Mame xkijkitaytik te smelelil kʼop

1. ¿Bin lekilal ya jtatik teme ya kalbeytik skʼoplal te bin-utʼil la jnoptik «te smelelil cʼop»?

«¿BIN-UTʼIL la anop te smelelil kʼope?». Bayalniwan buelta kakʼojbeytik sujtib te jojkʼoyel ini. Jich ya jojkʼoybeytik te hermanoetik te kʼalal ya jnaʼbeytik sbae. Ya jmulantik yaʼiyel stojol bin-utʼil te yantik hermanoetik la snaʼbeyik sba te Jehová sok kʼux la yaʼiy ta yoʼtanik. Jaʼnix jich ya jmulantik scholbeyel yaʼiyik te bin yuʼun mukʼ skʼoplal ta koʼtantik te smelelil kʼope (Rom. 1:11). Te kʼalal ya kalbeytik skʼoplal sok te yantike ya sjultes ta koʼtantik te tʼujbil majtanil kichʼojtik te bitʼil testigootik yuʼun Jehová. Jaʼnix jich ya yakʼbotikxan kiptik yuʼun ma xkijkitaytik «te smelelil cʼop», jaʼ-abi ya skʼan ya yal te spisil-ora ya kakʼbeytik stseʼelil yoʼtan te Jehová sok jich ya yakʼbotik bendición (3 Juan 4).

2. ¿Bin ya kilbeytik skʼoplal ta artículo ini?

² Ta artículo ini ya kiltik cheʼoxeb skʼoplal bin yuʼun te mukʼ skʼoplal ta koʼtantik te smelelil kʼope. Jaʼnix jich ya kilbeytik skʼoplal te bin-utʼil ya xjuʼ ya kakʼtikxan ta ilel te mukʼ skʼoplal ta koʼtantik te majtanil ini. Teme jich ya jpastike, yame kalbeytikxan bayal wokol te Jehová te bitʼil la yikʼotik tal ta smelelil kʼope (Juan 6:44). Sok yame jmulantikxan te ya jcholbeytik yaʼiy te yantik te smelelil kʼope.

¿BIN YUʼUN MUKʼ SKʼOPLAL TA KOʼTANTIK «TE SMELELIL CʼOP»?

3. ¿Bin yuʼun mukʼ skʼoplal ta koʼtantik te smelelil kʼope?

³ Ay bayal te bin yuʼun mukʼ skʼoplal ta koʼtantik te smelelil kʼope. Te banti mukʼxan skʼoplale jaʼ te kʼux ta koʼtantik te Jehová, melel tey talem-a te smelelile. Ta swenta te sKʼop te ay ta Biblia jnopojtikix te machʼa la spas te chʼulchan sok te Balumilal, jaʼ te Dios te spisil ya xjuʼ yuʼun. Kʼaxtoxan-a te bitʼil jaʼ jTatik, te kʼuxotik ta yoʼtan sok te ay jkʼoplaltik ta yoʼtane (1 Ped. 5:7). Jnaʼojtik te jaʼ jtul Dios «te ay bayel scʼuxul yoʼtan soc te ay yutsil yoʼtan, ma orahuc ya xʼilin, mero mucʼ scʼuxul yoʼtan soc stalel jun yoʼtan» (Éx. 34:6). Bayal skʼoplal ta yoʼtan te bin stojil ta pasel (Is. 61:8). Te Jehová kʼux ya yaʼiy-euk te kʼalal ya yil te ay jwokoltik sok yame slajinix te wokoliletik te kʼalal ya xkʼot yorail yuʼune (Jer. 29:11). ¡Koʼtantikukix te ya xkʼot ta pasel-abi! Jaʼ jun swentail te kʼax kʼux ta koʼtantik te Jehová.

4, 5. ¿Bin yuʼun la yal te jpuk-kʼop Pablo te jaʼ pajal sok jun ancla te bin ya jmaliytik ta pajel chaʼbeje?

