¿Bin ya yakʼ jnoptik te stojol kolel?

1. ¿Bin lekilal ya jtatik te bitʼil ya jpastik te Snaʼojibal slajel te Jesús ta jujun jaʼbil?

¿MABAL jichuk te jaʼ jun mukʼul majtanil te stojol kolele? (2 Cor. 9:15). Ta swenta te la yakʼ te skuxlejal te Jesús ya xjuʼ te ya kamigointik te Jehová sok ya yakʼ te ya jta jkuxlejaltik ta sbajtelkʼinal. Bayal bintik yuʼun te ya kalbeytik wokol te Jehová, te jaʼ te machʼa la yakʼbotik te majtanil sok te kʼuxotik ta yoʼtane (Rom. 5:8). Yuʼun ya skoltayotik te manchuk ya kijkitaytik ta yalel wokol sok te maʼyuk bin-ora ya xchʼay ta koʼtantik te stojol kolele, te Jesús la yal ta mantal te yakuk jpastik te Snaʼojibal slajel ta jujun jaʼbil (Luc. 22:​19, 20).

2. ¿Bin ya jnoptik ta artículo ini?

² Ta jaʼbil ini, te Snaʼojibal slajel te Jesús ya yichʼ pasel ta sábado 12 yuʼun abril ta 2025. Melel te jpisiltik ya jkʼan ya xbootik. Jaʼ yuʼun, lek te yakuk jlokʼes jtiempotik ta yorail te Snaʼojibal slajel te Jesús yuʼun ya jnopilan ta koʼtantika te bin la spas ta jtojoltik te Jehová sok te sNichʼan. Ta artículo ini ya xbajt kiltik bin ya yakʼ jnoptik te stojol kolel ta swenta te Jehová sok te Jesús. Ta yan artículo ya xbajt jnoptik bin lekilal ya jtatik ta swenta te stojol kolel sok bin-utʼil ya kakʼtik ta ilel te ya kaltik wokol.

¿BIN YA YAKʼ JNOPTIK TE STOJOL KOLEL TA SWENTA TE JEHOVÁ?

3. ¿Bin-utʼil ay-a te jaʼnax ta swenta slajel jtul winik ya yakʼbey skuxlejal bayal millón ta tul ants winiketik? (Jaʼnix jich ilawil te dibujo).

³ Te stojol kolel ya yakʼ jnaʼtik te Jehová kʼux ta yoʼtan te bin toj ta pasel (Deut. 32:4). ¿Bin yuʼun te jich ya kaltik? Kʼalal te Adán la skʼaxuntaybey skʼop te Dios, spisil te stsʼumbal la skʼasesbey te mulil sok te lajel (Rom. 5:12). Te Jehová la stikun tal te Jesús yuʼun ya yakʼotik ta libre ta swenta te mulil sok te lajele. Pero, ¿bin-utʼil ay-a te jaʼnax ta swenta jtul tojil winik ya sta skolelik bayal millón ta tul ants winiketik? Te jpuk-kʼop Pablo jich la yal: «Jich bitʼil te bayal machʼatik la sta smulik ta swenta te la skʼaxuntay mantal jtul winik [Adán], jaʼnix jich bayal machʼatik toj ya x-ilotik yuʼun Dios ta swenta jtul winik [Jesús] te la schʼuun mantal stukele» (Rom. 5:19; 1 Tim. 2:6). Ya skʼan ya yal-abi teme spisil te ants winiketik mosoinbilotik yuʼun te mulil sok te lajel ta skajnax jtul winik te maba la schʼuunbey smantal te Dios, jaʼnix jich ya xjuʼ te libre ya x-jilotik ta swenta jtul tojil winik te ya schʼuunbey smantal te Diose.

4. ¿Bin yuʼun te Jehová maba la yakʼ te ya xkuxinik ta sbajtelkʼinal te stsʼumbal te Adán te ya schʼuunik te mantale?

⁴ ¿Yuʼun-nixbal ya skʼan ya xlaj-a te Jesús yuʼun ya jta jkoleltik? ¿Mabal ya xjuʼ yuʼun te Jehová te lajuk yakʼ te ya xkuxin ta sbajtelkʼinal te stsʼumbal te Adán te ya schʼuunik mantale? Te bitʼil jmulawilotike lekniwan ya kiltik, pero ayuk ta koʼtantik te stojil ya xchajpanwan te Jehová. Jaʼ yuʼun ma xjuʼ te jichnax ya yijkitay te bitʼil la skʼaxuntay kʼop te Adán sok te jich yilel te maʼyuk bin-ora la sta smule.

