Akʼa schʼuun koʼtantik te ya xkʼot ta pasel te achʼ balumilal

1, 2. Te bitʼil yakotik ta smaliyel te achʼ balumilal, ¿bin ya skʼan ya jpastik?

YA KALBEYTIK bayal wokol te Jehová te nopol ya xbajt slajinix te chopol balumilal ini (2 Ped. 3:13). Manchukme ma jnaʼtik te bin-ora ya xkʼot ta pasel te achʼ balumilal, spisil te bin yak ta kʼoel ta pasel ta ora ini ya yakʼ ta ilel te nopolix te jich ya xkʼot ta pasele (Mat. 24:32-34, 36; Hech. 1:7).

² Manchukme bayalix jaʼbil te ochemotik ta testigo yuʼun Jehová, jpisiltik ya skʼan te ya stsakxan yip te schʼuunel koʼtantik. ¿Bin yuʼun? Melel ya xjuʼ ya xpejkʼaj te schʼuunel koʼtantike. Te jpuk-kʼop Pablo la yal teme maʼyuk lek te schʼuunel koʼtantike, jaʼme «te mulil te oranax ya sbechʼotik» (Heb. 12:1). Teme maba ya jkʼantik te ya xpejkʼaj te schʼuunel koʼtantik, ya skʼan ya kilbeytik skʼoplal te bin yuʼun ya jchʼuuntik te nopolix ya spas te achʼ balumilal te Jehová (Heb. 11:1).

3. ¿Bin ya kilbeytik skʼoplal ta artículo ini?

³ Ta artículo ini ya kiltik oxchajp skʼoplal te bin ya skoltayotik yuʼun ya smukʼulinxan koʼtantik te Jehová ya spas te achʼ balumilal: 1) snopilanel ta koʼtantik te stojol kolel, 2) snopel ta swenta te yuʼel te Jehová sok 3) te jaʼuk ya xbajt ta koʼtantik spasbeyel yaʼtel te Jehová. Jaʼnix jich ya kiltik bin-utʼil ya stsakxan yip te schʼuunel koʼtantik ta swenta te bin albot te Habacuc yuʼun te Jehová. Pero ta nail ya kiltik bin yuʼun ya schʼuun koʼtantik te ya yichʼ pasel te achʼ balumilal.

YA SKʼAN TE AYUK YIP TE SCHʼUUNEL KOʼTANTIK

4. ¿Bin-utʼil ya kakʼtik ta ilel te ay yip te schʼuunel koʼtantike?

⁴ Jujun kʼajkʼal ay bin ya jtatik ta nopel spasel te ya yakʼ ta ilel teme ay schʼuunel koʼtantik. Jich bitʼil te kʼalal ya jtsatik te machʼatik ya kamigointik, te bin ya jkʼasestik kʼajkʼal-ae, te nop jun, te nujpunel, te alnichʼanetik sok te aʼtel. Ya xjuʼ te jich ya jojkʼoybey jbatik: «¿Bin ya kakʼ ta ilel ta swenta te bin ya jpase? ¿Yabal kakʼ ta ilel te nopol ya yichʼix lajinel te chopol balumilal ini? O ¿jichbal jtalel bitʼil te ants winiketik te maʼyuk bin yakik ta smaliyele?» (Mat. 6:19, 20; Luc. 12:16-21). Teme ya schʼuun koʼtantik te nopolix te achʼ balumilal, jaʼ ya skoltayotik yuʼun lek te bin ya jtatik ta nopel spasel ta ora ini.

5, 6. 1) ¿Bin yuʼun ya skʼan te ayuk yip te schʼuunel koʼtantik te kʼalal ya xkʼax jwokoltik? Ala junuk ejemplo.

