax tseʼel yoʼtanik sok la skoltayonik yuʼun ya jmulanxan te scholel skʼop Dios. Jich yuʼun jajchon ta snopel te ya x-abatinon ta tiempo completo. Ta swenta te jaʼnax la jle te machʼatik pajal kaʼbilal soke, la jta ta ilel te jaʼ ta swenta-abi te maʼyuk bayal kamigotak te lek stalelike. Ta patil kʼalal ochon ta Betel, jaʼnix jich la jta lekil kamigotak. La skoltayonik yuʼun ya jtsa ta lek te bin ya jkʼases kʼajkʼal-ae, sok jich la kamigoinxan ta lek te Jehová».

15. ¿Bin jultesbot ta yoʼtan te Timoteo yuʼun te Pablo? (2 Timoteo 2:20-22).

¹⁵ ¿Bin ya apas teme ay machʼa ta congregación ya awil te ma lek ta jokinele? Te jpuk-kʼop Pablo snaʼoj-a te ay machʼatik ma lek stalelik ta congregación ta sbabial siglo. Jaʼ yuʼun la yalbey te Timoteo te manchuk ya sjokinlane (kʼopona 2 Timoteo 2:20-22). Te yamigoinel te jTatik te ay ta chʼulchan kʼax mukʼ skʼoplal. Jich yuʼun mame xkakʼtik te ay machʼa ya snamajtesotik ta stojol, melel la yichʼ bayal tiempo yuʼun ya kamigointik (Sal. 26:4).

TEME YA ALE BIN-UTʼIL YA X-ABATINANXAN, YA XMUKʼUB TE SCHʼUUNEL AWOʼTAN

16. ¿Bintik ya xjuʼ ya anop ya apas ta akuxlejal?

¹⁶ Nopa te bin ya apas ta akuxlejal te ya xjuʼ ya skoltayate. ¿Bintik-a? Jaʼ te ya skoltayat yuʼun ya stsakxan yip te schʼuunel awoʼtan sok te ya skoltayat yuʼun ya xlekubxan te atalele (Efes. 3:16). Jich bitʼil ya xjuʼ ya akʼaytes aba ta snopbeyel skʼoplal te Biblia sok skʼoponel ta spisil-ora (Sal. 1:2, 3). Jaʼnix jich spisil-ora ya xjuʼ ya akʼopon te Jehová sok spisil awoʼtan. Sok yaniwan skʼan ya anop stuuntesel ta lek te atiempo sok ya atsajtay te bin ya akʼases kʼajkʼal-ae (Efes. 5:15, 16). Kʼax tseʼel yoʼtan te Jehová kʼalal ya yil te yakat ta spasel tulan ta smukʼubtesel te schʼuunel awoʼtan.

17. ¿Bin yuʼun ya ata stseʼelil awoʼtan teme ya akoltay te yantike?

¹⁷ Kʼalal ya akoltay te yantike, ya xlekubxan te atalele. Te Jesús jich la yal: «Ha bayel xan yutsil te machʼa ay bin ya yacʼ te bin utʼil ay bin ya yichʼ» (Hech. 20:35). Yame ata stseʼelil awoʼtan teme ya atuuntes jtebuk te atiempo sok awip ta skoltayel te yantike. ¿Bin ya xjuʼ ya apas ta stojol te yantike? Jich bitʼil ya xjuʼ ya akoltay te hermanoetik te ayik ta chamel o te ayix yaʼbilalik yuʼun ya akoltay o ya anojptes ta stuuntesel te stabletaik o celularik. Teme jchʼielat sok awichʼojix jaʼ pasa tulan yuʼun ya x-ochat ta siervo ministerial yuʼun jich ya akoltayxan-a te awermanotake (Filip. 2:4). Jaʼnix jich ya xjuʼ ya awakʼbey yil te skʼuxul awoʼtan te machʼatik ma snaʼbeyik sba te Jehová te kʼalal ya acholbey yaʼiy te lek yachʼil kʼop yuʼun te Wentainel (Mat. 9:36, 37). Teme ya xjuʼ awuʼune, akʼa aba ta abatinel ta tiempo completo.

18. ¿Bin-utʼil ya skoltayat te abatinel ta tiempo completo yuʼun ya xmukʼubxan te schʼuunel awoʼtan?

¹⁸ Te abatinel ta tiempo completo ya skoltayat yuʼun ya xmukʼubxan te schʼuunel awoʼtane. Teme ya x-ochat ta precursor ya xjuʼ ya xbaat ta Escuela yuʼun Evangelizador, ta Betel, o te ya x-aʼtejat ta construcción. Ilawil bin ya yal jtul precursora te Kaitlyn sbiil: «Te bin la skoltayon yuʼun ya xmukʼubxan te schʼuunel koʼtan te kʼalal la kichʼ jaʼe, jaʼ te la jokin ta scholel skʼop Dios te hermanoetik sok hermanaetik te pʼijubenikix ta leke. Te ejemplo yuʼunik la skoltayon yuʼun la jnopxan ta lek te Biblia sok te la jnopxan ta lek pʼijubteswanej».

19. ¿Bin bendicionetik ya ata teme ya amukʼubtesxan te schʼuunel awoʼtan?

¹⁹ Teme maba ya akom aba ta smukʼubtesel te schʼuunel awoʼtan, te Jehová yame yakʼbat bayal bendición. Sok ma jaʼuk ya atuuntes te akuxlejal ta spasel te bintik maʼyuk skʼoplale (1 Juan 2:17). Jich maba ya ata wokoliletik ta akuxlejal ta swenta te bin ya ata ta nopel spasele. Ya ata stseʼelil awoʼtan sok lek ya xkʼot te bintik ya apas ta akuxlejale (Prov. 16:3). Te lekil ejemplo awuʼun yame xkoltayotik te yantik hermanoetik, te jchʼieletik sok te machʼatik ayix yaʼbilalik (1 Tim. 4:12). Sok te bin kʼax mukʼxan skʼoplale, jaʼ te ya ata lamalkʼinal sok stseʼelil awoʼtan, melel ya anaʼ te lek ya yilat te Jehová sok te jaʼ awamigoe (Prov. 23:15, 16).