Ancianoetik, kʼayinbeyaik stalel te Gedeón

1. Jich bitʼil ya yal 1 Pedro 5:2, ¿bin ay ta swentaik spasel te ancianoetik?

TE Jehová yakʼbeyoj ta swenta te ancianoetik yuʼun ya skanantay te tuminchijetik yuʼune. Te ancianoetik mukʼ skʼoplal ya yilik te ya x-abatinik ta stojol te yermanotak sok ya spasik tulan yuʼun ya xkanantaywanik ta lek (Jer. 23:4; kʼopona 1 Pedro 5:2). ¡Kʼax tʼujbil ta ilel te ay hermanoetik te tulan ya x-aʼtejik ta congregacionetik!

2. ¿Bin wokolil ya sitintayik te ancianoetik?

² Te bitʼil bayal yaʼtelik te ancianoetik ya yil swokolik, kʼalal ya skanantay te congregación bayal ya x-aʼtejik. Kiltik te bin kʼax ta stojol te Tony, jtul anciano yuʼun Estados Unidos. La sta ta ilel te ya skʼan ya yal ta jamal te bin ya yaʼiyel la yaʼiy sba kʼalal ya x-akʼbot spas jun aʼtelil. Te Tony, jich ya yal: «Kʼalal jajch te chamel COVID-19, bayal aʼtelil ya skʼan pasel ta schajpanel te tsoblejetik, te scholel skʼop Dios, sok maba ya kal te maba ya jpase, manchukme ya jpas tulan ta slajinel ta spasel spisilnanix-ora ay aʼtel-a. Ta patil ma jajch jkʼoponix te jBiblia sok ma jkʼoponix Dios-a». Te Ilir, jtul anciano ta Kosovo, yan-a te bin kʼax ta stojole. Te bitʼil ay ta kuxinel ta banti ay guerra wokol ya yaʼiy schʼuunel te bin ya yal te organización, jich ya yal: «Kʼalal te sucursal la yalbon te yakuk jkoltay te hermanoetik te yak ta kʼaxel swokolik, la yakʼbon xiwel. Wokol la kaʼiy spasel te bin la kichʼ albeyele». Jtul misionero ta Asia te Tim sbiil, ya yal te ay wokol ya yaʼiy spasel te yaʼtele, jich ya yal: «Ay kʼax lujben ya kaʼiy jba». ¿Bin ya xjuʼ ya spasik te ancianoetik yuʼun ma jichuk ya yaʼiy sbaik?

3. ¿Bin yuʼun jpisiltik ay bin ya skʼan ya jnoptik ta swenta te Gedeón?

³ Te ancianoetik bayal bin ya xjuʼ ya snopik ta swenta te juez Gedeón (Heb. 6:12; 11:32). Jaʼ ya skanantay sok ya yil te lum yuʼun Dios (Juec. 2:16; 1 Crón. 17:6). Te ancianoetik ta ora ini jaʼnix jich bayal yaʼtelik ta skanantayel te lum yuʼun Dios jich bitʼil la spas te Gedeón (Hech. 20:28; 2 Tim. 3:1). Bayal bin ya xjuʼ ya jnoptik ta swenta te Gedeón te bitʼil la yal te ma spisiluk ya xjuʼ yuʼun spasel, te ay spekʼelil yoʼtan, te ma xiw sok te la schʼuun kʼop. Jaʼnix jich te ejemplo yuʼun te Gedeón ya skoltay ta spisil te hermanoetik yuʼun mukʼuk skʼoplal ta yoʼtanik te aʼtelil ya spasike sok te ya skʼan ya jkoltaytik (Heb. 13:17).

TE KʼALAL WOKOL YA KAʼIYTIK YAKʼEL TA ILEL PEKʼEL OʼTANIL

4. ¿Bin-utʼil la yakʼ ta ilel te Gedeón te ay bin ma spisiluk ya xjuʼ yuʼun spasel sok te ay spekʼelil yoʼtan?