5. ¿Bin yuʼun ya xjuʼ ya schʼuun koʼtantik te spisil-ora toj te bin ya spas te Jehová?

⁵ Jnop kaʼiytik te manchuk la yakʼ te stojol kolel te Jehová sok te la yakʼ te ya xkuxin ta sbajtelkʼinal te stsʼumbal te Adán. ¿Binwan kʼot ta pasel te jichuke? Te jichuk la spas te Jehová, maniwan la yichʼ ta wenta te mantalil yakʼoj ta swenta te bin ma lek sok te bin leke, te ants winiketik laniwan sjojkʼoybey sbaik te jichniwan ya spas ta swenta te bintikxan snopoj ya spase, sok maniwan ya skʼotes ta pasel te bin jamal yaloje. Pero, ma skʼan ya jmel koʼtantik yuʼun, melel stojil te bin la spas te Jehová manchukme la yakʼ ta lajel te sNichʼan te kʼux ta yoʼtane. Jaʼ yuʼun ya schʼuun koʼtantik te spisil-ora ya spas te bin stojil.

6. ¿Bin-utʼil ya skoltayotik te stojol kolel yuʼun ya jnaʼtik te jayebto kʼuxotik ta yoʼtan te Jehová? (1 Juan 4:​9, 10).

⁶ Te stojol kolel ya yakʼ ta ilel te toj yoʼtan te Jehová, pero kʼaxtoxan ya yakʼ ta ilel-a te kʼuxotik ta yoʼtan (Juan 3:16; kʼopona 1 Juan 4:​9, 10). Te Jehová la stikun tal te sNichʼan yuʼun ya yakʼ te skuxlejal ta jtojoltik, melel ya skʼan te ya xkuxinotik ta sbajtelkʼinal sok jaʼnix jich ya skʼan te ya x-ochotik ta sfamilia. Jnoptik ta swenta ini, kʼalal te Adán la sta smul la yichʼ lokʼesel ta familia yuʼun te Jehová. Jaʼ yuʼun, ta jpisiltik maba ayotik ta familia yuʼun te Dios kʼalal ya x-ayinotik. Pero, ta swenta te stojol kolele spisil te ants winiketik te ya yakʼ schʼuunel yoʼtanik ta stojol te Dios sok te ya schʼuunbeyik te smantale, ya sta yorail te ya x-ochik ta familia yuʼun te Diose. Ta ora ini, te Jehová ya spasbotik perdón yuʼun te jmultik, ya xjuʼ te lek ya kamigoin jbatik sok, soknix te kermanotaktike. ¡Kʼax kʼuxotik ta yoʼtan te Jehová! (Rom. 5:​10, 11).

7. Te bitʼil kʼax swokol te Jesús, ¿bin-utʼil ya skoltayotik yuʼun ya xkʼot ta koʼtantik te jayebto kʼuxotik ta yoʼtan te Jehová?

⁷ Teme ya jnoptik te maʼyuk bin ya spaj te stojol kolel te la yakʼ ta jtojoltik te Jehová, jich ya xkʼotxan ta koʼtantik te jayebto kʼuxotik ta yoʼtane. Te Satanás jamal ya yal te maʼyuk jtuluk j-abat yuʼun Dios te jun yoʼtan ya yakʼ sba te kʼalal ya xkʼax swokole. Yuʼun ya yichʼ naʼel te ma jichuke, te Jehová la yakʼ te ya xkʼax swokol te Jesús te kʼalal nopol ya xlajix-ae (Job 2:​1-5; 1 Ped. 2:21). Kʼalal te ants winiketik la slabanik te Jesús sok te kʼalal la yichʼ majel yuʼun te soldadoetik soknix te la sjijpanik ta teʼe, te Jehová la yil kʼalalto ta chʼulchan. Jaʼnix jich la yil te jayebto swokol kʼax kʼalal laj te sNichʼane (Mat. 27:​28-31, 39). Juʼ te ay bin la spas te Jehová, jich bitʼil kʼalal te ants winiketik la yalik: «Akʼa koltayotuk yuʼun te Dios ta ora ini teme ya skʼan ya xkoltayot yuʼune» (Mat. 27:​42, 43). Pero, te jichuk la spase maba la yakʼ te stojol kolel sok te ants winiketik ta ora ini maʼyuk bin ya smaliyik. Jaʼ yuʼun-abi, te Jehová la yakʼ te kʼax swokol te sNichʼan jaʼto te kʼalal laje.

