Ayuk ta koʼtantik te ma spisiluk ya kichʼbeytik swentail

1. ¿Bin yakʼojbotik te Jehová, sok bin yuʼun?

TE Jehová la spasotik yuʼun ya xjuʼ ya jpastik pensar, te ay bin ya xkʼot ta koʼtantik sok te ya kichʼbeytik swentail te bitʼil ya jpastik te bin ya jnoptike. ¿Bin yuʼun te jich la spasotike? Melel ya skʼan te «ya anaʼbey sba te Diose» sok te yakuk jtuuntestik te jpʼijiltik yuʼun lekuk te bin ya jtatik ta nopel spasel kʼalal ya x-abatinotik ta stojol (Prov. 2:1-4; 2:5, TZOXCH; Rom. 12:1).

2. 1) ¿Bin ya skʼan ayuk ta koʼtantik? (Job 37:23, 24; jaʼnix jich ilawil te dibujo). 2) ¿Bin lekilal ya jtatik teme ya kakʼtik ta ilel spekʼelil koʼtantik te bitʼil ma spisiluk ya jnaʼbeytik swentail?

² Manchukme te Jehová la spasotik yuʼun ay bin ya xkʼot ta koʼtantik, pero ta melel ay bintik-a te ma xkʼot ta koʼtantike (kʼopona Job 37:23, 24). Jnoptik ta swenta te ejemplo yuʼun te Job. Te Jehová la spastiklanbey jojkʼoyeletik yuʼun ya yakʼ ta ilel te ma spisiluk ya snaʼbey swentail te Jobe. Jaʼ koltayot yuʼun ya sjeltay te bin ya snop te Job sok te yakuk xkʼot ta yoʼtan te ya skʼan te ayuk spekʼelil yoʼtan (Job 42:3-6). Jaʼnix jich, te joʼotik ay bin lek ya xlokʼ kuʼuntik-a teme ay ta koʼtantik te ma spisiluk ya xkichʼbeytik swentail. Jaʼ-abi ya skoltayotik yuʼun sok spekʼelil koʼtantik ya smukʼulin koʼtantik te Jehová te spisil-ora ya yakʼ jnaʼtik te bin-nix ya skʼan ya jnaʼtik-a yuʼun lekuk te bin ya jtatik ta nopel spasel (Prov. 2:6).

3. ¿Bin ya kilbeytik skʼoplal ta artículo ini?

³ Ta artículo ini ya xbajt kilbeytik skʼoplal te bintik ma jnaʼbeytik swentail sok bin yuʼun te ay baeltik wokol ya kiltike. Jaʼnix jich ya xbajt kiltik bin yuʼun jaʼ lek te ay bin ma jnaʼbeytik swentail. Te bin ya xbajt jnoptik ya skoltayotik yuʼun ya smukʼulinxan koʼtantik te Jehová te «machʼa spisil snaʼoj», jaʼ ya yal te bin-nix ya skʼan ya jnaʼtik-ae (Job 37:16).

MABA JNAʼOJTIK TE BIN-ORA YA XTAL TE SLAJIBAL TE CHOPOL BALUMILAL INI

4. Jich bitʼil ya yal Mateo 24:36, ¿bin-a te maba jnaʼojtike?

⁴ (Kʼopona Mateo 24:36). Te joʼotik maba jnaʼojtik te bin-ora ya xtal te slajibal te chopol balumilal ini, jaʼnix jich te kʼalal xtaluk ta Balumilal te Jesús maba snaʼoj-a «te bin kʼajkʼalil sok te jayeb ora».a Ta patil te Jesús la yalbey te jpuk-kʼopetik yuʼun, te «jaʼnax ay ta swenta snaʼel stukel» te Jehová te Ajwalil yuʼun te Tiempo te bin-ora ya xkʼot ta pasel te bintik yaloj (Hech. 1:6, 7). Te Jehová yakʼojbeyix skʼajkʼalel te bin-ora ya xtal te slajibal te chopol balumilal ini, pero te joʼotik maba ay ta jwentatik snaʼel.

