Jtʼunbeytik stalel te Jesús jich ma xlaj te lamalkʼinal ya kaʼiytike

1, 2. ¿Bin yuʼun kʼax tenbil la yaʼiy sba te Jesuse?

KʼALAL junxanix kʼajkʼal skuxlejal ta Balumilal-a te Jesuse, kʼax tenbil la yaʼiy sba. Snaʼojix-a te nopolix ya yichʼ tulan majel sok ya yichʼ milel yuʼun te skontratake. Pero ay bin ya snaʼulanxan ta yoʼtan-a. La skʼan te tseʼeluk yoʼtan yuʼun te sTate, melel bayal kʼux ta yoʼtan. Snaʼoj-a teme jun yoʼtan ya yakʼ sba ta stojol manchuk yak ta kʼaxel tulan swokol, ya yakʼ ta naʼel-a te jaʼnax ya skʼan ichʼel ta mukʼ te Jehová sok te ma meleluk te lotiletik ya yichʼ alel ta stojole. Jaʼnix jich, kʼux ta yoʼtan te ants winiketik sok kʼoem ta yoʼtan te jaʼnax ya xjuʼ ya jta jkuxlejaltik ta sbajtʼelkʼinal teme jun yoʼtan ya yakʼ sba jaʼto kʼalal ya xlaje.

² Manchukme kʼax tenbil la yaʼiy sba ta skaj te swokole, te Jesuse ma laj te lamalkʼinal ya yaʼiye. Jich yalojbeyix-a te jnopojeletik yuʼune: «Ya caʼbeyex te lamal qʼuinal cuʼun» (Juan 14:27). Yichʼoj-a te «lamal qʼuinal te ya yacʼ te Diose», te jaʼ ya skʼan ya yal te lamalnax kʼinal ya yaʼiy te machʼa lek yiloj sba sok te Diose. Jaʼ te lamalkʼinal la yaʼiy ta yoʼtan sok ta spensar te Jesuse (Filip. 4:6, 7).

3. ¿Bin ya kilbeytik skʼoplal ta artikulo ini?

³ Melelnix-a te ma jichuk ya xkʼax jwokoltik te bitʼil kʼax yuʼun te Jesuse. Pero jpisiltik te jchʼuunjelotik yuʼune yame xkʼax jwokoltik (Mat. 16:24, 25; Juan 15:20). Jich bitʼil ay kʼax tenbil la yaʼiy sba te Jesuse, aynix jich ya xbajtʼ kaʼiytik-euk. ¿Bin ya skʼan ya jpastik swenta ma slajin te lamalkʼinal ya kaʼiytik te mel-oʼtane? Kiltik oxchajp te bin la spas te Jesús kʼalal la schol skʼop Dios liʼ ta Balumilal sok te bin-utʼil ya xjuʼ ya jtʼunbeytik stalel kʼalal ya xkʼax jwokoltike.

TE JESÚS BAYAL BUELTA LA SKʼOPON DIOS

4. Jich bitʼil ya kiltik ta 1 Tesalonicenses 5:17, ala cheʼoxeb ejemploetik te ya yakʼ ta ilel te bayal buelta la skʼopon Dios te Jesús kʼalal junxanix kʼajkʼal kuxul ta Balumilal-ae.

⁴ (Kʼopona 1 Tesalonicenses 5:17). Kʼalal junxanix kʼajkʼal kuxul-a te Jesuse bayal buelta la skʼopon Dios. Kʼalal la yakʼbey snop te jnopojeletik yuʼun te bitʼil ya spasik te snaʼojibal slajele, la skʼopon Dios kʼalal la skʼases te pane sok kʼalal la skʼases te binoe (1 Cor. 11:23-25). Jaʼnix jich la skʼopon Dios kʼalal mato xlokʼik bael-a te banti la spasik te kʼin Pascuae (Juan 17:1-26). Kʼalal kʼotik ta wits yuʼun Oliboiltik bayal buelta la skʼopon Dios (Mat. 26:36-39, 42, 44). Jaʼnix jich te kʼalal jtebxanix ya skʼan ya xlaj-ae la skʼopon te sTate (Luc. 23:46). Jich bitʼil ya kiltike, te jayeb buelta la skʼopon Jehová te Jesuse la yichʼ ta wenta ta spisil te bintik mukʼ skʼoplal kʼot ta pasel ta skuxlejale.