⁵ Jaʼnix jich ay bintikxan ya xkʼax ta jkuxlejaltik te ya skʼan te ayuk yip schʼuunel koʼtantik, jich bitʼil te kontrainel, te chamel te maʼyuk spoxil o yantikxan te ya yakʼ xkʼax jwokoltik. Ta sjajchibale yaniwan xkujch kuʼuntik. Pero, te kʼalal ya xjalajxan baele, yaniwan skʼan te ayukxan yip te schʼuunel koʼtantik yuʼun ya xkujch kuʼuntik sok te ya x-abatinotik ta stojol te Jehová sok stseʼelil koʼtantik (Rom. 12:12; 1 Ped. 1:6, 7).

⁶ Te kʼalal yakotik ta kʼaxel ta tulan wokolil, yaniwan xjuʼ ya jnoptik te maʼyuk bin-ora ya xkʼot ta pasel te achʼ balumilal. ¿Yuʼunbal maʼyuk yip te schʼuunel koʼtantik te jich ya jnoptike? Maniwan jichuk. Kaltik jun ejemplo, te kʼalal yak ta kʼaxel tulan sik yaniwan jnoptik te ma xkʼot yorail te skʼuxul kʼajkʼal. Pero yananix xkʼot-a te yorail skʼuxul kʼajkʼale. Jaʼ pajal sok te kʼalal chebajem koʼtantik, yaniwan jnoptik te maʼyuk bin-ora ya xkʼot yorail te achʼ balumilal. Teme yichʼoj yip te schʼuunel koʼtantik, ya jnaʼtik te yananix kʼot ta pasel-a te bin yaloj te Jehová (Sal. 94:3, 14, 15; Heb. 6:17-19). Te smukʼul koʼtantik jaʼ ya skoltayotik yuʼun jaʼ nail ya jpas ta jkuxlejaltik te bin ya skʼan te Jehová.

7. ¿Bin talelil ya skʼan ya jpʼajtik?

⁷ Jaʼnix jich ya skʼan te ayuk schʼuunel koʼtantik te kʼalal ya jcholtik skʼop Dios. Kʼalal ya kalbeytik skʼoplal te nopol ya spas te achʼ balumilal te Diose, bayal ants winiketik tʼujbilnax ya yaʼiyik, pero ma schʼuunik te yananix xkʼot ta pasel-a (Mat. 24:14; Ezeq. 33:32). Pero ma skʼan te jichuknix jtaleltik bitʼil te ants winiketik te maʼyuk schʼuunel yoʼtanik. Jaʼ yuʼun mukʼ skʼoplal te ya kakʼbeytik tsak yip te schʼuunel koʼtantik. Kiltik oxchajp te bin ya skʼan ya jpastik.

SNOPILANEL TA KOʼTANTIK TE STOJOL KOLEL

8, 9. ¿Bin-utʼil ya stsakxan yip te schʼuunel koʼtantik te kʼalal ya jnopilantik ta koʼtantik te stojol kolel?

⁸ Jun te bin-utʼil ya stsak yip te schʼuunel koʼtantik, jaʼ te ya jnopilan ta koʼtantik te stojol kolel. Jaʼ ya yakʼ jnaʼtik te ya skʼotes ta pasel te bin ya yal te Dios. Mukʼ skʼoplal te ya jlokʼestik tiempo ta snopilanel ta koʼtantik te bin smakbeyoj skʼoplal te stojol kolel sok te bin yuʼun la yakʼ te Jehová. Teme jich ya jpastike, ya schʼuunxan koʼtantik te ya spas te achʼ balumilal te Jehová sok tey ya xkuxinotik ta sbajtelkʼinal. ¿Bin yuʼun te jich ya kaltike?

