Ayuk skʼoplal ta koʼtantik te bitʼil libre ayotik ta stsael te bin ya jpastike

1, 2. 1) ¿Bin ya yal chaʼoxtul ants winiketik ta swenta te bitʼil libre ayotik ta stsael te bin ya jkʼantik spasele? 2) Jaʼukmeto, ¿bin ya yal te Biblia ta swenta-abi? 3) ¿Bin jojkʼoyeletik ya yichʼ akʼbeyel sujtib ta articulo ini?

AY JTUL ants te ay bin ya skʼan ya sta ta nopel te ya spas te jich la yalbey jtul yamigo: «Maxa wakʼbon jpas pensar, jaʼnax albon te bin ya skʼan ya jpase, jaʼ kʼunxan ya kaʼiy». Te antse jaʼ ya skʼan te ya x-albot te bin ya spase, ma jaʼuk te ya stuuntes te bitʼil libre ay ta stsael te bin ya skʼan ya spas, te jaʼ jun mukʼul majtʼanil te talem ta stojol Dios. ¿Bin ya kaltik ta jwentatik? ¿Joʼotiknixbal ya jnoptik te bin ya jkʼan ya jpastik o jaʼbal ya jkʼantik te ay machʼa ya yalbotik te bin ya skʼan ya jpastike? ¿Bin ya kaltik ta swenta te bitʼil libre ayotik ta stsael te bin ya jkʼan ya jpastike?

² Te ants winiketik bayal bin ya yalik ta swenta te bitʼil libre ayotik ta stsael te bin ya jkʼan ya jpastike. Ay chaʼoxtul ya yalik te maba libre ayotik, melel skuyojik te yalojix te Dios te bin ya jpastik ta jkuxlejaltike. Ay yantik te ya yalik te jaʼnax ya xjuʼ ya jnoptik te bin ya jkʼan ya jpastik teme libre ayotik ta jkʼaxele. Jaʼukmeto te Biblia ya yakʼ ta nopel te jich la spasotik te Jehová te ya xjuʼ kuʼuntik te pʼijuk te bintik ya jtatik ta nopel te ya jpastike (kʼopona te sjun Josué 24:15). Jaʼnix jich te Biblia ya yakʼbey sujtib te jojkʼoyeletik ini: Manchukme libre ayotik ta stsael te bin ya jkʼan ya jpastike, ¿aybal bintik maba ya xjuʼ ya jpastik? ¿Bin-utʼil ya xjuʼ ya jtuuntestik te bitʼil libre ayotik swenta ya jtatik ta nopel te bin ya jkʼan ya jpastike? ¿Bin-utʼil ya kakʼtik ta ilel te kʼux ta koʼtantik ta smelelil te Jehová ta swenta te bin ya jtatik ta nopel te ya jpastike? ¿Bin-utʼil ya kakʼtik ta ilel te ya kichʼtik ta mukʼ te bin ya staik ta nopel spasel te yantike? Te jojkʼoyeletik-abi ya kakʼbeytik sujtib ta articulo ini.

¿BIN YA JNOPTIK TA SWENTA TE JEHOVÁ SOK TE JESUSE?

3. ¿Bin-utʼil ya stuuntes Jehová te bitʼil libre ay ta jkʼaxel ta stsael te bin ya spase?

³ Jaʼnax te Jehová libre ay ta jkʼaxel ta stsael te bin ya skʼan ya spas, jaʼukmeto bayal bin ya xjuʼ ya jnoptik ta swenta te bin-utʼil ya stuuntese. Jich bitʼil, te Jehová la stuuntes te bitʼil libre ay te kʼalal la stsa te lum Israel te jich kʼot ta lum yuʼun (Deuteronomio 7:6-8). La stsa yuʼun ya skʼan ya skʼotes ta pasel te bin jamal yaloj ya spas ta stojol te yamigo jaʼ te Abrahame (Génesis 22:15-18). Jaʼnix jich te Jehová sok stojil soknix skʼuxul yoʼtan ya stuuntes te bitʼil libre ay ta spasel te bin ya skʼane. Jich la yakʼ ta ilel kʼalal la stojobtes te israeletik te la skʼaxuntaybeyik skʼope. Kʼalal ya sujtes yoʼtanik ta smelelil ta swenta te bin la spasike, te Jehová ya yakʼbey yil skʼuxul yoʼtan sok ya snaʼbey yoʼbolil sbaik. Jich la yal: «Ya jlecubtesbe te stoybahil, ta scuenta yutsil coʼtan cʼux ya caʼiy ta coʼtan» (Oseas 14:4). Jich bitʼil ya kiltike, te Jehová ya stuuntes te bitʼil libre ay ta spasel te bin ya skʼan ta skoltayel te yantike. ¡Kʼax lekil ejemplo ta jtojoltik!

