«Yame ajokinon ta Nichimal Kʼinal»

1. ¿Bin albot yuʼun Jesús jtul chopol winik te kʼalal nopol ya xlajix-ae? (Lucas 23:39-43).

TE Jesús sok te chaʼtul chopol winiketik yakik ta ajkan yuʼun te nopol ya xlajikix-ae (Luc. 23:32, 33). Te chaʼtul winiketik-abi yakik ta slabanel-a te Jesús, jaʼ yuʼun ya jnaʼtik te ma jaʼuk jnopojeletik yuʼune (Mat. 27:44; Mar. 15:32). Pero ay jtul te la sjel te snopojibal yuʼun, jich la yal: «Jesús, naʼawon te kʼalal ya x-ochat ta Wentainel awuʼune». Te Jesús jich la yal: «Ta ora ini jamal ya kalbat: yame ajokinon ta Nichimal Kʼinal» (kʼopona Lucas 23:39-43). Maʼyuk bin ya yakʼ jnaʼtik te la schʼuun yoʼtan te chopol winik te bin la schol te Jesús ta swenta «te Wentainel yuʼun te chʼulchane». Sok maʼyuk bin-ora la yal te Jesús te ya x-och ta Wentainel te winik-abi (Mat. 4:17). Te Jesús jaʼ yak ta yalbeyel skʼoplal-a te Nichimal Kʼinal ya xkʼot ta pasel liʼ ta Balumilal ta pajel chaʼbej. ¿Bin-utʼil ya jnaʼtik?

2. ¿Bin yuʼun ya kaltik te judioniwan te chopol winike?

² Te chopol winik te la sujtes yoʼtane, judioniwan. Te winik-abi la sjojkʼoybey te yan chopol winik: «Jich bitʼil pajal yakotik ta yichʼel castigo soke, ¿matobal ya axiʼ-a te Diose?» (Luc. 23:40). Te judioetik jtulnax Dios ya yichʼik ta mukʼ, pero te ants winiketik ta yantik nación ya yichʼik ta mukʼ bayal diosetik (Éx. 20:2, 3; 1 Cor. 8:5, 6). Te yanuk slumalik-a te chaʼtul chopol winiketik-abi, jichniwan la sjojkʼoy te jichuke: «¿Matobal ya axiʼ-a te diosetike?». Jaʼnix jich, la yichʼ tikunel tal te Jesús ta sleel «te tuminchijetik yuʼun Israel te chʼayemike», jaʼ yuʼun maba ya scholbey skʼop Dios-a te ants winiketik te yan snacionik-ae (Mat. 15:24). Te Dios yakʼojbeyix snaʼ-a te israeletik te ya schaʼkuxajtes te machʼa lajemikixe. Jaʼ-abi snaʼojniwan-a te chopol winike, sok ta swenta te bin la yal ya yakʼ jnaʼtik te kʼoemniwan ta yoʼtan te ya yichʼ chaʼkuxajtesel te Jesús yuʼun te Jehová sok te ya x-och ta Ajwalil ta Wentainel yuʼun te Dios. Jich yilel te chopol winik-abi schʼuunoj yoʼtan te ya yichʼ chaʼkuxajtesel yuʼun te Diose.

3. ¿Binwan la snop te chopol winik te la sujtes yoʼtan kʼalal te Jesús la yal ta swenta te Nichimal Kʼinale? (Génesis 2:15).

³ Te bitʼil jaʼ judío te chopol winike, snaʼoj ta swenta te Nichimal Kʼinal te banti la yakʼ Jehová te Adán sok te Eva. Jaʼ yuʼun laniwan snop te Nichimal Kʼinal la yal te Jesús jaʼ te nichimal kʼinal te ya yichʼ pasel liʼ ta Balumilal (kʼopona Génesis 2:15).

4. ¿Bin ya stij koʼtantik ta snopel te bin la yal te Jesús ta stojol te chopol winike?

⁴ Te bin la yal te Jesús ta stojol te chopol winike ya skʼan ya stij koʼtantik ta snopilanel bin yilel te kuxlejalil ta Nichimal Kʼinale. Te bin ya skoltayotik jaʼ te ya jultes ta koʼtantik te lamalkʼinal la staik te israeletik te kʼalal ay ta ajwalil-a te Salomón. Te Biblia ya yalbey skʼoplal te Jesús te «jaʼ kʼax mukʼxan skʼoplal te bin-utʼil te Salomone». Jaʼ yuʼun jnaʼojtik ta lek te ya xbajt schajpanik te Balumilal te Jesús sok te machʼatik ya xwentainwanik soke (Mat. 12:42). Jaʼnix jich, te «yantik tuminchijetik» ya skʼan ya snopik te bin ya skʼan ya spasik yuʼun ya xkuxinik ta sbajtelkʼinal ta Nichimal Kʼinal (Juan 10:16).