⁹ Jnop kaʼiytik bin smakbeyoj skʼoplal te stojol kolel. Te Jehová la yakʼ talel ta balumilal te jip jtul sNichʼan te kʼux ta yoʼtan, te lekil amigo yuʼun, swenta ya x-ayin liʼ ta Balumilal bitʼil jtul tojil winik. Te kʼalal xtaluk ta balumilal te Jesús, bayal kʼax swokol sok la yichʼ milel. Te Jehová te ay skʼuxul yoʼtane bayal bin kʼax ta stojol. Maniwan la skʼan te yakuk xkʼax swokol te sNichʼan yuʼun-nax ya yakʼbotik lekil kuxlejalil te oranax ya xlaje (Juan 3:16; 1 Ped. 1:18, 19). Te bitʼil bayal bin kʼax ta stojol te Jehová, ya xbajt yakʼbotik jkuxlejaltik ta sbajtelkʼinal ta achʼ balumilal.

SNOPEL TA SWENTA TE YUʼEL TE JEHOVÁ

10. Jich bitʼil ya yal Efesios 3:20, ¿bin ya xjuʼ ya spas te Jehová?

¹⁰ Yanxan te bin ya yakʼ stsak yip te schʼuunel koʼtantik, jaʼ te ya jnopilan ta koʼtantik te yuʼel te Jehová. Ay yuʼel yuʼun ya skʼotes ta pasel spisil te bin ya yal. Manchukme te ants winiketik ma schʼuunik te ya xjuʼ ya xkuxinotik ta sbajtelkʼinal. Pero te Jehová bayal bin ya sjapbotik te manix ya xjuʼ kuʼuntik spasel-a, melel jaʼnix-a te Machʼa spisil ya xjuʼ yuʼun (Job 42:2; Mar. 10:27). ¿Mabal snujpʼuk te bayal bin ya sjapbotik? (Kʼopona Efesios 3:20).

11. Albeya skʼoplal cheʼoxebuk te bin la skʼotes ta pasel te Jehová (ilawil te recuadro «Te bintik la skʼotes ta pasel te Jehová»).

¹¹ Jnop kaʼiytik te bin la yal te Jehová te ya spas ta stojol te j-abatetik yuʼun te jich yilel te ma xjuʼ ta pasele. Te Abrahán sok te Sara la yichʼik albeyel te ya x-ayin jtul yal snichʼnabik manchukme ayix yaʼbilalik (Gén. 17:15-17). Jaʼnix jich la yichʼ albeyel te Abrahán te ya yichʼik te skʼinal Canaán te stsʼumbale. Pero te stsʼumbal te Abrahán te jaʼik te israeletik, bayal jaʼbil la yichʼik mosoinel ta Egipto, jaʼniwan yuʼun la snopik te maʼyuk bin-ora ya xkʼot ta pasel te bin la yal te Jehová. Manchukme jich-abi, kʼotnanix ta pasel-a. Te kʼalal kʼaxemix bayal jaʼbil-a, te Jehová la yalbey te Elisabet te ayix yaʼbilal, te ya x-ayin jtul skerem-al. Jaʼnix jich la yalbey te María te ya yayintes te sNichʼan te Diose. Jich ya xkʼot ta pasel te bin la yal te Jehová ta tsʼunbil kʼinal Edén (Gén. 3:15). Spisil te bin la yal te Jehová la skʼotes ta pasel.

12. ¿Bin ya yalbotik te Josué 23:14 sok te Isaías 55:10, 11 ta swenta te yuʼel te Jehová?

¹² Te kʼalal ya jnoptik ta spisil te bin la sjap te Jehová sok te la skʼotes ta pasel, tey ya kiltik-a te kʼax bayal yuʼel. Jaʼme ya yakʼbey yip te schʼuunel koʼtantik sok te ya spas te achʼ balumilal (kʼopona Josué 23:14; Isaías 55:10, 11). Teme jich ya jpastike, chapalotikxan ta skoltayel te yantik yuʼun ya xkʼot ta yoʼtanik te yanix xkʼot ta pasel-a te achʼ balumilal, melel te Jehová jich la yal: «Te kʼopetik ini […] ya schʼuun koʼtantik sok jaʼ smelelil» (Apoc. 21:1, 5).

