-
¿Bin ya skoltayat yuʼun maba ya akom aba ta snopel te Biblia?¡Mulana te akuxlejal ta sbajtelkʼinal! Te Biblia ya yalbat bin-utʼil
-
-
LECCIÓN 12
¿Bin ya skoltayat yuʼun maba ya akom aba ta snopel te Biblia?
Bayal ya skoltayotik te ya jnoptik te Bibliae, pero ay ma kʼunuk ta pasel. Ayniwan ya sta yorail te ya akʼan ya akejchan snopel te Bibliae. ¿Bin yuʼun ma skʼan ya awijkitay snopel te Biblia? ¿Bin ya xjuʼ ya apas yuʼun maba ya awijkitay manchukme ay kontrainel?
1. ¿Bin yuʼun ma skʼan ya awijkitay snopel te Bibliae?
«Cuxul te scʼop Dios soc ay yuʼel ya xʼaʼtej» (Hebreos 4:12). Te Biblia kʼax mukʼ skʼoplal, melel tey ya yal-a te bin ya snop te Dios soknix ya yal te kʼuxat ta yoʼtane. Ma jaʼuknax te ay bin ya yakʼbat anop te Bibliae, jaʼnix jich ya skoltayat yuʼun lekuk te bin ya ata ta nopel spasel sok te ayuk bin lek ya amaliy ta pajel chaʼbej. Pero te bin mukʼxan skʼoplale jaʼ te ya skoltayat yuʼun ya awamigoin aba sok te Jehová. Te kʼalal ya anop te Bibliae, ya skoltayat yuʼun tseʼeluk awoʼtan.
2. ¿Bin yuʼun ya skʼan te mukʼ skʼoplal ta awoʼtan te bin ya anop ta Bibliae?
Te bintik ya jnoptik ta Biblia jich kʼoem bitʼil kʼulejalil. Jaʼnix te Biblia te jich ya yalbotik: «Mana te bin smelelil, ma me xachon» (Proverbios 23:23). Teme jich ya kiltik bitʼil kʼulejalil te bin ya jnoptik ta Bibliae, ya jpastik tulan yuʼun ma jkom jbatik ta snopel manchukme ay bin ya smakotik (kʼopona Proverbios 2:4, 5).
3. ¿Bin-utʼil ya skoltayat te Jehová swenta maba ya akom aba?
Te Jehová ya snaʼbat aba ta lek, melel jaʼ Jpaswanej awuʼun sok jaʼ awamigo, jaʼ yuʼun ya skʼan ya skoltayat yuʼun ya anaʼbeyxan sba ta lek. Yame xjuʼ ya stijbat awoʼtan sok ya xjuʼ ya yakʼbat awip ta spasel te bin ya skʼanbate (kʼopona Filipenses 2:13). Jaʼ yuʼun teme jich ya awaʼiy te ma xyikʼbat awoʼtan snopel te Biblia o teme wokol ya awaʼiy spasel ta akuxlejal te bin ya anope, jaʼme ya skoltayat te Jehová. Sok teme jich ya awaʼiy te maʼyuk awip ta sitintayel te makel o te kontrainel, jaʼme ya yakʼbat awip. Mame xa akom aba ta skʼanbeyel koltayel te Jehová yuʼun ya anopxan te Bibliae (1 Tesalonicenses 5:17).
JNOPTIKXAN TA LEK
Kiltik bin ya xjuʼ ya apas yuʼun ya anopxan te Biblia manchukme ay machʼa ya skʼan ya skomat o maʼyuk lek atiempo. Jaʼnix jich ya kiltik bin-utʼil ya skoltayat te Jehová yuʼun maba ya akom aba.
4. Mukʼuk skʼoplal ta awoʼtan snopel te Bibliae
Ay baeltik te bayal bin ya smakotik te maʼyukix jtiempotik ta snopel te Bibliae. ¿Bin ya jpastikix-a? Kʼoponaik Efesios 5:16 sok albeyaik skʼoplal ini:
¿Bintik-a te mukʼ skʼoplal te ya skʼan ya atuuntes-a te atiempoe?
¿Bin ya xjuʼ ya apas yuʼun mukʼ skʼoplal ta awoʼtan snopel te Biblia ta spisil-ora?
Teme nail ya anojes ta jiʼ jun cubeta, maba ya x-ochix-a te tonetike.
Pero teme jaʼ nail ya awotses te tonetike, jteb ma spisil ya x-ochix-a te jiʼe. Jaʼnix jich, teme jaʼ nail ya apas te bintik mukʼ skʼoplale, yatome xjil atiempo yuʼun ay bintikxan ya apas.
Te skʼoponel te Biblia ya skoltayotik ta snaʼbeyel sba te Dios sok te ya kichʼtik ta mukʼe. Kʼoponaik Mateo 4:4 sok albeyaik skʼoplal ini:
¿Bin lekilal ya jtatik teme mukʼ skʼoplal ta koʼtantik snopel te Bibliae?
