¿Bin sbiil te Diose?

Kʼalal ay machʼa ya jkʼan ya jnaʼbeytik sbae, jaʼniwan nail ya jojkʼoybeytik te bin sbiile. Te yakuk xjuʼ ya jojkʼoybeytik bin sbiil te Diose, ¿binwan ya sutbotik?

«¡Hoʼon Jehovahon, ha me te jbihile!» (Isaías 42:8).

¿Aybal awaʼiyoj te biilil-abi? Maniwan ayuk. Jaʼniwan yuʼun te maʼyuk bayal la stuuntesik te machʼatik la skʼasesik ta yan kʼopil te Bibliae o ma la stuuntesik ta jkʼaxel. Jteb ma spisiluk la sjeltayik ta KAJWAL. Pero te sbiil te Diose kʼaxem ta 7 mil buelta ya xchiknaj ta namey kʼopiletik te la yichʼ tsʼibayel te Biblia. Te sbiil te Diose akʼbil señail ta chaneb letraetik yuʼun hebreo, jaʼ te YHWH o JHVH, bayalix jaʼbil yichʼoj kʼasesel ta español jich bitʼil «Jehová».

Te sbiil te Dios ya xchiknaj ta kʼopil hebreo sok ta yantikxan kʼopil te la yichʼ kʼasesel te Biblia.

¿BIN YUʼUN MUKʼ SKʼOPLAL SBIIL TE DIOSE?

Mukʼ skʼoplal ya yil te Diose. Maʼyuk machʼa la slebey sbiil te Diose, jaʼnix la sle te sbiile. Te Jehová jich la yal: «Jaʼme jich jbiil ta sbajtelkʼinal sok jaʼme jich ya kichʼ naʼbeyel jba ta kajalkaj tsʼumbaliletik» (Éxodo 3:15). Te sbiil te Diose kʼaxemtoxan jich ya xchiknaj ta Biblia te bitʼil: Spisil ya xjuʼ yuʼun, jTatik, Kajwal o Dios, soknix te biililetik jich bitʼil, Abrahán, Moisés, David o Jesús. Te bin ya skʼan te Jehová jaʼ te yakuk jnaʼbeytik te sbiile. Te Biblia jich ya yal: «Acʼa snaʼic te ha Jehová te abihile, te haʼat atuquel te Machʼa toyol ayat ta stojol spahmal te qʼuinale» (Salmo 83:18).

Mukʼ skʼoplal ya yil te Jesuse. Ta oración te ya yichʼ naʼbeyel sba bitʼil Padrenuestro, te Jesús la snojptes te jnopojeletik yuʼun te jichuk ya skʼoponik te Diose: «Akʼa yichʼ chʼultesel te abiile» (Mateo 6:9). Te Jesuse jich la skʼopon te Diose: «Jtat, akʼa ta ichʼel ta mukʼ te abiile» (Juan 12:28). Te Jesuse bayal skʼoplal ta yoʼtan te ya yichʼ ichʼel ta mukʼ sbiil te Diose. Jaʼ yuʼun jich la yal: «La kakʼbeyix snaʼik te abiile sok yame kakʼxan ta naʼel» (Juan 17:26).

Mukʼ skʼoplal ya yilik te machʼatik ya snaʼbeyik sba te Diose. Te j-abatetik yuʼun Dios ta namey snaʼojik-a te ya yichʼik kanantayel sok koltayel ta swenta sbiil te Diose. Ay jtul te jich la yal: «Ha toyol tsʼahc te sbihil te Jehová; tey ya xʼahnimaj bahel a te machʼa toj yoʼtan soc hich ya xcol». Ay yan te jich la yal: «Spisil te machʼatic ya scʼopon Jehová ta scuenta sbihil ya me xcolic» (Proverbios 18:10; Joel 2:32). Te Biblia ya yal te ya yichʼik naʼbeyel sba te j-abatetik yuʼun Dios ta swenta te sbiile. «Spisil te pueblohetic ya xbehenic ta scuenta sbihilic te dios yuʼunic, te hoʼotic ya xbehenotic ta scuenta sbihil Jehová te Dios cuʼuntic sbahtel qʼuinal» (Miqueas 4:5; Hechos 15:14).