¿BINWAN YILEL YA XKʼOT TE JKUXLEJALTIK TA NICHIMAL KʼINAL?

5. ¿Binwan yilel ya anop te kuxlejalil ta Nichimal Kʼinale?

⁵ ¿Binwan yilel ya anop te kuxlejalil ta Nichimal Kʼinale? Yaniwan anop ta swenta te jun tʼujbil parque, jich bitʼil te tsʼunbil kʼinal Edén (Gén. 2:7-9). O yaniwan xjul ta awoʼtan te albilkʼop la yal te Miqueas ta stojol te j-abatetik yuʼun Dios te kʼalal la yal: «Jujutuhl ya shuhcan sbahic ta yeʼtal te stsʼusubil soc ta yeʼtal te higuera yuʼune» (Miq. 4:3, 4). Sok yaniwan xtal ta awoʼtan te textoetik te banti ya yal te ya x-ayin bayal weʼelile (Sal. 72:16; Is. 65:21, 22). Yaniwan kiltik kʼoem te ayotik ta tʼujbil nichimal kʼinal, te ayotik ta jun mesa te nojel ta bujtsʼan weʼeliletik. ¿Yabal anop te yakat ta yichʼbeyel yikʼ te nichimetik? ¿Yabal anop te ya awaʼiybey stseʼej te afamiliatak sok awamigotak sok te jun-nax atsoboj abaike? Ayniwan chaʼoxtul te la yichʼik chaʼkuxajtesele, spisil-abi smelelil ya xkʼot ta pasel ta Balumilal. Jaʼnix jich ta Nichimal Kʼinal yame xbajt jmulantik spasel tʼujbil aʼtelil.

6. ¿Bin ya xbajt jpastik ta Nichimal Kʼinal? (Ilawil te dibujo).

⁶ Te Jehová la spasotik yuʼun ya jmulantik te kaʼteltike (Ecl. 2:24). Te kʼalal ya xwentainwan ta jmil jaʼbil te Cristo, bayalme aʼtelil ya jpastik. Te machʼatik ya xkolik jilel ta tulan wokolil sok te bayal millón ta tul ants winiketik te ya xchaʼkuxajik tal, ya xtuun yuʼun skʼuʼ spakʼik, sweʼelik sok snaik. Spisil-abi bayal aʼtel yichʼoj, pero yame xbajt yakʼ stseʼelil koʼtantik. Jich bitʼil te Adán sok te Eva te la skanantayik te tsʼunbil kʼinal Edén, jaʼnix jich te joʼotik ya xbajt jkʼatpʼuntik ta nichimal kʼinal te Balumilal. Nopanax awaʼiy te ya xbajt jmulantik snojptesel te bayal ta millón ta tul te ya xchaʼkuxajik tal te maba la snaʼbeyik sba ta lek te Jehová sok te skʼanojel yoʼtane. Jaʼnix jich ya xbajt jnojptestik te j-abatetik yuʼun Dios te lajemikix-a te kʼalal mato xtal ta Balumilal-a te Jesús.

7. ¿Bin-a te jnaʼojtik, sok bin yuʼun ya jnaʼtik?

⁷ Ta Nichimal Kʼinal jnaʼojtik te ya x-ayin lamalkʼinal, te bintik ya xtuun kuʼuntik sok leknax chajpanbil spisil. ¿Bin yuʼun ya jnaʼtik? Jaʼ yuʼun te bin ya yalbotik te Biblia ta swenta te bin-utʼil wentainwan te Salomón, te Jehová ya skoltayotik ta snaʼel te bin yilel ya xbajt kʼotuk te jkuxlejaltik kʼalal ya xwentainwan ta Balumilal te sNichʼane.

TE WENTAINEL YUʼUN SALOMÓN, YA YAKʼ KILTIK TE BIN YILEL YA XKʼOT TE NICHIMAL KʼINAL

8. ¿Bin-utʼil kʼot ta pasel ta namey kʼinal te bin ya yal te Salmo 37:10, 11, 29? (Ilawil te sección «Te bintik ya sjojkʼoyik te machʼatik ya skʼopon te june» te ay ta revista ini).