⁴ Te Gedeón la yal te ma spisiluk ya xjuʼ yuʼun spasel sok ay spekʼelil yoʼtan.b Te kʼalal albot yuʼun jtul chʼul abat te tsaot yuʼun Jehová yuʼun ya slokʼes ta libre te israeletik te ay ta skʼab te madianitaetik, te Gedeón jich la yal sok spekʼelil yoʼtan: «Te jfamilia ma mukʼ skʼoplal ta stsʼumbal te Manasés sok joʼon te jkʼaxel maʼyuk jkʼoplal ta sna te jtate» (Juec. 6:15, TNM). La skuy te ma xjuʼ yuʼun spasel te aʼtelil ini, pero te Jehová snaʼoj te ya xjuʼ yuʼun sok te ya xkoltayote.

5. ¿Binwan yuʼun te ay wokol ya yaʼiyik yalel te ay bin ma xjuʼ yuʼunik spasel sok te ya yakʼik ta ilel pekʼel oʼtanil te ancianoetike?

⁵ Te ancianoetik ya yakʼik ta ilel te ay spekʼelil yoʼtanik sok te ma spisiluk ya xjuʼ yuʼunik spasel (Miq. 6:8; Hech. 20:18, 19). Maba ya stoy sbaik yuʼun te bintik ya snaʼik spasel sok teme ay bin ma lek ya xlokʼ yuʼunik maba kʼax mukʼ skʼoplal ya yilik. Pero ayniwan wokol ya yilik te ya yalik te ma xjuʼ yuʼunik spasel spisil sok te ya yakʼik ta ilel pekʼel oʼtanil. Kaltik cheʼoxebuk ejemplo, teme jtul anciano ya yichʼ akʼbeyel bayal aʼteliletik sok ta patil ya yil te ma xjuʼ yuʼun spasel spisil. Yaniwan yichʼ albeyel lek skʼoplal o maʼuk, jaʼ chikan te bitʼil la spas te yaʼtele. Te kʼalal jich ya xkʼot ta pasele, ¿bin utʼil ya xjuʼ ya skʼayinbeyik stalel te Gedeón te ancianoetike?

6. ¿Bin-utʼil ya yakʼik ta ilel te ancianoetik te ma spisiluk ya xjuʼ yuʼunik spasel? (Jaʼnix jich ilawil te foto).

⁶ Kʼana koltayel. Te machʼa ya snaʼ te ma spisiluk ya xjuʼ yuʼun spasel ya skʼan koltayel jich bitʼil la spas te Gedeón (Juec. 6:27, 35; 7:24). Te ancianoetik te ya snaʼ stsajtayel sbaik jichnix ya spasik-euk. Te Tony te la kalbeytik skʼoplal ta párrafo 2, jich ya yal: «Ta swenta te bin yilel la kichʼ chʼitesel, bayal ya kichʼ kaʼtel te ma xjuʼix kuʼun spasel-a. Jaʼ yuʼun te kʼalal la jpastik te yichʼel ta mukʼ Dios ta sjunal na la kalbeytik skʼoplal te bintik ma xjuʼ kuʼuntik spasel sok la kalbey te kinam te yakuk yal te bin ya snop ta swenta-abi. Jaʼnix jich la kil te video te ay ta jw.org te sbiil Jich bitʼil la spas te Jesús, jnojptestik te yantik sok akʼa smukʼulin koʼtantik». Te Tony jajch skʼanbey koltayel te yantik jich ya yal te bin lek lokʼ yuʼun-a: «Ta congregación leknax ya yichʼ pasel spisil, sok ayxan jtiempo yuʼun ya kamigoinxan te Jehová».

7. ¿Bin-utʼil ya skʼayinbeyik stalel te Gedeón te ancianoetik kʼalal ay bin ma lek ya yichʼik albeyel ta stojolik? (Santiago 3:13).

