1 | Te oración: Akʼbeya «ta stojol spisil» te bin ya amel awoʼtan yuʼun

TE BIBLIA JICH YA YAL: «Akʼbeyaik ta stojol [Dios] spisil te bintik ya amel awoʼtanik yuʼun, melel ayex ta yoʼtan stukel» (1 PEDRO 5:7).

Te bin ya skʼan ya yal

Te Jehová ya skʼan te yakuk jcholbeytik yaʼiy spisil te jwokoltik o te bin ya jmel koʼtantik yuʼune (Salmo 55:22). Manchukme tulan te jwokoltik o maʼyuk lek skʼoplal yilel ya xjuʼ ya kalbeytik yaʼiy te Diose. Teme ya jmel koʼtantik yuʼun te jwokoltike, jaʼnix jich te Jehová. Te oración ya yakʼbotik lamalkʼinal (Filipenses 4:6, 7).

¿Bin-utʼil ya skoltayotik?

Te kʼalal stsakojotik te chamel te ya yutsʼin jpensartik, jtukeltikniwan ya kaʼiy jbatik, melel te yantike maniwan xkʼot ta yoʼtanik te bin yak ta kʼaxel ta jtojoltike (Proverbios 14:10). Yan stukel te Diose ya xkʼot ta yoʼtan te bin yaʼiyel ya kaʼiy jbatik, jaʼ yuʼun ya xjuʼ ya jcholbeytik yaʼiy spisil te bin yak ta kʼaxel ta jtojoltike. Te Jehová ya yilotik, ya snaʼ te bin kʼux ya kaʼiytik sok ya snaʼ te bin wokolil ya xkʼax ta jtojoltik. Jaʼ yuʼun ya skʼan te yakuk kalbeytik ta oración biluk wokolil te ya jmel koʼtantik yuʼune (2 Crónicas 6:29, 30).

Te kʼalal ya jkʼopontik te Jehová, ya xjuʼ ya smukʼulin koʼtantik te yuʼun-nix ya skʼan ya skanantayotik-ae. Ya xjuʼ jich ya kaltik te bin-utʼil te machʼa la stsʼibay te Biblia kʼalal jich la yalbey te Diose: «Awilojbon te jmel-oʼtane, ya anaʼbon te jwocole» (Salmo 31:7, Xchʼul Cʼop Dios ta Tzeltal yuʼun Oxchuc soc Tenejapa, TZOXCH). Snaʼel te ya smel yoʼtan te Jehová yuʼun te jwokoltike, ya skoltayotik yuʼun ma xchebaj koʼtantik. Pero ma jaʼuknax ya yil te jwokoltike, ya xkʼot ta yoʼtan te bin yak ta kʼaxel ta jtojoltik sok ya skoltayotik ta stael smukʼul koʼtantik ta swenta te bin ya yal te Biblia.

¿Bin-utʼil ya xkoltayot yuʼun te Biblia? Julián

Te bin-utʼil ya yutsʼinon te ansiedad

«Ya kil jwokol yuʼun te ansiedad sok te chamel te transtorno obsesivo compulsivo sbiil (TOC). Ma naʼbiluk kuʼun te bin-ora ya yutsʼinon te ansiedad. Ya xjuʼ te lek ayon, pero ta repentenax ma jnaʼ te bin ya jpas ta skaj te ansiedad. Jich ya xkʼot ta jtojol te kʼalal jokinoj bayal ants winiketik, melel ya jmel koʼtan yuʼun te bin ya snopik ta jtojole.

»Te machʼatik ya snaʼbonik jba ya spasik tulan yuʼun ya skoltayonik. Aynix ma ya skoltayon te bin ya yalbonike, pero ya kal wokol yuʼun te bitʼil ya spasik tulan yuʼun lek ya kaʼiy jba.

»Ay baeltik ta skaj te ansiedad sok te chamel transtorno obsesivo compulsivo, wokol ya kaʼiy te ya jkʼopon te Jehová. Ya skʼan ya jpas tulan yuʼun maʼyuk bin ya schʼaytesbon koʼtan, yuʼun jich ya jkʼopon te Jehová. Oranax ya xchʼay ta koʼtan te bin ya jnop sok ma jnaʼix-a te bin yakon ta snopel-ae. Te kʼalal ma junuknax te bin ay ta jpensar, wokol ya kaʼiy te ya kalbey te Jehová te bin-nix ya jnop-ae sok te bin yaʼiyel ya kaʼiy jbae».

Te bin-utʼil ya skoltayon te Biblia

«Te Biblia la yakʼbon jnop te ma puersauk kʼax najt o buen chajpanbil te oración yuʼun jich ya yaʼiy-a te Diose. Ay baeltik te kʼalal ma jnaʼ bin-utʼil ya kalbey te Dios te bin yaʼiyel ya kaʼiy jbae, jaʼnax ya kalbey: ‹Jehová, awokoluk, koltayawon›. Manchukme jaʼnax ya xjuʼ kuʼun yalel-abi, jich ya kaʼiy te ya xkʼot ta yoʼtan Jehová te bin yaʼiyel ya kaʼiy jba sok te ya skoltayon ta yorail-abi. Ma jaʼuknax ya jpas te oracione, jaʼnix jich jleoj koltayel ta stojol doctoretik te ya snaʼik ta swenta-abi. Tseʼelnax koʼtan, melel ta swenta-abi lekix ya kaʼiy jba jtebuk. Manchukme ya skʼan ya jpas tulan yuʼun ya xnoptsajon ta stojol te Jehová, ya jpas, melel ya jnaʼ te kʼuxon ta yoʼtan sok te yuʼun-nix ya skʼan ya skoltayon-ae».