¿Bin-utʼil ya xjuʼ ya jlekubtestikxan te j-oraciontik?

1, 2. 1) ¿Bin yuʼun te jteb ma spisil-ora jun-nax te bin ya kalulantik ta skʼoponel Dios o te ma lokʼemuk ta koʼtantike? 2) ¿Bin-utʼil ya jnaʼtik te ya schʼam yaʼiy spisil te bin ya kalbeytik te Jehová?

¿AYBAL jich awaʼiyoj te spisil-ora jun-nax te bin ya awalulan ta skʼoponel Dios o jich ya awaʼiy te ma lokʼem tal ta awoʼtan? Jichniwan ya kaʼiy jbatik ta jpisiltik, jaʼniwan yuʼun te bayal kaʼteltik te animaltiknax ya jkʼopontik te Diose. O ta skaj te ma snujpʼuk ya kaʼiytik te ya kalbeytik te bin-utʼil ya kaʼiy jbatik te Jehová.

² Te Biblia jamal ya yal te bin mukʼxan skʼoplal ya yil te Jehová jaʼ te lokʼemuk ta koʼtantik te kʼalal ya jkʼopontik sok te pekʼeluk koʼtantik. Jaʼ yuʼun ma skʼan te ya jmel koʼtantik ta stuuntesel kʼopetik te yaniknax ta aʼiyel-a o te kʼax leknax ya kaltike. Jaʼ ya yaʼiybey skʼop spisil te machʼatik pekʼel yoʼtanik (Sal. 10:17). Ya schʼam yaʼiy spisil te bin ya kaltik, melel ya smel yoʼtan ta jtojoltik (Sal. 139:1-3).

3. ¿Bintik jojkʼoyeletik ya kakʼbeytik sujtik ta artículo ini?

³ Ta artículo ini ya xbajt kakʼbeytik sujtik te jojkʼoyeletik ini: ¿bin yuʼun ma skʼan ya jxiʼtik yalbeyel te Jehová te bin ay ta koʼtantik sok te bin-utʼil ya kaʼiy jbatik?, ¿bin ya xjuʼ ya jpastik yuʼun lokʼemuk ta koʼtantik te bin ya kalbeytik te Jehová?, ¿bin-utʼil ya skoltayotik te oracionetik te ya jtatik ta Biblia yuʼun ya jlekubtestikxan te kuʼuntike? Sok ¿bin ya xjuʼ ya jpastik kʼalal ma jnaʼtik bin-utʼil ya kaltik te bin yaʼiyel ya kaʼiy jbatik ta skaj te tulan mel-oʼtan?

MAME XIWAT TA SKʼOPONEL TE JEHOVÁ

4. ¿Bin ya skoltayotik yuʼun ya kalbeytik ta jamal te bin ay ta koʼtantik te Jehová? (Salmo 119:145).

⁴ Maba wokoluk ya kaʼiytik scholbeyel te bin ay ta koʼtantik te Jehová sok te bin yaʼiyel ya kaʼiy jbatik teme jich ya kiltik bitʼil jtul lekil amigo te jaʼ ya skʼan te bin lek ta jtojoltik. Jnop kaʼiytik ta swenta te machʼa la stsʼibay te Salmo 119 te la sitintay tulan wokoliletik. Jich bitʼil te ay machʼatik la yalik lotiletik ta stojol (Sal. 119:23, 69, 78). Jaʼnix jich ay chebaj yoʼtan ta skaj te ay bintik ma lek la spas (Sal. 119:5). Pero la spas tulan yuʼun ya yamigoin te Dios, jaʼ yuʼun ma xiw ta yalel ta jamal te bin ay ta yoʼtan (kʼopona Salmo 119:145).

5. ¿Bin yuʼun ma skʼan ya skomotik ta skʼoponel Dios te kʼalal ay bin ma lek ya jnoptik ta jtojoltik? Ala junuk ejemplo.