⁷ Lamalukme awoʼtan kʼalal ay bin ma lek ya awichʼ albeyel. Te Gedeón snaʼoj te maba tojuk, sok la yakʼ ta ilel slamalil yoʼtan kʼalal te winiketik yuʼun Efraín jajchik ta kʼop ta stojol, jichnix ya xjuʼ ya spasik-euk te ancianoetik kʼalal ay bin ma lek ya yichʼik albeyel (Juec. 8:1-3). Maba ilin, pekʼelnax yoʼtan, la yaʼiybey te skʼopik sok la yakʼ lamajuk te kʼope. Te ancianoetik te ya snaʼ stsajtayel sbaik jichik bitʼil te Gedeón. Kʼalal ay bin ma lek ya yichʼik albeyel, ya schʼam yaʼiyik sok slamalil yoʼtan ya sjakʼik (kʼopona Santiago 3:13). Kʼalal jich ya spasik ya x-ayin lamal-kʼinal ta congregación.

8. ¿Bin ya skʼan ya yalik te ancianoetik kʼalal ya yichʼik utsilkʼoptayel? Ala junuk ejemplo.

⁸ Kakʼtik ta ichʼel ta mukʼ te Jehová. Kʼalal lek la yalbeyik skʼoplal te Gedeón yuʼun te la stsal te madianitaetik, jaʼ la yakʼ ta albeyel yutsil skʼoplal te Jehová (Juec. 8:22, 23). ¿Bin-utʼil ya xjuʼ ya skʼayinbeyik stalel Gedeón te ancianoetike? Jaʼ te ya yalbeyik yutsil skʼoplal te Jehová kʼalal ay bin lek ya spasik (1 Cor. 4:6, 7). Te kʼalal jtul anciano ya yichʼ utsilkʼoptayel ta swenta te bin-utʼil ya yakʼ te nojptesel, yaniwan xjuʼ ya yal te bin la yale lokʼem ta sKʼop Dios sok te bayal bin ya xjuʼ ya jnoptik ta swenta te nojptesel ya yakʼ te organización yuʼun Jehová. Ay baeltik ya skʼan ya sjojkʼoybey sbaik te ancianoetik teme ya yakʼ ta ichʼel ta mukʼ Jehová te bin-utʼil ya xnojpteswanik o jaʼ ya yakʼ sbaik ta ichʼel ta mukʼ yuʼun. Kiltik te bin kʼax ta stojol te hermano Timothy. Kʼalal och ta anciano kʼax ya smulan skʼasesel discursoetik. Jich ya yal: «Kʼalal ya jchajpan te jdiscurso ya kakʼ ejemploetik te kʼax najtike sok te leknax chajpanbile, jaʼ yuʼun te hermanoetik bayal ya yalbonik yutsil jkʼoplal. Mel-oʼtantik sba te ya kakʼ jba ta ichʼel ta mukʼ, ma jaʼuk te Jehová sok te Biblia». Ta patil, te Timothy la sta ta ilel te ya skʼan ya sjeltay te bin-utʼil ya xnojpteswan yuʼun ma jaʼuk ya yakʼ sba ta ichʼel ta mukʼ (Prov. 27:21). ¿Bin lek lokʼ yuʼun-a? Jich ya yal: «Ta ora ini ay hermanoetik te ya yalbonik bin-utʼil koltaybilik yuʼun te discurso ta sitintayel jun wokolil, yuʼun ya xkujch yuʼunik te prueba sok te nopolxan ya yaʼiy sbaik ta stojol te Jehová. Tseʼelxan koʼtan te jich ya yalbonik ta ora ini».

KʼALAL WOKOL YA KAʼIYTIK SCHʼUUNEL KʼOP SOK TE MA XIWOTIK

9. ¿Bin-utʼil la yakʼ ta ilel te Gedeón te la schʼuun kʼop sok te ma xiwe? (Ilawil te dibujo ta yelaw te revista).