4, 5. 1) ¿Machʼa-a te sbabial akʼbot te majtʼanil te bitʼil libre ay ta stsael te bin ya skʼan ya spas sok bin-utʼil la stuuntes? 2) ¿Bin jojkʼoyel ya skʼan ya jpasbey jbatik ta jpisiltik?

⁴ Te Jehová jich la snop te ya spas te chʼul-abatetik sok te ants winiketik te bitʼil libre ya x-ayinik ta stsael te bin ya skʼan ya spasike. Te Jesús jaʼ sbabial te machʼa la yichʼ pasel yuʼun Dios sok la yichʼ pasel ta slokʼomba. Jaʼ te machʼa sbabial la yichʼ akʼbeyel te majtʼanil te bitʼil libre ay ta stsael spasel te bin ya skʼane (Colosenses 1:15). ¿Bin-utʼil la stuuntes? Kʼalal mato talem ta Balumilal, la sta ta nopel te jun yoʼtan ya yakʼ sba ta stojol Dios ma jaʼuk ta stojol te Satanás te bitʼil ya skontrain te Diose. Kʼalal tal ta Balumilal, la spʼaj spisil te tsajel akʼbot yuʼun te Satanase, melel jich la sta ta nopel te ya spase (Mateo 4:10). Jaʼnix jich, kʼalal junxanix ajkʼabal ya skʼan ya xlaj-ae la skʼopon te sTate sok la yalbey ta jamal te ya skʼan ya spasbey te skʼanojel yoʼtan. Jich la yalbey: «Jtat, teme hich ya scʼan awoʼtan, ma me xcʼoht ta jcuenta te copa ini; pero ma me haʼuc ya xcʼoht ta pasel te bin ya scʼan coʼtan hoʼon, ha acʼa cʼohtuc ta pasel te bin ya scʼan awoʼtan te haʼate» (Lucas 22:42). ¿Yabal xjuʼ ya jtʼunbeytik stalel te Jesús sok te ya jtuuntestik te bitʼil libre ayotik ta stsael te bin ya jkʼantik spasel swenta ya kichʼtik ta mukʼ te Jehová sok ya jpasbeytik te skʼanojel yoʼtane?

⁵ Yak, ya xjuʼ ya jtʼunbeytik stalel te Jesús melel jaʼnix jich la kichʼtik pasel ta slokʼomba te Diose (Génesis 1:26). Jaʼukmeto te joʼotike maba libre ayotik ta jkʼaxel jich bitʼil te Jehovae. Te Biblia ya yal te manchukme libre ayotik, ay bintik yaloj te Jehová te maba ya xjuʼ ya jpastike sok yaloj te ma skʼan ya jkʼaxuntaytik te bantito kʼalal yaloj te ya xjuʼ jpastike. Jich bitʼil te inamiletik ya skʼan ya yichʼik ta mukʼ te aʼtelil yichʼoj te smamlalike, te alnichʼanetik ya skʼan ya schʼuunbeyik skʼop te smeʼ statike (Efesios 5:22; 6:1). Jaʼ yuʼun ta jpisiltik ya skʼan ya jojkʼoybey jbatik ini: «¿Yabal kichʼ ta mukʼ te bitʼil yaloj te Jehová te ay bintik maba ya xjuʼ ya jpas, manchukme libre ayon?». Te bin ya xjuʼ jtatik ta sbajtʼelkʼinal ta pajel chaʼbeje jaʼme chikan te bin sujtib ya kakʼbeytik te jojkʼoyel-abi.

