¿Bin lekilal ya ata te bitʼil ya spas perdón te Jehová?

1. ¿Bin yaʼiyel ya awaʼiy aba te kʼalal ya yalbat jtul awamigo te ya spasbat perdón?

NOPA AWAʼIY te ay bin la awalbey o ay bin la apas te la yutsʼinbey yoʼtan jtul awamigo, pero ta patil la akʼanbey perdón, sok jich ya yalbat: «Ya jpasbat perdón». ¿Bin-utʼil ya awaʼiy aba te kʼalal jich ya yalbate? Kʼax lekniwan ya awaʼiy aba. Pero, ¿jichnixbal ya awamigoin abaik te bitʼil ta nailale? O ¿yabal xjelon?

2. ¿Bin-utʼil ya scholbey skʼoplal te Biblia te bitʼil ya spas perdón te Jehová? (Jaʼnix jich ilawil te nota).

² ¡Maʼyuk jtuluk ants winik te ya spas perdón jich bitʼil ya spas te Jehová! Jtul salmista jich la yal: «Ya jtatic perdón ta atojol, swenta yuʼun jich ya quichʼticat ta mucʼ» (Sal. 130:4).a Te bitʼil ya spas perdón te Jehová maʼyuk bin ya spaj sok kʼax mukʼ skʼoplal, melel jaʼnax ta swenta te «ya jtatic perdón». Teme ya jkʼan ya jnaʼtik bin-a te spasel perdón, ya skʼan te ya kiltik te ejemplo yuʼune. Ta Escrituras Hebreas ay baeltik te ya stuuntes jpʼal kʼopil te jaʼnax ya yalbey skʼoplal te bitʼil ya spas perdón te Jehová, ma jaʼuk te bitʼil ya spas perdón te ants winiketike.

3. ¿Bin yuʼun ya kaltik te maba pajal te bitʼil ya spas perdón te Jehová sok te bitʼil ya spas perdón te ants winiketike? (Isaías 55:​6, 7).

³ Kʼalal te Jehová ay machʼa ya spasbey perdón, ya stupʼbey ta jkʼaxel te smule sok lek ya yil sba sok yan buelta. Te Jehová ya spas perdón ta jkʼaxel sok yutsil yoʼtan. ¡Kʼax leknax te jich ya spase! (kʼopona Isaías 55:​6, 7).

4. ¿Bin-utʼil ya skoltayotik te Jehová yuʼun ya xkʼot ta koʼtantik bin-a te spasel perdón?

⁴ Ma xkʼot ta koʼtantik ta jtukeltik te bitʼil ya spas perdón te Jehová, melel maba pajaluk sok te bitʼil ya spas perdón te ants winiketike. Pero te Jehová ya skoltayotik yuʼun ya xkʼot ta koʼtantik ta swenta te ejemploetik te ay ta Biblia. Ta artículo ini, ya kiltik cheʼoxebuk skʼoplal. Jichme ya kiltik bin-utʼil te Jehová ya stupʼ te mulil sok bin-utʼil lek ya kil jbatik sok yan buelta. Ya xbajt jnoptik bintik smakojbey skʼoplal te bitʼil ya spas perdón te Jehová yuʼun jich ya xkʼot ta koʼtantik sok te mukʼuk skʼoplal ya kiltik te jTatik Jehová.

TE JEHOVÁ YA YICHʼ BAEL TE MULILETIK

5. ¿Bin ya xkʼot ta pasel kʼalal ya spasbotik perdón te Jehová?

⁵ Te Biblia bayal buelta ya spajaltaybey skʼoplal te muliletik jich bin-utʼil jun ijkatsil te kʼax al. Te ajwalil David, jich la yal: «Tsʼahmal qʼuinal ya caʼiy yuʼun te muliletic cuʼun, mero al ta cuchel ya caʼiy» (Sal. 38:4). Manchukme jich-abi, te Salmo 25:18 sok 32:5 ya yal te Jehová ya spasbey «perdón» te machʼatik ya sujtes yoʼtanik yuʼun te smulike. Ta hebreo te kʼopil spasel «perdón» ya skʼan ya yal «skʼechel» o «yichʼel bael». Jaʼ ini ya yakʼ jnaʼtik te Jehová jaʼ jich kʼoem bitʼil jtul winik te bayal yip te ya skʼech te jmultik sok ya yichʼ bael.

6. ¿Banti ya yichʼ bael Jehová te jmultike?