5. ¿Bin yuʼun maʼyuk yip yoʼtanik-a te jpuk-kʼopetike?

⁵ Jun swentail te bin yuʼun tsʼijk yuʼun te wokoliletik-abi, jaʼ te maba la skom sba ta skʼoponel te sTat ta skʼanbeyel koltayel. Pero te jpuk-kʼopetike ma jichuk la spasik ta ajkʼabal-abi, jaʼ yuʼun maʼyuk yip yoʼtanik-a kʼalal kʼot ta stojolik te pruebae (Mat. 26:40, 41, 43, 45, 56). ¿Bin ya jnoptik yuʼun? Ya jnoptik te jaʼnax jun koʼtan ya kakʼ jbatik teme spisil-ora ya jkʼopontik te Dios jich bitʼil la spas te Jesuse. Pero ¿bin ya jkʼantik ta skʼoponel Dios?

6. ¿Bin yuʼun ya skoltayotik te schʼuunel koʼtantik swenta ma xlaj te lamalkʼinal ya kaʼiytike?

⁶ Ya xjuʼ jkʼanbeytik te Jehová te yakuk yakʼbotikxan schʼuunel koʼtantik (Luc. 17:5; Juan 14:1). Ya skʼan ayuk schʼuunel koʼtantik, melel te Satanás ya xbajtʼ yakʼotik ta prueba te bitʼil jnopojelotik yuʼun te Jesuse (Luc. 22:31). Te schʼuunel koʼtantik ya skoltayotik swenta ma xlaj te lamalkʼinal manchukme bayal wokolil ya xkʼax ta jtojoltik. ¿Bin yuʼun? Melel, teme la jpastikix tulan ta schajpanel te ban kʼalal ya xjuʼ kuʼuntike, ya stij koʼtantik ta yakʼbeyel jilel ta skʼab te Jehová. Te smukʼul koʼtantik te jaʼnax stukel ya xjuʼ ya schajpan ta leke, ya yakʼ te lamalnax kʼinal ya kaʼiy ta koʼtantik sok ta jpensartik (1 Ped. 5:6, 7).

7. ¿Bin ya jnoptik yuʼun te bin la scholbey skʼoplal te Robert?

⁷ Te skʼoponel Dios ya yakʼ te ma xlaj te lamalkʼinal ya kaʼiytik chikan bintik ya xkʼax ta jkuxlejaltik. Kiltik te bin kʼax ta stojol te Robert te jaʼ jtul ansiano te jun yoʼtan yakʼoj sba te 80 yaʼbilale. Ya scholbey skʼoplal bin ya spas swenta spisil-ora lamalkʼinal ya yaʼiy: «Te jayebix kʼajkʼal kuxulone, te bin ya yal Filipenses 4:6, 7 skoltayejon ta stsʼikel bayal ta chajp wokoliletik. Ay maʼyuk jtakʼin, ay jun buelta te la kijkʼitay te kaʼtel ta ansiano». Jich ya yalxan: «Ya jkʼopon Dios ta oranax te kʼalal ay bin ya jmel koʼtan yuʼune. Kʼalal spisil-ora ya jkʼopon Dios sok te ya jambey koʼtane, jich ya kaʼiyxan bayal lamalkʼinal».

TE JESÚS LA SCHOL SKʼOP DIOS SOK SBUJTSʼ YOʼTAN

8. Jich bitʼil ya yal Juan 8:29, ¿binxan yuʼun la yaʼiy lamalkʼinal te Jesuse?

⁸ (Kʼopona Juan 8:29). Te Jesús jaʼnix jich la yaʼiy lamalkʼinal te kʼalal la yichʼ kontrainele. ¿Bin yuʼun? Jaʼ yuʼun te snaʼoj te yak ta yakʼbeyel stseʼelil yoʼtan te sTate. La schʼuun mantal manchukme kʼax tulan yak ta kʼaxel swokol. Te bitʼil kʼux ta yoʼtan te Jehovae, jaʼ bajtʼ ta yoʼtan te ya x-abatin ta stojole. Kʼalal mato talem ta Balumilal-ae, la sjokin ta aʼtel te Dios jich bitʼil j-aʼtel te pʼijuben ta leke (Prov. 8:30). Jaʼnix jich te kʼalal kuxin ta Balumilal la schol sok sbujtsʼ yoʼtan te smelelil kʼop ta swenta te sTate (Mat. 6:9; Juan 5:17). Te aʼtel la spase akʼbot bayal stseʼelil yoʼtan (Juan 4:34-36).