5. Mame xa akom aba manchukme ay kontrainel
Ayniwan machʼatik ya skʼan ya skomat yuʼun ya awijkitay snopel te Bibliae. Ilawil te bin kʼax ta stojol te Francesco. Ilawilik te VIDEO sok albeyaik skʼoplal ini:
¿Bin xchi yuʼun te sfamilia sok te yamigotak te Francesco te kʼalal la yaltiklanbey te yak ta snopel te Bibliae?
¿Bin lek lokʼ yuʼun te ma la skom sbae?
Kʼoponaik 2 Timoteo 2:24, 25 sok albeyaik skʼoplal ini:
¿Bin xchi yuʼun te afamilia sok te awamigotak te bitʼil yakat ta snopel te Bibliae?
Jich bitʼil la jkʼopontikix ta textoe, ¿bin ya skʼan ya apas teme ay machʼa ma smulan te ya anop te Bibliae? ¿Bin yuʼun te jich ya awale?
6. Naʼame te ya skoltayat te Jehová
Te kʼalal kʼux ya kaʼiytikxan ta koʼtantik te Diose, ya jkʼan ya kakʼbeytikxan stseʼelil yoʼtan. Manchukme jich-abi, ayniwan wokol ya kaʼiytik spasel te bin lek ya yile. Teme ay jich ya awaʼiy abae mame xchebaj awoʼtan, yame skoltayat te Jehová. Ilawilik te VIDEO sok albeyaik skʼoplal ini:
¿Bintik la yijkitay spasel te Jim yuʼun ya spas te bin lek ya yil te Jehovae?
¿Bin-a te yan-nax la spas te Jim?
Kʼoponaik Hebreos 11:6 sok albeyaik skʼoplal ini:
¿Bin ya spas te Jehová ta stojol te machʼatik ya spasik tulan yuʼun ya snaʼbeyik sba sok te ya spasik te bin leke?
¿Binwan-utʼil ya yaʼiy sba te Jehová te kʼalal ya yil te yakat ta spasel tulan ta snopel te Bibliae?
AY MACHʼATIK JICH YA SJOJKʼOYIK: «¿Bin ya xlokʼ awuʼun-a te ya anop te Bibliae?».
¿Bin ya asutbey?
¿BINTIK LA JNOPTIK?
Ayniwan ma kʼunuk ta pasel, pero teme ya anop te Biblia, jaʼme ya skoltayat ta smulanel te akuxlejal ta sbajtelkʼinal. Teme ya akʼanbey koltayel te Jehová, yame skoltayat.
¿Jilbal ta awoʼtan into?
¿Bin yuʼun mukʼ skʼoplal ta awoʼtan te bin ya anop ta Bibliae?
Te kʼalal la awilix bintik-a te mukʼxan skʼoplale, ¿bin-utʼil ya atuuntes te atiempoe?
¿Bin yuʼun ya skʼan ya akʼanbey koltayel te Jehová yuʼun maba ya awijkitay snopel te Bibliae?
YA XJUʼ YA ANOPXAN INI
Ilawil bin spasojik chaʼoxtul ants winiketik yuʼun ya stuuntesik ta lek te stiempoik.
«¿Bin-utʼil ta tuuntesel ta lek te tiempoe?» (¡Wikʼame asit!, febrero 2014)
Jtul ants ya skʼan ya yakʼbey stseʼelil yoʼtan-a te Diose, pero te smamalal ma xkʼot ta yoʼtan-a te bin yuʼun te jich ya spase. Ilawil bin-utʼil koltayot yuʼun te Jehová.
Te Jehová ya yakʼ yip koʼtantik yuʼun ya xkujch kuʼuntik te jwokoltike (5:05)
Ilawil bin-utʼil jtul ants la skoltay te smamalal ta skaj te maba la skom sba ta snopel te Biblia.
Ay ya yalik te ya xatiklan familiaetik te Testigoetike, pero ¿melelbal-abi?
-
-
Jnoptik ta lek te bin ya jpastik¡Mulana te akuxlejal ta sbajtelkʼinal! Te Biblia ya yalbat bin-utʼil
-
-
LECCIÓN 35
Jnoptik ta lek te bin ya jpastik
Jpisiltik ay bintik ya jtatik ta nopel spasel. Ayniwan lek o ma lek ya xlokʼ sok ay ya xjuʼ ya yutsʼin jkuxlejaltik o te bitʼil jun koʼtantik sok te Jehová. Jich bitʼil, yaniwan skʼan ya jnoptik banti ya xnainotik, bin-utʼil ya jta jtakʼintik sok teme ya xnujpunotik o maʼuk. Teme lek te bin ya jtatik ta nopel, tseʼel koʼtantik sok tseʼel yoʼtan-euk te Jehová.