5. Te bitʼil maba jnaʼojtik te bin-ora ya xkʼot skʼajkʼalel te ya yichʼ lajinel te chopol balumilal ini, ¿bin-utʼil ya xjuʼ ya yutsʼinotik?

⁵ Jich bitʼil la yal te Jesús, maba jnaʼojtik te bin-ora ya xtal te slajibal te chopol balumilal ini. Jaʼ yuʼun yaniwan xlujbotik ta smaliyel sok yaniwan xchebaj koʼtantik, kʼaxtoxan-a teme ayix bayal jaʼbil te yakotik ta abatinel ta stojol te Jehová. O wokolniwan ya kaʼiytik te ya xkujch kuʼuntik te tseʼlayel yuʼun te jfamiliatik o te tseʼlayel yuʼun te yantik ants winiketik ta swenta te maba talem te slajibal kʼajkʼale (2 Ped. 3:3, 4). Yaniwan xjuʼ jich ya jnoptik: «Te yakuk jnaʼ te bin-ora ya xkʼot te slajibal kʼajkʼale maniwan wokol ya kaʼiy smaliyel sok te ya xkujch kuʼun te tseʼlayele».

6. ¿Bin yuʼun lek te maba ya jnaʼtik te bin-ora ya xkʼot yorail te slajibal te chopol balumilal ini?

⁶ Te bitʼil te Jehová maba ya yakʼ jnaʼtik te bin-ora ya sta yorail te ya yichʼ lajinel te chopol balumilal ini, ya yakʼbotik te majtanil yuʼun ya kakʼbeytik yil te ya x-abatinotik ta stojol ta swenta te kʼux ta koʼtantik sok te ya smukʼulin koʼtantik. Ya jkʼantik te ya x-abatinotik ta stojol te Jehová ta sbajtelkʼinal ma jaʼuknax te kʼalal ya sta yorail te ya yichʼ lajinel te chopol balumilal ini. Snopel ta swenta te «skʼajkʼalel te Jehová» ma jaʼuk ya skʼan ya xbajt ta koʼtantik te bin ora ya xtale, jaʼ ya skʼan ya jnoptik te bin lek ya xlokʼ yuʼun-a. Snopel te bin ya xbajt spas te Dios jaʼ ya skoltayotik yuʼun ya xnoptsajotikxan ta stojol sok ya jpastikxan tulan yuʼun lekuk ya yilotik (2 Ped. 3:11, 12).

7. ¿Bin-a te jnaʼojtikixe?

⁷ Jaʼ lek te jaʼuk ya xbajt ta koʼtantik te bintik jnaʼojtikixe. ¿Bintik-a te jnaʼojtikixe? Jaʼto tal ta 1914 jnaʼojtik te yakotikix ta kuxinel ta slajibal kʼajkʼal. Te Jehová yakʼojbotik albilkʼopetik ta Biblia te ya yakʼ ta ilel sok te ya yakʼ jnatik bin yilel te kuxinel ta tiempo-abi. Seguro ayotik te «¡nopolix te smucʼul cʼahcʼalel yuʼun Jehová!» (Sof. 1:14). Jaʼnix jich jnaʼojtik te Jehová ya skʼan te ay bin ya jpastik: jaʼ te scholel «te lek yachʼil kʼop yuʼun te Wentainel yuʼun te Diose» ta stojol spisil te ants winiketik (Mat. 24:14). Te lek yachʼil kʼop ini yak ta albeyel skʼoplal ta 240 nacionetik sok territorioetik, sok kʼaxem ta jmil ta jchajp kʼopiletik. Ma puersauk ya skʼan ya jnaʼtik «te bin kʼajkʼalil sok te jayeb ora» ya xtal te slajibal kʼajkʼal yuʼun ya jpastik sok stseʼelil koʼtantik te aʼtelil te mukʼ skʼoplale.

