-
Salmo 53:titulo-6Xchʼul Kʼop Dios sventa Achʼ Balumil
-
-
Sventa bankilal jtijson sventa maalat.* Maskil.* Salmo yuʼun David.
53 Xi chal ta yoʼonton li buchʼu bole:*
«Chʼabal Jeova».+
2 Pe ta vinajel to tskʼel talel xnichʼnab krixchanoetik li Diose+
sventa tskʼel mi oy buchʼu oy spʼijil, mi oy buchʼu yakal tsaʼ li Jeovae.+
3 Skotolik namajemik ta stojolal Dios;
skotolik koʼol noʼox tspasik li kʼusi toj chopole.
Mi junuk buchʼu maʼ ti oy kʼusi lek tspase,
batsʼi mi junuk.+
4 ¿Mi yuʼun ta melel mu xaʼibeik smelolal li jpaschoplejaletike?
Tslajesik li jteklumal kʼuchaʼal tslajesik veʼlile.
Muʼyuk tskʼanbeik vokol li Jeovae.+
5 Pe ta xbat xchʼulelik ta xiʼel,
jun xiʼel ti muʼyuk bu jech xaʼiik-oe,*
yuʼun te jiʼil ch-iktabat sbakilik yuʼun Dios li buchʼutik tstsakot ta kʼope.*
Chavakʼanan ta kʼexlal, yuʼun pʼajbilik yuʼun li Jeovae.
6 ¡Ati teuk xlik tal skoltaobba Israel li ta Sione!+
Kʼalal tstsob sutel steklumal li Jeova ti chukbilik batele,
akʼo muyubajuk li Jakobe, kuxetuk yoʼonton li Israele.
-