15 Li vaʼ kʼakʼale, ta skotol li jteklumetik yuʼun jbenjaminetike la stsobik 26 mil soltaroetik ti lek chapal xchiʼuk s-espadaike, parte li vukub sien viniketik ta Guibea ti lek xtojobike. 16 Ta skotol li soltaroetik taje oy vukub sien viniketik ti lek xtojobik ti ta tsʼetkʼob* kʼusitik tspasike. Li viniketik taje lek xtojobik ta sjipel ton ta jimichʼ, yuʼun mu stselpʼuj yuʼunik akʼo mi jpʼej stsotsil jolil.