MABA JNAʼOJTIK TE BIN YA SPAS TE JEHOVÁ YUʼUN YA SKOLTAYOTIK

8. ¿Bin ya skʼan ya yal te «bin ya spas te Dios»? (Eclesiastés 11:5).

⁸ Ma spisiluk ya jnaʼtik «te bin ya spas te Diose» (kʼopona Eclesiastés 11:5). ¿Bintik-a te ya spase? Jaʼ spisil te bintik ya spas yuʼun ya skʼotes ta pasel te skʼanojel yoʼtan. Ma xjuʼ ya jnaʼtik spisil te bintik ya yakʼ xkʼot ta pasel sok te bintik ya spas yuʼun ya skoltayotik (Sal. 37:5). Te Biblia ya yal te maʼyuk bin-ora ya xkʼot ta koʼtantik snaʼel, jich te bin-utʼil ma xkʼot ta koʼtantik te bitʼil ya xchʼi ta schʼujt te smama te chʼin alale ni jaʼuk te cientificoetik snaʼojbeyik skʼoplal.

9. ¿Bintik wokolil ya xjuʼ ya jtatik te bitʼil maba ya jnaʼtik te bin ya spas te Jehová yuʼun ya skoltayotik?

⁹ Te bitʼil maba ya jnaʼtik te bin ya xbajt spas te Jehová yuʼun ya skoltayotik ayniwan wokol ya kaʼiytik. Te kʼalal ay bin ya jtatik ta nopel spasel ayniwan xchebet koʼtantik, jich bitʼil teme ya jkʼan ya jcholtikxan skʼop Dios ya skʼan te maba bayal ya jlexan jbiluktik o ya xbootik ta yan lugar te banti ya skʼanikxan bayal publicadoretik. Jaʼnix jich, te kʼalal ma jichuk ya xkʼot ta lokʼel te bintik jnopojtik-ae, yaniwan ya jojkʼoybey jbatik teme lek ya yilotik te Jehová. Ayniwan jmetatik pero ma xjuʼ kuʼuntik skʼotesel ta pasel. O yaniwan jpastik tulan yuʼun ya jcholtikxan skʼop Dios, pero maʼyuk machʼa ya schʼam yaʼiy. O ayotikniwan ta jun proyecto yuʼun construcción, pero ya jsitintaytik jwokoltik. Ta swenta-abi yaniwan jojkʼoybey jbatik: «¿Yakbal skoltaybelon te Jehová?».

10. Te bitʼil ma jnaʼtik te bitʼil ya skoltayotik te Jehová, ¿bin talelil ya yakʼ te ayuk kuʼuntike?

¹⁰ Te bitʼil ma jnaʼtik te bin ya xbajt spas te Jehová ya skoltayotik yuʼun ayuk kuʼuntik taleliletik, jich bitʼil te pekʼel oʼtanil sok te ayuk ta koʼtantik te ay bin maba ya jnaʼbeytik swentail. Ya sjultes ta koʼtantik te snopojibal yuʼun te Jehová sok te beetik yuʼun jaʼ kʼax toyolxan te bitʼil te kuʼuntike (Is. 55:8, 9). Jaʼnix jich, teme ya smukʼulin koʼtantik ta jkʼaxel te Jehová sok teme ya jletik koltayel ta stojol lekme ya xlokʼ te bin ya jpastike. Teme leknax yak ta bael te bitʼil ya jcholtik sKʼop Dios o jun proyecto ta organización mame xchʼay ta koʼtantik yalbeyel yutsil skʼoplal te Jehová (Sal. 127:1; 1 Cor. 3:7). Teme ma jichuk ya xkʼot ta lokʼel te bitʼil jnopojtike, ya yakʼ stseʼelil koʼtantik snaʼel te Jehová ya yil sok te ya schajpan spisil (Is. 26:12). Ya jpastik tulan te bantito kʼalal ya xjuʼ kuʼuntik sok ya kakʼbeytik ta skʼab te Jehová te yanxane. Melelnix-a te maba ya spas jun milagro yuʼun ya yakʼ kiltik te be te banti ya skʼan jtʼuntik jich bitʼil la spas ta namey kʼinal, pero seguro ayotik te ya yakʼbotik te tojobtesel te ya xtuun kuʼuntike (Hech. 16:6-10).