9. ¿Bin-utʼil ya skoltayotik te jaʼ ya xbajtʼ ta koʼtantik scholel skʼop Dios swenta ma xlaj te lamalkʼinal ya kaʼiytike?

⁹ Ya jtʼunbeytik stalel te Jesús kʼalal ya jchʼuunbeytik smantal te Jehová sok te kʼalal spisil-ora bayal bintik ya jpastik ta stojol te Diose (1 Cor. 15:58). Te j-abat yuʼun Dios te jaʼ «yaʼtelinej yalel scʼop Dios» yan bitʼil ya yil-a te swokole (Hech. 18:5). Jun swentail jaʼ te spisil te ants winiketik te ya jcholbeytik skʼop Diose jaʼ tulanxan swokolik te bitʼil joʼotike. Pero kʼalal kʼux ya xkʼot yaʼiyik te Jehová sok te ya spasik te bin ya yale, ya xlekub skuxlejalik sok tseʼelxan yoʼtanik. Kʼalal jich ya xkʼot ta pasele, ya xmukʼubxan te smukʼul koʼtantik te ya skanantayotik te Diose. Jaʼ-abi ya skoltayotik swenta ma xlaj te lamalkʼinal ya kaʼiytike. Jaʼ jich yak ta kʼaxel ta stojol jtul ermana te bayalix jaʼbil yichʼoj depresion sok te maʼyuk skʼoplal ya yaʼiy sbae. Jich ya yal: «Te bitʼil spisil-ora ya jchol skʼop Dios ya yakʼbon lamalkʼinal sok ya yakʼbon stseʼelil koʼtan. Jaʼniwan yuʼun te jaʼ nopolxan ya kaʼiy jba ta stojol Jehová kʼalal ya jchol skʼop Diose».

10. ¿Bin ya yakʼ jnoptik te bin ya schol te Brendae?

¹⁰ Kiltik-euk te ejemplo yuʼun jtul ermana te Brenda sbiil. Te ermana sok te yantsil al tsakbilik ta tulan chamel te esclerosis múltiple sbiil. Te Brenda ay ta siya de rueda sok maʼyuk lek yip. Te kʼalal ya xjuʼ yuʼun ya yaʼiye ya schol skʼop Dios ta nanatik, pero jteb ma spisil-ora ya schol skʼop Dios ta karta. Jich ya schol kaʼiytik: «Te kʼalal kʼot ta koʼtan te mananix xlekubon ta balumilal ini, juʼ kuʼun te jaʼ bajtʼix ta koʼtan-a te scholel skʼop Dios. Ta melel, kʼalal ya jchol skʼop Dios ya xchʼay ta koʼtan te bin ya jmel koʼtan yuʼune. Jaʼ ya yakʼ xbajtʼ ta koʼtan skoltayel te ants winiketik ya jta ta territorio yuʼun te kongregasion. Soknix ya yakʼ te spisil-ora ya xjul ta koʼtan te bin smukʼulinej koʼtane».

TE JESÚS MA LA SPʼAJ TE KOLTAYEL AKʼBOT YUʼUN YAMIGOTAK

11-13. 1) ¿Bin-utʼil la yakʼik ta ilel te jpuk-kʼopetik sok te yantik jnopojeletik ta jaʼik lekil amigoetik yuʼun te Jesuse? 2) ¿Bin yaʼiyel la yaʼiy sba yuʼun te Jesuse?