1. ¿Bin-utʼil ya skoltayat te Biblia yuʼun ya anop ta lek te bin ya apase?
Kʼalal ay bin ya anop spasel, kʼanbeya koltayel te Jehová. Sok lea ta Biblia te bin ya snop te Dios ta swenta te bin anopoj spasele (kʼopona Proverbios 2:3-6). Te Jehová aynix banti jamal ya yalbotik te bin ya skʼan o ma skʼan pasele. Jich yuʼun, jaʼ lek te ya jchʼuuntike.
¿Jaxan teme maba jamal ya yal te Biblia te bin ya skʼan ya jpastike? Manchukme jich, te Jehová ya stojobtesat «ta be te banti ya scʼan yac atʼun bahele» (Isaías 48:17). ¿Bin-utʼil ya spas? Ta swenta te textoetik te ya stojobtesat. Te textoetik-abi ya yakʼ jnaʼtik te bin ya snop sok te bin ya smulan te Jehová. Ya jtatik ta ilel te kʼalal ya jkʼopontik ta Biblia te bin kʼax ta skuxlejalik te j-abatetik yuʼun Dios ta namey. Kʼalal ya xkʼot ta koʼtantik te bin ya snop te Jehová, lek te bin ya jtatik ta nopel spasele.
2. ¿Bin nail ya skʼan ya anop te kʼalal ay bin ya apase?
Te Biblia ya yal te «machʼa pʼij yoʼtan ya stsahtay te banti ya xbehene» (Proverbios 14:15). Jaʼ-abi ya skʼan ya yal te nail ya skʼan ya jnoptik bin-a te lekxan ta pasele. Te kʼalal ya anop te bintik ya apase, jojkʼoybeya aba: «¿Bin ya yal te Biblia ta swenta ini? ¿Lekbal ya kaʼiy jba teme ya jpase? ¿Mabal yakuk kakʼbey sta swokol te yantike? Te bin mukʼxan skʼoplal, ¿yabal kakʼbey stseʼelil yoʼtan te Jehovae?» (Deuteronomio 32:29).
Te Dios jaʼ ay ta swenta yalel te bin lek sok te bin ma lekuk ta pasele. Teme ya jnaʼtik ta lek te mantaliletik sok te tojobteseletik te ayik ta Biblia sok teme ya jchʼuuntik spasele, jich ya jpʼijubtestik te bin ya yalbotik te koʼtantik. Te bin ya xkʼopoj ta koʼtantik jaʼ ya yal te bin lek o ma lek ta pasel (Romanos 2:14, 15). Kʼalal pʼijuben te koʼtantike ya skoltayotik ta stael ta nopel ta lek te bin ya jpastike.
JNOPTIKXAN TA LEK
¿Bin-utʼil ya skoltayotik te tojobteseletik te ayik ta Biblia sok te bin ya yal te koʼtantik kʼalal ay bin ya jnoptik spasele?
3. Akʼa aba ta tojobtesel yuʼun te Biblia
Kʼalal ay bin ya jtatik ta snopel spasel, ¿bin-utʼil ya stojobtesotik te bin ya yal te Biblia? Ilawilik te VIDEO sok albeyaik skʼoplal ini:
¿Bin majtanil yakʼojbotik te Jehová?
¿Bin yuʼun te Jehová ya yakʼ te jujuntul ya jnoptik te bin ya jpastike?
¿Bin la yakʼbotik te Jehová yuʼun ya jtatik ta nopel ta lek te bin ya jpastike?
Kiltik jun tojobtesel te ay ta Biblia, kʼoponaik Efesios 5:15, 16. Ta patil albeyaik skʼoplal te bin-utʼil ta tuuntesel «ta lec te tiempo» swenta...
... ya akʼopon te Biblia ta jujun kʼajkʼal.
... lekil inamil o mamalalil ya xkʼoat, lekil meʼil tatil o alnichʼanil.
... ya xbaat ta tsoblejetik ta congregación.
4. Pʼijubtesa awoʼtan swenta lek te bin ya anop spasele
Kʼalal te Biblia jamal ya yal te bin ya skʼan pasele ma wokol ta tael ta nopel te bin lek ta pasele. ¿Jaxan teme ma xyal ta jamale? Ilawilik te VIDEO sok albeyaik skʼoplal ini:
¿Bin la spas te hermana yuʼun ya spʼijubtes te yoʼtan sok yuʼun jaʼ ya spas te bin ya smulan te Jehovae?