11. ¿Bintik-a te jnaʼojtikixe?

¹¹ Sjultesel ta koʼtantik te bin ya jnaʼtik ya skoltayotik. ¿Bin-a te jnaʼojtikixe? Jaʼ te spisil-ora ay skʼuxul yoʼtan te Jehová, toj yoʼtan sok ay spʼijil yoʼtan, te mukʼ skʼoplal ya yil te bintik ya jpastik ta stojol sok ta stojol te hermanoetik, sok te spisil-ora ya smajtantes te machʼatik jun yoʼtanik ta stojole (Heb. 11:6).

MABA YA JNAʼTIK TE BIN YA XKʼOT TA PASEL PAJEL

12. Jich bitʼil ya yal Santiago 4:13, 14, ¿bin-a te ma jnaʼojtike?

¹² (Kʼopona Santiago 4:13, 14). Ta melel maba ya jnaʼtik bin yilel te jkuxlejaltik te pajele. Ta Biblia jich ya yal: «Ay bin ya xjuʼ ya xkʼot ta stojolik ta biluk-ora te ma smaliyojik-ae» (Ecl. 9:11). Jaʼ yuʼun, maba ya jnaʼtik teme lek ya xlokʼ te bin jchapojtik spasel o teme kuxulotikto yuʼun ya jpastik.

13. ¿Bin yuʼun ya yakʼ jwokoltik te bitʼil maba ya jnaʼtik te bin ya xkʼot ta pasel pajel?

¹³ Te bitʼil ma jnaʼtik te bin ya xkʼot ta pasel pajel ayniwan wokol ya kaʼiytik yuʼun. Yaniwan jmel koʼtantik yuʼun te bin ya xjuʼ ya xkʼot ta pasel sok te ya xchʼay te stseʼelil koʼtantik yuʼune. Jich bitʼil te kʼalal ay bin ya xkʼot ta pasel te maʼyuk jich jmaliyojtik-ae o yantikxan wokoliletik te ya yakʼ jmel koʼtantik sok te maba lek ya kaʼiy jbatik yuʼune. Jaʼnix jich, te kʼalal ma xkʼot ta pasel te bin jnopojtik-ae yaniwan jmel koʼtantik yuʼun o ya xchebaj koʼtantik (Prov. 13:12).

14. ¿Bin-a te ya yakʼ stseʼelil koʼtantik? (Jaʼnix jich ilawil te fotoetik).

¹⁴ Kʼalal ya xkujch kuʼuntik te wokoliletik jich ya kakʼtik ta ilel te ya x-abatinotik sok skʼuxul koʼtantik ta stojol te jTatik te ay ta chʼulchan chikan bin ya xkʼax ta jkuxlejaltik, ma jaʼuk ta swenta te ay bin ya jkʼantik yuʼune. Ta Biblia ay relatoetik te ya yakʼ ta ilel te ma skʼan ya jmaliytik te ma xyakʼ te ya xkʼax wokoliletik ta jtojoltik te Jehová sok te maba tsʼibaybil yuʼun-a te bin ya xkʼot ta pasel ta jkuxlejaltik. Melel snaʼoj te ma jaʼuk ya yakʼ stseʼelil koʼtantik teme ya jnaʼtik te bintik ya xkʼot ta pasel ta jkuxlejaltik ta pajel chaʼbej, jaʼ ya yakʼ stseʼelil koʼtantik teme ya jletik te tojobtesel yuʼun sok te ya jchʼuuntik (Jer. 10:23). Kʼalal ya jkʼanbeytik koltayel te Jehová te jaʼ ya stojobtesotik te kʼalal ay bin ya jtatik ta nopel spasel, jich kʼoem te jich ya kaltik: «Teme jich ya skʼan te Jehová sok teme kuxulotike, yame jpastik ini o yame jpastik te yane» (Sant. 4:15).