TE MACHʼATIK LEK SOK MA LEK YA STUUNTESIK TE BITʼIL LIBRE AYOTIKE

6. Chola sok jun ejemplo bin yuʼun tulan skʼoplal te ay bintik ma xjuʼ ya jpastik manchukme libre ayotik.

⁶ Jich bitʼil te jaʼnax ya xjuʼ ya jpastik te bantito kʼalal ya yal Jehová, ¿yabal xjuʼ ya kaltik te libre ayotik ta smelelile? Yak. ¿Bin yuʼun? Melel te bitʼil ay bintik maba ya xjuʼ ya jpastik ya skanantayotik. Jpajbeytik skʼoplal sok ini. Jnop kaʼiytik te ya xbootik ta jpam lum te namal ay, jaʼukmeto ta carretera te banti ya xkʼaxotik maʼyuk leyetik yuʼun tránsito. Te ants winiketik ma tojuk ya xbeen sok skarroik ta carretera chikan banti ya xbajtʼik sok chikan bin velocidad ya skʼan ya stijik. ¿Junbal koʼtantik ya kaʼiy jbatik ta carretera-abi? Ta jkʼaxel maʼuk. Te ejemplo-abi ya yakʼ kiltik te puersa ya jkʼantik te ay bintik maba ya xjuʼ ya jpastik swenta ya jmulantik te ayinel ta libre ta smelelile. Kiltik cheʼoxebuk ejemploetik ta Biblia te ya yakʼ ta ilel te jaʼ ta skaj jlekilaltik te bitʼil jich yakʼoj te Jehová te ay bintik maba ya xjuʼ ya jpastike.

7. 1) Albeya skʼoplal junuk te banti maba pajal te Adán sok te chambalametike. 2) ¿Bin-utʼil la stuuntes ta lek te Adán te bitʼil libre ay ta snopel te bin ya skʼan ya spase?

⁷ Te sbabial ants winik te la spas te Jehová jaʼ te Adane. Te Jehová la yakʼ te libre kʼot te Adán ta stsael te bin ya skʼan ya spase, jich bitʼil la spas te chʼul-abatetike. Jaʼukmeto te chambalametike maba libre la yakʼtiklan stukel. ¿Bin-utʼil la stuuntes te Adán te bitʼil libre aye? La skʼan la spas te tʼujbil aʼtelil akʼbot spas yuʼun te Dios ta slebeyel sbiil te chambalametik. Te Biblia ya yal te bitʼil te Dios la yikʼ tal ta stojol Adán te chambalametik swenta ya yil sok ya yakʼbey sbiil te snujpʼ ya xkʼote. Te Jehová maba la sjelontes ni junuk te biililetik la sle te Adane. La yichʼ ta mukʼ te bin la snop ya spas te Adane (Génesis 2:19).

8. ¿Bin-utʼil maba lek la stuuntes te Adán te bitʼil libre ay ta stael ta nopel te bin ya skʼan ya spase, sok bintik maba lek lokʼ ta swenta te bin la spase?

⁸ Te Jehová la yakʼbey ta swenta te Adán spasel ta nichimal kʼinal te Balumilale. Te Dios jich la yal: «Sitinan soc pʼohla abahic, nojesahic ta swohlol te bahlumilal, soc tuhunahic te qʼuinale. Ajwalilat ya xcʼohat yuʼun te schayul haʼetic, te mutetic te ya xwihlic ta toyol soc spisil te chambahlametic te ya xbehenic ta lumqʼuinal» (Génesis 1:28). Jaʼukmeto te Adán maba la yichʼ ta mukʼ te bantito kʼalal albot yuʼun Jehová te ya xjuʼ ya spase. Jich yuʼun la sloʼbey sit te teʼe. Jich bitʼil te Adán maba la snaʼ stuuntesel te bitʼil libre ay ta spasel te bin ya skʼane, te ants winiketik bayalix jmil jaʼbil te yakik ta wokol (Romanos 5:12). Spisiluk-ora juluk ta koʼtantik te bintik maba lek lokʼ yuʼun-a te bin la snop la spas te Adane. Teme jich ya jpastike, yame jnaʼtik stuuntesel ta lek te bitʼil libre ayotik ta stael ta nopel te bin ya jkʼan ya jpastike. Jaʼnix jich maba ya jkʼaxuntaytik te bantito kʼalal yaloj te Jehová te ya xjuʼ ya jpastike.