⁴ Yan swentail te bin yuʼun mukʼ skʼoplal ta koʼtantik te smelelil kʼop, jaʼ te bayal ya skoltayotik ta jkuxlejaltik. Kiltik jun ejemplo. Jun te bin jnopojtik ta Biblia jaʼ te bin ya jmaliytik ta pajel chaʼbej. Swenta ya xkʼot ta koʼtantik te mukʼ skʼoplal ini, jich la stsʼibay te jpuk-kʼop Pablo: «Te smucʼul-oʼtanil ini ha ancla cʼohem yuʼun» te jkuxlejaltik (Heb. 6:19). Jich bitʼil te ancla te ya yakʼbey yiptajib te barco manchukme ya xyukʼilanot yuʼun te ikʼe, te bin ya yal te Biblia te ya jmaliytik ta pajel chaʼbej ya yakʼ yip koʼtantik sok slamalil koʼtantik te kʼalal ya xtal te wokoliletike.

⁵ Te kʼalal jich la yal te Pablo, jaʼ ay ta yoʼtan te bin ya smaliyik te machʼatik tsabilik te ya xbajtik ta chʼulchan. Pero te bin la yale tey ochem skʼoplalik-euk-a te machʼatik ya xkuxinik jilel liʼ ta Balumilal te kʼalal pastajemix ta nichimal kʼinal-ae (Juan 3:16). Jich bitʼil te yakotik ta smaliyel te ya xkuxinotik ta sbajtelkʼinal, ta melel jaʼ yakʼoj te ay swentail ya xkʼot te jkuxlejaltike.

6, 7. ¿Bin-utʼil koltayot te Yvonne ta swenta te bin ya jmaliytik ta pajel chaʼbej?

⁶ Kiltik te bin kʼax ta stojol jtul hermana te Yvonne sbiil. Maba chʼi ta smelelil kʼop sok te kʼalal chʼinto-ae ya xiʼ-a te lajele. Ya xjul ta yoʼtan te ay bin la skʼopon ta jun libro te jich ya yal: «Yananix xkʼot yorail-a te ya xlajotike». Ta swenta-abi jich ya schol: «Te kʼopetik-abi ma xyakʼ xwayon ta ajkʼabal, ya jnopilan ta koʼtan te bin ya xkʼot ta pasel ta pajel chaʼbej sok ya kalbey jba: ‹Ma jaʼuknax kuxlejalil ini. ¿Bin yuʼun te kuxulone?› ¡Ma jkʼan ya xlajon-a!».

⁷ Te kʼalal jchʼielix-a te Yvonne, la snaʼbey sba te testigoetik yuʼun Jehová. Jich ya schol: «Jajch jchʼuun te ya xjuʼ ya xkuxinon ta sbajtelkʼinal ta jun Nichimal kʼinal liʼ ta Balumilal». Te bitʼil la snop te smelelil kʼop koltayot ta bayal, melel jich ya yal: «Ya x-ochix jwayel ta ajkʼabal, melel ma jaʼuk ya jnopilanix te bin ya xkʼot ta pasel ta pajel chaʼbej sok ta swenta te lajele». Ma chajpuk ya kaʼiytik-a te mukʼ skʼoplal ya yil te Yvonne te smelelil kʼope, sok ya smulan scholbeyel yaʼiy te yantik te bin ya jtatik ta pajel chaʼbej (1 Tim. 4:16).

8, 9. 1) Ta lokʼombakʼop la yal te Jesús, ¿bin-utʼil la yakʼ ta ilel te mukʼ skʼoplal ta yoʼtan te machʼa la sta te kʼulejalil? 2) ¿Bin yilel ya awil te smelelil kʼope?