⁸ Te Jehová la yakʼbey stsʼibay te David te bin yilel ya xkʼot te kuxlejalil ta pajel chaʼbej kʼalal ya xwentainwan jtul ajwalil te ay spʼijil sok te jun yoʼtane (kʼopona Salmo 37:10, 11, 29). Kʼalal ya kalbeytik te ants winiketik ta swenta te Nichimal Kʼinal, ta bayal buelta jaʼ ya jkʼopontik te Salmo 37:11. Lek te jich ya jpastike, melel te Jesús la stuuntes te texto-abi kʼalal pʼijubteswan ta wits. Jich la yakʼ ta ilel te yato xbajt kʼotuk ta pasel ta pajel chaʼbej (Mat. 5:5). Pero, te bin la stsʼibay te ajwalil David, jaʼnix jich la yakʼ ta ilel te bin yilel ya xkʼot te kuxlejalil ta skʼajkʼalel te Salomón. Ta yorail-abi, te lum Israel la staik bayal lamalkʼinal sok te bin ya xtuun yuʼunik ta lumkʼinal te banti ay bayal «leche soc chab». Te Dios jich yalojix-a: «Teme yac atʼunic te bintic caloj ta mandar. […] Ya cacʼ lamal qʼuinal, soc mayuc machʼa ya xiwtesex cʼalal wayalex a» (Lev. 20:24; 26:3, 6). Te bin la yal te Dios kʼot ta pasel kʼalal wentainwan te Salomón (1 Crón. 22:9; 29:26-28). Te Jehová la yal ta jamal te ya slajinlan te chopol ants winiketik (Sal. 37:10). Jich bitʼil la kiltikixe, kʼotix ta pasel ta namey kʼinal te bin ya yal te Salmo 37:10, 11, 29 sok yato xkʼot ta pasel ta pajel chaʼbej.

9. ¿Bin la yal te ajwalil ants ta Saba ta swenta te bitʼil ya xwentainwan te Salomón?

⁹ Te ajwalil ants yuʼun Saba la yaʼiy stojol te bayal lamalkʼinal sok lek skuxlejalik te israeletik. Jaʼ yuʼun bajt ta Jerusalén ta yilel teme melel te bin la yaʼiy stojole (1 Rey. 10:1). Kʼalal la yil te bin-utʼil ya xwentainwan te Salomón, jich la yal: «Ma ba stahoj jʼohlil te bin caʼiyej. […] ¡Bayel me yutsil te winiquetic awuʼun! Bayel me yutsil te aʼbatetic awuʼun te spisil ora ayic ta atojol ta yaʼiybelic te apʼijile» (1 Rey. 10:6-8). Te bin yilel te kuxlejalil te kʼalal wentainwan te Salomón, jaʼnaxme la yakʼ ta ilel jtebuk te Jehová te bin ya xbajt spas ta stojol te ants winiketik kʼalal ya xwentainwan te sNichʼan liʼ ta Balumilal.

10. ¿Bin yuʼun te jaʼ mukʼxan skʼoplal te Jesús te bitʼil te Salomón?

¹⁰ Te Jesús jaʼ mukʼxan skʼoplal te bitʼil te Salomón. Te Salomón ma tojil winikuk, bayal bintik ma lek la spas te la yakʼbey swokol te lum yuʼun Dios. Yan te Jesús jaʼ jtul Ajwalil te toj stukele (Luc. 1:32; Heb. 4:14, 15). Jaʼnix jich juʼ yuʼun stsalel te pruebaetik akʼbot yuʼun te Satanase. Te Cristo yakʼoj ta ilel te maʼyuk bin-ora ya spas te bin ma lek sok te ma xyakʼbey swokol te machʼatik ya swentaine. ¿Mabal jichuk te ya yakʼ stseʼelil koʼtantik te jaʼ Ajwalil kuʼuntike?

11. ¿Machʼatik ya skoltayik te Jesús?

¹¹ Te Jesús ya xkoltayot yuʼun te 144 mil ajwaliletik, ya skanantayik te ants winiketik sok ya skʼotesik ta pasel te skʼanojel yoʼtan te Jehová ta Balumilal (Apoc. 14:1-3). Te ajwaliletik-abi jaʼnix jich kʼax swokolik kʼalal ayik ta Balumilal-a. Jaʼ yuʼun ya xkʼot ta yoʼtanik te bin yaʼiyel ya kaʼiy jbatik. ¿Bin-nix aʼtelil ya spasik-a?

¿BIN AʼTELIL YA SPASIK TE MACHʼATIK YA XBAJTIK TA CHʼULCHAN?

12. ¿Bin aʼtelil ya x-akʼbotik yuʼun Jehová te 144 mil?