9. ¿Bin la yakʼbey ta swenta te israeletik ta stael ta nopel te Jehová, sok bin la yalik ta jamal?

⁹ Jpisiltik jmulawilotik sok ya xlajotik ta skaj te mulil la spasik te Adán sok te Evae. Jaʼukmeto yato xjuʼ te joʼotiknix ya jtatik ta nopel te bin ya jpastike. Jich ya kiltik ta swenta te bitʼil la yakʼ ta ilel stalel te Jehová ta stojol te lum Israel. Te Jehová la yakʼ ta swenta te israeletik te jaʼnix ya snopik teme ya skʼan ya xkʼotik ta lum yuʼun o teme maʼuke (Éxodo 19:3-6). Te israeletik la skʼanik te ya xkʼotik ta lum yuʼun te Jehová sok la yalik te jaʼnax ya spasik te bantito kʼalal albil yuʼun Jehová te ya xjuʼ ya spasike. Jich la yalik ta jamal: «Ya jpascotic spisil te bin yaloj te Jehová» (Éxodo 19:8). Jaʼukmeto, ta patil jaʼiknix la staik ta nopel te maba ya spasikix te bin jamal yaloj ya spasike. Ay bin ya yakʼ jnoptik te bin la spasike. ¿Bin-a? Jaʼ te ya skʼan te spisiluk-ora ayuk skʼoplal ta koʼtantik te bitʼil libre ayotik ta stael ta nopel te bin ya jpastike, te nopol ya kakʼ jbatik ta stojol te Jehová sok te ya jchʼuunbeytik te mantaliletik yuʼune (1 Corintios 10:11).

10. ¿Machʼatik ya yalbey skʼoplal te kapitulo 11 yuʼun te Hebreos te ya yakʼ ta ilel te manchuk jmulawilotik ya xjuʼ ya jtuuntestik ta yichʼel ta mukʼ te Jehová te bitʼil libre ayotik ta stsael te bin ya jpastike? (Ilawil te lokʼomba ta sjajchibal te articulo).

¹⁰ Te kapitulo 11 yuʼun te Hebreos ya yalbey sbiil waklajuneb ta tul winiketik sok antsetik te jun yoʼtan la yakʼ sbaik te la yichʼik ta mukʼ te bitʼil yaloj Jehová te ay bintik maba ya xjuʼ ya spasike. Ta skaj te lek te bin la staik ta nopel spasele, la yichʼik bayal bendisionetik sok ay bin lek yakik ta smaliyel ta pajel chaʼbej. Jich bitʼil te Noé la yakʼ ta ilel te tulan te schʼuunel yoʼtan sok la sta ta nopel te ya schʼuun te mantaliletik yuʼun Dios ta swenta te bin-utʼil ya yichʼ pasel te arkae sok bin-utʼil ya sta skolel te sfamilia sok te stsʼumbal ta patile (Hebreos 11:7). Te Abraham sok te Sara la schʼuunbeyik skʼop te Dios ta spisil yoʼtanik, jaʼnix jich bajtʼik ta kʼinal te albil ya x-akʼbotik yuʼun te Diose. Manchukme ta patil «huʼ yuʼunic te suhtic bahel» ta lum Ur te jichuke, jaʼ bajtʼ ta yoʼtanik te bintik jamal yaloj te Dios te ya x-akʼbotik ta patile. Te Biblia ya yal te la spasik tulan swenta ya «yahnuytayic te bin lec xan» (Hebreos 11:8, 9, 13, 15, 16). Te Moisés la spʼaj te kʼulejalil ta lum Egipto, «ha lec xan la yaʼiy a te pajal ya xcʼax swocol soc te pueblo yuʼun Dios te bin utʼil ya smulan te yacʼoltayel mulil te jcʼaxel nax ay» (Hebreos 11:24-26). Jtʼunbeytik schʼuunel yoʼtanik te j-abatetik yuʼun Dios-abi sok kakʼtik ta ilel te bayal skʼoplal kuʼuntik te bitʼil libre ayotik ta stsael te bin ya jpastik te ya jtuuntestik ta spasbeyel skʼanojel yoʼtan te Diose.

