LEKSION 6

Jamal xa acholbey skʼoplal te tekstoetik

Juan 10:33-36

TE BIN YA SKʼAN YA ANOP: Mame jaʼuknax ya akʼopon te teksto ta Biblia sok te oranax ya xkʼaxat ta yan punto. Ilawil ta lek te yakuk xkʼot ta oʼtanil te bin-utʼil snitojbey sba skʼoplal te teksto sok te bin ya akʼan ya awakʼ ta nopele.

¿BIN-UTʼIL TA PASEL?

Akʼa ta naʼel te kʼopetik te mukʼ skʼoplale. Te kʼalal la akʼoponix-a te tekstoe, akʼa ta naʼel te kʼopetik te snitojbey sba skʼoplal sok te punto ya akʼan ya awakʼ ta nopele. Jaʼ-abi, ya xjuʼ ta pasel te kʼalal ya awalulanbey skʼoplal te kʼopetik te mukʼ skʼoplale o pasa jun jojkʼoyel te ya xkoltaywan ta yilel te banti ay te kʼopetik-abi.

Teme ya atuuntes jmajkʼ kʼopetik yuʼun te tekstoe, ilawil te yakuk xkʼot ta oʼtanil te bin-utʼil snitojbey sba skʼoplal te teksto sok te bin mukʼ skʼoplal yakat ta yalele.
Akʼa ta naʼel te punto te ya akʼan ya awale. Teme ya awalbey skʼoplal te bin yuʼun ya akʼopon te teksto, akʼa ta naʼel bin-utʼil snitojbey sba skʼoplal te kʼopetik te mukʼ skʼoplal ta teksto sok te bin swentail te la akʼopone.

Kʼalal ya acholbey skʼoplal te teksto jamaluk awuʼun te Bibliae. Teme jich ya apase, jichnix ya spasik-euk te machʼatik ya schʼam yaʼiyik te akʼope sok jich ya xkʼot ta yoʼtanik te bin yakat ta yalele.
Mame chujkʼuluk xa acholbey skʼoplal. Mame xa awal te bintik maba snitojbey sba skʼoplal sok te punto te mukʼ skʼoplale. Ta swenta te jayebto ya snaʼikix te tema te machʼatik ya schʼam yaʼiyik te akʼope, ilawil ta lek jayebto informasion ya atuuntes yuʼun jamal ya xjil skʼoplal te bin ya achole.