¹¹ Kʼalal la schol skʼop Dios te Jesuse, bayal wokolil kʼax ta stojol. Pero te jpuk-kʼopetik te jun yoʼtanike la yakʼik ta ilel te jaʼ lekil amigoetike jich bitʼil ya yal te Proverbios 18:24 banti ya yal: «Ay machʼatic te cʼax hich jun yoʼtan sbahic te bin utʼil te machʼa jun smeʼstat soque». Te Jesús ay skʼoplal ta yoʼtan la yil te jpuk-kʼopetike. Juluk ta koʼtantik te ta ora-abi maʼyuk jtuluk yijtsʼinab schʼuunejik-a te Jesuse (Juan 7:3-5). Te sfamilia ay la skuyik te sojkem sjole (Mar. 3:21). Pero te jpuk-kʼopetik te jun yoʼtanike yan stalel la yakʼik ta ilel stukelik. Kʼalal junxanix ajkʼabal kuxul-ae, te Jesús la yal: «Haʼex te machʼa jun awoʼtanic ta jtojol te cʼalal ayon ta contrahinel a» (Luc. 22:28).

¹² Ay bayal buelta chʼayik ta stojol. Pero te Jesús ma jaʼuk la yil te bintik ma lek la spasike, jaʼ la yil te schʼuunel yoʼtanik ta stojole (Mat. 26:40; Mar. 10:13, 14; Juan 6:66-69). Te slajibal ajkʼabal la sjokinlan te winiketik ini te jun yoʼtanike, jich la yaltiklanbey: «La jcalbeyex te jun coʼtan jbahtic, como spisil te bin la jcaʼiy ta stojol te Jtat la jcaʼbeyex anaʼic» (Juan 15:15). Ta melel, la sta yip yoʼtan te Jesús ta swenta te yamigotake. Te koltayel la yakʼbeyik te Jesús kʼalal la schol skʼop Dios akʼbot bayal stseʼelil yoʼtan (Luc. 10:17, 21).

¹³ Ma jaʼuknax la yamigoin te jpuk-kʼopetike, jaʼnix jich ay yantik yamigotak sok yamigatak te koltayot te kʼalal la scholel skʼop Diose. Ay machʼatik la yakʼik ta majanel snaik swenta ya xweʼ tey-a (Luc. 10:38-42; Juan 12:1, 2). Ay yantik te la sjokinik ta beel sok la yakʼbeyik Jesús te bin ay yuʼunike (Luc. 8:3). ¿Bin yuʼun la sta lekil yamigotak te Jesuse? Jaʼ yuʼun te jaʼnix la yakʼ ta ilel te jaʼ lekil amigoe. Bayal bintik lek la spas ta stojolik sok ma la skʼantiklanbey te yakuk spasik te bin ma xjuʼ yuʼunik spasele. Te Jesús toj stukel, yan te yamigotake maʼuk, pero la yaltiklanbey wokol yuʼun te koltayel la yakʼike. Ta melel la skoltayik swenta ma xlaj te lamalkʼinal yuʼune.

14, 15. 1) ¿Bin-utʼil ya jtatik lekil kamigotaktik? 2) ¿Bintik-utʼil ya skoltayotik?

¹⁴ Te lekil amigoetike ya skoltayotik swenta jun koʼtan ya kakʼ jbatik ta stojol Jehová. Te bin ya skʼan ya jpastik swenta ya jtatik kamigotaktik jaʼ te joʼotiknix ya kakʼtik ta ilel te lekil amigootike (Mat. 7:12). Te Biblia ya yal te ya skʼan ya jlajin jbatik ta skoltayel te yantike, kʼaxtoxan ta stojol te machʼatik ayik ta wokole (Efes. 4:28). Jnop kaʼiytik ta stojol te ermanoetik ta kongregasion te ya skʼanik koltayele. ¿Aybal jtul publikador ma xjuʼ xlokʼ ta sna? Yaniwan xjuʼ jkoltaytik ta smanbeyel sbiluk. O yaniwan xjuʼ ya kakʼbeytik bin ya sweʼik jun familia te ayik ta wokol ta skaj te maʼyuk stakʼinike. ¿Yabal jnaʼtik stuuntesel te pajina jw.org^® sok te aplikasion JW Library^®? Teme yake, ya xjuʼ ya jkoltaytik te ermanoetik ta kongregasion ta yakʼbeyel yil te bintik ay tey-ae. Teme jaʼ ya xbajtʼ ta koʼtantik skoltayel te yantike, jaʼniwan ya yakʼbotik stseʼelil koʼtantik (Hech. 20:35).