JAʼUK YA XBAJT TA KOʼTANTIK SPASBEYEL YAʼTEL TE JEHOVÁ

13. ¿Bin-utʼil ya yakʼ stsakxan yip te schʼuunel koʼtantik te tsoblejetik?

¹³ Te yoxebal te bin ya yakʼ te ya stsakxan yip te schʼuunel koʼtantik, jaʼ te ya xbajt ta koʼtantik spasbeyel yaʼtel te Dios. Jich bitʼil te kʼalal ya xbootik ta tsoblejetik. Te Anna,b te bayalix jaʼbil yak ta abatinel ta tiempo completo, jich ya yal: «Te tsoblejetik jich kʼoem bitʼil jun ancla te ma xyakʼ ya xpejkʼaj te schʼuunel koʼtan. Manchukme ma mero snaʼ ta lek jnojpteswanej te machʼa ya yakʼ te discurso o maʼyuk bin yachʼil ya yal, spisilnanix-ora ya skoltayon ta yichʼbeyel swentail te bin ya yal te Biblia, sok ya yakʼ yichʼxan yip te schʼuunel koʼtan». Ta tsoblejetik jaʼnix jich ya kaʼiytik comentarioetik te ya yakʼ stsakxan yip te schʼuunel koʼtantik (Rom. 1:11, 12; 10:17).

14. ¿Bin-utʼil ya yakʼ stsakxan yip schʼuunel koʼtantik te scholel skʼop Dios?

¹⁴ Jaʼnix jich ya stsakxan yip te schʼuunel koʼtantik kʼalal ya jcholtik skʼop Dios (Heb. 10:23). Te Barbara te kʼaxemix ta 70 jaʼbil ochem ta Testigo, jich ya yal: «Te scholel skʼop Dios yakʼbeyojxan yip te schʼuunel koʼtan. Soknix te kʼalal ya kalbey skʼoplal ta swenta te Jehová sok te bintik ya spastiklan ta pajel chaʼbej».

15. ¿Bin-utʼil ya yakʼ stsakxan yip te schʼuunel koʼtantik te kʼalal ya jnoptik te Biblia? (Jaʼnix jich ilawil te fotoetike).

¹⁵ Te bin ya yakʼ stsakxan yip te schʼuunel koʼtantik, jaʼ te snopel te Biblia. Te Susan bayal ya xkoltayot te ay yorail yuʼun te bintik ya snop, jich ya yal: «Ta jujun domingo ya jnop te J-ilkʼinal ta toyol te ya yichʼ ilel ta yan semana. Ta lunes sok ta martes ya jnop te bin ya yichʼ ilel ta olil semana, sok te yantik kʼajkʼal ya jnop yanyantik temaetik». Te bitʼil ay jun horario yuʼun te Susan, ya xkoltayot yuʼun ya stsakxan yip te schʼuunel yoʼtan. Te Irene te ayix bayal jaʼbil te ay ta central mundial, stsakojxan yip te schʼuunel yoʼtan kʼalal ya snop ta swenta te albilkʼopetik ay ta Biblia. Jich ya yal: «Chamnax koʼtan yuʼun te ya xkʼot ta pasel spisil te albilkʼopetike».c

«YA ME XCʼOHT TA PASEL»

16. ¿Bin yuʼun ya jnaʼtik te ma jaʼuknax ay ta swenta te Habacuc te bin la yichʼ albeyel yuʼun te Jehová? (Hebreos 10:36, 37).