⁶ ¿Banti ya yichʼ bael te Jehová te jmultike? Ta Salmo 103:12 ya skoltayotik yuʼun ya xkʼot ta koʼtantik te bin ya skʼan ya yal: «Hich te bin utʼil snamalil yiloj sbahic banti ya xlocʼ tal cʼahcʼal soc te smahlib cʼahcʼal, hich la snamijtes bahel te jcʼaxun-mandar cuʼuntique». Te versículo ini ya yakʼ jnoptik te kʼalal ya spasbotik perdón te Jehová, kʼax namal ya yichʼ bael te jmultike, jich ya xkʼot te ya yichʼ bael te banti ya xlokʼ tal kʼajkʼal te kʼax namal yiloj sba sok te smalib kʼajkʼal. ¡Kʼax leknax te jich ya spase!

7. ¿Bin-utʼil ya scholbey skʼoplal te Biblia te bin ya spas te Jehová sok te jmultike? (Miqueas 7:​18, 19).

⁷ Kʼalal te Jehová ya yichʼ bael ta namal te jmultike, ¿yabal skʼan ya yal te ya yichʼ jilele? Maʼuk, melel te ajwalil Ezequías, jich la yal: «La awacʼ ta apat spisil te jmule» (Is. 38:​9, 17). Jaʼ yuʼun, kʼalal ya jsujtes koʼtantik, te Jehová ya stsak te jmultik sok ya schʼoj bael ta namal te banti maʼyukix bin-ora ya yil. Te versículo ini, jaʼnix jich ya xjuʼ ya yichʼ kʼasesel: «La apas te jich kʼoem te maʼyuk bin-ora la jpas mulil». Te Biblia ya yakʼbeyxan yichʼ yip sok te bin ya yal te Miqueas 7:​18, 19 (kʼopona). Tey ya yal-a te Jehová ya schʼoj bael ta skʼubulil mar spisil te jmultike. Ta namey kʼinal te kʼalal ay bin ya xchʼay koel ta yutil mar, maʼyukix bin-ora ya xjuʼ ya yichʼ lokʼesel.

8. ¿Bintik la jnopbeytikix skʼoplal?

⁸ Ta swenta te bintik la kilbeytik skʼoplal la yakʼ jnoptik te kʼalal ya spasbotik perdón te Jehová, ya yichʼ bael te jmultik sok jich kʼoem te ya skʼech bael te kijkatstike. Te David, jich la yal: «Tseʼelnax yoʼtanik te machʼatik la yichʼik pasbeyel perdón yuʼun te bintik chopol la spasike sok te machʼatik la yichʼik pasbeyel perdón te smulike; tseʼelnax yoʼtan te machʼa ma x-ichʼbot ta wenta yuʼun Jehová te smule» (Rom. 4:​6-8). ¡Jaʼme spasel perdón-abi!

TE JEHOVÁ YA STUPʼ TA JKʼAXEL TE JMULTIK

9. ¿Bintik-utʼil ya yakʼ xkʼot ta koʼtantik te bitʼil ya spasbotik perdón te Jehová?

⁹ Kiltik cheʼoxeb ejemplo ta Biblia te ya skoltayotik yuʼun ya xkʼot ta koʼtantik bin-utʼil te Jehová ya xjuʼ ya stupʼbey ta jkʼaxel te smul te machʼatik ya sujtes yoʼtanik ta swenta te stojol kolel. Te Biblia ya yal te Jehová ya spok sok ya skus ta jkʼaxel te muliletik, jich ya slekubtes te machʼa staoj smul (Sal. 51:7; Is. 4:4; Jer. 33:8). Te Jehová, jich ya yal: «Aunque hich amulic te bin utʼil buen tsaj, buen sac ya xhilic hich te bin utʼil meʼsic; aunque hich ayic te bin utʼil cʼax tsaj, hich sac ya xcʼohtic te bin utʼil sac stsotsel tuminchij» (Is. 1:18). Teme ay bin tsaj ya xkʼot ta sakil pakʼ kʼax wokol ta pokel lokʼel. Ta swenta ini, te Jehová jamal ya yal te ya xjuʼ te ya stupʼ ta jkʼaxel te jmultike.

10. ¿Bin-utʼil ya skoltayotikxan te Jehová yuʼun ya xkʼot ta koʼtantik te ya spasbotik perdón sok yutsil yoʼtan?

¹⁰ Jich bitʼil la kiltik ta yan artículo, te muliletik jich kʼoemik bitʼil betil (Mat. 6:12; Luc. 11:4). Jujun buelta te ya jtatik jmultik ta stojol te Jehová, jich kʼoem te ya jletikxan jbetik. Pero, te kʼalal ya spasbotik perdón jich kʼoem te ya stupʼ spisil te jbetik, ya skʼan ya yal-abi te maba ya yakʼ jtojtikix. Te Jehová maba ya sujotik ta stojel te jmultik te spasojbotikix perdone. ¡Ya yakʼ smukʼul koʼtantik te jich ya spasbotik perdón te Jehová!

