Jaʼ jlekilaltik teme ya xnoptsajotik ta stojol te hermanoetik

1, 2. ¿Bin-a te kʼax mukʼ skʼoplal ya yil te Jehová sok bin ya skʼan ya jpastik?

MUKʼ SKʼOPLAL ya yil Jehová te bin yilel ya kiltik te yantik ants winiketik. Te Jesús la snojptesotik te ya skʼan te kʼuxuk ta koʼtantik te jpatxujktik jich te bin-utʼil kʼux ya kaʼiy jbatik te joʼotike (Mat. 22:​37-39). Tey ochem skʼoplal-a te ants winiketik te ma xyichʼik ta mukʼ te Jehová. Jichme ya jkʼayinbeytik stalel-a te jTatik te ay ta chʼulchan, «melel ya yakʼ xlokʼ tal kʼajkʼal ta stojol te machʼatik ma lek stalelik sok te machʼatik lek yoʼtanik, sok ya yakʼ tal jaʼal ta stojol te machʼatik toj yoʼtanik sok te machʼatik ma toj yoʼtanik» (Mat. 5:45).

² Manchukme te Jehová kʼux ta yoʼtan spisil te ants winiketik, pero jaʼ kʼux-xan ta yoʼtan te machʼatik ya schʼuunik te bin ya yale (Juan 14:21). Jaʼ ya skʼan te ya jkʼayinbeytik te stalele, jaʼ yuʼun jich ya stij koʼtantik ta spasel ta stojol te kermanotaktik: «Talel kʼaxel kʼuxuk xa awaʼiy abaik sok spisil awoʼtanik» (1 Ped. 4:8; Rom. 12:10). Te kʼuxul oʼtanil-abi jaʼ pajal sok te bitʼil kʼux ya yaʼiy sbaik ta jun familia o ta stojol jtul amigo.

3. ¿Bin ya skʼan ya jultes ta koʼtantik ta swenta te kʼuxul oʼtanil?

³ Te kʼuxul oʼtanil jaʼ pajal kʼoem sok jpet nichim, yuʼun lek ya xchʼi-a ya skʼan ya kakʼbeytik yaʼlel sok ya jkanantaytik ta lek. Te jpuk-kʼop Pablo jich la yalbey te jchʼuunjeletik: «Spisilukme-ora kʼux ya awaʼiy abaik jich te bin-utʼil kʼux ya yaʼiy sbaik te machʼatik jun-nax smeʼ statike» (Heb. 13:1). Te Jehová ya skʼan te ya kakʼtik ta ilel skʼuxul koʼtantik ta stojol te yantik. Ta artículo ini ya kilbeytik skʼoplal bin yuʼun ya skʼan ya xnoptsajotikxan ta stojol te hermanoetik sok bin-utʼil ya xjuʼ ya jpastik.

¿BIN YUʼUN YA SKʼAN YA XNOJPTSAJOTIKXAN TA STOJOL TE HERMANOETIKE?

4. ¿Bin ya skoltayotik yuʼun mukʼuk skʼoplal ya kiltik te bitʼil jun ay te lum yuʼun Dios jich bitʼil ya yal Salmo 133:1? (Jaʼnix jich ilawil te fotoetik).

⁴ (Kʼopona Salmo 133:1). Jich bitʼil te salmista, ya xjuʼ jich ya kaltik «buen lec soc bayel yutsil» te ya xjuʼ ya kamigointik te machʼatik kʼux ta yoʼtanik te Jehová. Pero ya xjuʼ te maʼyukix lek skʼoplal ya xjajch kiltik te bitʼil jun-nax ay te lum yuʼun te Jehová. Ya xjuʼ te jich ya xkʼot ta jtojoltik te bin-utʼil jtul ants winik ya yil jpejt mukʼul teʼ te tʼujbil sok te jujun kʼajkʼal ya yil, pero te kʼalal ya xkʼax bael te tiempo ya xkʼay ta yilel sok maba mukʼix skʼoplal ya yil, te bitʼil bayal buelta ya kiltik ta jujun semana te hermanoetik, ¿bin ya skoltayotik yuʼun mukʼuk skʼoplal ya kiltik ta spisil-ora te kermanotaktike? Jaʼ te ya jlokʼes jtiempotik ta snopel bin yuʼun mukʼ skʼoplal kuʼuntik ta jujuntul sok ta stojol te congregación.

