LECCIÓN 13
Te lotil religionetik ya sbolobtesbeyik skʼoplal te Diose
Te Dios jaʼ jkʼuxul oʼtanil, pero ¿bin yuʼun-nix-a te religionetik bayal bin ma lek spasojik? Jaʼ ta skaj te maba smeleliluk te religionetik-abi. Te lotiletik ya yakʼik ta nopel sok te bintik ya spasik, ya sbolobtesbey skʼoplal te Diose. ¿Bin-utʼil spasojik? ¿Bin-utʼil ya yaʼiy sba yuʼun te Diose? Sok ¿bin ya xbajt spasbey te lotil religionetike?
1. ¿Bintik yakʼojik ta nopel te ya sbolobtesbey skʼoplal te Diose?
Te lotil religionetik «la sjelic ta lotil te bin smelelil yuʼun Dios» (Romanos 1:25). Jich bitʼil, ay bayal religionetik te ma xyakʼik ta nopel te sbiil te Diose. Yan stukel te Biblia ya yal te ya skʼan ya jtuuntestike (Romanos 10:13, 14). Ay jwolwanej yuʼun religionetik te ya yalik te kʼalal ay machʼa ya sta swokole jaʼlaj yuʼun te jich la skʼan te Diose. Pero ma jichuk-abi. Te wokolil ya jtatike ma jaʼuk smul te Diose (kʼopona Lamentaciones 3:33). Ta skaj te bin ya yalike bayal machʼatik maba kʼux ta yoʼtanik te Diose.
2. ¿Bintik spasojik te ya sbolobtesbey skʼoplal te Diose?
Te Jehová kʼux ta yoʼtan te ants winiketik, pero te lotil religionetik ma jichuk ya spasik. Te Biblia ya yal te kʼalalto ta «chʼulchan tohyemix te smule» (Apocalipsis 18:5). Ayix bayal jaʼbil te lotil religionetik schʼikoj sbaik ta política, ya skoltaybeyik skʼoplal te guerra sok yakʼojik ta milel bayal ta tul ants winiketik o lek yilojik te jich ya yichʼ pasele. Ay chaʼoxtul jwolwanejetik yuʼun religión te ya skʼan ya xkʼulejubik, jaʼ yuʼun ya skʼanbeyik stakʼin te ants winiketike. Te bintik ya spasik ya yakʼ ta ilel te manix yichʼojik ta mukʼ-a te Diose. Jich yuʼun, ¿snujpʼbal te ya yalik te yakik ta aʼtel ta stojol te Diose? (Kʼopona 1 Juan 4:8).
3. ¿Bin yilel ya yil te bintik ya spas te lotil religionetik te Diose?
Teme jkʼaxel ma lek ya awil te bintik ya spasik te lotil religionetike, ¡jaʼuktobalix-a te Jehovae! Melel kʼux ta yoʼtan te ants winiketike. Jaʼ yuʼun te Diose kʼaxto ilinem ta stojol te jwolwanej yuʼun religionetik te sbolobtesojbeyik skʼoplal sok te ya yutsʼinik te ants winiketike. Te Dios ya xbajt slajin te lotil religión sok «ma ba ya xwehtix ta lehel» ta patil (Apocalipsis 18:21). Nopolme ya slajin spisil te lotil religionetike (Apocalipsis 18:8).
JNOPTIKXAN TA LEK
Jnoptikxan ta lek te bin yilel ya yil Jehová te lotil religionetik sok te bintikxan spasojik te religionetik-abi. Jaʼnix jich ya kiltik bin yuʼun ma skʼan ya schebajtesbat awoʼtan ta snaʼbeyel sba te Jehová spisil te bintik ma lek spasojike.
4. Te Dios ma lek ya yil spisil te religionetike
Bayal ants winiketik ya skuyik te lek spisil te religionetike. Pero, ¿melelbal-abi? Kʼoponaik Mateo 7:13, 14 sok albeyaik skʼoplal ini:
¿Bin yilel te be te ya yikʼotik bael ta stael jkuxlejaltik?
Ilawilik te VIDEO sok albeyaik skʼoplal ini:
¿Yabal yakʼ ta nopel te Biblia te lek ya yil Dios spisil te religionetike?