11. 1) ¿Bin-a te kʼax mukʼ skʼoplal ya xjuʼ ya jpastik teme ya jnaʼtik stuuntesel te bitʼil libre ayotik ta stsael te bin ya jpastike? 2) ¿Bin ya stij koʼtantik ta stuuntesel ta lek te bitʼil libre ayotik ta stsael te bin ya jpastike?

¹¹ Jichniwan te jaʼ kʼun ya kaʼiytik teme ay machʼa ya yalbotik te bin ya skʼan ya jpastike. Jaʼukmeto teme jich ya jpastike, ayme bin kʼax mukʼ skʼoplal ya xchʼay kuʼuntik. ¿Bin-a? Te Biblia ya yalbotik ta sjun Deuteronomio 30:19, 20 (kʼopona). Te versiculo 19 ya yal te ay bintik la yakʼ te Dios ta stojol te israeletik te ya xjuʼ ya stsaike. Te versiculo 20 ya yal ta swenta te bin ya staik ta nopel spasel ya yakʼik ta ilel jich yipal kʼux ta yoʼtanik te Jehovae. Jaʼnix jich te joʼotike ya xjuʼ ya jtatik ta nopel teme ya jkʼantik te ya kichʼtik ta mukʼ te Jehovae. Teme jich ya jtatik ta nopel spasele, jichme ya jtuuntestik te bitʼil libre ayotik ta yichʼel ta mukʼ te Jehová sok jich ya kakʼtik ta ilel jich yipal kʼux ta koʼtanike.

MAME CHOPOLUK YA JTUUNTESTIK TE BITʼIL LIBRE AYOTIK TA STSAEL TE BIN YA JPASTIKE

12. ¿Bin-a te maba ya jkʼan ya jpastik te bitʼil libre ayotik ta stsael te bin ya jpastike?

¹² Jnop kaʼiytik te ya kakʼbeytik jun majtʼanil te bayal skʼoplal jtul kamigotike. ¿Bin yaʼiyel ya kaʼiytik teme ya schʼoj bael ta kʼaʼpal o te bin tulanxan teme ya stuuntes ta yutsʼinel te yantike? ¿Mabal jichuk te kʼux ya kaʼiytike? Jich bitʼil jaʼ la yakʼbotik Jehová te bitʼil libre ayotike, ya xkʼot ta koʼtantik te kʼux ya yaʼiy kʼalal ya yil bitʼil te ants winiketik ya stuuntesik te majtʼanil-abi ta stael ta nopel te bintik maba lek sok ta yutsʼinel te yantike. Te Biblia ya yal ta swenta te «slajibal cʼahcʼal» te maba ya snaʼik yalel wokol te ants winiketike (2 Timoteo 3:1, 2). Jaʼukmeto, te joʼotike maba ya jkʼantik te jich ya jtuuntestik te bitʼil libre ayotike, maba ya jkʼantik te ma jnaʼtik yalel wokole. Jich yuʼun, ¿bin-utʼil ya xjuʼ ya kakʼtik ta ilel te ya kaltik wokol bitʼil te Jehová libre ayotik yuʼune? ¿Sok bin-utʼil ya xjuʼ te leknax ya jtuuntestik te majtʼanil yakʼojbotike?

13. ¿Bin-utʼil ya xjuʼ ya jtuuntestik ta lek te bitʼil libre ayotik ta stael ta nopel te bin jkʼan ya jpastik jich bitʼil j-abatotik yuʼun te Diose?

