Kakʼbey jba smukʼul koʼtantik ta tsoblejetik

1. ¿Bin yuʼun ya kakʼ jcomentariotik ta tsoblejetik?

¿BIN YUʼUN ya xbootik ta tsoblejetik? Yuʼun ya kalbeytik yutsil skʼoplal te Jehová (Sal. 26:12; 111:1). Ta tsoblejetik jaʼnix jich talel kʼaxel ya kakʼbey jba smukʼul koʼtantik ta yorail te tulan wokoliletik (1 Tes. 5:11). Jaʼme te cheb te bin ya xjuʼ ya jpastik te kʼalal ya kakʼ jcomentariotike.

2. ¿Banti ya xjuʼ ya kakʼ jcomentariotik ta tsoblejetik?

² Ta jujun semana ya xjuʼ ya kakʼ bayal jcomentariotik. Jich bitʼil ta slajibal semana ya xjuʼ ya kakʼ jcomentariotik te kʼalal ya jnoptik Te J-ilkʼinal ta toyol. Ta yolil semana ya xjuʼ ya jtoy jkʼabtik te kʼalal ya yichʼ kʼasesel te «Bintik mukʼ skʼoplal ta Biblia», jaʼnix jich te kʼalal ya yichʼ Snopel te skʼop Dios ta congregación sok te yantikxan te banti ya xjuʼ ya kakʼ jcomentariotik.

3. 1) ¿Bin ya xjuʼ ya smakotik ta yakʼel te jcomentariotik? 2) ¿Bin-utʼil ya skoltayotik te Hebreos 10:24, 25?

³ Jpisiltik ya jkʼan ya kalbeytik yutsil skʼoplal te Jehová sok te ya kakʼbeytik smukʼul yoʼtan te kermanotaktik ta swenta te jcomentariotik. Pero ay bintik te ya xjuʼ ya smakotik, te ya xiwotik te jich ma xjuʼ ya kakʼix te jcomentariotik o te ya jtoy te jkʼabtik bayal buelta pero maba ya kichʼtik akʼbeyel. Te carta la stsʼibay te jpuk-kʼop Pablo ta stojol te hebreoetik, ya xjuʼ ya jtatik koltayel tey-a. Te kʼalal la yal te mukʼ skʼoplal te tsoblejetik, te Pablo la yal te jaʼ ya skʼan ya xbajt ta koʼtantik ini: «Te talel kʼaxel ya kakʼbey jba smukʼul koʼtantik» (Kʼopona Hebreos 10:24, 25). Maba ya xiwotik ta yakʼel te jcomentariotik teme ay ta koʼtantik te ya kakʼbeytik smukʼul yoʼtan te yantik manchukme komnax te jcomentariotik, pero ya yakʼ ta ilel te schʼuunel koʼtantike. Manchukme maba ya kichʼtik akʼbeyel te jcomentariotik, tseʼel koʼtantik yuʼun te ay machʼa yan ya yichʼ akʼbeyele (1 Ped. 3:8).

4. ¿Bin oxchajp ya xbajt kilbeytik skʼoplal ta artículo ini?

⁴ Ta artículo ini, ya xbajt kiltik bin-utʼil talel kʼaxel ya kakʼbey jba smukʼul koʼtantik ta jun congregación te banti maʼyuk bayal hermanoetik, sok te ya xjuʼ ya kakʼ bayal jcomentariotik. Ta patil ya kiltik bin-utʼil ya jpastik ta jun mukʼul congregación, te banti bayal hermanoetik ya skʼan ya yakʼ scomentarioik. Ta slajibal, ya xbajt kilbeytik skʼoplal te bin-utʼil ya skʼan ya kakʼ te jcomentariotik yuʼun ya yakʼbey smukʼul yoʼtan te yantike.

KAKʼBEY JBATIK SMUKʼUL KOʼTANTIK TA CONGREGACIÓN TE BANTI MAʼYUK BAYAL HERMANOETIK

5. ¿Bin ya xjuʼ ya jpastik teme ma bayalotik ta tsoblej?

⁵ Ta jun grupo o ta jun congregación te banti maʼyuk bayal hermanoetik, maʼyuk bayal machʼa ya yakʼ te scomentario. Jaʼ yuʼun te hermano te yak ta skʼasesel yaniwan smaliy yuʼun ay machʼa ya stoy te skʼab yuʼun ya yakʼ te scomentarioe. Jaʼ-abi ya yakʼ te ya xjalaj te tsoblej, sok ma xyakʼ mukʼul oʼtanil. ¿Bin ya xjuʼ ya jpastik te kʼalal jich ya xkʼot ta pasel? Akʼa kakʼ bayal jcomentariotik, yuʼun jich ya xtijbot yoʼtan te yantik te jichuk ya spasik-euke.