5. ¿Bin ya xtijbot yoʼtanik yuʼun te ants winiketik kʼalal ya yilik te kʼux ya yaʼiy sbaik te Testigoetike?

⁵ Kʼalal ay machʼa ya xbajt ta sbabial buelta ta jtsoblejtik, ay machʼatik chamnax yoʼtanik yuʼun te kʼalal ya yilik te talel kʼaxel kʼux ya kaʼiy jbatik sok ya schʼuun yoʼtanik te smelelil jchʼuunjelotik, jich bitʼil la yal te Jesús: «Jichme ya snaʼik spisil te ants winiketik te jaʼex jnopojelex kuʼun: teme talel kʼaxel kʼux ya awaʼiy aba ta awoʼtanike» (Juan 13:35). Kiltik te experiencia yuʼun te Chaithra, jaʼ jtul estudiante te ya xbajt ta universidad te jajch snop te Biblia. La skʼan bajt ta jun mukʼul tsoblej yuʼun oxeb kʼajkʼal, ta sbabial kʼajkʼal jich la yalbey te hermana te ya x-akʼbot nojptesel yuʼun ta Biblia: «Te jmeʼ jtat maʼyuk bin-ora la spetonik o la smechʼonik. ¡Pero ta sbabial kʼajkʼal yuʼun te mukʼul tsoblej la spetonik 52 ta tul ants winiketik! Te ants winiketik ini la yakʼbonik kil te skʼuxul yoʼtan te Jehová. Jaʼ yuʼun ya jkʼan ya x-ochon ta lum yuʼun». Te Chaithra la snopxan te Biblia sok la yichʼ jaʼ ta 2024. Kʼalal ya yilik te bin ya jpastik te machʼatik yachʼilikto, jich bitʼil te kʼuxul oʼtanil, jaʼ ya xtijbotik yoʼtanik yuʼun ya skʼan ya x-abatinik ta stojol te Jehová (Mat. 5:16).

6. ¿Bin-utʼil ya skoltayotik teme ya xnoptsajotikxan ta stojol te kermanotaktik?

⁶ Jaʼ kanantayel teme ya xnoptsajotikxan ta stojol te kermanotaktik. Te Pablo jich la yalbey te jchʼuunjeletik: «Ta jujun kʼajkʼal talel kʼaxel xa awakʼbey aba smukʼul awoʼtanik […] yuʼun jich maʼyuk jtulukex te ya stulantesbeyex awoʼtanik te mulile» (Heb. 3:13). Teme jich ya kaʼiytik te ya xjajch ta pejkʼajel te yip te schʼuunel koʼtantik sok teme jich ya kaʼiytik te ya xnamajotik ta tojil be yuʼun te Jehová, te Jehová ya stuuntes te hermanoetik yuʼun ya skoltayotik (Sal. 73:​2, 17, 23). ¡Kʼax lek ta jtojoltik te jich ya kichʼtik koltayel!

7. ¿Bin-utʼil snitojbey sba skʼoplal te kʼuxul oʼtanil sok te jun ayotike? (Colosenses 3:​13, 14).

⁷ Ayotik ta jun organización te banti spisil te ants winiketik ya spasik tulan yuʼun ya yakʼik ta ilel kʼuxul oʼtanil, jaʼ yuʼun ya jmulantik bayal bendicionetik (1 Juan 4:11). Jich bitʼil, te kʼuxul oʼtanil ya stij koʼtantik yuʼun ya xkujch kuʼuntik te bin ma lek ya spas te yantike sok jaʼ ya yakʼ te jun-nax ayotik ta smelelil (Efes. 4:​2-6; kʼopona Colosenses 3:​13, 14). Ta tsoblejetik kuʼuntik leknax ya kaʼiy jbatik sok maʼyuk jich ya yichʼ ilel ta yantik lugaretik yuʼun te balumilal ini.