8. ¿Bin yuʼun ya jnaʼtik te kʼux la yaʼiy te Jehová te kʼalal la yil te yak ta kʼaxel swokol te sNichʼane? (Jaʼnix jich ilawil te dibujo).

⁸ Melelnix-a te Jehová maba la stuuntes te yipal yuʼel yuʼun ma xyakʼ te ya xkʼax swokol te sNichʼane, pero ma skʼan ya yal-abi te ma xkʼot ta yoʼtan te bin yaʼiyel ya kaʼiy jbatik. Te Jehová jich la spasotik te ya xchiknaj ta ilel te bin yaʼiyel ya kaʼiy jbatike, te bitʼil pasbilotik ta slokʼomba te Diose jaʼnix jich ya xkʼot ta yoʼtan te bin yaʼiyel ya kaʼiy jbatike. Jaʼ yuʼun, te Biblia ya yal te ay ants winiketik te «la yaʼbeyic smel yoʼtan» (Sal. 78:​40, 41). Jnoptik ta swenta te Abrahán sok te Isaac. Te Jehová la yalbey te Abrahán te yakuk yakʼ ta chikʼbil majtanil te snichʼane (Gén. 22:​9-12; Heb. 11:​17-19). Nopanax awaʼiy te jayebto la smel yoʼtan te Abrahán te kʼalal yak ta schajpanel-a te banti ya yakʼ ta chikʼbil majtanil te snichʼane. Jaxan te Jehová, ¿Bin yaʼiyel la yaʼiy sba kʼalal la yil te yak ta majel te sNichʼan jaʼto te kʼalal laje? Ma xkʼot ta koʼtantik te jayebto la smel yoʼtane. (Jaʼnix jich ilawil ta jw.org te video Ejemploetik yuʼun schʼuunel oʼtanil: Abrahán [parte 2]).

9. Jich bitʼil ya yal Romanos 8:​32, 38, 39, ¿bin ya yakʼbat anop ta swenta te skʼuxul yoʼtan te Jehová ta atojol sok ta stojol te j-abatetik yuʼune?

⁹ Te stojol kolel ya yakʼ jnoptik te maʼyuk machʼa jich kʼax kʼuxotik ta yoʼtan-a te bin-utʼil te Jehová ni jaʼuk te kamigotik ni jaʼuk te jfamiliatik (kʼopona Romanos 8:​32, 38, 39). Jaʼnix jich, te Jehová jaʼ kʼaxtoxan kʼuxotik ta yoʼtan-a te bitʼil kʼux ya kaʼiy jbatike. Nopa awaʼiy ta swenta ini: ¿Yabal akʼan te ya xkuxinat ta sbajtelkʼinal? Te Jehová jaʼ te machʼa ya skʼanxan te ya xkuxinat ta sbajtelkʼinal. ¿Yabal akʼan te ya awichʼ pasbeyel perdón ta swenta te amule? Te Jehová jaʼ te machʼa ya skʼanxan te ya awichʼ pasbeyel perdone. Te bin-nax ya skʼanbat stukele jaʼ te ya achʼuunbey te smantale sok te ya awakʼ schʼuunel awoʼtan ta stojole. Chikan ta ilel te stojol kolel jaʼ jun prueba te kʼax kʼuxotik ta yoʼtan te Diose. Sok ta achʼ balumilal ya xbajt jnoptikxan ta swenta te skʼuxul yoʼtan te Jehová (Ecl. 3:11).

¿BIN YA YAKʼ JNOPTIK TE STOJOL KOLEL TA SWENTA TE JESÚS?

10. 1) ¿Bin-a te akʼbot smel yoʼtan yuʼun te Jesús te kʼalal nopol ya xlajix-ae? 2) ¿Bintik-utʼil la skoltaybey skʼoplal te sbiil Jehová te Jesús? (Jaʼnix jich ilawil te recuadro «Te bitʼil jun yoʼtan te Jesús la skoltaybey skʼoplal te sbiil te Jehová»).

¹⁰ Te Jesús mukʼ skʼoplal la yil te manchuk ya yichʼ bolobtesbeyel skʼoplal te sTate (Juan 14:31). La smel yoʼtan te kʼalal la yichʼ akʼbeyel smulin te la sbolobtesbey skʼoplal te sbiil te sTate. Jaʼ yuʼun jich la yal: «Jtat, teme ya xjuʼe, kʼeja bael ta jtojol te copa ini» (Mat. 26:39). Te bitʼil jun yoʼtan la yakʼ sba jaʼto te kʼalal laje, te Jesús juʼ yuʼun skoltaybeyel skʼoplal ta jkʼaxel te sbiil te Jehovae.

