6 Ta tsʼakale, li j-ammonetike laj yakʼik venta ti muʼyuk xa lek ch-ilatik yuʼun li Davide, jaʼ yuʼun li Anun xchiʼuk j-ammonetike la stakik batel jmil talento* plata ta Mesopotamia,* ta Aram-Maaka xchiʼuk ta Soba+ sventa xchʼamunik karetaetik xchiʼuk jkajlejetik ta kaʼ. 7 Jaʼ yuʼun, la slokʼik 32 mil ta kot kareta, la stojik xtok li ajvalil Maaka xchiʼuk sviniktake. Jech tal skotolik, te la spas skarpanaik ta stukʼil Medeba.+ Li j-ammonetik eke la stsob sbaik lokʼel ta steklumalik sventa xbatik ta paskʼop.