15. ¿Bin-a te jnaʼojtik ta swenta te pajel chaʼbeje?

¹⁵ Manchukme ma jnaʼtik te bin ya xkʼot ta pasel pajel, jnaʼojtik te Jehová jamal yaloj te ya yakʼbotik jkuxlejaltik ta sbajtelkʼinal jaʼ chikan teme ta chʼulchan o liʼ ta Balumilal. Jnaʼojtik te maba ya spas lot sok te maʼyuk bin ya xmakot yuʼun ya skʼotes ta pasel te bin jamal yaloje (Tito 1:2). Te Jehová jich ya yal: «Ya calbe scʼoblal te shahchibal cʼalal ta slajibal, cʼalal ta namey, te bin ma to ba cʼohem ta pasel». Spisil te bintik yaloj ay kʼoemix ta pasel sok yato xkʼotxan ta pasel (Is. 46:10). Seguro ayotik te maʼyuk bin ya xmakot yuʼun te Jehová yuʼun ya yakʼ ta ilel te kʼuxotik ta yoʼtan (Rom. 8:35-39). Ya yakʼbotik jpʼijiltik, smukʼul kʼinal kaʼiytik sok kiptik te ya xtuun kuʼuntik yuʼun ya xkujch kuʼuntik chikan biluk wokolil te yato xtale. Ya schʼuun koʼtantik te Jehová ya skoltayotik sok ya yakʼbotik bendición (Jer. 17:7, 8).

MA XKʼOT TA KOʼTANTIK BIN-UTʼIL-A TE YA SNAʼBOTIK JBATIK TA LEK TE JEHOVÁ

16. Manchuk chamnax koʼtantik yuʼun, ¿bintik-a te snaʼoj te Jehová ta jtojoltik? (Salmo 139:1-6).

¹⁶ (Kʼopona Salmo 139:1-6). Te Jpaswanej kuʼuntik ya snaʼ te bin kileltik, te bin yaʼiyel ya kaʼiy jbatik, te bin ya jnoptik sok spisil-ora ya skanantayotik. Ya snaʼ te bin ya kaltik sok te bin yuʼun te jich ya kaltike, te bin ya jpastik sok te bin yuʼun ya jpastik. Te ajwalil David jich la yal ta swenta te Jehová te ya sjoytayotik, ya skanantayotik jich bitʼil ya spas jtul jkanan te spisil-ora ya yilotik. Chamnax koʼtantik te bayal jkʼoplaltik ta yoʼtan te Mukʼul Ajwalil, te Jpaswanej yuʼun te chʼulchan sok te Balumilal, te Machʼa spisil ya xjuʼ yuʼun. Te David jich la yal: «Te bintic anaʼoj, ¡cʼax bayel yutsil ya caʼiy, cʼax toyol, ma xhuʼ cuʼun snaʼel!» (Sal. 139:6).

17. ¿Bin yuʼun wokol ya kaʼiytik schʼuunel te ya snaʼbotik jbatik ta lek te Jehová?

