Jtuuntestik ta lek te espejo

Te jnopojel Santiago la yal te jich kʼoem bitʼil jun espejo te Biblia te ya yakʼ ta ilel te bin-nix yilel-a te jtaleltike (Sant. 1:22-25). Jaʼ yuʼun, ¿bin-utʼil ya xjuʼ ya jtuuntestik ta lek te espejo-abi?

Mame animaluk ya jkʼopontik te Biblia. Teme animalnax ya kil jbatik ta espejo, maniwan ya jtatik ta ilel teme lek la jchajpan jbatik. Jichnix ya xkʼot ta pasel teme animaltiknax ya jkʼopontik te Biblia, maba ya kiltik te bintik ya skʼan ya jlekubtestik ta jkuxlejaltik. Jaʼ yuʼun ya skʼan te ya jkʼopontik ta lek te Bibliae.

Jaʼuk ya xbajt ta koʼtantik slekubtesel te jtaleltik, ma jaʼuk te stalel te yantike. Jaʼ chikan te bin-utʼil ya kakʼtik te espejo, ya xjuʼ ya kiltik te yantik sok ya xjuʼ ya kiltik teme lek chapale. Jichnix ya xkʼot ta pasel te kʼalal ya jkʼopontik te Biblia, ya xjuʼ ya jnoptik te banti ya skʼan ya slekubtes te stalelik te yantik. Pero teme jich ya jpastike wokolniwan ya jtatik ta ilel te banti ya skʼan ya xlekubotik te joʼotike.

Akʼa jtsajtay jbatik. Yaniwan xchebaj koʼtantik teme jaʼnax ya kiltik ta espejo te bin ma jmulantik ta jbakʼetaltik. Yuʼun ma jichuk ya xkʼot ta pasel te kʼalal ya jkʼopontik te Biblia, ya skʼan te ya jtsajtay jbatik sok te maba ya jsuj jbatik ta spasel te bin ma xjuʼ kuʼuntike, melel te Jehová maba ya sujotik ta spasel (Sant. 3:17).