¹³ Jpisiltik ay ta jwentatik stael ta nopel machʼa ya kamigointik, bin kʼuʼul pakʼal ya jtuuntestik, bin yilel ya jchajpan jbatik sok bin-utʼil ya jmulantik skʼasesel kʼajkʼal-ae. Jaʼukmeto, ya skʼan ya jtsajtay jbatik swenta maba ya jtuuntestik te bitʼil libre ayotik te ya jmak jbatik ta stael ta nopel te bin maba lek ya yil te Dios o ta spasel te bin ya spas te ants winiketik ta balumilale (kʼopona te 1 Pedro 2:16). Mame jtuuntestik te bitʼil libre ayotik ta spasel te bin maba leke, ayuk ta koʼtantik te ya xjuʼ ya jtuuntestik ta spasel «spisil ta scuenta yichʼel ta mucʼ te Diose» (1 Corintios 10:31; Gálatas 5:13).

14. ¿Bin yuʼun ya skʼan ya smukʼulin koʼtantik te Jehová kʼalal ya jtuuntestik te bitʼil libre ayotik ta stsael te bin ya jpastike?

¹⁴ Te Jehová jich ya yalbotik: «Hoʼon Jehovahon, te Dioson awuʼun, te ya caʼbat anop te bin lec ya xcʼohat yuʼun, te ya jtojobtesat ta be te banti ya scʼan yac atʼun bahele» (Isaías 48:17). Teme ya smukʼulin koʼtantik te Jehovae, yame kichʼtik ta mukʼ te bantito kʼalal yaloj te ya xjuʼ ya jpastik sok lek te bin ya jtatik ta nopel te ya jpastike. Sok spekʼelil koʼtantik ya kaltik te bitʼil «te ants-winic ma haʼuc scuentahinej te be yuʼune, ma haʼuc yuʼun te ya yal banti ya xbehen» (Jeremías 10:23). Ni jaʼuk te Adán ni jaʼuk te israeletik te maba jun yoʼtan la yakʼ sbaik maba la yichʼik ta mukʼ te bantito kʼalal yaloj Jehová te ya xjuʼ ya spasike. Jaʼ la staik ta nopel te jaʼiknix ya smukʼulin sba yoʼtanik ta swenta te bin snopojike. Mame jtʼuntik te bin la spasike. Kakʼ smukʼul koʼtantik ta stojol Jehová sok spisil koʼtantik, mame joʼotiknix ya jmukʼulin jbatik (Proverbios 3:5).

YA SKʼAN YA KICHʼTIK TA MUKʼ TE BITʼIL LIBRE AYIK TE YANTIKE

15. ¿Bin ya snojptesotik te bin smelelil ya xtojobteswan te ay ta Gálatas 6:5?

¹⁵ Jaʼnix jich ya skʼan ya kichʼtik ta mukʼ te bitʼil libre ayik te yantik ta stael ta nopel te bin ya spasike. ¿Bin yuʼun? Melel jpisiltik libre ayotik ta stael ta nopel te bin ya jkʼan ya jpastike. Jaʼ yuʼun, stalel te ay maba pajal te bintik ya staik ta nopel ya spasik te yantik j-abatetik yuʼun Dios bitʼil te joʼotike. Jich ya xjuʼ ya xkʼot ta pasel ta swenta te talelil sok te yichʼel ta mukʼ te Diose. Juluk ta koʼtantik te bin smelelil ya xtojobteswan te ay ta sjun Gálatas 6:5 (kʼopona). Te bin smelelil te ya xtojobteswan-abi ya yakʼ jnoptik te jujuntul ay ta jwentatik te bin ya xlokʼ kuʼuntik ta swenta te bin ya jtatik ta nopel spasele. Teme jich ya xkʼot ta koʼtantik, yame kichʼtik ta mukʼ te bitʼil ay ta swenta te yantik stael ta nopel te bin ya skʼan ya spasike.

16, 17. 1) ¿Bin yuʼun kʼot ta tulan kʼop te bitʼil libre ayik ta stsael te bin ya spasik te jchʼuunjeletik yuʼun te Corinto? 2) ¿Bin-utʼil la skoltay te Pablo te jchʼuunjeletik-abi? 3) ¿Bin ya jnoptik yuʼun?