11. ¿Bin-utʼil la yakʼ ta ilel te Jesús te kʼux ta yoʼtan te ants winiketik? (Juan 13:1).

¹¹ Te stojol kolel jaʼnix jich ya yakʼ jnoptik te Jesús ya smel yoʼtan ta stojol te ants winiketik, kʼaxtoxan-a ta stojol te jnopojeletik yuʼune (Prov. 8:31; kʼopona Juan 13:1). Te Jesús snaʼoj te ya sitintay wokoliletik te jayeb tiempo ya xkuxin Balumilal sok te ya xkʼax swokol ta lajel. Manchukme jich-abi, ma jaʼuknax la skʼotes ta pasel te yaʼtel ta skaj te jich ya skʼan pasele, sok spisil yoʼtan la schol skʼop Dios, nojpteswan sok la skoltay te yantik. Jaʼnix jich la spas te kʼalal nopol ya xlajix-a, la slokʼes stiempo ta spoktiklanbeyel yok te jpuk-kʼopetik yuʼune, ta yakʼtiklanbeyel yip yoʼtan sok bayal bintik la yakʼtiklanbey snop (Juan 13:​12-15). Ta patil, te kʼalal jipilix ta teʼ-ae la yakʼbey smukʼul yoʼtan te chopol winik te jipil ta stsʼeele sok la yalbey te Juan te yakuk skanantay te María, te snane (Luc. 23:​42, 43; Juan 19:​26, 27). Te Jesús la yakʼ ta ilel te kʼax kʼux ta yoʼtan te ants winiketik kʼalal la spas te yaʼtel ta balumilal sok te la yakʼ skuxlejal ta stojolik.

12. ¿Bintik-utʼil yakʼoj ta ilel te Jesús te maba skomoj sba yuʼun ya skoltayotik?

¹² Te Cristo «jun-nax buelta la yakʼ sba ta lajel», pero maba skomoj sba yuʼun ay bin ya spas ta jtojoltik (Rom. 6:10). Ta melel ma skomoj sba ta aʼtel yuʼun ay bintik lek ya spas ta jtojoltik ta swentanax te stojol kolele. Nopa ta swenta te bintik ya spas te bitʼil jaʼ Ajwalil, te jaʼ Mukʼul Sacerdote sok te jaʼ jolal yuʼun te congregación (1 Cor. 15:25; Efes. 5:23; Heb. 2:17). Jaʼ ay ta swenta stsobel te machʼatik tsabilik yuʼun xbajtik ta chʼulchan sok te ipal ants winiketik, jun aʼtelil te ya stsʼakaj ta pasel yuʼun te kʼalal nopol ya xlajix-a te tulan wokolil (Mat. 25:32; Mar. 13:27).b Jaʼnix jich ya yil te lekuk ay ta swenta schʼuunel yoʼtan spisil te j-abatetik te jun yoʼtanik ta yorail te slajibal kʼajkʼale (Mat. 24:45). Sok ta yorail te Wentainel ta jmil jaʼbil maba ya skom sba ta aʼtel yuʼun ya skoltayotik. Jich bitʼil la kiltikix, kʼalal te Jehová la yakʼ te sNichʼan ta jtojoltik, ma jaʼuk jich la spas yuʼun-nax ya yakʼ te skuxlejale, jich la spas yuʼun ay bintikxan ya spas ta jtojoltik.

MAME XA AKOM ABA TA SNOPEL

13. ¿Bin-utʼil te snopilanel ta koʼtantik ya skoltayotik yuʼun ya jnoptikxan ta swenta te skʼuxul yoʼtan ta jtojoltik te Dios sok te Cristo?

¹³ Te snopilanel ta awoʼtan jaʼ ya xbajt skoltayat yuʼun ma xa awijkitay ta snopel ta swenta te skʼuxul yoʼtan ta jtojoltik te Jehová sok te Jesús. Yaniwan xjuʼ ya akʼopon junuk o chebuk te Evangelioetik ta yorail te Snaʼojibal slajel te Jesús ta jaʼbil ini. Pasa tulan yuʼun manchuk bayal información ya akʼopon ta jun-nax buelta, ya skʼan te kʼunkʼun ya akʼopon te información ta swenta te bintik yuʼun ya skʼan kʼux ta koʼtantik te Jehová sok te Jesús. Sok mame xchʼay ta awoʼtan te ya awalbey yantik te bin yachʼil la anope.