5. Te lotil religionetik ma xyakʼik ta ilel te skʼuxul yoʼtan te Diose
Bayal ta chajp te bin-utʼil sbolobtesojbeyik skʼoplal Dios te lotil religionetike, jich bitʼil te ya schʼik sbaik ta guerra. Kiltik bin-utʼil kʼoem ta pasel. Ilawilik te VIDEO sok albeyaik skʼoplal ini:
¿Bin la spasik bayal religionetik ta yorail te Segunda Guerra Mundial?
¿Bin yilel ya awil te bin la spasike?
Kʼoponaik Juan 13:34, 35 sok 17:16. Ta patil albeyaik skʼoplal ini:
¿Bin yaʼiyel ya yaʼiy sba te Jehová kʼalal ya yil te ya schʼik sbaik ta guerra te religionetike?
Te lotil religionetik bayal bin ma lek spasojik sok ma xyakʼik ta ilel te skʼuxul yoʼtan te Diose. ¿Bintik ataoj ta ilel te jaʼate?
Te lotil religionetik ma xyakʼik ta ilel te skʼuxul yoʼtan te Diose.
6. Te Dios ya skʼan te yakuk xlokʼotik ta lotil religión
Kʼoponaik Apocalipsis 18:4a sok albeyaik skʼoplal ini:
Te Dios ya skʼan ya skoltay te ants winiketik te loʼlaybilik yuʼun te lotil religione. ¿Bin yaʼiyel ya awaʼiy aba yuʼun te bin ya spas te Diose?
7. Naʼbeyaxan sba te smelelil Diose
¿Lekbal te jaʼ ya kakʼbeytik smulin te Dios te bintik ma lek ya spasik te lotil religionetike? Nopa awaʼiy te ay jtul kerem te ya skʼaxuntaybey smantal te state, te ya xlokʼ bael ta sna sok te ya xjajch spas te bintik ma leke. Te tatile ma lek ya yil te bin ya spas te snichʼane. Jaʼ yuʼun, ¿stojilbal teme ya kakʼbeytik smulin te tatil spisil te bintik ma lek ya spas te snichʼane?
¿Stojilbal teme ya kakʼbeytik smulin Jehová te bintik ma lek ya spas te lotil religionetike? ¿Snujpʼbal te ma jchʼuuntikix Dios yuʼune?
AY MACHʼATIK JICH YA YALIK: «Tojol ya jchʼuun te Diose, melel ya kil te bayal bin ma lek ya spasik te machʼatik ay sreligionike».
¿Jichbal ya anop-euk te jaʼate?
¿Bin yuʼun ma skʼan ya kakʼbeytik smulin te Dios te bintik ma lek ya spasik te lotil religionetike?
¿BINTIK LA JNOPTIK?
Te lotil religionetik sbolobtesojbeyik skʼoplal te Jehová ta swenta te bintik ya yakʼik ta nopel sok te bin kʼaxto ma lek ya spasike. Nopolix ya yichʼik lajinel.
¿Jilbal ta awoʼtan into?
¿Bin yilel awil te bin spasojik te lotil religionetik sok te bintik yakʼojik ta nopele?
¿Bin yilel ya yil te Jehová te lotil religionetike?
¿Bin ya xbajt spasbey te lotil religionetike?
YA XJUʼ YA ANOPXAN INI
Ay cheb te bin ma lek ya spasik te religionetike, jaʼ yuʼun ma lek ilbilik yuʼun te Diose. Kiltik bin-a.
«¿Yabal skoltayotik spisil te religionetik yuʼun ya jnaʼbeytik sba te Diose?» (Ay ta jw.org)
¿Bin yuʼun te Jehová jaʼ ya skʼan te yakuk jtsob jbatik ta jun religión yuʼun ya kichʼtik ta mukʼ?
«¿Puersabal te ya x-ochotik ta jun religión?» (Ay ta jw.org)
Jtul sacerdote la sta ta ilel te ay bintik ma smeleliluk ya yichʼ akʼel ta nopel ta sreligion, pero ma jaʼuk makot ta sleel te bin smelelil ya yakʼ ta nopel te Bibliae.
«Jtul sacerdote la yijkitay te sreligion» (¡Wikʼame asit!, febrero 2015)
Te religionetike bayal bin yalojik ta stojol te Dios te ma smeleliluke sok yakʼojbeyik schʼuun te ants winiketik te maʼyuk jkʼoplaltik ta yoʼtan sok te kʼax ma lek yoʼtane. Ilawil bin-utʼil chiknaj oxchajp lotil nojptesel.
«Te lotil te ya yichʼ alel ta stojol te Diose» (Te J-ilkʼinal ta toyol, 1 yuʼun noviembre 2013)