⁵ Te Jehová jaʼnix jich ya skʼan te yakuk xkʼoponot yuʼun te machʼatik ay spasojik tulan mulil (Is. 55:6, 7). Jaʼ yuʼun ma skʼan te jaʼuk ya skomotik te bintik ma lek ya jnoptik ta jtojoltik. Yuʼun ya xkʼot ta koʼtantik-a, jnop kaʼiytik ta swenta te machʼa ya stij te Avión, ayniwan bin ma lek la spas o yan banti bajt-a. Pero ya snaʼ te ya xjuʼ ya skʼopon te machʼa ay ta swenta yakʼel te koltayele. Te bitʼil ay bin ma lek la spas, ¿yabal anop te ma skʼan koltayel ta skaj te ya xkʼexaw? ¡Maʼuk! Jaʼ pajal sok te kʼalal ay baeltik ya jpastik jun tulan mulil o te kʼalal ya xchʼayotik, maba ya skʼan te ya xiwotik o te ya xkʼexawotik ta skʼoponel te Jehová (Sal. 119:25, 176).

¿BIN-UTʼIL YA XJUʼ YA APAS ORACIONETIK TE LOKʼEMUK TA AWOʼTAN?

6, 7. ¿Bin ya skoltayotik yuʼun ya kaltik ta oración te bin ay ta koʼtantik? Ala junuk ejemplo (jaʼnix jich ilawil te nota).

⁶ Kʼalal ya jkʼopontik te Jehová sok spisil koʼtantik ta swenta te bin ya jnoptik sok te bin yaʼiyel ya kaʼiy jbatik, ya xnoptsajotikxan ta stojol. Kiltik bin ya xjuʼ ya skoltayotik yuʼun ya kalbeytik te Jehová te bin ay ta koʼtantik.

⁷ Jnopilan ta koʼtantik te taleliletik yuʼun te Jehová.a Te kʼalal ya jlokʼestikxan tiempo ta snopilanel ta koʼtantik te taleliletik yuʼun te Jehová, maba wokoluk ya kaʼiytik yalbeyel te bin ay ta koʼtantik (Sal. 145:8, 9, 18). Jich la spas te Kristine, jtul hermana te kʼax chopol te spapa. Jich la yal: «Te kʼalal ya kil jich bitʼil jtul tatil te Jehová, wokol ya kaʼiy skʼoponel. Jich ya kaʼiy te ya xnamaj ta jtojol ta swenta te ay banti ya xchʼayon». ¿Bin talelil yuʼun Dios koltayot yuʼun? Jich ya yalxan: «Te skʼuxul yoʼtan te Jehová te ma x-ijkitaywan ya yakʼ te lek la kaʼiy jba yuʼun. Ya jnaʼ te spisil-ora ya stsakon ta jkʼab sok teme ya xyalon ya sjachon sok skʼuxul yoʼtan. Te kʼalal ya jnopilan ta koʼtan te skʼuxul yoʼtan te Jehová, ya skoltayon yuʼun ya kalbey te bin ya yakʼbon stseʼelil koʼtan sok te bin ya yakʼbon mel-oʼtan».

8, 9. ¿Bin lekilal ya jtatik teme nail ya jnoptik te bin ya kalbeytik te Jehová? Ala junuk ejemplo.

⁸ Jnoptik ta nailal te bin ya jkʼantike. Te kʼalal mato jpasojtik-a te oración, ya xjuʼ ya jpasbey jbatik te jojkʼoyeletik ini: «¿Bintik wokoliletik yakon ta sitintayel ta ora ini? ¿Aybal machʼa maba jpasojbey perdón? ¿Aybal bin kʼaxeltonax kuʼun te ya skʼan ya jkʼanbey koltayel te Jehová?» (2 Rey. 19:15-19). Jaʼnix jich ya xjuʼ ya jkʼayintik te ejemplo yuʼun te Jesús sok te ya jkʼantik ta oración te bintik snitojbey sba skʼoplal sok te sbiil te Jehová, te Wentainel yuʼun sok te skʼanojel yoʼtane (Mat. 6:9, 10).