TALEL KʼAXEL AKʼA KICHʼ JBATIK TA MUKʼ

8. ¿Bin-utʼil ya skoltayotik te Jehová yuʼun junuk ayotik?

⁸ Te bitʼil jun ayik te hermanoetik ta swolol Balumilal jaʼ jun milagro yuʼun te Jehová te jich ya xkʼot ta pasele, melel maba tojotik (1 Cor. 12:25). Te Biblia jich ya yal: «Te Dios jaʼ yak snojptesbelex te talel kʼaxel kʼux ya awaʼiy abaike» (1 Tes. 4:9). ¿Bin-utʼil ya spas? Ta swenta te Biblia ya yalbotik bin ya skʼan ya jpastik yuʼun ya xnoptsajotikxan ta stojol te yantike. Jaʼnix jich ya kakʼ jbatik ta nojptesel yuʼun te Jehová kʼalal ya jnoptik ta lek te bin ya yalbotik sok te ya jpas ta jkuxlejaltik (Heb. 4:12; Sant. 1:25). Jaʼ te bin ya jpastik tulan ta spasel te testigootik yuʼun Jehová.

9. ¿Bin ya yakʼ jnoptik te Romanos 12:​9-13 ta swenta te talel kʼaxel ya kichʼ jbatik ta mukʼe?

⁹ ¿Bin-utʼil ya skoltayotik te bin ya yal te skʼop Dios yuʼun ya xnoptsajotikxan ta stojol te hermanoetik? Kiltik te bin la yal te Pablo ta Romanos 12:​9-13 (kʼopona). Kalbeytik skʼoplal te kʼopil «jaʼme nailuk xa awakʼik ta ilel te talel kʼaxel ya awichʼ abaik ta mukʼe». ¿Bin ya skʼan ya yal-abi? Jaʼ te yakuk jletik te bin-utʼil ya kakʼtik ta ilel te skʼuxul koʼtantik, jich bitʼil te yakuk jpastik perdón, te yakuk x-otseswanotik ta jnatik sok te ayuk yutsil koʼtantik (Efes. 4:32). Ma skʼan ya jmaliytik te jaʼ nail ya spasik ta jtojoltik te yantike, ya skʼan te joʼotik nailuk ya kakʼtik ta ilel. Jichme ya kiltik te yak ta kʼoel ta pasel te bin la yal te Jesús: «Te machʼa ay bin ya yakʼ jaʼ bayalxan stseʼelil yoʼtan te bin-utʼil machʼa ay bin ya yichʼe» (Hech. 20:35).

10. ¿Bin-utʼil ya kakʼtik ta ilel te j-aʼtel winikotik kʼalal talel kʼaxel ya kichʼ jbatik ta mukʼ? (Jaʼnix jich ilawil te foto).

¹⁰ Kiltik te bin mukʼ skʼoplal la yal te Pablo. Te kʼalal yalojix-a te jaʼuk nail ya kakʼtik ta ilel te talel kʼaxel ya kichʼ jbatik ta mukʼe, te Pablo jich la yal: «Tulanukme ya x-aʼtejex, mame xchʼajubex». Jtul aʼtel winik sok stseʼelil yoʼtan ya x-aʼtej sok oranax ya spas te kʼalal ya yichʼ akʼbeyel jun aʼtelil. Te Proverbios 3:​27, 28 jich ya yal: «Ma me xacom aba ta spasel te bin lec ta pasel ta stojol te machʼa hich ya scʼan pasbeyel, teme ya xhuʼ awuʼun spasele». Jaʼ yuʼun, teme ya kiltik te ay machʼa ya skʼan koltayel, jpastik te bantito kʼalal ya xjuʼ kuʼuntik yuʼun ya jkoltaytik. Mame jnoptik te patil ya jkoltaytike o te ya yichʼ koltayel yuʼun te yantike (1 Juan 3:​17, 18).

11. ¿Bin ya skoltayotik yuʼun ya xnoptsajotikxan ta stojol te hermanoetike?