⁹ Kʼalal te Jehová la yakʼbey yaʼtel ta juez te Gedeón, kʼax mukʼ skʼoplal te ya yakʼ ta ilel te maba ya xiwe. La yichʼ akʼbeyel tulan yaʼtel: jaʼ te ya slajin te skajtajib te chikʼbil majtanil yuʼun Baal te jaʼ yuʼun te state (Juec. 6:25, 26). Ta patil te Gedeón la stsob bayal soldadoetik sok ta cheb buelta albot yuʼun te Jehová te ma ya skʼan te kʼax bayalukik (Juec. 7:2-7). Ta patil albot yuʼun te Jehová te yakuk slajin ta olil ajkʼabal te skontratake (Juec. 7:9-11).

10. ¿Bin yuʼun wokol ya yilik te ancianoetik te ya skʼan ya schʼuunik kʼope?

¹⁰ Te ancianoetik ya skʼan ya schʼuunik kʼop (Sant. 3:17). Kʼalal jtul anciano ya schʼuun kʼop, ya spas sok sbujtsʼ yoʼtan te bin ya yal te Biblia sok te bin ya yal te organización, jich ya yakʼik ta ilel lekil ejemplo ta stojol te yantike. Pero ayniwan wokol ya yaʼiyik spasel te bin yachʼil ya yal te organización. Ayniwan ya sjojkʼoybey sba teme lek ta pasel o ta chʼuunel te bin ya yichʼ alel. Ayniwan bin ya xkʼanbot spas te ya xjuʼ ya sta swokol yuʼun. Kʼalal jich ya xkʼot ta pasel, ¿bin-utʼil te ancianoetik ya xjuʼ ya skʼayinbeyik stalel te Gedeón te bitʼil la schʼuun kʼope?

11. ¿Bin ya xjuʼ ya xkoltayotik te ancianoetik yuʼun ya schʼuunik kʼop?

¹¹ Chʼuunaik spasel te bin ya yichʼ alele. Te Dios la yalbey te Gedeón bin-utʼil ya slajin te skajtajib chikʼbil majtanil yuʼun te stat, sok banti ya yichʼ pasel te skajtajib chikʼbil majtanil yuʼun Jehová sok bin chambalamil ya yakʼ. Te Gedeón oranax la schʼuun te bin la yichʼ albeyele. Ta kʼajkʼal ini, te ancianoetik ay bin ya yichʼik albeyel yuʼun te organización yuʼun te Jehová ta swenta cartaetik sok anuncioetik. Yuʼun jich ya kichʼtik kanantayel te jkuxlejaltik sok te schʼuunel koʼtantik. Kʼux ta koʼtantik te ancianoetik, melel ya schʼuunik te bin ya yichʼik albeyel yuʼun te organización yuʼun te Jehová. Te bitʼil ya schʼuunik kʼop ya sta slekilal te congregación (Sal. 119:112).

12. Kʼalal ay bin ya sjeltay te organización yuʼun Jehová, ¿bin-utʼil ya schʼuunik te ancianoetik te bin ya yal te Hebreos 13:17?