¹⁶ Bayalix tal jaʼbil te j-abatetik yuʼun Jehová yakik ta smaliyel te ya yichʼ lajinel te chopol balumilal ini, pero jich yilel te ma xkʼot ta pasele. Te Jehová ya xkʼot ta yoʼtan te bin yaʼiyel ya yaʼiy sbaik te j-abatetik yuʼune, jaʼ yuʼun jich albot te Habacuc: «Ma to xcʼoht ta pasel te nahalsitil, ya xcʼoht ta pasel ta mero yorahil, ma ba ya spas lot. Aunque ya xhalaj, mahliya, yuʼun ya me xcʼoht ta pasel, ma ba ya xhalaj» (Hab. 2:3). ¿Jaʼnaxbal ay ta swenta te Habacuc o yabal yakʼ smukʼul koʼtantik ta ora ini? Te Jehová la yakʼbey ta yoʼtan te jpuk-kʼop Pablo te texto-abi, yuʼun ya yakʼbey snaʼ te jchʼuunjeletik te machʼatik yakik ta smaliyel te achʼ balumilal (kʼopona Hebreos 10:36, 37). Manchukme jich ya kaʼiytik te yak ta jalajel te Jehová, julukme ta koʼtantik te «ya me xcʼoht ta pasel, ma ba ya xhalaj».

17. ¿Bin-utʼil koltayot jtul hermana te bin albot te Habacuc yuʼun te Jehová?

¹⁷ Bayal jchʼuunjeletik yakʼoj ta yoʼtanik te la yal te Jehová te ya skʼan te ma xlujbik, manchukme ya xkʼax bayal jaʼbil. Kiltik te bin kʼax ta stojol jtul hermana te Louise sbiil, te jach ta abatinel ta stojol te Jehová ta 1939, jich ya yal: «La jkuy te ma jtaix 18 kaʼbilal, melel la jkuy te jaʼ nail ya xtal te Armagedón. Pero ma jichuk kʼot ta pasel. Te bin la skoltayone, jaʼ te la jkʼopon te bin kʼax ta skuxlejalik te Noé, Abrahán, José sok yantik j-abatetik yuʼun Dios te bayal tiempo la smaliyik yuʼun ya yichʼik te bin albotik ta jaʼmal yuʼun te Diose. Te bitʼil ma la jkom jba, la skoltayon sok koltayot yantik yuʼun manchuk ya xchʼay ta yoʼtanik te nopolix ya xtal te achʼ balumilal». Jichniwan ya snopik-euk te machʼatik ayix bayal jaʼbil yakik ta spasbeyel skʼanojel yoʼtan te Jehovae.

18. ¿Bin-utʼil ya skoltayotik te bintik pastiklanbil yuʼun ya schʼuun koʼtantik te ya xkʼot ta pasel te achʼ balumilale?

¹⁸ Mato ya kiltik te achʼ balumilal, pero ay bintik-a te ya xjuʼ ya kiltik, jich bitʼil te ekʼetik, te teʼetik, te chambalametik sok te ants winiketik. Manchukme maʼyukik ta namey, pero ta ora ini ma xjuʼ ya kaltik te maʼyuke. Ya xjuʼ ta ilel, melel jaʼ spasoj te Jehová (Gén. 1:1, 26, 27). Jaʼ yuʼun, te Dios kuʼuntik yaloj ta jamal te ya xbajt spas jun achʼ balumilal, sok ya skʼotes ta pasel te bin yaloje. Yame xkuxinotik ta sbajtelkʼinal sok ma stsakotikix chamel. Te kʼalal ya xkʼot ta pasel te bin yaloj te Jehová, yame kiltik te achʼ balumilal (Is. 65:17; Apoc. 21:3, 4).

19. ¿Bin-utʼil ya xjuʼ ya stsakxan yip te schʼuunel koʼtantik?

¹⁹ Te bitʼil mato ayukotik ta achʼ balumilal, akʼa stsakxan yip te schʼuunel koʼtantik. Akʼa jnopilan ta koʼtantik te bitʼil la yakʼ sba ta lajel te Jesús, te yuʼel te Jehová sok jaʼ akʼa bajtuk ta koʼtantik spasbeyel yaʼtel te Diose. Teme jich ya jpastike, teyme ochem jkʼoplaltik-a «te machʼatik ta swenta schʼuunel yoʼtanik sok slamalil yoʼtanik ya yichʼik te bintik jamal yaloj te Diose» (Heb. 6:11, 12; Rom. 5:5).