6, 7. ¿Bin ya xjuʼ ya apas yuʼun maba ya xiwat?

⁶ Bayal hermanoetik ya xiwik ta yakʼel scomentarioik. Teme jich ya awaʼiy aba-euke, ¿bin ya xjuʼ ya apas? ¿Yabal xjuʼ ya ale koltayel yuʼun jich ma xiwat-a sok te jich ya awakʼbey smukʼul yoʼtan yantik ta swenta te acomentarioe?

⁷ Ya xjuʼ ya skoltayat te bin ya yal Te J-ilkʼinal ta toyol.b Tey ya yal-a te ya skʼan ya jchajpan jbatik ta lek (Prov. 21:5). Te kʼalal anaʼojix ta lek-a te bin ya yale, maba wokol ya awaʼiy te ya awakʼ te acomentario. Yanxan te bin ya xjuʼ ya skoltayat, jaʼ te komuknaxe (Prov. 15:23; 17:27). Teme komnaxe, maba ya xiwat, melel jich oranax ya xkʼot ta yoʼtan te hermanoetik. Teme komnax sok lokʼem ta awoʼtan te bin ya awale, te yantik ya yilik te la achajpan aba ta lek sok te la awichʼbey swentail te bin yak ta nopele.

8. ¿Bin yaʼiyel ya yaʼiy sba te Jehová kʼalal ya yil te ya jpastik tulane?

⁸ ¿Bin ya xjuʼ ya apas teme maba chʼay ta xiwel manchukme la kilbeytikix skʼoplal te bin ya xjuʼ ya apase? Naʼame te Jehová bayal skʼoplal ya yil te kʼalal ya apas tulane (Luc. 21:1-4). Pero te Jehová maba ya stenat ta spasel te bin ma xjuʼ awuʼune (Filip. 4:5). Jaʼ yuʼun pasa te ban kʼalal ya xjuʼ awuʼun sok kʼanbeya te Jehová te ya yakʼbat slamalil awoʼtan. Ta nail te bin ya xjuʼ ya apase, jaʼ te komnax ya awakʼ te acomentario.

KAKʼBEY JBATIK SMUKʼUL KOʼTANTIK TA CONGREGACIÓN TE BANTI AY BAYAL HERMANOETIK

9. ¿Bintik ya xjuʼ ya xkʼot ta pasel ta jun mukʼul congregación?

⁹ Teme bayal publicadoretik ta acongregacion maniwan ya ataix acomentario, melel bayal hermanoetik te ya skʼan ya yakʼik-euke. Jnoptik ta swenta te Danielle, te jaʼ jtul hermana te bayal ya smulan yakʼel scomentario.c Ya yal te jich ya yichʼ ta mukʼ te Jehová, te ya yakʼbey smukʼul yoʼtan te yantik, sok te jich ya xjil ta sjol te bin ya yal te Biblia. Pero, te kʼalal bajt ta jun congregación te mukʼxane, maʼyukix bayal ya x-akʼbot scomentario o ma x-akʼbotix. Jich ya yal: «Ma lek ya kaʼiy jba. Jich la kaʼiy te chʼay jun jprivilegio. Kʼalal bayal buelta ma xa awichʼ akʼbeyel acomentario, ya xjajch anop te spasemal yoʼtan te jich ya spas te hermanoe».

10. ¿Bin ya xjuʼ ya apas yuʼun ya awakʼxan acomentario?

