5 Ta tsʼakal une, laj yikta komel Beer-Seba li Jakobe. Vaʼun, li xnichʼnabtak Israele la xkuchik batel ta kareta li stotike, li Jakobe. Jaʼ li karetaetik stakoj batel faraone. La xkuchik batel xtok li yalab xnichʼnabike xchiʼuk li yajnilike. 6 Laj yikʼik batel skotol li xchonbolomike xchiʼuk skotol li kʼusitik te la stsob sba yuʼunik ta yosilal Kanaane. Jaʼ jech och ta Ejipto Jakob xchiʼuk skotol li yutsʼ yalale. 7 Laj yikʼ batel ta Ejipto li skeremtake, li stsebetake xchiʼuk li smamobtake, skotol li yutsʼ yalale.