¹¹ Yan te bin-utʼil ya kakʼbeytik yil te yantik te ya kichʼtik ta mukʼe, jaʼ te ya jpasbeytik perdón te kʼalal ay bin ma lek ya spasik ta jtojoltik. Ta Efesios 4:26 jich ya yal: «Mame kʼalalto ta smaleluk kʼajkʼal te ilinemexe». ¿Bin yuʼun? Jich te bitʼil ya yal te versículo 27: «Mame xa awakʼik te ya x-och te Pukuj ta awolilik». Ta skʼop te Jehová, bayal buelta ya yalbotik te ya skʼan ya jpasbeytik perdón te yantike. Te Colosenses 3:13 jich ya yalbotik: «Talel kʼaxel […] pasbeya abaik perdón». Kʼalal ma xkichʼtik ta wenta te banti ya xchʼayik te hermanoetik sok te ya jpasbeytik perdón ya yakʼ te ya xnoptsajotikxan ta stojolik. Jichme ya xkoltaywanotik yuʼun jun-nax ya x-ayinotik ta swenta te chʼul espíritu sok te lamal koʼtantik ya xkuxinotik (Efes. 4:3). Teme ya jpastik perdón ya yakʼ te jun-nax ayotik sok ay lamal kʼinal.

12. ¿Bin-utʼil ya skoltayotik te Jehová yuʼun ya jpasbeytik perdón te yantike?

¹² Melelnix-a te aynix wokol ya kaʼiytik spasbeyel perdón te machʼa ay bin ma lek la spasbotik, pero sok te koltayel yuʼun te chʼul espíritu ya xjuʼ kuʼuntik. Kʼalal te Pablo la yalbeyix skʼoplal-a te ya skʼan ya kakʼtik ta ilel te kʼuxul oʼtanil sok te ya skʼan te tulanuk ya x-aʼtejotik, te Biblia jich ya yalxan: «Akʼame yakʼbeyex awipik te chʼul espiritue». Jich yuʼun, ta swenta te chʼul espíritu, jtul j-abat yuʼun Jehová ya xjuʼ ya yakʼ ta ilel bayal stseʼelil yoʼtan kʼalal ya spas te bin stojil ta pasel, jich bitʼil yakʼel ta ilel kʼuxul oʼtanil sok spasel perdón sok yutsil oʼtanil (Romanos 12:11). Jich yuʼun ya jkʼanbeytik wokol te Jehová te yakuk skoltayotik (Luc. 11:13).

«TE MANCHUK AYUK XATOMBA TA AWOLILIK»

13. ¿Binwan-a te ya xjuʼ ya xatotike?

¹³ Ta congregacionetik ay bayal ta jchajp ants winiketik (1 Tim. 2:​3, 4). Te bitʼil ma pajal te jkuxlejaltike, yanyantik-a te bin ya jtatik ta nopel ta swenta te bin-utʼil ya jchajpan jbatik, te bin poxiletik ya jtuuntestik sok te bin ya jkʼasestik kʼajkʼal-ae. Teme maba ya jkanantay jbatike, spisil ini ya xjuʼ ya xatotik (Rom. 14:4; 1 Cor. 1:10). Pero, te Dios la snojptesotik te talel kʼaxel ya jkʼuxultay jbatik, jaʼ yuʼun maba ya kaltik te jaʼ lekxan te bin ya jtatik ta nopele (Filip. 2:3).

14. ¿Bin ya skʼan ya jpastik tulan ta spasel spisil-ora sok bin yuʼun?

¹⁴ Yanxan te bin ya xjuʼ ya jpastik swenta maba ya xat sba te congregación, jaʼ te ya jpastik tulan yuʼun ya kakʼbeytik smukʼul yoʼtanik sok stseʼelil yoʼtanik te yantike (1 Tes. 5:11). Matonax jaluk talel, bayal ta tul ants winiketik te namajemik ta stojol-a te Jehová sujtik talel, jaʼnix jich te machʼatik yichʼojik lokʼesel ta congregación. Kʼax tseʼel koʼtantik te bin-utʼil sujtik talele (2 Cor. 2:8). Jtul hermana te kʼaxem ta 10 jaʼbil te namajem ta stojol te Jehová kʼot ta sNail Tsoblej, jich ya yal: «Spisil te hermanoetik tal spatbonik koʼtan sok stseʼelil yoʼtanik» (Hech. 3:19). ¿Bin yaʼiyel la yaʼiy sba te hermana ta swenta te kʼuxul oʼtanil-abi? Jich ya yalxan: «Jich la kaʼiy te jaʼ Jehová te machʼa yak yikʼbelon bael yuʼun ya xchaʼ sujton te banti ay tseʼel oʼtanil». Kʼalal ya jpastik tulan yuʼun ya kakʼtik mukʼul oʼtanil, te Jesús ya xjuʼ ya stuuntesotik yuʼun ya jkoltaytik te machʼatik bayal yijkatsik (Mat. 11:​28, 29).

