LEKSION 10

Jelbeya snukʼul te akʼop

Mateo 20:31

TE BIN YA SKʼAN YA ANOP: Swenta ya awakʼ ta naʼel ta lek te bin ya awakʼ ta nopele sok te ya stij oʼtanile, moesbeya, koesbeya o jelbeya snukʼul te akʼope, jaʼnix jich animal o kʼun-nax ya skʼan ya xkʼopojat.

¿BIN-UTʼIL TA PASEL?

Moesa o koesbeya snukʼul te akʼope. Moesbeya snukʼul te akʼop te kʼalal ya awakʼ ta naʼel te puntoetik te mukʼ skʼoplal sok te ya xtijbot yoʼtan te machʼatik ya schʼam yaʼiyike. Jaʼnix jich ya akʼopon te bersikuloetik ta Biblia te banti ya yakʼ ta naʼel te ay machʼa ya yichʼ akʼbeyel kastigo. Koesbeya snukʼul te akʼop kʼalal ya awakʼ ta naʼel mel-oʼtan, xiwel o yuʼun ya xtijbot yoʼtanik ta snaʼelxan te bin ya awale.

Mame spisiluk-ora ya amoesbey snukʼul te akʼope, teme jich ya apase yaniwan skuyik te yakat ta utawe. Swenta ma jaʼuk ya xbajtʼ yoʼtanik ta atojol mame chajpuknax ya apas-a te akʼope.
Jelbeya snukʼul te akʼope. Najtʼubtesbeya snukʼul te akʼop yuʼun ya awakʼ ta naʼel tseʼel-oʼtanil, te bintik namal ay o te bintik mukʼike. Mukʼubtesbeya snukʼul te akʼop kʼalal ya wakʼ ta naʼel mel-oʼtan o wokolil.
Animal o kʼun-nax ya xkʼopojat. Swenta ya awakʼ ta naʼel sbujtsʼ oʼtanil, animal ya skʼan ya xkʼopojat. Pero teme mukʼ skʼoplal te bin ya awakʼ ta naʼele kʼun-nax ya skʼan ya xkʼopojat.

Mame animaluknax ya ajelontes te bitʼil yakat ta kʼope, teme jich ya apase yame axiwtes te machʼatik ya schʼam yaʼiyike. Mame animaluknax ya xkʼopojat, melel ma xchiknajix ta aʼiyel-a te bin ya awale.