11. ¿Bin ya skʼan ya yal te Biblia kʼalal ya yal te ya yichʼ tupʼel ta jkʼaxel te jmultik? (Hechos 3:19).

¹¹ Te Jehová ma jaʼuknax ya spasbotik perdón, jaʼnix jich ya stupʼ ta jkʼaxel te jmultike (kʼopona Hechos 3:19). Jnop kaʼiytik jun ejemplo ta swenta jtul ants winik te ya skitsbey te sbet yan ants winik te ay ta jun yuʼune. Manchuk kitsbilix yato xchiknaj te jayeb te sbete. Te ejemplo ini ma jaʼuknax ya yalbey skʼoplal te ya yichʼ kitsel jun betil, jaʼ te ya yichʼ tupʼel ta jkʼaxel. Yuʼun ya xkʼot ta koʼtantik-a, ta namey ya stuuntesik jun tinta te oranax ya xjuʼ ta tupʼel, jaʼ yuʼun kʼalal ay machʼa ya yichʼ kitsbeyel te sbet ya xtupʼ ta jkʼaxel. Jich maʼyuk machʼa ya xjuʼ ya yilix te bin la yichʼ tsʼibayele. Jich kʼoem te maʼyuk bin-ora la sta sbet. ¡Ya kaltik bayal wokol ta stojol te Jehová te ya spasbotik perdón sok te ya stupʼ ta jkʼaxel te jmultike! (Sal. 51:9).

12. ¿Bin ya yakʼ jnoptik te ejemplo ta swenta te tokal?

¹² Te Jehová ya stuuntes yan ejemplo yuʼun ya yalbey skʼoplal bin ya spas ta swenta te jmultik ta Isaías 44:​22, te jich ya yal: «Joʼon la jchʼaybatix ta jcʼaxel te faltaetic soc te muliletic awuʼune, jich bitʼil ya xchʼay ta jcʼaxel te tocale» (TZOXCH). Kʼalal te Jehová ya spasbotik perdón, jich kʼoem te bin-utʼil tokal te ya xchʼay bael ta jkʼaxel te maʼyuk machʼa ya xjuʼ ya yilix yan buelta.

13. ¿Bin yaʼiyel ya awaʼiy aba te ya spasbat perdón te Jehová?

¹³ ¿Bin ya skʼan ya yalbotik te ejemploetik ini? Kʼalal te Jehová ya spasbotik perdón, ma skʼan te ayto jmultik ya kaʼiy jbatik, melel te jmultik la yichʼix tojel ta swenta te schʼichʼel te Jesucristo, maba joʼotik ya jtojtikix. La yichʼ tupʼel ta jkʼaxel, jich kʼoem te maʼyuk bin-ora la jta jmultik. Jaʼ te bin ya spas te Jehová kʼalal ya jsujtes koʼtantik ta smelelil ta swenta te jmultik sok ya spasbotik perdón.

TE JEHOVÁ YA SKʼAN YA YAMIGOINOTIK YAN BUELTA

14. ¿Bin yuʼun ya xjuʼ ya schʼuun koʼtantik te ya spasbotik perdón te Jehová? (Jaʼnix jich ilawil te dibujoetik).

¹⁴ Kʼalal te Jehová ya spasbotik perdón ya xjuʼ te ya kamigointik yan buelta. Snaʼel ini ya skoltayotik yuʼun maʼyuk jmul ya kaʼiy jbatik sok maba ya jxiʼtik te ya xjuʼ ya skʼej yilinba ta jtojoltik te Jehová sok te ya yakʼ jtojtike. ¡Maʼyuk bin-ora jich ya xbajt spasbotik! ¿Bin yuʼun te jich ya kaltike? Melel te Jehová, jich la yalbey te j-alwanej Jeremías: «Ya jpasbe perdón yuʼun te schopolilic soc ma ba ya jnaʼbeyix xan te smulique» (Jer. 31:34). Te jpuk-kʼop Pablo jich la yal ta swenta te versículo ini: «maba ya jultesix ta koʼtan te smulike» (Heb. 8:12). ¿Bin ya skʼan ya yal te kʼopetik-abi?

15. ¿Bin ya kʼan ya yal te maba ya xjulix ta yoʼtan Jehová te jmultike?