¹⁷ Ta swenta te bitʼil kichʼojtik chʼitesel, te jtsʼumbaltik o te bintik jchʼuunojtik ta namey tal wokolniwan ya kaʼiytik te jich ya kiltik te Jehová bitʼil jtul tatil te kʼuxotik ta yoʼtan sok te ya smel yoʼtan ta jtojoltike. O maniwan lek ya kaʼiy jbatik ta swenta te bin ma lek la jpastik ta namey te ya yakʼ jnoptik te maba ya skʼanotik te Jehová sok te namal ay ta jtojoltik, jich bitʼil la yaʼiy sba te David (Sal. 38:18, 21). Ayniwan machʼa yak ta spasel tulan sok spisil yoʼtan yuʼun ya sjeltay te skuxlejal yuʼun ya spas te bin lek ya yil te Diose, pero yaniwan sjojkʼoybey sba: «¿Bin yuʼun te Dios ya skʼan te ya jpʼaj te bin maba chopoluk ya kil te joʼone? ¿Yanixbal xkʼot ta yoʼtan-a te bin yaʼiyel ya kaʼiy jbae?».

18. ¿Bin yuʼun ya skʼan ya schʼuun koʼtantik te Jehová jaʼ ya snaʼxan jbatik ta lek? (Jaʼnix jich ilawil te fotoetik).

¹⁸ Ya xjuʼ ya schʼuun koʼtantik te Jehová jaʼ kʼaxtoxan ya snaʼ jbatik ma jichuk bitʼil te joʼotike sok jaʼ ya yil te tʼujbil taleliletik te ay kuʼuntik. Te Jehová ya yil te bintik ma lek ya jpastik, pero jaʼnix jich ya xkʼot ta yoʼtan te bin yaʼiyel ya kaʼiy jbatik sok bin yuʼun te ay jich ya jpastik sok kʼuxotik ta yoʼtan (Rom. 7:15). Kʼalal ya xkʼot ta koʼtantik te ya snaʼ bin kileltik ya xkʼootik te Jehová, ya yakʼ smukʼul koʼtantik yuʼun junuk koʼtantik ya x-abatinotik ta stojol sok stseʼelil koʼtantik.

19. ¿Bin-a te jnaʼojtik ta stojol te Jehová?

¹⁹ Jnaʼojtik te jaʼ kʼuxul oʼtanil te Jehová (1 Juan 4:8). Jnaʼojtik te tojobteseletik yuʼun ya yakʼ ta ilel te kʼuxotik ta yoʼtan sok jaʼ ya skʼan te lek ya xkʼootik ta lokʼel. Jaʼnix jich jnaʼojtik te ya skʼan te ya xkuxinotik ta sbajtelkʼinal, jaʼ yuʼun la yakʼ te stojol kolel. Ta swenta te majtanil-abi, ya xjuʼ ya schʼuun koʼtantik te lek ya yilotik manchukme jmulawilotik (Rom. 7:24, 25). Jnaʼojtik «te Dios jaʼ mukʼxan te bin-utʼil te koʼtantike sok spisil ya snaʼ stukel» (1 Juan 3:19, 20). Te Jehová ya snaʼ jbatik ta lek sok snaʼoj te ya xjuʼ kuʼun spasel te skʼanojel yoʼtane.

20. ¿Bin ya skoltayotik yuʼun ma bayal ya jmel koʼtantik?

²⁰ Jich bitʼil la kiltikix te Jehová ya yakʼ jnaʼtik te bin ya skʼan ya jnaʼtike. Ya skʼan ayuk ta koʼtantik te ma spisiluk ya jnaʼbeytik swentail, jaʼ-abi ya skoltayotik yuʼun maba ya jmel koʼtantik ta swenta te bin maba ya jnaʼtik, ya skʼan te jaʼuk ya xbajt ta koʼtantik te bintik mukʼ skʼoplal. Jich ya kakʼtik ta ilel te ya smukʼulin koʼtantik te Jehová «te machʼa tsʼacal te spʼijile» (Job 36:4). Manchukme ta ora ini ay bayal te bintik maba ya jnaʼtik, ya yakʼ stseʼelil koʼtantik snaʼel te pajel chaʼbej maba ya kijkitaytik snopel ta swenta te mukʼul Dios kuʼuntik ta sbajtelkʼinal (Ecl. 3:11).