Lekubtesa te bin-utʼil ya achol te skʼop Diose: Lajinbeya skʼoplal te kurso yuʼun Biblia teme maba yak ta chʼiel ta swenta skʼop Dios

TE BIN YUʼUN TULAN SKʼOPLALE: Te ants winiketik ya skʼan ya yalbeyik sbiil te Jehová swenta ya xkolik-a (Ro 10:13, 14). Pero, ma spisiluk te machʼatik ya yichʼik kurso yuʼun te Biblia ya spas ta skuxlejalik te tojil mantaliletik yuʼun te Jehovae. Swenta ya jtuuntestik ta lek te tiempo te ya x-abatinotik ta stojol te Diose, jaʼ ya skʼan ya xbajtʼ koʼtantik ta snojptesel te machʼatik ta smelelil ya skʼan ya sjeltay te skuxlejalik yuʼun lek ya x-ilotik yuʼun-a te Jehovae. Jaʼ yuʼun, teme ay maba yak ta chʼiel ta swenta skʼop Dios te machʼa yakotik ta snojptesele, te kʼaxix jun tiempo te snujpʼ te yakukix ta sjelel te skuxlejal te jichuke, jaʼ lek te maba ya kakʼbeytikix te kursoe, jaʼme ya skʼan ya xbajtʼ koʼtantik ta skoltayel te machʼatik ikʼbilik yuʼun te Jehová ta banti organisasion yuʼun (Jn 6:44). Pero, teme patil ya sjeltay te stalele sok teme jich yoʼtan ya xkuxin ta sbajtʼelkʼinale, yato xjuʼ ya jnojptestik yan buelta sok stseʼelil koʼtantik (Hch 13:48).

TE BIN-UTʼIL TA PASEL:

• Albeya lek skʼoplal te machʼa yakat ta snojptesel yuʼun te ya smulan snopel te Bibliae (1Ti 2:4).

• Jultesbeyame ta yoʼtan te ya skʼan ya spas ta skuxlejal te bintik la snopixe (Lu 6:46-49).

• Ilbeya skʼoplal te señail kʼop yuʼun te jtsʼunbajel winik sok te machʼa yakat ta snojptesele, pero pasame sok slekil awoʼtan soknix tijbeya yoʼtan yuʼun ya snop te bin ya xmakot ta sjeltayel te skuxlejale (Mt 13:18-23).

• Albeya sok yutsil awoʼtan te bin yuʼun maba ya awakʼbeyix te kursoe.

• Albeya te ya xjuʼ ya akʼopon ta selular o te baeltik ya xbajtʼ awulaʼtaye sok te ya xjuʼ ya ajachik yan buelta te kurso teme kaj spas ta skuxlejal te bin snopojix ta Bibliae.

KʼALAL LA AWILIX-A TE BIDEO, AKʼBEYA SUJTIB TE JOJKʼOYELETIKE:

• ¿Bintik ya yakʼ ta ilel te maba yak ta chʼiel ta swenta skʼop Dios te machʼa yak ta yichʼel te kursoe?

• ¿Bin la spas te jcholkʼop yuʼun ya yakʼbey yil te machʼa yak ta snojptesel te ya skʼan ya sjeltay te skuxlejale?

• ¿Bin-utʼil te jcholkʼop la yalbey yaʼiy te machʼa yak ta snojptesel te ya xjuʼ ya sjachbey yan buelta te skurso ta patile?