Te bintik ya sjojkʼoyik te machʼatik ya skʼopon te june

Ta namey kʼinal, ¿puersabal ta swenta ba-alal tal stsʼumbal te Mesiase?

Ay baeltik te jich kalojtik-abi. Jaʼ ta swenta te bin ya yal te Hebreos 12:16 te ya yalbey skʼoplal te Esaú te maʼyuk skʼoplal ta yoʼtan te «bila chʼultesbile» sok «maʼyuc scʼoplal ta yoʼtan te bitʼil ba-alale. Melel la sjel ta jun nax buelta sweʼel» sok te Jacob. Ta swenta-abi jich yilel te la yichʼ akʼbeyel te Jacob te ya xkʼot ta stsʼumbal te Mesías kʼalal jaʼ kʼot ta «ba alale» (Mateo 1:2, 16; Lucas 3:23, 34).

Jaʼukmeto, te kʼalal la kilbeytikxan skʼoplal yantik textoetik ta Biblia, la kiltik te ma puersauk ba-alal te machʼa kʼot ta stsʼumbal te Mesiase. Kiltik cheʼoxebuk ejemplo te jich ya yakʼ ta ilele.

Te sba snichʼan te Jacob (Israel) sok te Lea, jaʼ te Rubén. Te sba snichʼan la sta ta patil sok te Raquel te jaʼ kʼux-xan ta yoʼtane, jaʼ te José. Kʼalal la sta smul te Rubén, jaʼ akʼbot ta swenta José te ba-alalile (Génesis 29:31-35; 30:22-25; 35:22-26; 49:22-26; 1 Crónicas 5:1, 2). Manchukme jich-abi, te Mesías maba tal ta stsʼumbal Rubén ni jaʼuk ta José, jaʼ tal ta stsʼumbal te Judá, te jaʼ schanebal snichʼan te Jacob sok te Lea (Génesis 49:10).

Te sjun Lucas 3:32 ya yalbey skʼoplal joʼtul winiketik te banti tal stsʼumbal te Mesiase. Te joʼtul winiketik ini jich yilel te jaʼ ba-alaletike. Te Booz jaʼ snichʼan te Obed, te Obed jaʼ snichʼan te Isaí (Jesé) (Rut 4:17, 20-22; 1 Crónicas 2:10-12).

Te yan machʼa tal ta patil jaʼ te David, pero ma ba-alaluk, jaʼ ijtsʼinal ta swaxaktul snichʼnab te Isaí (1 Samuel 16:10, 11; 17:12; Mateo 1:5, 6). Jichnix-euk te Salomón te jaʼ tal ta patile, melel ma jaʼuk sba snichʼan te Davide (2 Samuel 3:2-5).

Spisil ini maba ya skʼan ya yal te maʼyuk lek skʼoplal te machʼa ba-alale. Te ba-alal ta jujun familia jaʼ ichʼbilxan ta mukʼ sok jteb ma spisiluk-ora jaʼ jolal ya xjil ta patil ta stojol te sfamiliae. Jaʼnix jich, jaʼ cheb bueltaxan ya yichʼ akʼbeyel sbiluk-a te bin-utʼil te yantik alnichʼanetike (Génesis 43:33; Deuteronomio 21:17; Josué 17:1).

Pero te bin ay ta swenta yichʼel te ba-alale ya xjuʼ ya yichʼ akʼbeyel yan alnichʼanil. Jich bitʼil, kʼalal te Abraham la sten lokʼel te Ismael, jaʼ la yichʼ jilel te Isaac te bintik ay ta swenta yichʼele (Génesis 21:14-21; 22:2). Jaʼnix jich bitʼil la kaltik ta sjajchibale, te bintik jaʼ ay ta swenta yichʼel-a te Rubén jaʼ la yichʼ akʼbeyel te José.

Akʼa kiltik yan buelta te Hebreos 12:16, te banti jich la stsʼibay te Pablo: «Ma me ayuc jtuluquex te ya xyalex ta mulile, soc te maʼyuc scʼoplal ta awoʼtanic te bila chʼultesbile, jich bitʼil Esaú te maʼyuc scʼoplal ta yoʼtan te bitʼil ba alale. Melel la sjel ta jun nax buelta sweʼel te bendición te scʼoplal ya yichʼe, [XCD]». ¿Bin la skʼan la yakʼ ta naʼel te Pabloe?

Te jpuk-kʼop Pablo ma jaʼuk yak ta yalbeyel skʼoplal-a te tsʼumbalil yuʼun te Mesiase. Te bin yalojbeyix skʼoplal-a te Pablo ta stojol te jchʼuunjeletik jaʼ te tojuk te beetik yuʼun te yokik swenta «mayuc machʼa ma ba ya sta te yutsil yoʼtan te Diose», jich ya xjuʼ ya xkʼot ta stojolik teme yalik ta mulile (Hebreos 12:12-16). Teme ya xyalik ta mulile jaʼ jich ya xkʼotik bitʼil te Esaú te maʼyuk skʼoplal kʼot ta yoʼtan te «bila chʼultesbile», jaʼ la stsa te bintik maba talem ta stojol te Diose.

Te Esaú kuxin ta stiempo te antiguo meʼil tatiletik sok ayniwan la yakʼ chikʼbil majtʼanil ta stojol Dios jich bitʼil sacerdote ta stojol te sfamilia (Génesis 8:20, 21; 12:7, 8; Job 1:4, 5). Pero ta swenta te maʼyuk skʼoplal ta yoʼtan te bintik yuʼun te Diose, la sjel ta jpajchnax lenteja-chenekʼ te bintik ay ta swenta yichʼel te bitʼil ba-alale. Jaʼniwan ma la skʼan te ya xkʼax ta stojol te wokolil te yichʼoj alel te ya xtal ta stojol te stsʼumbal te Abrahame (Génesis 15:13). Te Esaú jaʼnix jich la yakʼ ta ilel te maʼyuk skʼoplal ta yoʼtan te bintik talem ta stojol Dios te kʼalal nujpun sok chaʼtul antsetik te maba schʼuunejik te Jehová, bayal la smel yoʼtan yuʼun te smeʼ state (Génesis 26:34, 35). Maba la spajbey stalel te Jacob te nujpun sok jtul ants te yichʼoj ta mukʼ te smelelil Diose (Génesis 28:6, 7; 29:10-12, 18).

Jich yuʼun, ¿bin ya jtatik ta nopel? Ay baeltik tal ta stojol ba-alal te stsʼumbal te Mesiase, pero ma spisiluk-ora jich kʼot ta pasel. Te judioetik snaʼojik sok schʼuunejik-a. Jich bitʼil, snaʼojik-a te ya xtal ta stsʼumbal David te Cristoe, te jaʼ ijtsʼinal yuʼun spisil snichʼnab te Isaí (Mateo 22:42).