-
¿Bin yuʼun te bayal wokolil?¡Mulana te akuxlejal ta sbajtelkʼinal! Te Biblia ya yalbat bin-utʼil
-
-
¿Anaʼojbal-a?
Kʼalal la yal te sbabial lotil te Satanase, la sbolobtesbey skʼoplal te Jehová, melel jich la yal kʼoem te ma snaʼ wentainwanej sok te maba toj yoʼtane. Kʼalal te Jehová ya slajin spisil te wokolile, yame schʼultes te sbiile, jaʼ-abi nopolme ya xkʼot ta pasel. Yame yakʼ ta ilel te jaʼ lekil jwentainwanej. Kʼax mukʼ skʼoplal ta chʼulchan sok ta Balumilal te ya yichʼ chʼultesel te sbiil te Jehová (Mateo 6:9, 10).
-
-
Te bin ya xbajt spas te Wentainel yuʼun Dios¡Mulana te akuxlejal ta sbajtelkʼinal! Te Biblia ya yalbat bin-utʼil
-
-
LECCIÓN 33
Te bin ya xbajt spas te Wentainel yuʼun Dios
Te Wentainel yuʼun Dios yakix ta aʼtel sok nopolme ya slekubtesix te Balumilal. Kiltik bintik ya xbajt spas te Wentainel yuʼun Dios te ya xjuʼ ya amaliy sok spisil awoʼtan.
1. ¿Bin ya xbajt spas te Wentainel yuʼun Dios yuʼun ya yakʼ lamalkʼinal?
Ta Armagedón, te Jesús—te jaʼ Ajwalil yuʼun te Wentainel yuʼun Dios—yame slajin te ajwaliletik sok te machʼatik ma lek te bin ya spasik (Apocalipsis 16:14, 16). Jaʼtome jich ya xkʼot ta pasel te bin ya yal te Biblia te jich ya yal: «Nopol ya xchʼay bahel te machʼa chopol» (Salmo 37:10). Ta swenta te Wentainel yuʼun te Dios, te Jesús ya yakʼ tal lamalkʼinal sok te bin stojil ta pasel ta swolol Balumilal (kʼopona Isaías 11:4).
2. ¿Bin yilel ya xkʼot te kuxlejalil kʼalal ya spas te skʼanojel yoʼtan te Dios?
Kʼalal ya xwentainwan te Wentainel yuʼun te Diose, «te machʼatic toj yoʼtanic ya me yichʼic hilel te qʼuinale, sbahtel qʼuinal ya xnahinic tey a» (Salmo 37:29). ¡Nopanax awaʼiy te bin yilel te jkuxlejaltik kʼalal te ants winiketik leknax yoʼtanik, kʼux ta yoʼtanik te Jehová sok te talel kʼaxel kʼux ya yaʼiy sbaik! ¿Mabal jichuk te kʼax tʼujbile? Maʼyuk machʼa ya stsakotix ta chamel sok jpisiltik ya xkuxinotik ta sbajtelkʼinal.
3. ¿Bin ya spas te Wentainel yuʼun te Dios te kʼalal la slajinix-a te machʼatik kʼax ma lek stalelik?
Kʼalal te Jesús la slajinix-a te machʼatik kʼax ma lek stalelike, ya xwentainwan jmil jaʼbil. Ta jmil jaʼbil-abi, te Jesús sok te 144 mil te ya xwentainwanike, yame slajinik ta jkʼaxel te mulil. Te kʼalal tsʼakajix-a te jmil jaʼbile, kʼatpʼujix ta nichimal kʼinal-a swolol te Balumilal sok nojelix ta ants winiketik te tseʼelnax yoʼtanik ta swenta te ya schʼuunbeyik smantal te Jehová. Tey-abi, te Jesús ya yakʼbey jilel ta skʼab Jehová te Wentainele. Jichme ya yichʼ chʼultesel te sbiil te Diose (Mateo 6:9, 10). Yame yichʼ naʼel ta lek te jaʼ lekil Ajwalil te Jehová sok te ya skanantay ta lek te lum yuʼune. Te Jehová yame slajin te Satanás, te pukujetik sok chikan machʼauk-a te ya xkontrainot yuʼune (Apocalipsis 20:7-10). Sbajtelkʼinal ya xjalaj te tʼujbil kuxlejalil ya yakʼ te Wentainel yuʼun te Diose.
JNOPTIKXAN TA LEK
Kiltik bin yuʼun ya xjuʼ ya jchʼuuntik te spisil te bin yaloj ya spas ta jtojoltik te Diose yananix skʼotes ta pasel-a ta swenta te Wentainel yuʼune.
4. Te Wentainel yuʼun Dios yame slajin spisil te ajwaliletik
Te «winic ya smosohin yan winic yuʼun ya yaʼbe swocol» (Eclesiastés 8:9). Te Jehová ya stuuntes te Wentainel yuʼun swenta ya slajin te wokolil ay ta skaj te bin ma stojiluk ya yichʼ pasele.