⁸ Te smelelil kʼop ya yal te Biblia tey ochem skʼoplal-euk-a te lek yachʼil kʼop yuʼun te Wentainel yuʼun te Diose. Te Jesús la spajbey skʼoplal te smelelil kʼop yuʼun te Wentainel jich bin-utʼil nakʼbil kʼulejalil. Jich la yal: «Te cuentahinel yuʼun te chʼulchan hich cʼohem te bin utʼil cʼuhlejalil mucul ta lum, te ay machʼa la sta soc la schaʼmuc xan hilel; tseʼel yoʼtan a baht schon spisil bintic ay yuʼun, ha baht sman te qʼuinale» (Mat. 13:44). Jich bitʼil ya kiltik, te machʼa la sta te kʼulejalil maba yak ta sleel-a. Pero te kʼalal la stae, bayal bintik la spas yuʼun ya yichʼ jilel te kʼulejalile: la schon spisil te bintik ay yuʼun. ¿Bin yuʼun te jich la spase? Melel kʼot ta yoʼtan te bayal stojol te kʼulejalil-abi, sok kʼaxtoxan jich stojol-a te bintik ay yuʼune.

⁹ ¿Mukʼbal skʼoplal ta awoʼtan-euk te smelelil kʼope? ¡Ya jnaʼtik te mukʼe! Melel spisil te bintik ya sjapbotik te balumilal ma xjuʼ ya jpajtik sok te stseʼelil koʼtantik te ya x-abatinotik ta stojol te Jehová ta ora ini sok te ya xjuʼ ya xkuxinotik ta sbajtelkʼinal te kʼalal ya xmantalaj te Wentainel yuʼun Dios. Chikan bin-a te ya jpastik yuʼun ya kamigointikxan ta lek te Jehová bayal bin ya jtatik yuʼun. Jaʼ jun mukʼul majtanil te kamigoinojtik te Jehová. Te bin bayal ya yakʼbotikxan stseʼelil koʼtantik jaʼ te lek yoʼtan kuʼuntik te Jehová (Col. 1:10).

10, 11. ¿Bin tijbot yoʼtan te Michael yuʼun ya sjeltay ta jkʼaxel te skuxlejale?

¹⁰ Bayal ta tul j-abatetik yuʼun Dios slokʼesoj sba ta yoʼtanik swenta ya yakʼbeyik stseʼelil yoʼtan te Jehová. Ay chaʼoxtul te spʼajojik jun carrera te ya xjapbotik yuʼun te balumilal. Ay yantik te maba sleojikix bayal skʼulejalik. Sok ay yantik te la sjeltayik ta jkʼaxel te skuxlejalik te kʼalal la snaʼbeyik sba te Jehová. Jaʼ jich kʼot ta stojol te Michael, te maba chʼi ta smelelil kʼop. Te kʼalal jchʼielto-ae, la snop karate. Jich ya yal: «Leknax ya kaʼiy jba yuʼun te tulan kʼinal ya kaʼiye. […] Ay baeltik ya kaʼiy te maʼyuk machʼa ya xjuʼ ya stsalone». Pero jajch snop te Biblia, la snop te maba lek te majtamba o te utsʼinwanej (Sal. 11:5). Te Michael jich ya yal ta stojol te hermano sok te yinam te nojptesot yuʼune: «Maʼyuk bin-ora la yalbonik te ya kijkitay te karate. Jaʼnax bajt ta yoʼtanik te ya snojptesonik ta skʼop Diose».

¹¹ Kʼalal te Michael yak ta snopel bael ta stojol te Jehová, kʼux-xan la yaʼiy ta yoʼtan. Jun te bin la snop te chajpnax la yaʼiye, jaʼ te ya snaʼbey yoʼbolil sba te Jehová te j-abatetik yuʼune. Te Michael kʼot ta yoʼtan te ya skʼan ya sjeltay ta jkʼaxel te skuxlejale. Jich ya yal: «Jnaʼoj-a te jaʼ kʼax tulan ya kaʼiy te ya kijkitay te karate. Pero jaʼnix jich jnaʼoj-a te ya kakʼbey bayal stseʼelil yoʼtan te Jehová teme ya kijkitaye, sok schʼuunoj koʼtan te jaʼ mukʼxan skʼoplal te ya x-abatinon ta stojol te Jehová». Te Michael mukʼ skʼoplal ta yoʼtan te smelelil kʼop la snope, jaʼ tijbot yoʼtan-abi ta sjeltayel ta jkʼaxel te skuxlejale (Sant. 1:25).