¹⁰ ¿Aybal jich awaʼiyoj aba bitʼil te Danielle? Teme aye, ayniwan anopoj te maba ya atoyix akʼab sok te jaʼnax ya awaʼiye. Pero, mame xchebaj awoʼtan. ¿Bin ya xjuʼ ya apas yuʼun ya awakʼxan acomentario? Ya skʼan te ma junuknax ya achajpan. Jich teme maba ya awakʼ acomentario ta jun párrafo, ya xjuʼ ya awakʼ ta yantik. Kʼalal ya achajpan aba sok Te J-ilkʼinal ta toyol, nopa bin-utʼil stsakoj sba te parrafoetik sok te tema yuʼun te artículo. Jichme ya xjuʼ ya awakʼ bayal acomentario. Te binxan ya xjuʼ ya apase, jaʼ te ya achajpan aba sok te textoetik te tulan ta cholbeyel skʼoplale (1 Cor. 2:10). Te bitʼil tulanik ta cholbeyel skʼoplal, maʼyuk machʼa bayal ya yakʼ scomentario. Pero ¿bin ya xjuʼ apas teme wokol ya awaʼiy yakʼel acomentario, manchukme la kiltikix te bin ya skʼan pasel? Te kʼalal mato xjajch-a te tsoblej kʼopona te hermano te machʼa ya skʼases Te J-ilkʼinal ta toyol sok albeya te banti ya akʼan ya awakʼ acomentario.

11. Jich te bin-utʼil la yal Filipenses 2:4, ¿bin ya xjuʼ ya jpastik?

¹¹ (Kʼopona Filipenses 2:4). Te Dios la yakʼbey ta yoʼtan te jpuk-kʼop Pablo yuʼun ya stijbey yoʼtan te jchʼuunjeletik ta slebeyel yutsil slekil te yantike. ¿Bin-utʼil ya xjuʼ ya jpastik ta tsoblejetik? Jaʼ te kʼalal ya xjul ta koʼtantik te jaʼnix jich ya skʼan ya spasik comentar-euk te yantike.

12. ¿Bin ya xjuʼ ya jpastik yuʼun ya yakʼ scomentarioik te hermanoetik? (Jaʼnix jich ilawil te foto).

¹² Kaltik jun ejemplo te ya skoltayotik yuʼun ya xkʼot ta koʼtantik. Te kʼalal ya xkʼopojat sok jtul awamigo, melel te ma jaʼukatnax spisil-ora ya xkʼopojat, jaʼnix jich ya awakʼ te ya xkʼopoj-euk. Jichnix ya xkʼot ta pasel ta tsoblejetik. Ya jkʼantik te spisiluk te hermanoetik ya yakʼ scomentarioik. Jun te bin-utʼil ya kakʼbeytik smukʼul yoʼtanik te kermanotaktik, jaʼ te ya kakʼtik te yakuk yalik te bin schʼuunojike (1 Cor. 10:24). Kiltik bin ya xjuʼ ya jpastik yuʼun yakuk yakʼ scomentarioik te hermanoetik.

13. ¿Bin ya xjuʼ ya jpastik yuʼun ya yakʼ scomentarioik-euk te hermanoetik?

¹³ Te komuknax te jcomentariotik. Jichme ya xjuʼ ya yakʼ scomentarioik-euk te kermanotaktik. Te ancianoetik sok yantik Testigoetik te bayalix jaʼbil ayik ta congregación ya xjuʼ ya yakʼik lekil ejemplo. Ya skʼan te komuknax te jcomentariotik, melel teme ya kaltik spisil te bin ya yal te párrafo, maʼyukix bin ya xjuʼ ya yalik-a te yantik. Ta párrafo ini ay cheb te bin ya skʼan ya jpastik: te komuknax te jcomentariotik sok te maba ya kaltik spisil te bin ya yal te párrafo. Teme jaʼat la awichʼ akʼbeyel te comentario ta párrafo ini, ¿yabal xjuʼ te jun-nax ya awal te bin ya skʼan pasele?

14. ¿Bin ya skʼan ya kichʼtik ta wenta te jayeb buelta ya jtoy jkʼabtik? (Jaʼnix jich ilawil te foto).

¹⁴ Nopa jayebnax buelta ya awakʼ te acomentario, melel teme spisil-ora ya atoy te akʼabe, te hermano te machʼa ya skʼases tenbilwan ya yaʼiy sba yuʼun ya yakʼbat acomentario manchukme ma yakʼoj te yantike. Sok ayniwan hermanoetik te ya xjuʼ ya snopik te tojolnax ya yakʼ scomentarioike (Ecl. 3:7).

15. 1) ¿Bin yaʼiyel ya skʼan ya kaʼiy jbatik kʼalal ma xkichʼtik akʼbeyel jcomentariotik? 2) ¿Bin ya skʼan ya yichʼ ta wenta te hermano te ya spas te jojkʼoyeletike? (Ilawil te recuadro «Te bin-utʼil ta kʼasesel te sección te yichʼoj jojkʼoyeletik»).