Kʼoponaik Daniel 2:44 sok 2 Tesalonicenses 1:6-8, sok albeyaik skʼoplal ini:
¿Bin ya x-utotik yuʼun Jehová sok Jesús te ajwaliletik sok te machʼatik ya xkoltayotik yuʼune?
¿Bin-utʼil ya anaʼ te toj spisil te bin ya xbajt spasik te Jehová sok te Jesús?
5. Kʼax lekil Ajwalil te Jesús
Te bitʼil jaʼ Ajwalil te Jesuse, bayal bin ya xbajt spas ta stojol te ants winiketike. Ilawilik te VIDEO swenta ya awilik te ya skʼan ya skoltay te ants winiketik sok te akʼbotix yuʼel yuʼun te Diose.
Te bintik la spas te Jesús te kʼalal kuxin ta Balumilal ya yakʼ ta ilel te bin ya spas ta pajel chaʼbej te Wentainel yuʼun te Diose. ¿Bintik-a te awoʼtanukix ya awil ya xkʼot ta pasele? Kʼoponaik spisil te textoetik te banti ya yal bin-a te ya xkʼot ta pasele.
TA BALUMILAL, TE JESÚS...
KʼALALTO TA CHʼULCHAN, TE JESÚS...
... la skombey yip te bintik ay ta Balumilal (Marcos 4:36-41)
... ya slekubtes te lumkʼinale (Isaías 35:1, 2)
... la smakʼlin bayal ta mil ants winiketik ta swenta jun milagro (Mateo 14:17-21)
... ya slajin te wiʼnal (Isaías 30:23)
... la slekubtes bayal jchameletik (Lucas 18:35-43)
... maba ya yakʼ te ay machʼa ya stsakot ta chamel (Isaías 33:24)
... la schaʼkuxajtes chaʼoxtul ants winiketik (Lucas 8:49-55)
... ya stupʼ te wokolil ya yakʼ te lajele (Apocalipsis 21:3, 4)
6. Te Wentainel yuʼun Dios ya yakʼ te lek ya xkuxinotik ta pajel chaʼbej
Te Wentainele, jaʼme ya skʼotes ta pasel te skʼanojel yoʼtan Dios ta sjajchibalto tal. Te ants winiketik ya xkuxinik ta sbajtelkʼinal ta jun nichimal kʼinal. Ilawilik te VIDEO swenta ya awilik bin-utʼil te Jehová yak ta stuuntesel te sNichʼan swenta ya skʼotes ta pasel te skʼanojel yoʼtane.
Kʼoponaik Salmo 145:16 sok albeyaik skʼoplal ini:
¿Bin-utʼil ya awaʼiy aba yuʼun te ya xbajt yakʼbotik spisil te bin ya xtuun kuʼuntik te Jehovae?
AY MACHʼATIK JICH YA YALIK: «Teme ya xkoltaywanotik ta jpisiltike, ya xchajpaj te kʼopetik ta Balumilal».
¿Bintik wokolil ya xbajt schajpan te Wentainel yuʼun Dios te ma juʼem yuʼunik schajpanel te ajwaliletik ta Balumilal?
¿BINTIK LA JNOPTIK?
Te Wentainel yuʼun te Dios ya skʼatpʼun ta nichimal kʼinal swolol te Balumilal sok tey ya xkuxinik-a te ants winiketik sok ya yichʼik ta mukʼ ta sbajtelkʼinal te Jehová.
¿Jilbal ta awoʼtan into?
¿Bin-utʼil ya xbajt yakʼ ta chʼultesbeyel sbiil te Jehová te Wentainel yuʼun te Diose?
¿Bin yuʼun jchʼuunejtik te ya skʼotes ta pasel te bin yaloj te Dios ta swenta te Wentainel yuʼune?
Ta spisil te bintik ya skʼotes ta pasel te Wentainel yuʼun te Diose, ¿bin-a te awoʼtanuk ya awilixe?
YA XJUʼ YA ANOPXAN INI
Nopbeya skʼoplal bin-a te Armagedón.
Ilawil te bin ya xkʼot ta pasel te kʼalal ya xwentainwan ta jmil jaʼbil te Jesús sok te kʼalal ya xtsʼakaj te jmil jaʼbile.
¿Bin-utʼil ya xjuʼ ya snop yaʼiy jun familia te yakix ta smulanel te bin ya spas ta pajel chaʼbej te Wentainel yuʼun te Diose?
Ilawil bin-utʼil jtul winik te schʼikoj sba ta política-a kʼot ta yoʼtan bin ya schajpan spisil te kʼopetike. Kʼopona te bin kʼax ta skuxlejal: «Bayal jojkʼoyeletik kuʼun-a».
«Jelontesbot skuxlejalik yuʼun te Biblia» (Te J-ilkʼinal ta toyol, 1 yuʼun enero 2012)
-