¹⁵ Ta Biblia te kʼopil snaʼel ma jaʼuknax ya skʼan ya yal te ay bin ya xjul ta koʼtantik te la jpastik ta namey. Ay baeltik jaʼ ya skʼan ya yal te ay bin ya xjuʼ ya yichʼ pasel. Jich bitʼil te winik te jipil ta teʼ ta stsʼeel te Jesús, jich la yal: «Naʼawon te kʼalal ya x-ochat ta Wentainel awuʼune» (Luc. 23:​42, 43). Ma jaʼuk yak ta skʼanel te ya xnaʼot ta ora-abi. Te Jesús la yakʼ ta naʼel te ya xbajt schaʼkuxajtes te winike. Kʼalal te Jehová ya yal te ya xchʼay ta yoʼtan te jmultike, ya skʼan ya yal-abi te maba ya yakʼ jtojtik. Sok maʼyuk bin-ora ya xjulix ta yoʼtan, melel spasojbotikix perdón.

16. Jich bitʼil ya yal te Biblia, ¿bin yaʼiyel ya kaʼiy jbatik kʼalal ya spasbotik perdón te Jehová?

¹⁶ Kiltik yan ejemplo te ya stuuntes te Biblia yuʼun ya xkʼot ta koʼtantik bin yaʼiyel ya kaʼiy jbatik kʼalal ya spasbotik perdón te Jehová. Ta jpisiltik maba tojotik sok jich kʼoem te mosoinbilotik yuʼun te mulile. Pero, te kʼalal ya spasbotik perdón te Jehová, jich kʼoem te ya stuchʼ te cadena sok ya «yakʼotik ta libre yuʼun te jmultik» (Rom. 6:​17, 18; Apoc. 1:5). Bayal ya yakʼ stseʼelil koʼtantik te ya spasbotik perdón te Jehová, melel jichotik te bin-utʼil jtul moso te libre ya xjile.

17. ¿Bin yuʼun ya kaltik te kʼalal ya spasbotik perdón te Jehová jich kʼoem te la jtabeytik spoxil jun tulan chamel? (Isaías 53:5).

¹⁷ (Kʼopona Isaías 53:5). Te slajibal ejemplo te ya kilbeytik skʼoplale, te Biblia ya spajaltaybey skʼoplal te mulil te jich bin-utʼil tulan chamel te maʼyuk spoxile. Pero te Jehová la spoxtayotik ta swenta te la yakʼ sba ta lajel te sNichʼane, sok jich lek ya kil jbatik sok (1 Ped. 2:24). Kʼalal jtul ants winik tsakbil ta tulan chamel sok ya xlekub, ya x-akʼbot stseʼelil yoʼtan yuʼun. Jaʼnix jich ya kaʼiy jbatik-euk kʼalal te Jehová ya spasbotik perdón yuʼun te jmultik sok te «ya slekubtes» te bitʼil kamigoinoj jbatik sok.

BIN LEKILAL YA JTATIK TE BITʼIL YA SPASBOTIK PERDÓN TE JEHOVÁ

18. ¿Bin la yakʼ jnoptik te ejemploetik ta Biblia ta swenta te bitʼil ya spas perdón te Jehová? (Jaʼnix jich ilawil te recuadro «Te bin-utʼil ya spasbotik perdón te Jehová»).

¹⁸ ¿Bin la yakʼ jnoptik te ejemploetik ta Biblia te bitʼil ya spasbotik perdón te Jehová? Jaʼ te ya stupʼ ta jkʼaxel te jmultik ta sbajtelkʼinal. Jaʼ ini ya yakʼ te lek ya kil jbatik sok te jTatik te ay ta chʼulchan. Ta ora ini ma skʼan ya xchʼay ta koʼtantik te perdón ya yakʼ te Jehová ma jaʼuk ta swenta te bin ya jpastik, melel jaʼ jun majtanil te ya yakʼbotik ta swenta te skʼuxul yoʼtan sok te bayal slekil yoʼtan (Rom. 3:24).

19. 1) ¿Bin yuʼun ya kaltik wokol? (Romanos 4:8). 2) ¿Bin ya kilbeytik skʼoplal ta yan artículo?

¹⁹ (Kʼopona Romanos 4:8). ¡Ya kaltik bayal wokol, melel ta Salmo 130:​4, jich ya yal: «Ya jtatic perdón ta atojol» Jehová! Teme ya jkʼantik te ya spasbotik perdón te Jehová, ya skʼan ya jpastik te bin la yal te Jesús: «Yan teme maba ya apasbeyik perdón te machʼatik staoj smulik ta atojolike, jaʼnix jich maba ya spasbeyex perdón-euk te aTatik te ay ta chʼulchane» (Mat. 6:​14, 15). Jaʼ yuʼun mukʼ skʼoplal te jaʼnix jich ya skʼan ya jpastik perdón jich te bitʼil ya spas te Jehová. Ta yan artículo ya kiltik bin-utʼil ya xjuʼ ya jpastik.