⁹ Jtul hermana te Aliska sbiil, kʼax wokol la yil skʼoponel te Jehová te kʼalal la snaʼ stojol te yichʼoj cáncer ta schinam te smamalale. Jich ya yal: «Bayal ayon ta mel-oʼtan-a te ma jnaʼ te bin ya kal sok wokol ya kaʼiy te ay bin ya jta ta nopel». ¿Bin koltayot yuʼun? Jich ya yalxan: «Te kʼalal mato jpasoj-a te oración, nail ya jnop ta koʼtan te bin ya kale, jaʼ-abi bayal ya skoltayon yuʼun ma jaʼuknax ya xbajt ta koʼtan te wokoliletik ya xkʼax ta jtojole, sok te ayuk slamalil koʼtan te kʼalal ya jkʼopon te Jehová».

10. ¿Bin yuʼun lek te ya xjalajotik ta skʼoponel te Jehová? (Jaʼnix jich ilawil te fotoetik).

¹⁰ Mame animaltiknax ya jpastik te oración. Melelnix-a teme komiknax te j-oraciontik ya yakʼ xnoptsajotik ta stojol te Jehová; pero teme najtik te j-oraciontik ya xjuʼ ya kalbeytik ta lek te bin yaʼiyel ya kaʼiy jbatike.b Te smamalal te Aliska te Elijah sbiil, jich ya yal: «Ya jpas tulan yuʼun bayaluk buelta ya jkʼopon te Jehová ta jujun kʼajkʼal, jtaoj ta ilel te kʼalal jal ya jkʼopon jich ya kaʼiy te ya xnoptsajonxan ta stojol. Te Jehová spisil-ora ay stiempo yuʼun ya yaʼiy jkʼoptik, jaʼ yuʼun ya jnaʼ te ya xjuʼ te jal ya xkʼopojon sok». Pasa awil ini: Lea bin-ora sok banti jal ya xjuʼ ya xkʼopojat sok te Jehová sok te maʼyuk bin ya xchʼaybat awoʼtan. Ya xjuʼ ya akʼopon ta awoʼtan o te ya xchiknaj ta aʼiyel te bin ya awal, jaʼnix jich akʼa ta awoʼtan te yakuk akʼaytes aba ta spasel.

NOPILANA TA AWOʼTAN TE ORACIONETIK TE AY TA BIBLIA

11. ¿Bin-utʼil ya skoltayotik te kʼalal ya jnopilan ta koʼtantik te oracionetik te la spasik te j-abatetik ta namey kʼinal? (Jaʼnix jich ilawil te recuadro «¿Jichbal ya awaʼiy aba-euk?»).

¹¹ Yaniwan skoltayat teme ya anopilan ta awoʼtan te bin la yalik chaʼoxtul j-abatetik yuʼun Jehová ta namey kʼinal ta s-oracionik te lokʼem ta yoʼtanik sok ta kʼayojiletik. Teme ya awil ta lek te bin la yalik ya xjuʼ ya skoltayat yuʼun jichuk ya apas-euk. Yaniwan ata ta ilel kʼopetik te ya xjuʼ ya atuuntes yuʼun ya awichʼ ta mukʼ te Jehová. Yaniwan ata oracionetik te la spas te j-abatetik yuʼun te Jehová te banti la yalik te bin yaʼiyel la yaʼiy sbaik te jichniwan ya awaʼiy aba-euk.

12. ¿Bintik jojkʼoyeletik ya xjuʼ ya jpasbey jbatik te kʼalal ya jkʼopontik te oracionetik te la spasik te j-abatetik ta namey?