¹⁵ Te kamigotaktik ya jtatike ya skoltayotik kʼalal ya xtal jwokoltik sok ya skoltayotik swenta ma xlaj te lamalkʼinal ya kaʼiytike. Jich bitʼil la spas te Eliú te la schʼambey yaʼiy skʼop te Job, te kamigotaktike ya schʼam yaʼiyik jkʼoptik kʼalal ya jcholbeytik yaʼiyik te bin ya jmel koʼtantik yuʼune (Job 32:4). Ta melel, mame jkuytik te jaʼ ya skʼan ya staik ta nopel te bin ya skʼan ya jpastike, pero ya kakʼtik ta ilel jpʼijiltik kʼalal ya jchʼam kaʼiytik te tojobtesel ya yakʼik te lokʼem ta Biblia (Prov. 15:22). Kʼalal ya xtuun kuʼuntik koltayel, jichukotik bitʼil te ajwalil David te maba la stoy sba, melel maba la spʼaj te koltayel akʼbot yuʼun te yamigotake (2 Sam. 17:27-29). Ta melel te amigoetik-abi, jaʼik jun majtʼanil te talem ta stojol Jehová (Sant. 1:17).

¿BIN YA SKʼAN YA JPASTIK SWENTA MA XLAJ TE LAMALKʼINAL YA KAʼIYTIKE?

16. Jich bitʼil ya yal Filipenses 4:6, 7, ¿bin-nax-utʼil ya xjuʼ ya jtatik lamalkʼinal? Cholbeya skʼoplal.

¹⁶ (Kʼopona Filipenses 4:6, 7). Te Jehová ya yalbotik te ya xjuʼ ya jtatik te lamalkʼinal ya yakʼ «ta scuenta te Cristo Jesús». Melel, swenta spisil-ora ay lamalkʼinal ta jpensartik sok ta koʼtantik, ya skʼan te kʼoemuk ta koʼtantik bin yaʼtel yichʼoj Jesús ta swenta te skʼanojel yoʼtan te Dios sok ya skʼan ay schʼuunel koʼtantik ta stojol. Jich bitʼil ya kichʼtik pasbeyel perdon te jmultik ta swenta te slajel te Jesuse ya yakʼ smukʼul koʼtantik (1 Juan 2:12). Snaʼel te jaʼ Ajwalil te Jesús yuʼun te Wentainel yuʼun Dios te ya xbajtʼ schajpan spisil te wokoliletik ya yakʼbotik te Satanás sok te balumilal yuʼune, ya yakʼ ay bin ya jmaliytik (Is. 65:17; 1 Juan 3:8; Apoc. 21:3, 4). Jaʼnix jich ya yakʼ yip koʼtantik snaʼel te sjokinejotik te Jesús ta spasel te tulan aʼtelil yakʼojbotik ta slajibal kʼajkʼal ini (Mat. 28:19, 20). ¿Mabal jichuk te jaʼ ya yakʼbotik lamalkʼinal te smukʼul koʼtantik, te ay bin ya jmaliytik sok te yip koʼtantike?

17. 1) ¿Bin ya xjuʼ ya spas jtul j-abat yuʼun Dios swenta ma xlaj te lamalkʼinal ya kaʼiytike? 2) Jich bitʼil ya yal Juan 16:33, ¿bin ya xjuʼ kuʼuntik spasel?

¹⁷ Jaʼ yuʼun, ¿bin ya skʼan ya jpastik swenta ma xlaj te lamalkʼinal ya kaʼiytik kʼalal ayotik ta tulan wokole? Jaʼ te ya jtʼunbeytik stalel te Jesuse. Sbabial, mame ayuk bin-ora ya jkom jbatik ta skʼoponel Dios. Schebal, jchʼuunbeytik smantal te Jehová sok jcholbeytik te skʼop sok sbujtsʼ koʼtantik manchukme ay jwokoltik. Yoxebal, mame jpʼajtik te koltayel ya yakʼbotik te kamigotaktike. Jich te lamalkʼinal yuʼun Dios ya skanantay te jpensartik sok te koʼtantike. Sok jich ya xjuʼ kuʼuntik sitintayel biluk wokolil, jich bitʼil la spas te Jesuse (kʼopona Juan 16:33).