TE BIN YA YAKʼ JNAʼTIK TE SBIILE

Jaʼnax stukel jich ya yichʼ naʼbeyel sba te Diose. Te machʼatik ya snopbeyik skʼoplal ta lek te Biblia staojik ta ilel te biilil te Jehová te ya skʼan ya yal: «Jaʼ te Machʼa ya spas te bin ya skʼan yoʼtane». Kʼalal jaʼnix la yalbey sba skʼoplal te Jehová te kʼalal kʼopoj sok te Moisés ya skoltayotik ta snaʼel te bin ya skʼan ya yal te sbiile. Jich la yal: «JOʼON JICH YA XKʼOON TE BITʼIL YA SKʼAN KOʼTANE» (Éxodo 3:14). Te sbiile ya yakʼ jnoptik te jaʼ Jpaswanej te jaʼ la yakʼ chiknajuk spisil te bintik aye. Jaʼnix jich ya yakʼ ta naʼel te ya xjuʼ ya skʼotes ta pasel spisil te bin ya skʼan yoʼtan o ya xjuʼ ya stuuntes te bintik spasoj yuʼun ya skʼotes ta pasel te skʼanojel yoʼtane. Manchukme ay yantik te bin-utʼil ya yichʼ naʼbeyel sba te Dios jaʼnax jich ya yichʼ albeyel ta swenta te yaʼtel o yuʼel, pero te sbiil te jaʼ Jehová, ya yakʼ ta naʼel te machʼanix-ae sok te ya skʼotes ta pasel spisil te bin ya skʼane.

Ya yakʼ ta ilel te ay jkʼoplaltik ta yoʼtan te Diose. Te sbiil te Diose ya yakʼ ta naʼel te kʼux ta yoʼtan spisil te bintik spasoje, soknix-euk te joʼotike. Te bitʼil la yakʼ jnaʼtik te sbiile ya yakʼ kiltik te ya skʼan te ya jnaʼbeytik sbae. Ta melel, jaʼ nail la yalbotik te bin sbiil te kʼalal mato ayuk machʼa ya sjojkʼoybey sba-a te bin sbiil te Diose. Te Diose ma skʼan te ya jnoptik te ma xjuʼ ta naʼbeyel sba o te namal ay ta jtojoltik, ya skʼan ya yakʼ jnaʼtik te yuʼun-nix ay-ae sok te ya xjuʼ ya xnoptsajotik ta stojol (Salmo 73:28).

Kʼalal ya jtuuntesbeytik te sbiile, ya kakʼtik ta ilel te ya jkʼantik ya jnaʼbeytik sbae. Nopa awaʼiy te ay machʼa ya skʼan ya yamigoinat sok te ya awalbey te yakuk yalbat te abiile. ¿Bin yaʼiyel ya awaʼiy aba teme ma skʼan ya yalbat te abiile? Yaniwan xjajch anop te manix yuʼunuk ya skʼan-a te ya yamigoinate. Jichnix ta stojol-euk te Jehovae. La yalbotikix te sbiile sok ya skʼan te ya jtuuntesbeytik. Kʼalal jich ya jpastik, ya kakʼtik ta ilel te ya jkʼantik te ya xnoptsajotik ta stojol. Te Biblia ya yal te ya snaʼ stukel te Dios te machʼa ya x-ichʼbot ta mukʼ yuʼun te sbiile (Malaquías 3:16).

Mukʼ skʼoplal te ya jnaʼbeytik sbiil te Dios swenta jich ya xjajch jnaʼbeytik sba-a. Pero ma tikʼuk-a te jaʼnax ya jnaʼbeytik te sbiile. Ya skʼan ya jnaʼtik te bin yuʼun te jich sbiile sok te bin yilel stalel.