12, 13. Ta swenta te smelelil kʼop, ¿bin-utʼil akʼbot yil sakal kʼinal te Mayli?

¹² Kʼax mukʼ skʼoplal te smelelil kʼope, te Biblia ya spajbey skʼoplal jich bitʼil tsumbil kʼajkʼ ta ijkʼal kʼinal (Sal. 119:105; Efes. 5:8). Te Mayli te jaʼ slumal te Azerbaiyán, bayal ya yal wokol te koltayot yuʼun te Biblia te jich kʼoem bitʼil tsumbil kʼajkʼ te akʼbot yil te sbee. Cheb sreligion-a te sfamiliae: te spapae jaʼ musulmán yan te smamae jaʼ judía. Te Mayli jich ya schol: «Jnaʼoj-a te ay te Diose, pero ay bintik-a te ma xkʼot ta koʼtan. Jich bitʼil: ‹¿Bin yuʼun te la spasotik te Diose? ¿Bin-utʼil ay-a te ay machʼa ya xkʼax swokol sok te patil ya xbajt ta infierno?›. Te ants winiketik ya skuyik te jich ya skʼan te Dios spisil te bin ya xkʼot ta pasele, jaʼ yuʼun jich la jnop: ‹¿Jaʼnaxbal ya stuuntesotik te Dios yuʼun ya jpastik te bin ya skʼan yoʼtan stukele? ¿Yabal smulan te kʼalal ya xkʼax jwokoltike?›».

¹³ Te Mayli maba la skom sba ta slebeyel sujtib te jojkʼoyeletik yuʼune. Ta patil la skʼan nojptesel yuʼun Biblia, jich och ta testigo yuʼun Jehová. Jich ya yal: «Ta swenta te bin jamal ya yakʼ ta nopel te Biblia, ta ora ini yan-nax ya kil te jkuxlejal sok ay lamalkʼinal ya kaʼiy». Jich bitʼil te Mayli, jpisiltik te machʼatik ya x-abatinotik ta stojol te Jehová ya kalbeytik yutsil skʼoplal, melel la slokʼesotik «ta yihcʼal qʼuinal» sok la yakʼotik «ta sacal qʼuinal» (1 Ped. 2:9).

14. ¿Bin ya xjuʼ ya jpastik yuʼun mukʼxan skʼoplal ta koʼtantik te smelelil kʼope? (Jaʼnix jich ilawil te recuadro «Te bin-utʼil ya yichʼxan pajaltaybeyel skʼoplal»).

¹⁴ Te ejemploetik la kiltik ta parrafoetik ini, ya yakʼ kiltik te mukʼ skʼoplal te smelelil kʼope. Ayniwan bayalxan ejemploetik te ya xtal ta koʼtantike. ¿Bin yuʼun ma jpastikxan tulan ta sleel te bintikxan ya yakʼ te mukʼuk skʼoplal ta koʼtantik te smelelil kʼope? Kʼalal mukʼxan skʼoplal ta koʼtantik te smelelil kʼope, jichme ya kakʼtikxan ta ilel te skʼuxul koʼtantik ta stojol.

¿BIN-UTʼIL YA KAKʼTIK TA ILEL TE MUKʼ SKʼOPLAL TA KOʼTANTIK TE SMELELIL KʼOP?

