5 ¿Bin-ora sok banti ya skʼan ya jpastik?

BAYAL religionetik ta swolol Balumilal sleojbeyik slugaril sok yorail te ya spasik oración. ¿Bin ya yal te Biblia ta swenta-abi?

Te Biblia aynix ya yal bin-ora ta kʼoponel te Diose. Jich bitʼil, te Jesús te la yalbey wokol te Dios te kʼalal och ta weʼel (Lucas 22:17). Jaʼnix jich te jnopojeletik yuʼun te Jesús ya spasik oración-a te kʼalal ya stsob sbaik ta yichʼel ta mukʼ te Diose. Pero, ma yachʼiluk te jich ya spasike. Aynanix ya yichʼ pasel ta sinagogaetik-a sok ta templo ta Jerusalén, te Dios jaʼ ya skʼan-a te jich ya xkʼot bitʼil na yuʼun spasel oración (Marcos 11:17).

Te Dios ya smulan te ya stsob sbaik te j-abatetik yuʼune sok te jun-nax ya spasik oración jich bitʼil ya yal te Bibliae. Te oración ya skoltayat ta spasel te bin ma xjuʼ awuʼun spasel ta atukele (Hebreos 13:18, 19). Jaʼ yuʼun, te testigoetik yuʼun Jehová ya spasik oración te kʼalal ya stsob sbaike. Teme ya akʼan ya awaʼiy te oración ya spasike, ya xjuʼ ya xbaat ta tsoblej yuʼun te Testigoetik ta sNail Tsoblej te nopol ya xjil awuʼune.

Pero, te Biblia maba ya yal te puersa ya skʼan ya jlebeytik yorail o jun lugar te banti ya jpastik te oración. Te j-abatetik yuʼun Dios ta nameye la spasik oración chikan jayeb ora-a sok chikan banti ayik-a. Te Jesús jich la yal: «Cʼalal yac acʼopon Dios, ochan ta yutil ana, maca te tiʼnahil soc cʼopona te Atat te ma chicanuc ta ilele. Te Atat te ya yil te bin muquen yac apas, ya yaʼbat amahtan ta comonsitil» (Mateo 6:6).

Kʼax jelawen yutsil te bitʼil ya xjuʼ ya jkʼopontik te machʼa kʼax mukʼ yaʼtel ta chʼulchan sok ta Balumilal te ya yaʼiy te jkʼoptik chikan bin-ora sok chikan banti ayotike. Jaʼ yuʼun te Jesús la sle te ayuk bin-ora stukel ya xjil swenta ya skʼopon te sTate. Ta jun buelta, sjunal ajkʼabal la skʼopon te Dios yuʼun ay bin mukʼ skʼoplal la sta ta nopel spasel (Lucas 6:12, 13).

Jaʼnix jich ay j-abatetik yuʼun Dios te la spasik oración te kʼalal ay bin mukʼ skʼoplal la staik ta nopel spasel o te kʼalal ay swokolik-ae. Chikan teme ta tulan la spasik te oración o ta yoʼtaniknax, teme la stsob sbaik o ta stukelik, te bin mukʼ skʼoplal jaʼ te la skʼoponik te Diose. Te Jehová jich ya yalbotik: «Aʼtelinahic me scʼoponel Dios» (1 Tesalonicenses 5:17). ¿Mabal tʼujbiluk ya awaʼiy te jich ya yalbotik te Diose? Te Dios ya smulan ya yaʼiybey skʼop te j-abatetik yuʼun chikan jayeb buelta ya xkʼoponot.

Manchukme jich-abi, bayal machʼatik ma schʼuunik te yuʼun-nix ya skoltayotik-a te oracione. Ayniwan jich ya anop-euk.