¹² Te Jesús sok te 144 mil jaʼ bayalxan aʼtel ya spasik te bitʼil te Salomón. Te ajwalil-abi jaʼnax la swentain cheʼoxeb millón ta tul ants winiketik ta jun nación. Pero, te machʼatik ya xwentainwanik sok te Jesús ya xbajt swentainik bayal millón ta tul ants winiketik ta swolol balumilal. ¡Jaʼ jun mukʼul aʼtelil ya x-akʼbotik yuʼun Jehová!

13. ¿Bin mukʼul aʼtelil ya spasik te machʼatik ya xwentainwanik sok te Jesús?

¹³ Jich bitʼil te Jesús, te 144 mil ta tul ya xkʼotik ta ajwalil sok ta sacerdoteetik (Apoc. 5:10). Te Ley yuʼun Moisés ya yal te bin aʼtelil te mukʼ skʼoplal ya spasik te sacerdoteetik, jaʼ te ya skanantaybeyik skuxlejal te israeletik sok te schʼuunel yoʼtanike. Te «Ley jaʼ yaxinal te bintik lek yak ta talele», jaʼ yuʼun snujpʼ ya kaltik te ya xbajt spasik jun aʼtelil te mukʼ skʼoplal te machʼatik ya xwentainwanik sok te Jesús, jaʼ te ya skanantaybeyik skuxlejal sok schʼuunel yoʼtan te lum yuʼun Dios (Heb. 10:1). Mato jnaʼojtik te bin-utʼil ya yalik mantal te ajwaliletik sok te sacerdoteetik ta stojol te ants winiketik te ayik ta Balumilal. Jaʼ chikan bitʼil ya xbajt schajpan te Jehová, jnaʼojtik ta lek te ya yichʼik koltayel te machʼatik ya xkuxinik ta Nichimal Kʼinal (Apoc. 21:3, 4).

¿BIN YA SKʼAN YA SPASIK TE «YANTIK TUMINCHIJETIK» SWENTA YA XKUXINIK TA NICHIMAL KʼINAL?

14. ¿Bin-utʼil-a te jun-nax ayik te «yantik tuminchijetik» sok te tuminchijetik te ma bayalike?

¹⁴ Kʼalal te Jesús la yal «tuminchijex te ma bayalexe» jaʼ skʼoplal te machʼatik ya xwentainwanik soke (Luc. 12:32). Jaʼnix jich la yalbey skʼoplal yan jtsob ants winiketik te la sbiilintes: «yantik tuminchijetik». Te chaʼtsojb-abi jun-nax ya xkʼotik (Juan 10:16). Jun-nax yakik ta aʼtel, sok jich ya spasikxan bael kʼalal ya xkʼatpʼuj ta nichimal kʼinal te Balumilal. Ta yorail-abi, te tuminchijetik te ma bayalik ayikix ta chʼulchan-a, pero te «yantik tuminchijetik» ya smaliyik te ya xkuxinik ta sbajtelkʼinal liʼ ta Balumilal. Pero, ay bintik ya skʼan ya spasik ta ora ini yuʼun ya xkuxinik ta Nichimal Kʼinal.

15. 1) ¿Bin-utʼil te «yantik tuminchijetik» ya skoltayik te yermanotak te Cristo? 2) ¿Bin-utʼil ya xjuʼ ya atʼun te ejemplo yuʼun te hermano te ya xchiknaj ta foto?

¹⁵ Te chopol winik te la sujtes yoʼtane ma xjuʼix yuʼun yakʼel ta ilel te ya yal wokol yuʼun te bin la spas te Jesús ta stojole. Pero, te «yantik tuminchijetik» bayal bin-utʼil ya xjuʼ ya yakʼik ta ilel stukel. Ya kakʼtik ta ilel te kʼux ta koʼtantik te Jesús ta swenta te bin ya jpastik ta stojol te machʼatik ya xbajtik ta chʼulchan. Te Jesús la yal te jaʼ jich ya yichʼ naʼel machʼatik-a te tuminchijetik (Mat. 25:31-40). Jun te bin-utʼil ya jkoltaytik te yermanotak te Cristo jaʼ te ya jcholtik skʼop Dios sok sbujtsʼ koʼtantik sok te ya kotsestik jnopojeletik (Mat. 28:18-20). Jaʼ yuʼun ya jtuuntestik te aʼtejibaletik yakʼojbotik, jich bitʼil te libro Mulana yuʼun ya kakʼtik nojptesel ta Biblia. Teme mato ayuk machʼa ya anojptes ta Biblia, ¿bin yuʼun maba ya apas tulan yuʼun ay machʼa ya anojptes?

16. ¿Bin ya skʼan ya jpastik ta ora ini swenta ya xkuxinotik ta Nichimal Kʼinal?