¹² Chʼuunaik te kʼalal ay bin ya yichʼ jelontesele. Juluk ta koʼtantik te Jehová la yalbey te Gedeón te ya skʼan te ma bayaluk te soldadoetik yuʼune (Juec. 7:8). Jichniwan la snop: «¿Puersabal ya skʼan te jich ya jpase? ¿Lekbal te bin ya xkʼot ta pasele?». Manchukme jich-abi te Gedeón la schʼuun kʼop. ¿Bin-utʼil ya xjuʼ ya skʼayinbeyik stalel Gedeón te ancianoetike? Jaʼ te kʼalal ya schʼuunik te bin ya yal te organización yuʼun Jehová (kʼopona Hebreos 13:17). Jich bitʼil ta 2014, te Cuerpo Gobernante la sjeltay te bin-utʼil ya yichʼ tuuntesel te takʼin ta spasel te sNail Tsoblej sok te sNail mukʼul Tsoblejetik (2 Cor. 8:12-14). Ta namey tal ya x-akʼbotik ta majanel takʼin te congregacionetik yuʼun ya spasik te snail tsoblej, ta patil ya xchaʼsujtesik te takʼin. Pero ta ora ini ay tsobil takʼin yuʼun te congregacionetik ta swolol balumilal yuʼun ya yichʼ pasel te snail tsoblej te banti ya xtuun, manchukme maʼyuk bayal takʼin tey ta lugar-abi. Te kʼalal jich la yichʼ alel, jtul anciano te José sbiil ma la schʼuun yoʼtan te jich ya yichʼ pasel, jich la yal: «Yaniwan xjuʼ te jich ya yichʼ pasel ta yan lugar, pero liʼi maniwan. Yame awil, mame xbajt yichʼ pasel ni junuk sNail Tsoblej liʼi». Pero la schʼuun te bin la yichʼ alele. ¿Bin yuʼun? Jich ya yal: «Jul ta koʼtan te bin ya yal te Proverbios 3:5, 6, te ya skʼan ya smukʼulin koʼtan te Jehová. ¡Bayal bin lek lokʼem-a! Ma jaʼuknax la yichʼ pasel bayal sNail Tsoblejetik, jaʼnix jich koltaywanotik».

13. 1) ¿Bin schʼuunoj yoʼtan te Gedeón? 2) ¿Bin ya skʼan ya spasik te ancianoetik yuʼun ya skʼayinbeyik stalel te Gedeón? (Jaʼnix jich ilawil te foto).

¹³ Mame xiwat ta spasbeyel te skʼanojel yoʼtan te Jehová. Te Gedeón la schʼuunbey skʼop te Jehová manchukme ya xiw sok te ya sta swokole (Juec. 9:17). Kʼalal la yal Jehová te ya skoltay te Gedeón, la schʼuun yoʼtan te ya xkoltayot ta skanantayel te lum yuʼune. Te ancianoetik te ayik ta kuxinel ta lugar te banti makbil te kaʼteltik jich kʼoemik bitʼil te Gedeón, sok ma xiwik ta schajpanel te tsoblejetik, te scholel skʼop Dios, manchukme ya xjuʼ ya yichʼik chukel, ichʼel ta kʼop, ya yichʼik lokʼesel ta yaʼtelik o ya yichʼik utsʼinel.c Ta yorail te tulan wokolil te ancianoetik ya skʼan te maba ya xiwik yuʼun ya schʼuunik te bin ya yichʼ alel manchukme ya xkʼax swokolik. Te bin ya kichʼtik albeyel te ya jpastik jaʼniwan te bin ya yichʼ albeyel te ants winiketik te wokolil ya xkʼot ta stojolik te jich kʼoem bitʼil mukʼul batetik o jaʼniwan ya kichʼtik albeyel te bin ya jpastik yuʼun ya xkolotik jilel kʼalal ya kichʼtik kontrainel yuʼun te Gog de Magog (Ezeq. 38:18; Apoc. 16:21)

KʼALAL WOKOL YA KAʼIYTIK TE YA XKUJCH KUʼUNTIK

14. ¿Bin-utʼil la yakʼ ta ilel te Gedeón te ya xkujch yuʼune?

¹⁴ Te Gedeón bayal aʼtej kʼalal och ta juez ta Israel. Kʼalal lokʼik bael ta anel ta ajkʼabal te madianitaetik la snutstiklan bael ta spamlej yuʼun Jezreel kʼalalto ta mukʼul jaʼ Jordán, te nojelniwan ta chʼixtikil te stiʼile (Juec. 7:22). ¿Bin la spasix-a? ¿Labal skom sba? ¡Ma jichuk la spas! Manchukme lujben sok te 300 ta tul swiniktak, solik bael ta sjech mukʼul jaʼ, la snutsikxan bael te skontratak. Ta patil la staik te madianitaetik sok la smiltiklanik (Juec. 8:4-12).

15. ¿Bin wokol ya xjuʼ ya yaʼiy spasel jtul anciano?