¹² Kʼalal ya akʼopon te oracionetik te la spasik te j-abatetik ta namey kʼinal, jojkʼoybeya aba: «¿Machʼa la yal te kʼopetik ini? ¿Bin yak ta kʼaxel ta skuxlejal-a? ¿Jichbal yak ta kʼaxel ta jkuxlejal-euk? ¿Bin ya yakʼbon jnop?». Melelnix-a te ya skʼan ya ale información yuʼun ya awakʼbey sujtib te jojkʼoyeletik ini, pero ayme bin lek ya xlokʼ-a teme jich ya apase. Kiltik cheʼoxebuk ejemplo.

13. ¿Bin ya yakʼ jnoptik te oración la spas te Ana? (1 Samuel 1:10, 11; jaʼnix jich ilawil te dibujo).

¹³ (Kʼopona 1 Samuel 1:10, 11). Kʼalal te Ana la skʼopon te Jehová, ay cheb wokoliletik te yak ta kʼaxel ta stojol-a: maba ya x-ala sok ay ta akʼbeyel swokol yuʼun te yan yinam te Elcaná (1 Sam. 1:4-7). Teme yak ta kʼaxel awokol te ma xchʼay baele, ¿bin ya xjuʼ ya anop ta swenta te oración la spas te Ana? Te Ana la slokʼes tiempo yuʼun ya scholbey te Jehová te bin-utʼil ya yaʼiy sba, sok ta patil lek la yaʼiy sba yuʼun (1 Sam. 1:12, 18). Jichnix xa apas-euk sok «aʼbeya Jehová te bin ay awocol yuʼun», ya skʼan ya yal-abi te ya acholbey te bintik ya amel awoʼtan yuʼun sok te bin yaʼiyel ya awaʼiy aba yuʼune (Sal. 55:22).

14. 1) ¿Binxan ya yakʼ jnoptik te ejemplo yuʼun te Ana? 2) ¿Bin-utʼil ya xjuʼ ya jlekubtestikxan te j-oraciontik kʼalal ya jnopilan ta koʼtantik te bin ya yal te Biblia? (Ilawil te nota).

¹⁴ Cheʼoxeb jaʼbil ta patil te kʼalal ayinemix-a te Samuel, te Ana la yikʼ bael ta stojol te mukʼul sacerdote Elí (1 Sam. 1:24-28). Ta swenta jun oración te la spas sok spisil yoʼtan la yalbey wokol te Jehová, melel la sta ta ilel te bin-utʼil ya skanantay te j-abatetik yuʼun te jun yoʼtanik (1 Sam. 2:1, 8, 9).c Maniwan chʼay bael ta jkʼaxel te swokole, pero jaʼ bajt ta yoʼtan te bin-utʼil akʼbil bendición yuʼun te Jehová. ¿Bin ya yakʼ jnoptik? Maniwan wokoluk ya kaʼiytik sitintayel te wokoliletik teme jaʼ ya xbajt ta koʼtantik yilel te bin-utʼil skoltayojotik te Jehová.

15. ¿Bin ya yakʼ jnoptik te oración la spas te Jeremías? (Jeremías 12:1).

¹⁵ (Kʼopona Jeremías 12:1). Ta jun tiempo, te j-alwanej Jeremías kʼax chebaj yoʼtan, melel la yil te leknax skuxlejalik te chopol ants winiketik soknix te israeletik te ya xlabanot yuʼune (Jer. 20:7, 8). Maba wokoluk ya kaʼiytik snaʼel te bin-utʼil la yaʼiy sba te Jeremías, melel ta ora ini te ants winiketik ya slabanotik sok jich yilel te ya smulanik lekil kuxlejalil te machʼatik ya spasik te bin chopol. Manchukme te Jeremías la yal te ma lek ya yaʼiy sba, maʼyuk bin-ora jaʼ la yakʼbey smulin te Dios te bin ma stojiluk ta pasel. Melel te kʼalal la yil bin-utʼil la stojobtes te lum yuʼun te la skʼaxuntayik mantal, la schʼuunxan yoʼtan te ya xchajpanwan ta stojil te Jehová (Jer. 32:19). Jaʼnix jich ya xjuʼ ya jpastik-euk sok te ya kalbeytik te Jehová te bin ma lek ya kaʼiy jbatik yuʼun, melel ya schʼuun koʼtantik te jaʼ ya schajpan te bin ma stojiluk ta pasel ta mero yorail.