15. Ala kaʼiytik junuk bin-utʼil ya xjuʼ kakʼtik ta ilel te mukʼ skʼoplal ta koʼtantik te smelelil kʼop.

¹⁵ Jun te bin-utʼil ya kakʼtik ta ilel te mukʼ skʼoplal ta koʼtantik te smelelil kʼop, jaʼ te kʼalal ya jkʼopontik spisil-ora te Biblia sok te publicacionetik kuʼuntik te lokʼemik ta Biblia. Chikan teme jteb o bayalix tiempo te jnopojtik te smelelil kʼop, spisil-ora ay bin yachʼil ya jnoptik. Te sbabial buelta lokʼ ta inglés te revista ini, jich la yal: «Te smelelil kʼop jich kʼoem te bitʼil nichim te ay ta yolil pimil kʼinal te jtebxanix ma xmilot yuʼun te jaʼmale, jaʼnix jich bayal lotiletik ta balumilal te wokol ya jtatik yuʼun te smelelil kʼope. Teme ya akʼan ya ata jun nichim te jich aye, ya skʼan ya apas tulan ta sleel; [...] teme ya akʼan ya atsake ya skʼan ya anijan aba. Ma skʼan te tikʼuk ya awaʼiy te jpejtnax nichim ya ata te jaʼ pajal sok te smelelil kʼop. [...] Pasa tulan ta stsobel; sok pasa tulan ta sleel». Ya skʼan ya jpastik tulan yuʼun ya jnoptik te skʼop Dios, teme jich ya jpastik bayal bin ya jtatik-a.

16. ¿Bintik apasoj te skoltayojat ta snopel te Bibliae? (Proverbios 2:4-6).

¹⁶ Jteb ma jpisiltik ma jmulantik skʼoponel sok snopel te junetik, pero te Jehová ya skʼanbotik te yakuk jnoptikxan te skʼope yuʼun jich ya xkʼot lekxan ta koʼtantik te smelelil kʼope (kʼopona Proverbios 2:4-6). Teme sok spisil koʼtantik jich ya jpastike spisil-ora ya jtatik jlekilaltik. Jtul hermano te Corey sbiil, ya yal te kʼalal ya skʼopon te Bibliae, jaʼnax ya xbajt ta yoʼtan jun versículo. Jich ya yal kaʼiytik: «Ya jkʼopon te notaetik te ay ta yeʼtal te página, ya jle te referenciaetik te ya xchiknaj jich ya xjajch jpas investigar. […] Te bitʼil jich ya jpase bayal bintikxan ya jnop». Chikan teme jich ya jpastik o maʼuk, teme ya jlokʼestik tiempo sok ya jpastik tulan ta snopel te Biblia, jich ya kakʼtik ta ilel te mukʼ skʼoplal ta koʼtantik te smelelil kʼope (Sal. 1:1-3).

17. ¿Bin ya skʼan ya jpastik sok te smelelil kʼope? (Santiago 1:25).

¹⁷ Ta melel, ma tikʼuknax-a te ya jnoptik te smelelil kʼope. Yuʼun ya jtatikxan jlekilaltik, ya skʼan ya jpastik ta jkuxlejaltik te bin ya jnoptik ta swenta te smelelil kʼope. Jaʼnaxme jich ya jtatik stseʼelil koʼtantik (kʼopona Santiago 1:25). ¿Bin-utʼil ya jnaʼtik ta lek te yakotik ta spasel ta jkuxlejaltik te smelelil kʼope? Jtul hermano ya yal te ya xjuʼ ya kiltik bintik lek yakotik ta spasel sok te banti ya skʼan ya xlekubotikxan. Te jpuk-kʼop Pablo jich la scholbey skʼoplal: «Te ban cʼalal cʼohemix ta coʼtantic, hichuc nix acʼa jtʼuntic» (Filip. 3:16).

18. ¿Bin yuʼun ya jpastik tulan yuʼun maba ya kijkitaytik «te smelelil cʼop»?

¹⁸ Jnop kaʼiytik te bintik lekilal ya jtatik teme maba ya kijkitaytik «te smelelil cʼop». Ma jaʼuknax ya xlekub te jkuxlejaltik, jaʼnix jich ya kakʼbeytik stseʼelil yoʼtan te Jehová sok te kermanotaktik (Prov. 27:11; 3 Juan 4). ¡Bayal skʼoplal ta koʼtantik te smelelil kʼop sok te ya jpas ta jkuxlejaltike!