¹⁶ Ma puersauk te ya jmaliytik te ya xkuxinotik ta Nichimal Kʼinal yuʼun ya jel jtaleltik jich bitʼil ya skʼan te Jehovae. Ta ora ini ya skʼan ya jpastik tulan yuʼun smeleliluk te bin ya kaltik, te bin ya jpastik sok te tsajtaybiluk te bin ya jpas ta jkuxlejaltik. Jaʼnix jich ya skʼan te jun koʼtantik ta stojol te Jehová, ta stojol te jmamalaltik, te kinamtik sok ta stojol te kermanotaktik. Teme ya jpastik tulan ta schʼuunbeyel mantal te Jehová te bitʼil ayotik ta chopol balumilal, ta Nichimal Kʼinal maba wokol ya kaʼiytik. Jaʼnix jich ay bintik ya xjuʼ ya jnoptik sok ya kakʼtik ta ilel lekil taleliletik te ya yakʼ ta ilel te yak jchajpanbel jbatik yuʼun ya xkuxinotik ta Nichimal Kʼinal, jich bitʼil ya yal te artículo «¿Chapalatbal yuʼun ya awuʼunin te Balumilale?» te ay ta revista ini.

17. ¿Bin yuʼun ma skʼan ya kakʼ schebajtes koʼtantik teme ay jpasojtik mulile?

¹⁷ Jaʼnix jich ya skʼan ya jpastik tulan te manchuk ayto jmultik ya kaʼiy jbatik teme ay jpasojtik tulan mulile. Pero mame jkuytik te ya stupʼbotik te jmultik te stojol kolel teme «spasemal koʼtantik ya jpastik te mulil» (Heb. 10:26-31). Pero, teme la sujtes koʼtantik ta smelelile, la jletik koltayel ta stojol te Jehová, ta stojol te ancianoetik, sok te la jeltaytikix te jtaleltike, jnaʼojtik te la spasbotikix perdón sok yutsil yoʼtan te Jehová (Is. 55:7; Hech. 3:19). Juluk ta koʼtantik te bin la yal te Jesús ta stojol te fariseoetik: «Maba tal jle te machʼatik tojike, jaʼ tal jle te jmulawiletike» (Mat. 9:13). Yuʼun-nix jich-a, ya jtatik perdón yuʼun te jmultik ta swenta te laj te Jesús.

YA XJUʼ YA XKUXINAT TA SBAJTELKʼINAL TA NICHIMAL KʼINAL

18. ¿Bin ya amulan ya ajojkʼoybey te chopol winik te pajal la yichʼ jijpanel ta teʼ sok te Jesús?

¹⁸ Nopanax awaʼiy te yakat ta aʼiyej ta Nichimal Kʼinal sok te chopol winik te kʼopoj sok te Jesuse. ¿Mabal jichuk te ya awalik wokol yuʼun te la yakʼ sba ta lajel te Cristoe? Yaniwan awalbey te akʼa scholbatxan awaʼiy te bin yilel kʼax yuʼun te Jesús kʼalal nopol ya xlajix-ae sok te bin yaʼiyel la yaʼiy sba te kʼalal sutbot skʼop yuʼun te Jesús ta swenta te bin la skʼanbeye. Jaʼnix jich yaniwan sjojkʼoybat bin yilel-a te kuxinel ta balumilal yuʼun te Satanás ta slajibal kʼajkʼal. ¡Jaʼ jun mukʼul majtanil te ya jnojptestik te ants winiketik ta swenta Biblia jich bitʼil te winik ini! (Efes. 4:22-24).

19. ¿Bin yuʼun maba ya xchʼajubotik ta Nichimal Kʼinal? (Ilawil te dibujo ta yelaw te revista).

¹⁹ Ta Nichimal Kʼinal maʼyuk bin-ora ya xchʼajubotik. Spisil-ora ay machʼa ya xkʼopojotik sok, sok ya jpastik aʼteliletik te ya yakʼ sbujtsʼ koʼtantik. Te bin lekxane jaʼ te ya jnaʼbeytikxan sba ta jujun kʼajkʼal te jTatik te ay ta chʼulchan sok te ya jmulantik te majtaniletik ya yakʼbotike. Spisil-ora ay bintik yachʼil ya jnoptik ta swenta te Jehová sok ta swenta te bintik spastiklanoje. Te skʼuxul koʼtantik ta stojol te Dios ya xmukʼubxan ta jujun kʼajkʼal. ¡Ya kalbeytik bayal wokol te Jehová sok te Jesús te ya yakʼ xkuxinotik ta sbajtelkʼinal ta Nichimal Kʼinal!