16. ¿Bin ya yakʼ jnoptik te oración la spas jtul levita te la yichʼ ikʼel bael ta chukel? (Salmo 42:1-4; jaʼnix jich ilawil te dibujoetik).

¹⁶ (Kʼopona Salmo 42:1-4). Ta kʼayojil ini, jtul levita la yal te bin-utʼil la yaʼiy sba te kʼalal ikʼot bael ta chukel sok te ma juʼ la sjokin sba sok te yermanotake. Jichniwan ya kaʼiy jbatik te kʼalal ma xjuʼ ya xlokʼotik ta jnatik o te ya kichʼtik chukel ta skaj te schʼuunel koʼtantik. Te kʼalal jich ya xkʼax ta jtojoltik, jkʼaxelniwan ma lek ya kaʼiy jbatik, pero jaʼ lek te ya kalbeytik Jehová te bin-utʼil ya kaʼiy jbatik. Jaʼ-abi ya skoltayotik ta yilel te bin-nix yaʼiyel ya kaʼiy jbatik-a sok te ma jaʼuk ya xbajt ta koʼtantik te wokoliletike. Jich bitʼil, te levita la sta ta ilel te bin-utʼil ya xjuʼ ya yichʼxan ta mukʼ te Jehová (Sal. 42:5). Jaʼnix jich la snopilan ta yoʼtan te bin-utʼil ya xkanantayot yuʼun (Sal. 42:8). Te kʼalal ya kalbeytik spisil te bin ay ta koʼtantik te Jehová, jaʼ ya skoltayotik ta snaʼel te bin-utʼil ya kaʼiy jbatik, ya jtatik slamalil koʼtantik sok yip koʼtantik yuʼun ya xkujch kuʼuntik te wokoliletike.

17. 1) ¿Bin ya yakʼ jnoptik te oración la spas te Jonás? (Jonás 2:1, 2). 2) ¿Bin-utʼil ya skoltayotik te kʼopetik ya jtatik ta Salmo te kʼalal ya xkʼax jwokoltik? (Ilawil te nota).

¹⁷ (Kʼopona Jonás 2:1, 2). Te j-alwanej Jonás la spas te oración ini te kʼalal ay ta schʼujt-a te mukʼul chay. Manchukme la skʼaxuntay mantal, schʼuunoj yoʼtan-a te ya x-aʼiybot skʼop yuʼun te Diose. Te kʼalal la skʼopon te Dios la stuuntes kʼopetik te ayik ta Salmo, jaʼ-abi ya yakʼ ta ilel te snaʼoj ta lek te bin ya yal te salmoetike.d Te bitʼil la sjultes ta yoʼtan sok te la snopilan la schʼuun yoʼtan te ya xkoltayot yuʼun te Jehová. Jaʼnix jich, teme ya jpastik tulan ta snopel te versiculoetik ta skʼop Dios, yaniwan xtal ta koʼtantik sok ya yakʼbotik smukʼul koʼtantik te kʼalal ya jpastik oración ta yorail tulan wokol.

YA XNOPTSAJATXAN TA STOJOL TE JEHOVÁ TEME YA AKʼOPON

18, 19. ¿Bin-utʼil ya skoltayotik te Romanos 8:26, 27 teme ma jnaʼtik bin-utʼil ya kalbeytik te bin yaʼiyel ya kaʼiy jbatik te Jehová? Ala junuk ejemplo.