¹⁶ Kiltik jun ejemplo ta Biblia te ya yakʼ kiltik bin yuʼun ya skʼan ya kichʼtik ta mukʼ te bitʼil libre ayik ta stael ta nopel te bin ya spasik te kermanotaktike. Te jchʼuunjeletik ta lum Corinto maba la yakʼ sbaik ta akuerdo teme ya xjuʼ o maba ya xjuʼ ta weʼel te tiʼbal te ya yichʼ akʼel ta stojol te lokʼombaetik te ya yichʼ chonel ta patil ta merkado. Ay chaʼoxtulik te maʼyuk bin ya x-albot yoʼtanik yuʼun teme ya sweʼike, melel snaʼojik te manix kuxulik-a te lokʼombaetik. Jaʼukmeto te machʼatik ay la yichʼik ta mukʼ lokʼombaetik te kʼalal mato ochemik ta jchʼuunjel-ae la skuyik te pajal sok yichʼel ta mukʼ te lokʼombaetike teme ya sweʼik te tiʼbale (1 Corintios 8:4, 7). Te bin ya snopik ta stojol-abi kʼot ta tulan kʼop yuʼunik, te juʼ la xat te kongregasione. ¿Bin la spas te Pablo swenta ya skoltay te hermanoetik ta schajpanel te kʼope?

¹⁷ Ta sbabial, te Pablo la sjultesbey ta yoʼtan te jchʼuunjeletik yuʼun Corinto bitʼil te weʼel uchʼel ma xkoltayotik ta yamigoinelxan ta lek te Diose (1 Corintios 8:8). Ta patil, te Pablo la sjultesbey ta yoʼtanik te manchukme libre ayik ta stael ta nopel te bin ya spasike, ya skʼan ya stsajtay sbaik te manchuk ya yutsʼinbeyik te bin ya x-albot yoʼtanik te yantik te maba tulan te schʼuunel yoʼtanike (1 Corintios 8:9). Patil la yalbey te machʼatik oranax ay bin ya x-albot yoʼtanik yuʼun te ma skʼan ya yichʼik ta kʼop te machʼatik ya sweʼik te tiʼbale (1 Corintios 10:25, 29, 30). Jich bitʼil ya kiltike, te kʼop jajchem-ae tulan skʼoplal melel snitojbey sba skʼoplal sok te yichʼel ta mukʼ te Diose, sok jujuntul jchʼuunjel ya skʼan ya sta ta nopel te bin ya skʼan ya spase. Jaʼnix jich te joʼotik ya kichʼtik ta mukʼ te bitʼil libre ayik te kermanotaktik ta stael ta nopel te bin ya spasik manchukme maba mukʼ skʼoplal ya kiltik te bin ya staik ta nopele (1 Corintios 10:32, 33).

18. ¿Bin-utʼil ya kakʼtik ta ilel te ay bayal skʼoplal ta koʼtantik te bitʼil libre yakʼojotik te Dios ta stael ta nopel te bin ya jpastike?

¹⁸ Te bitʼil libre ayotik ta stael ta nopel te bin ya jpastike jaʼ jun majtʼanil yakʼojbotik te Dios te ya skoltayotik yuʼun ya jmulantik te bitʼil libre ya x-ayinotik ta smelelil (2 Corintios 3:17). Bayal skʼoplal ta koʼtantik te majtʼanil-abi, melel ya yakʼ te ya kakʼtik ta ilel bantito kʼalal kʼux ta koʼtantik te Jehová ta swenta te bin ya jtatik ta nopele. Akʼame jtatik ta nopel te bin ya yakʼ ta ichʼel ta mukʼ te Dios sok kichʼtik ta mukʼ te bitʼil libre ayik te yantik ta stael ta nopel te bin ya spasike. Jich ya kakʼtik ta ilel te ay bayal skʼoplal ta koʼtantik te majtʼanil yakʼojbotik te Diose.