¿Bin yuʼun ma skʼan ya jkʼanbeytik te yantik te jaʼuk ya yalbotik te bin ya jpastike? Kʼoponaik Hebreos 5:14 sok albeyaik skʼoplal ini:
Maba wokol te ya jkʼanbeytik yantik te ya yalbotik te bin ya jpastike, pero ¿bin yuʼun te jaʼ lek te joʼotiknix ya jtatik ta nopel te bin leke?
¿Bintik ya xjuʼ ya skoltayotik yuʼun ya jpʼijubtestik te koʼtantik yuʼun jich lek te bin ya jpastike?
Te bin ya yal koʼtantike pajal sok jun mapa, ya skoltayotik ta yilel bin beil ya skʼan ya jtsaktik ta jkuxlejaltik.
5. Ichʼa ta wenta te bin ya yal yoʼtan te yantike
Yanyantik-a te bintik ya jtatik ta nopel spasele, melel maba pajalotik. ¿Bin-utʼil ya kakʼtik ta ilel te ya kichʼtik ta mukʼ te bin ya x-albot yoʼtan te yantike? Kiltik cheb ejemplo.
Ejemplo 1: Jtul hermana te ya smulan te ya sbon sbae ya xkʼax ta yan congregación banti bayal hermanaetik ma mero lek ya yaʼiy sbaik yuʼun te ya sbon sbaik te yantike.
Kʼoponaik Romanos 15:1 sok 1 Corintios 10:23, 24, sok albeyaik skʼoplal ini:
Ta swenta te bin ya yal te textoetike, ¿bin ya skʼan ya spas te hermanae? Jaxan te jaʼate, ¿bin ya apas teme ay bin lek ta pasel ya awil, pero ma lek te bin ya x-albot yoʼtan yuʼun te yantike?
Ejemplo 2: Jtul hermano ya snaʼ te maba ya yal te Biblia te jkʼaxel ma xjuʼ ta uchʼel jtebuk te tragoe; pero ya sta ta nopel te ma xyuchʼ ni jtebuke. Pero ta jun buelta te ya x-ikʼot ta kʼin, ya yil te ay hermanoetik te yakik ta yuchʼel jtebuk trago.
Kʼoponaik Eclesiastés 7:16 sok Romanos 14:1, 10, sok albeyaik skʼoplal ini:
Ta swenta te bin ya yal te textoetike, ¿bin ya skʼan ya spas te hermanoe? Jaxan te jaʼate, ¿bin ya apas teme ya awil te ay machʼa ya spas te bin ma lek ya yalbat awoʼtan yuʼune?
¿Bintik ya skʼan ya apas yuʼun lek te bin ya ata ta nopele?
1. Kʼanbeya te Jehová te yakuk skoltayat ta snopel ta lek te bin ya apase (Santiago 1:5).
2. Lea ta Biblia sok ta publicacionetik textoetik te ya stojobtesat ta stael ta nopel te bin ya apase. Jaʼnix jich ya xjuʼ ya akʼanbey koltayel te hermanoetik te tulanix schʼuunel yoʼtanik.
3. Nopa awaʼiy bin-utʼil ya xjuʼ ya yutsʼinbat awoʼtan sok ya yutsʼinbey yoʼtan te yantike.
AY MACHʼATIK JICH YA YALIK: «Pasa te bin ya skʼan awoʼtan. ¡Maʼyuk skʼoplal te bin ya yalik te yantike!».
¿Bin yuʼun ya skʼan ya kichʼtik ta wenta te bin ya snop te Dios sok te yantike?
¿BINTIK LA JNOPTIK?
Lek te bin ya jtatik ta nopel spasel teme ya kichʼtik ta wenta te bin ya snop te Jehová sok teme maba ya kutsʼinbeytik yoʼtan te yantike.
¿Jilbal ta awoʼtan into?
¿Bin ya skoltayat yuʼun jaʼ ya apas te bin lek ya yil te Jehová?
¿Bin ya skʼan ya apas yuʼun ya apʼijubtes te awoʼtane?
¿Bin-utʼil ya xjuʼ ya awakʼ ta ilel te ya awichʼ ta wenta te bin ya x-albot yoʼtan te yantike?
YA XJUʼ YA ANOPXAN INI
Kʼalal lek te bin ya ata ta nopel spasele nopolxan ya x-ayinat ta stojol te Jehová, ilawil bin-utʼil ya xjuʼ ya apas.
«Jaʼuk ya jpastik te bin ya smulan te Diose» (Te J-ilkʼinal ta toyol, 15 yuʼun abril 2011)
Ilawil bin-utʼil ya yakʼbotik tojobtesel te Jehová.
Ilawil bin koltayot jtul winik ta stael ta nopel spasel te bin leke.
Ilawil bin-utʼil ya xjuʼ ya kakʼbeytik stseʼelil yoʼtan te Jehová kʼalal ay bin ya jtatik ta nopel spasel manchukme maba jamal ya yalbotik ta Biblia te bin ya skʼan pasele.
-