11 »›Kʼalal chlik jujun ue, skʼan xavakʼbeik ta chikʼbil matanal Jeova chaʼkot chʼiom tot vakax, jkot tot chij, vukot chʼiom tot chij ti muʼyuk ip* xchiʼuk ti jun to jabil yichʼojike,+ 12 oxvokʼ ta lajunvokʼ jun efa arina ti lek nin ti kapbil ta aseite ti chkʼot ta matanal sat tsʼunobiletik ti jmoj chichʼ akʼel+ xchiʼuk li jujukot tot vakaxe, chaʼvokʼ ta lajunvokʼ jun efa arina ti lek nin ti kapbil ta aseite ti chkʼot ta matanal sat tsʼunobiletik ti jmoj chichʼ akʼel xchiʼuk li tot chije+ 13 xchiʼuk jvokʼ ta lajunvokʼ jun efa arina ti lek nin ti kapbil ta aseite ti chkʼot ta matanal sat tsʼunobiletik ti jmoj chichʼ akʼel xchiʼuk li jujukot chʼiom tot chije, jaʼ chkʼot ta chikʼbil matanal ti lek xmuet yikʼe,*+ jun chikʼbil matanal sventa Jeova.