15. ¿Binxan-utʼil ya xjuʼ ya xkoltaywanotik yuʼun junuk ayotik? (Jaʼnix jich ilawil te foto).

¹⁵ Yanxan te bin-utʼil ya xjuʼ ya xkoltaywanotik yuʼun junuk ayotik, jaʼ ta swenta te bin ya kaltik. Ta Job 12:11 jich ya yal: «¿Ma bal yacuc yaʼiy te chiquinil bin utʼil ay te cʼopetic, hich te bin utʼil ya yaʼiybe sbuhtsʼ weʼelil te quetique?». Te machʼa ya snaʼ spasel ta lek te weʼelil, ya spas prueba nailuk teme bujtsʼane. Jaʼnix jich, te kʼalal ya xkʼopojotik ya skʼan te nailuk ya jnoptik ta lek te bin ya kaltike, teme ya yakʼ tseʼel oʼtanil, mukʼul oʼtanil sok teme ay bin lek ya sta-a te machʼa ya yaʼiyotike (Sal. 141:3; Efes. 4:29).

16. ¿Machʼatik-a te ya skʼan ya spasikxan tulan yuʼun yakuk yakʼ mukʼul oʼtanil ta swenta te bin ya yalike?

¹⁶ Mukʼ skʼoplal te jichuk ya spasik te winiketik te nujpunemike, te papailetik sok te mamailetik yuʼun yakuk yakʼ mukʼul oʼtanil te bin ya yalike (Col. 3:​19, 21; Tito 2:4). Jaʼ nix jich, te ancianoetik ya yakʼik mukʼul oʼtanil sok ya smukʼubtesbeyik kʼinal yaʼiy te tuminchijetik yuʼun te Jehová (Is. 32:​1, 2; Gál. 6:1). Te Proverbios jich ya yalbotik: «Buen lec te cʼop te ya yichʼ halel ta mero yorahil» (Prov. 15:23).

KʼUXUK AKʼA KAʼIY JBATIK TA SMELELIL

17. ¿Bin ya skʼan ya jpastik yuʼun ya kakʼbeytik yil te smelelil kʼuxul oʼtanil te kermanotaktike?

¹⁷ Te jpuk-kʼop Juan jich la yal: «Mame ta jkʼoptiknax ni ta sbauknax ketik ya kaltik te kʼux ya kaʼiy jbatike, akʼa jpasbeytik yaʼtelul sok smelelilukme» (1 Juan 3:18). ¿Bin ya skʼan ya jpastik yuʼun smeleliluk te skʼuxul koʼtantike? Kʼalal ya jkʼasestik tiempo sok te kermanotaktik, jichme ya xnoptsajotikxan ta stojol sok yame yichʼ yip te skʼuxul koʼtantik ta stojolik. Jletik bin-utʼil ya jkʼasestik tiempo sok te hermanoetik ta tsoblej sok ta scholel skʼop Dios. Jaʼnix jich jlokʼes jtiempotik yuʼun ya xbajt kulaʼtaytik. Teme jich ya jpastike, ya xjuʼ te jich ya yalik ta jtojoltik-euk: «Te Dios jaʼ yak snojptesbelex te talel kʼaxel kʼux ya awaʼiy abaike» (1 Tes. 4:9). Yame jtatik ta ilel te «buen lec soc bayel yutsil te jun yoʼtan sbahic te machʼatic yermano sbahique» (Sal. 133:1).