¹⁵ Jtul anciano ya xjuʼ ya xlujb te kʼalal ya skanantay te congregación sok te sfamilia. ¿Bin-utʼil ya xjuʼ ya skʼayinbeyik stalel te Gedeón te kʼalal jich ya yaʼiy sbaike?

16, 17. 1) ¿Bin koltayot te Gedeón yuʼun ya xkujch yuʼun? 2) ¿Bin ya skʼan kʼoem ta yoʼtanik te ancianoetik? (Isaías 40:28-31; jaʼnix jich ilawil te foto).

¹⁶ Ayuk smukʼul awoʼtanik te jaʼ ya skoltayex te Jehová. Jich la spas te Gedeón sok jaʼ koltayot yuʼun te Jehová (Juec. 6:14, 34). Ta jun buelta, te Gedeón sok te swiniktak la snutsik bael ta yokik chaʼtul ajwalil madianitaetik, te moemikniwan ta camello stukelik (Juec. 8:12, 21). Pero, jaʼnax ta swenta te koltayel yuʼun te Jehová, te israeletik te ma lujbik la stsal te skontratakik. Te ancianoetik ta ora ini, jaʼnix jich ya xjuʼ ya smukʼulin yoʼtanik te Jehová, te Dios te «ma xluhb soc ma xpehcʼaj yip». Jaʼ ya x-akʼbotik yip yoʼtanik yuʼun te kʼalal ya xtuun yuʼunik (kʼopona Isaías 40:28-31).

¹⁷ Kiltik te bin kʼax ta stojol te Matthew, te ya x-aʼtej ta Comité yuʼun Enlace ta swenta Hospital. ¿Bin koltayot yuʼun ya xkujch yuʼun? Jich ya yal: «Kʼaxem ta jkuxlejal te bin ya yal Filipenses 4:13. Bayal buelta, kʼalal lujben ya kaʼiy jba sok te maʼyuk bin ya xjuʼix kuʼun spasel, ya jkʼopon te Jehová sok ya jkʼanbey te akʼa yakʼbon kip yuʼun ya xjuʼ ya jkoltay te hermanoetik. Jich ya kaʼiy te ya skoltayon te Jehová yuʼun ya xkujch kuʼun-a». Jich bitʼil te Gedeón, te ancianoetik tulan ya x-aʼtejik yuʼun ya skanantayik te tuminchijetik manchukme ya xkʼax swokolik. Pero ya skʼan ya xjul ta yoʼtanik te ma spisiluk-ora ya xjuʼ yuʼunik spasel te bin ya skʼan ya spasike. Manchukme jich-abi, te ancianoetik ya smukʼulin yoʼtanik te Jehová te ya x-aʼiybot te skʼopik sok te ya x-akʼbot yip yoʼtanik (Sal. 116:1; Filip. 2:13).

18. Jich bitʼil la jnoptikix, ¿bin-utʼil ya skʼayinbeyik stalel te Gedeón te ancianoetik?

¹⁸ Jich bitʼil la jnoptikix, te ancianoetik bayal bin ya xjuʼ ya snopik ta swenta te Gedeón. Ya skʼan ayuk ta yoʼtanik te ma spisiluk ya xjuʼ yuʼunik spasel, te pekʼeluk yoʼtanik kʼalal ya yichʼik akʼbeyel yaʼtelik sok te ma skʼan ya stoy sbaik kʼalal ya yichʼik utsil kʼoptayel o ay bin ma lek ya yichʼik albeyel. Jaʼnix jich ya skʼan ya schʼuunik kʼop sok te manchuk ya xiwik kʼaxemtoxan-a te nopolix te slajibal kʼajkʼale. Ya skʼan ya smukʼulin yoʼtanik te Jehová te ya x-akʼbot yipik yuʼun ya xkujch yuʼunik. Mukʼ skʼoplal ta koʼtantik te bin ya spasik te ancianoetik te tulan ya x-aʼtejik (Filip. 2:29).