14. Jich bitʼil ya yal Salmo 119:​97, ¿bin ya skʼan ya jpastik yuʼun ma jkom jbatik ta snopelxan ta swenta te stojol kolel sok yantikxan nojpteseletik? (Jaʼnix jich ilawil te foto).

¹⁴ Teme bayalix jaʼbil ayat smelelil kʼop, yaniwan ajojkʼoybey aba teme ay bin yachʼil ya ata ta swenta te temaetik te kʼax naʼbilik sba, jich bin-utʼil te stojil ya x-ichʼawan ta kʼop te Diose, te skʼuxul yoʼtan sok te stojol kolele. Pero, te bin smelelil ta swenta te temaetik ini ay bintik yachʼil ya yakʼ jnoptik. ¿Bin ya skoltayat yuʼun maba ya akom aba ta snopelxan? Jaʼ te kʼalal ya ale información ta swenta te publicación kuʼuntike, teme ya ata jun texto te ma xkʼot ta awoʼtane pasaxan investigar. Sok ta patil, ta sjunal kʼajkʼal nopilana ta awoʼtan te bin la atae sok ilawil bin ya yakʼbat anop ta swenta te Jehová, te sNichʼan sok te skʼuxul yoʼtanik ta atojole (kʼopona Salmo 119:97).

15. ¿Bin yuʼun ma skʼan ya jkom jbatik ta sleel te kʼulejalil te ay ta Bibliae?

¹⁵ Mame xchebaj awoʼtan teme ma spisiluk-ora ay bin yachʼil ya anop o te ay bin ya amulan te kʼalal ya anop te Biblia. Snopel te Biblia jaʼ jich kʼoem te bin-utʼil sleel oro. Bayal ants winiketik ya yakʼ bayal stiempoik ta sleel oro, ya sleik sok slamalil yoʼtanik sok ma skom sbaik ta sleel. Manchukme chin-nax te oro te ya staike, kʼax mukʼ skʼoplal ta yoʼtanik. Te kʼulejalil te ya jtatik ta Biblia jaʼ kʼaxtoxan mukʼ skʼoplal-a te bitʼil te oroe (Sal. 119:127; Prov. 8:10). Jaʼ yuʼun, lamalukme awoʼtan sok mame xa akom aba ta snopel te Biblia (Sal. 1:2).

16. ¿Bin-utʼil ya xjuʼ ya jkʼayinbeytik stalel te Jehová sok te Jesús?

¹⁶ Kʼalal ya anop te Biblia, lea bintik-utʼil ya anop yuʼun ya apas ta akuxlejal te bin la anope. Jich bitʼil, ya xjuʼ ya akʼayinbey te bitʼil stojil ya xchajpanwan te Jehová kʼalal maʼyuk machʼa tsabilnax ya awile. Sok ya xjuʼ ya akʼayinbey te skʼuxul yoʼtan te Jesús ta stojol te sTat sok ta stojol te ants winiketik te kʼalal ya alokʼes aba ta awoʼtan ta skoltaybeyel skʼoplal te sbiil te Diose. Te ya akoltay te hermanoetik manchukme ya ata awokol yuʼun sok te ya acholbey skʼop Dios te yantik ants winiketik yuʼun ya sta slekilalik-a ta swenta te stojol kolele.

17. ¿Bin ya xbajt kilbeytik skʼoplal ta yan artículo?

¹⁷ Kʼalal ya xkʼotxan ta koʼtantik sok mukʼ skʼoplal ya kiltik te stojol kolel, ya xchʼixan te skʼuxul koʼtantik ta stojol te Jehová sok te sNichʼane. Sok jaʼnix jich ya xchʼixan te skʼuxul yoʼtanik ta jtojoltik-euk (Juan 14:21; Sant. 4:8). Jaʼ yuʼun jtuuntestik spisil te bin yakʼojbotik te Jehová yuʼun ya jnoptikxan ta swenta te stojol kolele. Ta yan artículo ya kilbeytik skʼoplal te bin lekilal ya jtatik ta swenta te stojol kolele sok te bin ya skʼan ya jpastik yuʼun ya kakʼtik ta ilel te ya kaltik wokol ta swenta te skʼuxul yoʼtan ta jtojoltik te Jehová.