¹⁵ Kʼalal bayal hermanoetik ya yakʼ scomentarioik, maniwan xjuʼ te jpisiltik ya kakʼtik. Ayniwan ya xlaj te tsoblej sok maʼyuk ya kakʼtik junuk comentario. Yaniwan jmel koʼtantik yuʼun, pero ma skʼan ya x-ilinotik (Ecl. 7:9).

16. ¿Bin ya xjuʼ ya jpastik yuʼun ya kakʼbeytik smukʼul yoʼtan te machʼatik la yakʼ scomentarioik?

¹⁶ Manchukme ma juʼ te bayal la awakʼ te acomentario, ya xjuʼ ya achʼam awaʼiy te scomentario te yantik sok ya awutsilkʼoptay te kʼalal ya xlaj te tsoblej. Te bin la yalik ta comentario ya xjuʼ ya yakʼbey smukʼul yoʼtan te hermanoetik (Prov. 10:21). Kʼalal ya kutsilkʼoptaytik te yantik, jaʼnix jich ya kakʼbeytik smukʼul yoʼtanik.

TE BIN-UTʼIL YA KAKʼTIKXAN MUKʼUL OʼTANIL

17. 1) ¿Bin ya xjuʼ ya spasik te meʼil tatiletik? 2) Jich bitʼil la yal te video, ¿bin chanchajp ya skʼan pasel yuʼun ya yichʼ chajpanel jun comentario? (Jaʼnix jich ilawil te nota).

¹⁷ ¿Bin ya xjuʼ ya jpastikxan yuʼun talel kʼaxel ya kakʼbey jba smukʼul koʼtantik ta tsoblejetik? Teme ay alaletik awuʼun, koltayaik ta schajpanel te scomentarioik (Mat. 21:16). Ta tsoblejetik, ay ya yichʼ nopbeyel skʼoplal ta swenta te nujpunel o yantikxan te tulanik skʼoplale. Manchukme jich-abi, ayniwan jun o cheb parrafoetik te banti ya xjuʼ ya yakʼ scomentarioik te alaletike. Jaʼnix jich ya xjuʼ ya akoltayik te awal anichʼnabik ta yichʼbeyel swentail bin yuʼun te ay ma x-akʼbotik scomentarioik. Teme jich ya awalbeyik, jich maba ya smel yoʼtanik kʼalal ma x-akʼbotik te scomentario (1 Tim. 6:18).d

18. ¿Bin ma skʼan ya jpastik kʼalal ya kakʼ jcomentariotik? (Proverbios 27:2).

¹⁸ Jpisiltik ya xjuʼ ya jchajpantik ta lek te jcomentariotik te ya yalbey yutsil skʼoplal te Jehová sok te ya yakʼbey smukʼul yoʼtan te hermanoetik (Prov. 25:11). Manchukme ya xjuʼ ya kaltik te bin kʼaxem ta jkuxlejaltik, ma skʼan te bayal ya kalbey jba jkʼoplaltik (Kʼopona Proverbios 27:2; 2 Cor. 10:18). Jaʼ ya skʼan ya xbajt ta koʼtantik te Jehová, te sKʼop sok te lum yuʼune (Apoc. 4:11). Pero, teme te jojkʼoyel yuʼun te párrafo ya yal te ya skʼan ya kaltik te bin kʼaxem ta jkuxlejaltik, lek teme ya kaltike. Ta yan párrafo ya kiltik jun ejemplo.

19. 1) ¿Bin lek ya xlokʼ-a teme ya kichʼtik ta wenta te yantik ta tsoblejetike? (Romanos 1:11, 12). 2) ¿Bin yuʼun ya amulan yakʼel acomentario ta tsoblejetik?

¹⁹ Manchukme maʼyuk ban ya yal bin-utʼil ya skʼan ya kakʼ jcomentariotik ta tsoblejetik, jpisiltik ya skʼan ya jpastik tulan yuʼun ya yakʼ smukʼul oʼtanil te bin ya kaltike. Ay hermanoetik te ya spasikxan tulan ta yakʼel scomentarioik, sok ay hermanoetik te leknax ya yaʼiy sbaik yuʼun te bayal ya yakʼ scomentarioik, pero ya x-akʼbot stseʼelil yoʼtan te kʼalal ay machʼa yan ya yakʼ scomentario. Teme ya kichʼtik ta wenta te yantik ta tsoblejetik, jpisiltik ya jmulantik te talel kʼaxel ya kakʼbey jba smukʼul koʼtantik (Kʼopona Romanos 1:11, 12).