¿Yatobal xjul ta awoʼtan?

¿Akʼoponojbal ta lek te articuloetik yuʼun Te J-ilkʼinal ta toyol te mato jaluk slokʼelike? Ilawil teme ya xjuʼ ya awakʼbey sujtib te jojkʼoyeletik ini:

¿Bin lekilal ya jtatik kʼalal ya kakʼ jtiempotik ta skʼoponel te Jehová, ta yaʼiybeyel skʼop sok ta snopilanel ta koʼtantik?

Lek te bin ya jtatik ta nopel spasel, ya xkʼootik ta lekil jpʼijubteswanej, ya stsakxan yip te schʼuunel koʼtantik sok kʼux-xan ta koʼtantik te Jehová (w22.01, pág. 30, 31).

¿Bin yuʼun jaʼ lek te ya smukʼulinxan koʼtantik te Jehová sok te machʼatik yakʼojbey yaʼtel?

Mukʼ skʼoplal te ya smukʼulin koʼtantik te spisil-ora lek te bin ya sta ta nopel spasel te Jehová. Jich ya kakʼtik ta ilel kʼalal ya jchʼuuntik spasel te bin ya staik ta nopel te ancianoetik. Ta yorail te tulan wokolil ma tulan ya kaʼiytik schʼuunel mantal manchukme maniwan ya xkʼot ta koʼtantik o ma jichuk ya skʼan ya yichʼ pasel yilel (w22.02, pág. 4-6).

¿Bin yuʼun te chʼul-abat la yalbey te Zacarías te ya yil te plomo ta skʼab te ajwalil Zorobabel? (Zac. 4:8-10).

Te najalsitil-abi la yakʼbey snaʼ te lum yuʼun Dios te manchukme ma kʼax tʼujbiluk te templo te yak ta juʼel, yananix xlaj ta pasel-a sok lek ya yil te Jehovae (w22.03, pág. 16, 17).

¿Bin-utʼil ya kakʼtik ta ilel lekil ejemplo ta swenta te bitʼil ya xkʼopojotik? (1 Tim. 4:12).

Lekuknax awoʼtan te kʼalal ya achol skʼop Dios, kʼayojinan sok yip awoʼtan ta tsoblejetik sok spisiluk-ora ya awakʼ acomentario, mame xa apas lot, utsilkʼoptaya te yantik sok mame xa atuuntes kʼopetik te kʼux ta aʼiyel (w22.04, pág. 6-9).

¿Bin yuʼun te chambalam ya yalbey skʼoplal te Apocalipsis 13:1, 2 pajal yilel sok te chankojt chambalam (ajwaliletik) te ya yal te capítulo 7 yuʼun Daniel?

Te chambalam ya yalbey skʼoplal te Apocalipsis 13 ma jaʼuk skʼoplal jun gobierno, jich bitʼil te Roma. Jaʼ skʼoplal spisil te ajwaliletik te swentainoj te ants winiketik te jayebix tal tiempoe (w22.05, pág. 9).

¿Bin-utʼil ya kakʼtik ta ilel te ya smukʼulin koʼtantik te stojil ya xchajpanwan te Jehová?

Teme ay machʼa ya sta smul ta jtojoltik, ma skʼan ya jkʼej kilinbatik sok slab koʼtantik ta stojol sok akʼa smukʼulin koʼtantik te jaʼ ya schajpan spisil te Jehová. Jaʼ ya schajpan te wokoliletik yakʼoj te mulile (w22.06, pág. 10, 11).

¿Bin ya skʼan ya yichʼ ta wenta jtul hermano te kʼalal ya skʼopon Dios ta tsoblej?

Te kʼalal ya skʼoponik Dios, ma yuʼunuk ya stojobtesik te congregación o ya yalik anuncioetik. Ma skʼan te «bayel ya xcʼopojic», kʼaxemtoxan-a teme jaʼ ta sjajchibal te tsobleje (Mat. 6:7) (w22.07, pág. 24, 25).

¿Bin-a te chaʼkuxajel yuʼun ichʼel ta kʼop ta stojol «te machʼatik la spasik te bintik chopole»? (Juan 5:29).

Ma jaʼuk ya x-ichʼotik ta kʼop yuʼun te bin la spasik te kʼalal mato xlajik-ae. Jaʼ ya skʼan ya yal te ya yichʼ ilbeyel stalelik te kʼalal chaʼkuxajemikix-ae (w22.09, pág. 18).

¿Bin la yal sok stseʼelil yoʼtan te hermano Joseph Rutherford ta jun mukʼul tsoblej te la yichʼ pasel ta septiembre ta 1922?

Ta jun mukʼul tsoblej te la yichʼ pasel ta Cedar Point (Ohio, Estados Unidos), jich la yal: «¡Ilawilik, te Ajwalil yakix ta wentainwanej! Jaʼex swiniktakex. Jaʼ yuʼun pukaik ta alel, pukaik ta alel, pukaik ta alel te Ajwalil sok te Wentainel yuʼune» (w22.10, pág. 3-5).

Jich bitʼil ya yal te capítulo 30 yuʼun Isaías, ¿bin oxchajp ya spas te Jehová yuʼun ya xkujch kuʼuntik te wokolile?

Te capítulo ini ya yakʼ jnaʼtik te 1) ya yaʼiy te j-oraciontik sok ya sut, 2) ya stojobtesotik sok 3) ya yakʼbotik bendición ta ora ini sok ta pajel chaʼbej (w22.11, pág. 9).

¿Bin yuʼun ya kaltik te kʼot ta pasel ta namey sok te yato xkʼot ta pasel ta pajel chaʼbej te bin ya yal te Salmo 37:10, 11, 29?

Te bin la yal te David la yakʼ ta ilel te jun-nax yoʼtan kuxinik ta Israel, te kʼalal ay ta ajwalil-a te Salomón. Te kʼalal te Jesús la yalbey skʼoplal te Nichimal Kʼinal ta pajel chaʼbej, jaʼ la stuuntes te versículo 11 (Mat. 5:5; Luc. 23:43) (w22.12, pág. 8-10, 14).