¹⁸ (Kʼopona Romanos 8:26, 27). Ayniwan baeltik te ma jnaʼtik te bin-utʼil ya kaltik te bin yaʼiyel ya kaʼiy jbatik ta skaj te ayotik ta tulan mel-oʼtan. Pero, ta yorail-abi te chʼul espíritu ya xjuʼ ya skoltayotik sok ya xjuʼ «ya xkʼopoj» ta jtojoltik. ¿Bin ya skʼan ya yal-abi? Ta swenta te schʼul espíritu te Jehová la yakʼ te tsʼibaybiluk ya xjil ta Biblia bayal oracionetik. Jaʼ yuʼun, te kʼalal ma jnaʼtik te bin-utʼil ya kaltik te bin yaʼiyel ya kaʼiy jbatik, te Jehová jich ya yil te joʼotik la jpastik te oracionetik-abi sok ya sutbotik.

¹⁹ Jaʼ te bin koltayot yuʼun jtul hermana te Elena sbiil te jaʼ slumal Rusia, melel la yichʼ chukel ta skaj te ya skʼopon Dios sok te ya skʼopon te Biblia. Wokol la yaʼiy skʼoponel Dios te kʼalal ay ta tulan mel-oʼtan-a. Jich ya yal: «Jul ta koʼtan te kʼalal ma xjuʼ kuʼun sitintayel jun wokolil sok te ma jnaʼ te bin ya jkʼan ta oración, te Jehová jich ya yil te joʼon ya jpas te oracionetik te ya xchiknaj ta Biblia te la spas te j-abatetik yuʼun ta namey». Jich ya yalxan: «Jaʼ la yakʼbon smukʼul koʼtan ta yorail te tulan wokoliletik».

20. ¿Bin ya skoltayotik ta schajpanel koʼtantik ta skʼoponel Dios te kʼalal kʼax lujbenotik?

²⁰ Te kʼalal kʼax lujben ya kaʼiy jbatik ayniwan bintik ya xjajch jnoptik te ya xchʼaybotik koʼtantik te kʼalal ya jkʼopontik Dios. Yuʼun ya jchajpan te koʼtantik ya xjuʼ ya kaʼiytik audioetik yuʼun salmo o ya jpastik te bin la spas te ajwalil David, jaʼ te ya jtsʼibaytik te bin yaʼiyel ya kaʼiy jbatike (Sal. 18, 34, 142; sok te sjajchibal aʼiyej ta sba te capítulo). Melelnix-a te ma pajalotik ta jpisiltik, ta jujuntul te j-abat yuʼun Dios ya xjuʼ ya sle bin-a te ya xkoltayot yuʼun kʼalal ya schajpan sba ta skʼoponel te Diose (Sal. 141:2). ¿Bin ya skoltayat te jaʼate?

21. ¿Bin yuʼun ya xjuʼ ya kalbeytik spisil te bin ay ta koʼtantik te Jehová?

²¹ Ya yakʼ smukʼul koʼtantik snaʼel te ya xkʼot ta yoʼtan te Jehová te bin yaʼiyel ya kaʼiy jbatik, manchukme mato kalojbeytik-a (Sal. 139:4). Te Jehová ya smulan yaʼiyel te jkʼoptik sok te ya smukʼulin koʼtantik. Jaʼ yuʼun ya skʼan te ya jkʼopontik sok spisil koʼtantik te jTatik te ay ta chʼulchan. Jtuuntestik kʼopetik yuʼun te oracionetik te la spasik te j-abatetik yuʼun te Dios te tsʼibaybil ta Biblia. Kalbeytik spisil te bin ay ta koʼtantik, te bin ya yakʼ jmel koʼtantik sok te bin ya yakʼbotik stseʼelil koʼtantik. Te Jehová jaʼ lekil amigo sok spisil-ora ay ta jtsʼeeltik.