Te bintik ya sjojkʼoyik te machʼatik ya skʼopon te june

¿Spisilixbal-a te «sit ya yacʼ te Espíritu» te cholanbil ta Gálatas 5:22, 23?

Te bersikuloetik-abi ya yal nuebe talelil te jaʼ sit ya yakʼ te espiritu, jaʼ te kʼuxul oʼtanil, sbujtsʼ-oʼtanil, lamalkʼinal, smaliyel, yutsil-oʼtanil, lekil oʼtanil, schʼuunel-oʼtanil, manso-oʼtanil, ya xjuʼ yuʼun skomel sba. Pero ma jaʼuknax-abi te talelil ya xjuʼ ya kakʼtik ta ilel ta swenta te schʼul espiritu te Diose.

Kʼalal jich la yal-abi te jpuk-kʼop Pabloe ay bin nail la yal: «Te yaʼtel te jpocoʼ-taleltic yuʼun mulil: ha te antsiwej, antsinel, bin ilobtic sba, maʼqʼuexlalil, schʼuhunel locʼomba, ilojel, contrahinwanej, tijtamba-cʼop, xutʼxutʼ-oʼtanil, ilimba, tsaltamba-cʼop, hach-cʼop, jatamba, tiʼtiʼoʼtantaywanej, yacubel, spasel bohlqʼuin, soc yantic bintic pajal soc» (Gál. 5:19-21). Te kʼalal jich la yal te Pablo ya yakʼ kiltik te ay yantikxan «yaʼtel te jpocoʼ-taleltic yuʼun mulil» te maba la yalbeyix skʼoplale, jich bitʼil te la yalbey skʼoplal ta Colosenses 3:5. Jaʼ pajal sok-abi te nuebe ta chajp talelil te la yalbey skʼoplal te jpuk-kʼop Pablo ta Gálatas 5:22, 23. Ta lista-abi ma la yal spisil te jayeb talelil ya xjuʼ ya kakʼtik ta ilel ta swenta te chʼul espiritue.

Jich ya kaltik-abi teme ya jpajtik te bin ya yal te Gálatas sok te bin la stsʼibay te Pablo ta stojol te kongregasion ta Éfeso te jich la yal: «Te sit ya yakʼ te sakal kʼinale, jaʼ te yutsil-oʼtanil, te bin toj ta pasel sok te bin smelelile» (Efes. 5:8; 5:9, TNM). Jich bitʼil ya yal te bersikuloe, te yutsil-oʼtanil ochem skʼoplal tey ta «sit ya yakʼ te sakal kʼinale» jich bitʼil te bin toj ta pasel sok te bin smelelile, pero te yutsil-oʼtanil jaʼnix jich jaʼ jun talelil te ya yakʼ te espiritue.

Jaʼnix jich te Pablo la stijbey yoʼtan te Timoteo te yakuk yakʼ ta ilel wakeb talelil: «Te bin toj ta pasel, te lec schʼuhunel Dios, schʼuhunel-oʼtanil, cʼuxultaywanej [o kʼuxul oʼtanil], te ya xcuhch awuʼun, soc manso-oʼtanil» (1 Tim. 6:11). Liʼ ta lista jaʼnax la yalbey skʼoplal oxeb talelil yuʼun te «sit ya yacʼ te Espíritu» te jaʼ te schʼuunel-oʼtanil, kʼuxul oʼtanil sok te manso-oʼtanil. Pero jaʼnix jich te Timoteo ya skʼan te koltayel yuʼun te chʼul espiritu swenta ya yakʼ ta ilel te oxebxan talelil te la yalbey skʼoplal te Pabloe, jaʼ-abi jaʼ te bin toj ta pasel, te schʼuunel Dios sok te ya xkujch yuʼune (paja sok Colosenses 3:12; 2 Pedro 1:5-7).

Jich yuʼun, te Gálatas 5:22, 23 maba ya yal spisil te talelil te ya skʼan ya kakʼtik ta ilel ta swenta te chʼul espiritue. Te chʼul espiritu ya skoltayotik ta yakʼel ta ilel te nuebe talelil te jaʼ «sit ya yacʼ te Espíritu». Pero ay yantikxan talelil te ya skʼan ayuk kuʼuntik swenta ya stsakxan yip te schʼuunel koʼtantik sok yuʼun ya jlaptik kʼoem te «yachʼil cuxlejal, te hich pasbil te bin-utʼil ay te Diose, te toj bin ya spas soc te chʼultesbil ta smelelil» (Efes. 4:24).